ბრძანება N 2410

N 2410

06 თებერვალი 2026

ბ რ ძ ა ნ ე ბ ა

 

ი/მ ----- (ს/ნ ----- ) (მის.: -----

2026 წლის 8 იანვრის საჩივრის

ნაწილობრივ დაკმაყოფილების თაობაზე.

 

შემოსავლების სამსახურმა დავების განხილვის საბჭოს 2026 წლის 4 თებერვლის სხდომაზე (ოქმი N 10) განიხილა ი/მ ----- (ს/ნ ----- ) 2026 წლის 8 იანვრის N 99788/1/2026 საჩივარი, შემოსავლების სამსახურის აუდიტის დეპარტამენტის 2025 წლის 5 დეკემბრის N 081-316 საგადასახადო მოთხოვნასთან დაკავშირებით.

 

სადავო საკითხი:

გადასახადის გადამხდელი ითხოვს მომწოდებლებისგან მიღებული საგადასახადო ანგარიშ - ფაქტურების საფუძველზე დღგ-ის ჩათვლას.

 

ფაქტობრივი გარემოებები:

საქმის მასალებით დგინდება, რომ შემოსავლების სამსახურის აუდიტის დეპარტამენტის 2025 წლის 19 ნოემბრის N 25410 ბრძანების საფუძველზე განხორციელდა ი/მ ----- (ს/ნ ----- ) საქმიანობის ხელახალი კამერალური საგადასახადო შემოწმება 2022 წლის 30 მაისიდან 2025 წლის პირველ იანვრამდე საანგარიშო პერიოდებში დღგ-ის გადამხდელად სავალდებულო რეგისტრაციის სისწორის დადგენის მიზნით. საგადასახადო შემოწმების შედეგებზე 2025 წლის პირველ დეკემბერს შედგა საგადასახადო შემოწმების აქტი, გამოიცა 2025 წლის 5 დეკემბრის №26785 ბრძანება და ამავე თარიღის N 081-316 საგადასახადო მოთხოვნა, რომლის საფუძველზე გადასახადის გადამხდელს დამატებით გადასახდელად განესაზღვრა სულ 18 941 ლარი, მათ შორის გადასახადი 9 824 ლარი, ჯარიმა 5 483 ლარი და საურავი 3 633 ლარი.

 

სადავო საკითხთან დაკავშირებით, საგადასახადო შემოწმების აქტის მიხედვით განხორციელებული დარიცხვა განპირობებულია შემდეგი გარემოებით:

შემოწმების შედეგად გაანალიზდა გადასახადის გადამხდელის დღგ-ით დასაბეგრი ოპერაციები, რომელთა დაკავშირებითაც გადასახადის გადამხდელს შესამოწმებელ პერიოდში საგადასახადო ვალდებულებები არ აქვს შესრულებული. გადამხდელის მიერ საგადასახადო შემოწმების მიმდინარეობისას არ იყო წარმოდგენილი კომერციული ბანკებიდან ინფორმაცია საბანკო ანგარიშებიდან ამონაწერების შესახებ. შემოწმების სრულყოფილად ჩატარების მიზნით, ----- საქალაქო სასამართლოს შუამდგომლობით გამოთხოვილ იქნა კომერციული ბანკებისგან ინფორმაცია, რომელთა შესწავლის შედეგად გაირკვა, რომ მეწარმეს უფიქსირდება სხვა დამატებითი ისეთი სახის შემოსავლები, რომლებიც წარმოადგენენ ეკონომიკური საქმიანობის განხორციელების შედეგად მიღებულ შემოსავლებს და ექვემდებარება დღგ-ით დაბეგვრას. საგადასახადო შემოწმების შედეგების განსაზღვრის მიზნით დამატებით დამუშავებული და შესწავლილი იქნა სასამართლოს შუამდგომლობით გამოთხოვილი საბანკო ამონაწერები და შემოსავლების სამსახურის გადასახადების ადმინისტრირების საინფორმაციო სისტემაში არსებული ინფორმაცია (წარდგენილი დეკლარაციები, ტერმინალი, საკონტროლო - სალარო აპარატის რეპორტები და სხვა), რომელთა დამუშავებისა და შესწავლის შედეგად დადგინდა, რომ მეწარმის დღგ-ის გადამხდელად სავალდებულო რეგისტრაცის თარიღად უნდა განსაზღვრულიყო 2022 წლის 20 ნოემბერი, ნაცვლად 2024 წლის 5 აგვისტოსა, რადგან დამატებით საბანკო ამონაწერების დამუშავებით დგინდება, რომ 01.01.2022 - 20.11.2022 საანგარიშო პერიოდში მიღებული შემოსავალი აჭარბებდა 100 000 ლარს. შემოწმების მიერ განისაზღვრა დღგ-ის გადამხდელად სავალდებულო რეგისტრაციის საანგარიშო თვიდან შესამოწმებელი პერიოდის ბოლომდე თითოეული საანგარიშო თვის დღგ-ით დასაბეგრი ოპერაციის თანხები (წინა შემოწმების შედეგების გამოკლებით), რის საფუძველზეც, საქართველოს საგადასახადო კოდექსის 159-ე და 163-ე მუხლების შესაბამისად, გადასახადის გადამხდელს დაერიცხა დღგ.

ამასთან, პირს შემოწმების შემდეგ მიღებული აქვს საგადასახადო ანგარიშ - ფაქტურები, რომლებიც არ არის ჩათვლაში ასახული. შემოწმების მიერ, დღგ-ის რეგისტრაციიის მომენტიდან შესამოწმებელი პერიოდის ბოლომდე, იმ საგადასახადო ანგარიშ - ფაქტურებზე, რომლებზეც ჩათვლა წინა შემოწმების ფარგლებში არ იყო გათვალისწინებული, საქართველოს საგადასახადო კოდექსის 174-ე და 175-ე მუხლების საფუძველზე, დაექვემდებარა დამატებით ჩათვლაში ასახვას, რის შედეგადაც შემცირდა დღგ 9 916 ლარით. პირს ასევე დაერიცხა ჯარიმა საქართველოს საგადასახადო კოდექსის 282-ე მუხლის შესაბამისად.

 

შემოსავლების სამსახურმა განიხილა წარმოდგენილი საჩივარი და მიიჩნია, რომ გადასახადის გადამხდელის მოთხოვნა უნდა დაკმაყოფილდეს ნაწილობრივ შემდეგ გარემოებათა გამო:

საქართველოს საგადასახადო კოდექსის 302-ე მუხლის მე-2 ნაწილის მიხედვით, დავის განმხილველი ორგანო საჩივარს განიხილავს მხოლოდ მომჩივნის მოთხოვნის ფარგლებში. ამავე მუხლის მე-6 ნაწილის მიხედვით, დავის განმხილველ ორგანოებს უფლება აქვთ, საჩივარი განიხილონ დისტანციურად, ტექნიკურ საშუალებათა გამოყენებით. მათ ასევე უფლება აქვთ, საჩივარი განიხილონ მომჩივნის დაუსწრებლად, თუ საქმეში არსებული მასალებიდან სრულად დგინდება დავის საგანთან დაკავშირებული ფაქტობრივი გარემოებები.

 

სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 174-ე მუხლის პირველ ნაწილზე, რომლის თანახმად, დღგ-ის ჩათვლა არის დასაბეგრი პირის უფლება, შეიმციროს გადასახდელი დღგ-ის თანხა საქონლის მიწოდებასთან/მომსახურების გაწევასთან დაკავშირებული ხარჯის სხვადასხვა კომპონენტის ღირებულებაზე პირდაპირ მიკუთვნებული დღგ-ის თანხით.

ამავე მუხლის მე-2 ნაწილის თანახმად, დღგ-ის ჩათვლის უფლება წარმოიშობა ჩასათვლელი დღგის თანხის დარიცხვის ვალდებულების წარმოშობის (შესაბამისი ოპერაციის დღგ-ით დაბეგვრის) მომენტიდან. ამავე მუხლის მე-3 ნაწილის თანახმად, დღგ-ის ჩათვლის უფლება აქვს მხოლოდ დღგ-ის გადამხდელად რეგისტრირებულ დასაბეგრ პირს.

საქართველოს საგადასახადო კოდექსის 175-ე მუხლის პირველი ნაწილის „ა“ ქვეპუნქტის თანახმად, თუ საქონელი/მომსახურება გამიზნულია ან გამოიყენება დღგ-ით დასაბეგრი ოპერაციის განხორციელებისთვის, დასაბეგრ პირს უფლება აქვს ჩაითვალოს საქართველოს ტერიტორიაზე სხვა დასაბეგრი პირისგან ამ საქონლის/მომსახურების შეძენისთვის გადახდილი/გადასახდელი დღგ.

საქართველოს საგადასახადო კოდექსის 176-ე მუხლის პირველი ნაწილის „ა“ და „ბ“ ქვეპუნქტების თანახმად, დღგ-ის ჩათვლის მიღების საფუძველია:

ა) ამ კოდექსის 175-ე მუხლის პირველი ნაწილის „ა“ და „ბ“ ქვეპუნქტებითა და მე-2 ნაწილით გათვალისწინებულ შემთხვევებში − საქონლის/მომსახურების შეძენასთან დაკავშირებით ამ კოდექსით დადგენილი წესით გამოწერილი საგადასახადო ანგარიშ - ფაქტურა;

ბ) ამ კოდექსის 175-ე მუხლის პირველი ნაწილის „გ“ ქვეპუნქტით გათვალისწინებულ შემთხვევაში − საქონლის იმპორტთან დაკავშირებით, იმპორტის დეკლარაცია.

,,გადასახადების ადმინისტრირების შესახებ“ საქართველოს ფინანსთა მინისტრის 2010 წლის 31 დეკემბრის N 996 ბრძანებით დამტკიცებული ინსტრუქციის 72-ე მუხლის პირველი ნაწილის თანახმად, თუ საქონელი/მომსახურება გამიზნულია ან გამოიყენება დღგ-ით დასაბეგრი ოპერაციის განხორციელებისთვის, გარდა ჩათვლის უფლების გარეშე გათავისუფლებული დასაბეგრი ოპერაციებისა, დასაბეგრ პირს უფლება აქვს ჩაითვალოს:

ა) საქართველოს ტერიტორიაზე სხვა დასაბეგრი პირისგან ამ საქონლის/მომსახურების შეძენისთვის გადახდილი/გადასახდელი დღგ;

ბ) ანაზღაურების სანაცვლოდ საქონლის მიწოდებად ან მომსახურების გაწევად, განხილულ ოპერაციებთან დაკავშირებით გადასახდელი დღგ;

გ) საქონლის იმპორტისას გადახდილი/გადასახდელი დღგ;

ხოლო, მე-3 ნაწილის ,,ა“ და ,,ბ“ ქვეპუნქტების თანახმად, დასაბეგრ პირს უფლება არ აქვს ჩაითვალოს:

ა) დღგ, თუ იგი არ არის რეგისტრირებული დღგ-ის გადამხდელად;

ბ) იმ საქონელზე/მომსახურებაზე (გარდა ძირითადი საშუალებებისა) გაწეული ხარჯის ღირებულებაზე მიკუთვნებული დღგ-ის თანხა, რომელიც დასაბეგრი პირის მიერ დღგ-ის გადამხდელად რეგისტრაციამდე პერიოდში გამოყენებულია დასაბეგრ ოპერაციებში.

საქართველოს საგადასახადო კოდექსის 180-ე მუხლის პირველი ნაწილის თანახმად, თუ ამ კოდექსით სხვა რამ არის დადგენილი, დღგ-ის გადამხდელად რეგისტრირებული დასაბეგრი პირის მიერ სხვა დასაბეგრი პირისთვის საქონლის მიწოდების ან მომსახურების გაწევის შემთხვევაში, გამოიწერება საგადასახადო ანგარიშ - ფაქტურა.

შემოსავლების სამსახური ყურადღებას ამახვილებს გადასახადის გადამხდელის მიერ წარმოდგენილ საჩივარში მითითებულ არგუმენტაციაზე, რომ შემოწმების აქტის თანახმად, შემოწმების მიერ ჩათვლას დაექვემდებარა 9 916 ლარის ოდენობით დღგ. ამასთან, აღნიშნავს, რომ საჩივარზე წარმოადგენს შესამოწმებელ პერიოდზე მიღებული საგადასახადო ანგარიშ - ფაქტურების რეესტრს, რომლითაც ჩასათვლელი დღგ-ის თანხა შეადგენს 24 333,35 ლარს. შედეგად, ითხოვს შემოწმების შედეგად დარიცხული თანხებისა და შესაბამისი სანქციის კორექტირებას.

საქართველოს ზოგადი ადმინისტრაციული კოდექსის 96–ე მუხლზე, რომლის თანახმად, ადმინისტრაციული ორგანო ვალდებულია ადმინისტრაციული წარმოებისას გამოიკვლიოს საქმისათვის ყველა მნიშვნელოვანი გარემოება და გადაწყვეტილება მიიღოს ამ გარემოებათა შეფასებისა და ურთიერთშეჯერების საფუძველზე.

ყოველივე ზემოაღნიშნულის გათვალისწინებით, სადავო საკითხთან დაკავშირებით, შემოსავლების სამსახურმა მიიჩნია, რომ დღგ-ს ჩასათვლელი თანხების დაზუსტების მიზნით, გადასახადის გადამხდელს უნდა მიეცეს წინადადება ამ ბრძანების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს დღგ-ის ჩათვლის უფლების დამადასტურებელი მტკიცებულებები. ხოლო თავის მხრივ უნდა დაევალოს აუდიტის დეპარტამენტს, შეისწავლოს წარდგენილი მტკიცებულებები (მათ შორის, საჩივარზე თანდართული) და დღგ-ის ჩათვლის მიღებასთან დაკავშირებით კანონმდებლობით დადგენილი შეზღუდვების გათვალისწინებით, უზრუნველყოს საგადასახადო ვალდებულებების კორექტირება (შემცირება).

 

საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ:

 

1. ი/მ ----- (ს/ნ ----- ) საჩივარი დაკმაყოფილდეს ნაწილობრივ;

2. სადავო საკითხთან დაკავშირებით, დღგ-ის ჩასათვლელი თანხის დაზუსტების მიზნით:

ა) გადასახადის გადამხდელს მიეცეს წინადადება ამ ბრძანების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს დღგ-ის ჩათვლის უფლების დამადასტურებელი მტკიცებულებები;

ბ) დაევალოს აუდიტის დეპარტამენტს, შეისწავლოს წარდგენილი მტკიცებულებები (მათ შორის, საჩივარზე თანდართული) და დღგ-ის ჩათვლის მიღებასთან დაკავშირებით კანონმდებლობით დადგენილი შეზღუდვების გათვალისწინებით, უზრუნველყოს საგადასახადო ვალდებულებების კორექტირება (შემცირება);

3. დანარჩენ ნაწილში საჩივარი არ დაკმაყოფილდეს;

4. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. N 16) ან სასამართლოში (მის.: ქ. ქუთაისი, ვიქტორ კუპრაძის ქ. N 11), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.

 

სადავო საკითხი:

გადასახადის გადამხდელი ითხოვს მომწოდებლებისგან მიღებული საგადასახადო ანგარიშფ - აქტურების საფუძველზე დღგ-ის ჩათვლას.

 

ფაქტობრივი გარემოებები:

დადგენილია, რომ ჩატარდა ინდივიდუალური მეწარმის საქმიანობის ხელახალი კამერალური საგადასახადო შემოწმება დღგ-ის სავალდებულო რეგისტრაციის სისწორის დადგენის მიზნით, რის შედეგადაც შედგა შემოწმების აქტი, გამოიცა საგადასახადო მოთხოვნა და განისაზღვრა დამატებითი საგადასახადო ვალდებულებები.

 

გადაწყვეტილება:

გადასახადის გადამხდელს ეძლევა ვადა დღგ-ის ჩათვლის დამადასტურებელი მტკიცებულებების წარსადგენად, რის შემდეგაც აუდიტის დეპარტამენტმა უნდა შეისწავლოს მასალები და კანონმდებლობის შესაბამისად შეამციროს საგადასახადო ვალდებულებები. აღნიშნული საჩივარი დაკმაყოფილდეს ნაწილობრივ;

 

დასაბუთება:

შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: მუხლი 163;175; 282;.