გადაწყვეტილება №26146/2/2025

N 26146/2/2025

10 დეკემბერი 2025

გ ა დ ა წ ყ ვ ე ტ ი ლ ე ბ ა

 

მომჩივანი: ----- (ს/ნ -----)

მოპასუხე: აუდიტის დეპარტამენტი.

 

საქართველოს ფინანსთა სამინისტროსთან არსებულმა დავების განხილვის საბჭომ 27.11.2025 წელს განიხილა და მიიღო გადაწყვეტილება შპს ----- 09.11.2025 წელს რეგისტრირებულ საჩივარზე (რეგისტრაციის N 26146/2/2025).

 

დავის საგანი: საგადასახადო ანგარიშ - ფაქტურების/სასაქონლო ზედნადებების და საბაჟო დეკლარაციების შესაბამისი პერიოდების დღგ-ის დეკლარაციებში ასახვის სისწორე.

 

გასაჩივრებული გადაწყვეტილება:

1. აუდიტის დეპარტამენტის 27.08.2025 წლის N 001-196 მოთხოვნა;

2. შემოსავლების სამსახურის 21.10.2025 წლის N 22858 ბრძანება.

 

დარიცხული თანხა:

150 006.1 ლარი.

მათ შორის:

დღგ - 92 387.32 ლარი;

ჯარიმა - 46 193.70 ლარი;

საურავი - 11 425.08 ლარი;.

 

ფაქტების აღწერა/დარიცხვის საფუძვლები:

გადასახადის გადამხდელის საქმიანობის საგანს წარმოადგენს სამშენებლო - სამონტაჟო მომსახურების გაწევა.

აუდიტის დეპარტამენტის 23.07.2025 წლის N 16535 ბრძანების საფუძველზე ჩატარდა მომჩივნის საქმიანობის გასვლითი საგადასახადო შემოწმება. შემოწმდა 01.09.2024 - 01.02.2025 წლების საანგარიშო პერიოდების ელექტრონულად გამოწერილი საგადასახადო ანგარიშ - ფაქტურების/სასაქონლო ზედნადებების, მიღებული საგადასახადო ანგარიშ - ფაქტურებისა და საბაჟო დეკლარაციების 2024 წლის სექტემბრის, ოქტომბრის, ნოემბრის, დეკემბრისა და 2025 წლის იანვრის საანგარიშო პერიოდების დღგ-ის დეკლარაციებში ასახვის სისწორე. შემოწმების შედეგები აისახა 26.08.2025 წლის საგადასახადო შემოწმების აქტში, საიდანაც ირკვევა, რომ სადავო დარიცხვა გამოწვეულია შემდეგი გარემოებებით:

ერთიანი ელექტრონული ბაზების და პირველადი დოკუმენტაციის ანალიზის შედეგად დადგინდა, რომ შესამოწმებელ პერიოდში მომჩივნის მიერ გამოწერილია ანგარიშ - ფაქტურები თანხით 605 650, რომელიც გადასახადის გადამხდელის მიერ არ არის დეკლარირებული და დაბეგრილი. შემოწმების შედეგად გამოვლენილმა დასაბეგრმა ბრუნვამ დამატებით შეადგინა 513 263 ლარი, რაზეც გადასახადის გადამხდელს დაერიცხა დღგ და შეეფარდა საგადასახადო კოდექსის 275-ე მუხლით გათვალისწინებული ჯარიმა.

შემოწმების აქტის საფუძველზეც გამოიცა 27.08.2025 წლის N 19068 ბრძანება და ამავე თარიღის N 001- 196 საგადასახადო მოთხოვნა, რაც გასაჩივრდა შემოსავლების სამსახურში, რომლის 21.10.2025 წლის N 22858 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი:

შემოსავლების სამსახურმა იხელმძღვანელა საგადასახადო კოდექსის 302-ე მუხლის მე-6 ნაწილით, 136-ე მუხლის მე-3 ნაწილით, 159-ე მუხლის პირველი ნაწილის „ბ“ ქვეპუნქტით, 163-ე მუხლის პირველი და მე-2 ნაწილებით, 164-ე მუხლის პირველი ნაწილით, 168-ე მუხლის პირველი ნაწილით, 43-ე მუხლის მე-4 ნაწილით და განმარტა, რომ აუდიტის დეპარტამენტის მიერ საგადასახადო ვალდებულებები განსაზღვრულია საგადასახადო კანონმდებლობის შესაბამისად, გადასახადის გადამხდელის საჩივარი დაუსაბუთებელია და არ არსებობს მისი დაკმაყოფილების სამართლებრივი საფუძველი.

 

მომჩივნის არგუმენტაცია:

კომპანიას გაუჭიანურდა კვალიფიციური დღგ-ის გადამხდელის სტატუსის მიღება და 2024 წელს ბიუჯეტში გადახდებს ახორციელებდა სავარაუდო სავადო გადახდებით. შემოწმებით არ იქნა აღნიშნული გათვალისწინებული. შემოწმების პერიოდისთვის სულ გადახდილია 30 108 ლარი. კვალიფიციური დღგ-ის გადამხდელის სტატუსის მიღებიდან დღემდე კომპანია სრულად ადეკლარირებს და იხდის გადასახადებს. ითხოვს დარიცხული თანხის და სანქციის/საურავების გაუქმებას/გადაანგარიშებას.

 

დავების განხილვის საბჭო:

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:

საგადასახადო კოდექსის 43-ე მუხლის პირველი ნაწილის „ა“ ქვეპუნქტისა და მე-4 ნაწილის შესაბამისად, გადასახადის გადამხდელი ვალდებულია შეასრულოს საგადასახადო ვალდებულებები საქართველოს საგადასახადო კანონმდებლობით დადგენილი წესითა და პირობებით. საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.

საგადასახადო კოდექსის 136-ე მუხლის მე-3 ნაწილის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.

საგადასახადო კოდექსის 158-ე მუხლის პირველი ნაწილის მიხედვით, დღგ-ით დასაბეგრ პირად (შემდგომ − დასაბეგრი პირი) განიხილება ნებისმიერი პირი, რომელიც ნებისმიერ ადგილზე დამოუკიდებლად ახორციელებს ნებისმიერი სახის ეკონომიკურ საქმიანობას, მიუხედავად ამ საქმიანობის მიზნისა და შედეგისა.

საგადასახადო კოდექსის 159-ე მუხლის პირველი ნაწილის „ა“ და „ბ“ ქვეპუნქტების თანახმად, დღგით დასაბეგრი ოპერაციებია, დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ საქონლის მიწოდება/მომსახურების გაწევა

საგადასახადო კოდექსის 163-ე მუხლის პირველი და მე-2 ნაწილების შესაბამისად, საქონლის მიწოდების/მომსახურების გაწევის დღგ-ით დაბეგვრა ხორციელდება საქონლის მიწოდების/მომსახურების გაწევის მომენტში, თუ ამ მუხლით სხვა რამ არ არის გათვალისწინებული. თუ თანხა სრულად ან ნაწილობრივ ანაზღაურებულია საქონლის მიწოდებამდე/მომსახურების გაწევამდე, ანაზღაურებული თანხის შესაბამისი დღგ-ის გადახდა ხორციელდება ანაზღაურების თანხის გადახდის საანგარიშო პერიოდის მიხედვით, გარდა ამ მუხლის მე-5 და მე-9 ნაწილებით გათვალისწინებული შემთხვევებისა.

საგადასახადო კოდექსის 164-ე მუხლის პირველი ნაწილის მიხედვით, თუ ამ მუხლით სხვა რამ არ არის გათვალისწინებული, დღგ-ით დასაბეგრი თანხა არის საქონლის მიწოდების/მომსახურების გაწევის სანაცვლოდ მიღებული/მისაღები ანაზღაურება დღგ-ის გარეშე, საქონლის/მომსახურების ფასთან პირდაპირ დაკავშირებული სუბსიდიის ჩათვლით. აღნიშნული დებულება გამოიყენება საქონლის/მომსახურების გაცვლის ოპერაციის (ბარტერული ოპერაციის) შემთხვევაშიც.

საგადასახადო კოდექსის 168-ე მუხლის პირველი ნაწილის შესაბამისად, დღგ-ის გადამხდელად რეგისტრირებული დასაბეგრი პირი ვალდებულია საგადასახადო ორგანოს წარუდგინოს დღგ-ის დეკლარაცია არაუგვიანეს საანგარიშო პერიოდის მომდევნო თვის 15 რიცხვისა და ამავე ვადაში გადაიხადოს გადასახადი.

მომჩივნის განმარტებით, კომპანიას გაუჭიანურდა კვალიფიციური დღგ-ის გადამხდელის სტატუსის მიღება და 2024 წელს ბიუჯეტში გადახდებს ახორციელებდა სავარაუდო სავადო გადახდებით. შემოწმებით არ იქნა აღნიშნული გათვალისწინებული. შემოწმების პერიოდისთვის სულ გადახდილია 30 108 ლარი. კვალიფიციური დღგ-ის გადამხდელის სტატუსის მიღებიდან დღემდე კომპანია სრულად ადეკლარირებს და იხდის გადასახადებს.

საქმეში წარმოდგენილია აუდიტის დეპარტამენტის 12.11.2025 წლის N ----- წერილი, საიდანაც სადავო საკითხზე მითითებულია შემდეგი:

შესამოწმებელ პერიოდში გადასახადის გადამხდელის მიერ გამოწერილია ანგარიშ - ფაქტურები თანხით 605 650, რომელიც გადასახადის გადამხდელის მიერ არ არის დეკლარირებული და დაბეგრილი. შემოწმების შედეგად გადასახადის გადამხდელის მიერ მიღებული შემოსავალი დაექვემდებარა დღგ-ით დაბეგვრას. შედეგად, შემოწმებით დამატებით დასაბეგრმა ბრუნვამ შეადგინა 513 263 ლარი, რაზეც გადასახადის გადამხდელს დაერიცხა გადასახადი და დაეკისრა ჯარიმა საგადასახადო კოდექსის 275-ე მუხლის საფუძველზე.

საბჭოს სხდომაზე მოპასუხე ორგანოს წარმომადგენელმა დაადასტურა, რომ გადასახადის გადამხდელის მიერ ბიუჯეტის წინაშე ვალდებულებები არ იყო შესრულებული. არც კვალიფიციური დღგ-ის გადამხდელის სტატუსის მინიჭების შემდგომ არ არის დაზუსტებული დეკლარაციები.

ზემოხსენებული სამართლებრივი ნორმების და იმის გათვალისწინებით, რომ მომჩივანი არ წარმოადგენს რაიმე არგუმენტს/მტკიცებულებას, რომელიც შეცვლიდა საგადასახადო შემოწმებით დადგენილ ფაქტობრივ გარემოებებს, საბჭო მიიჩნევს, რომ არ არსებობს სადავო საკითხზე შემოსავლების სამსახურის მიერ მიღებული გადაწყვეტილების გაუქმების და საჩივრის დაკმაყოფილების საფუძველი.

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:

 

1. საჩივარი არ დაკმაყოფილდეს;

2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი N 64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხი:

საგადასახადო ანგარიშ - ფაქტურების/სასაქონლო ზედნადებების და საბაჟო დეკლარაციების შესაბამისი პერიოდების დღგ-ის დეკლარაციებში ასახვის სისწორე.

 

ფაქტობრივი გარემოებები:

გადასახადის გადამხდელის საქმიანობაა სამშენებლო-სამონტაჟო მომსახურების გაწევა. ერთიანი ელექტრონული ბაზების და პირველადი დოკუმენტაციის ანალიზის შედეგად დადგინდა, რომ შესამოწმებელ პერიოდში მომჩივნის მიერ გამოწერილია ანგარიშ - ფაქტურები თანხით 605 650, რომელიც გადასახადის გადამხდელის მიერ არ არის დეკლარირებული და დაბეგრილი. შემოწმების შედეგად გამოვლენილმა დასაბეგრმა ბრუნვამ დამატებით შეადგინა 513 263 ლარი, რაზეც გადასახადის გადამხდელს დაერიცხა დღგ და შეეფარდა საგადასახადო კოდექსის 275-ე მუხლით გათვალისწინებული ჯარიმა. შემოწმების აქტის საფუძველზეც გამოიცა ბრძანება და ამავე თარიღის საგადასახადო მოთხოვნა, რაც გასაჩივრდა შემოსავლების სამსახურში, რომლის ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

გადაწყვეტილება:

საბჭოს სხდომაზე მოპასუხე ორგანოს წარმომადგენელმა დაადასტურა, რომ გადასახადის გადამხდელის მიერ ბიუჯეტის წინაშე ვალდებულებები არ იყო შესრულებული. არც კვალიფიციური დღგ-ის გადამხდელის სტატუსის მინიჭების შემდგომ არ არის დაზუსტებული დეკლარაციები. ზემოხსენებული სამართლებრივი ნორმების და იმის გათვალისწინებით, რომ მომჩივანი არ წარმოადგენს რაიმე არგუმენტს/მტკიცებულებას, რომელიც შეცვლიდა საგადასახადო შემოწმებით დადგენილ ფაქტობრივ გარემოებებს, საბჭო მიიჩნევს, რომ არ არსებობს სადავო საკითხზე შემოსავლების სამსახურის მიერ მიღებული გადაწყვეტილების გაუქმების და საჩივრის დაკმაყოფილების საფუძველი.

 

დასაბუთება:

საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: მუხლი 164; 158; 159;.