ბრძანება N 8710

N 8710

20 აპრილი 2026

ბ რ ძ ა ნ ე ბ ა

 

ფ/პ ------- (პ/ნ -------)

(მის.: -------, -------)

2026 წლის 26 მარტის საჩივრების

დაკმაყოფილებაზე უარის თქმის თაობაზე

 

შემოსავლების სამსახურმა დავების განხილვის საბჭოს 2026 წლის 3 აპრილის სხდომაზე (ოქმი №30) განიხილა ფ/პ ------- (პ/ნ -------) №101487/1/2026 და №49705/21 საჩივრები, რომლითაც გადასახადის გადამხდელი არ ეთანხმება შემოსავლების სამსახურის ვალის მართვის დეპარტამენტის 2025 წლის 3 დეკემბრის №------- საგადასახადო სამართალდარღვევის ოქმს.

 

გადასახადის გადამხდელის პოზიცია:

გადასახადის გადამხდელი წარმოდგენილ საჩივრებში განმარტავს, რომ ვალის მართვის დეპარტამენტმა არასწორად დააკისრა ჯარიმა და ასევე, სრულიად უსაფუძვლოდ გამოუქვეყნეს სადავო საგადასახადო სამართალდარღვევის ოქმი საჯაროდ. მომჩივანი კომპანია შპს ,,-------”-ში მუშაობდა დარაჯად პანდემიამდე პერიოდში, 2020 წლამდე. შემდეგ პანდემიის გამო შეჩერდა მუშაობა და წამოვიდა სამსახურიდან. მისთვის უცნობი იყო იმ პასუხისმგებლობის შესახებ, რომელიც ხელის მოწერით დაეკისრა.

მომჩივანი მიუთითებს, რომ ქონება, რომელსაც ედავება საგადასახადო ორგანო, 2024 წელს თბილისის სააღსრულებო ბიუროს მიერ აღრიცხულია და ჩაბარებული აქვს სხვა პირს. კერძოდ, ------- (პ/ნ -------). 2026 წლის 23 მარტს დავალიანების შესახებ დაუკავშირდნენ შემოსავლების სამსახურიდან და ჩააყენეს საქმის კურსში, რაც ადასტურებს, რომ მისი საკონტაქტო ინფორმაცია გააჩნდათ. ამდენად, აღნიშნული სატრანსპორტო საშუალება არსებობს, ჩაბარებული აქვს სხვა პირს და აღრიცხვაზეა აღსრულების ეროვნულ ბიუროში.

ზემოაღნიშნულის გათვალისწინებით, გადამხდელი ითხოვს სადავო საგადასახადო სამართალდარღვევის ოქმით შეფარდებული სანქციისგან გათავისუფლებას.

 

ფაქტობრივი გარემოებები:

შემოსავლების სამსახურის გადასახადების ადმინისტრირების საინფორმაციო სისტემის მონაცემების მიხედვით, საქართველოს საგადასახადო კოდექსის 241-ე მუხლის საფუძველზე, ადმინისტრირების დეპარტამენტის მიერ შპს ,,-------”-ის (ს/ნ -------) მიმართ გამოცემულ იქნა ქონებაზე ყადაღის დადების შესახებ 2017 წლის 23 თებერვლის №011-619 ბრძანება. ასევე, შედგენილ იქნა ქონებაზე ყადაღის დადების შესახებ 2018 წლის 13 აპრილის აქტი, რომლის საფუძველზეც დაყადაღებას დაექვემდებარა შპს „-------”-ის (ს/ნ -------) საკუთრებაში არსებული ავტომანქანა ------- ცისტერნა ლურჯი 1990 წ. სახ. ნომერი -------, რომელიც შესანახად ჩაბარდა ფ/პ ------- (პ/ნ -------).

ვალის მართვის დეპარტამენტის მე-4 სამმართველოს მიერ მოწოდებული ინფორმაციის თანახმად, ფ/პ ------- (პ/ნ -------) ვერ უზრუნველყო ყადაღადადებული ქონების (------- ცისტერნა ლურჯი 1990 წ. სახ. ნომერი -------) წარმოდგენა

ზემოაღნიშნულიდან გამომდინარე, 2025 წლის 3 დეკემბერს ვალის მართვის დეპარტამენტის მიერ შედგენილ იქნა N------- საგადასახადო სამართალდარღვევის ოქმი და ფ/პ ------- (პ/ნ -------) საქართველოს საგადასახადო კოდექსის 278-ე მუხლის თანახმად, დაეკისრა ჯარიმა 4000 ლარის ოდენობით.

აღნიშნული საგადასახადო სამართალდარღვევის ოქმი მომჩივანს გაეგზავნა გადასახადის გადამხდელის ავტორიზებულ გვერდზე, რომელსაც გაეცნო ელექტრონულად 2026 წლის 23 მარტს. ოქმი ასევე გამოქვეყნებულ იქნა საჯაროდ 2026 წლის 17 თებერვალს.

 

შემოსავლების სამსახურმა განიხილა წარმოდგენილი საჩივრები და მიიჩნია, რომ გადასახადის გადამხდელის მოთხოვნა არ უნდა დაკმაყოფილდეს შემდეგ გარემოებათა გამო:

საქართველოს საგადასახადო კოდექსის 302-ე მუხლის მე-6 ნაწილის თანახმად, დავის განმხილველ ორგანოებს უფლება აქვთ, საჩივარი განიხილონ დისტანციურად, ტექნიკურ საშუალებათა გამოყენებით. მათ ასევე უფლება აქვთ, საჩივარი განიხილონ მომჩივნის დაუსწრებლად, თუ საქმეში არსებული მასალებიდან სრულად დგინდება დავის საგანთან დაკავშირებული ფაქტობრივი გარემოებები.

შემოსავლების სამსახური მიუთითებს საქართველოს საგადასახადო კოდექსის 241-ე მუხლის პირველ ნაწილზე, რომლის თანახმად, საგადასახადო ორგანოს უფლება აქვს, სასამართლოს გადაწყვეტილების გარეშე დაადოს ყადაღა პირის საკუთრებაში არსებულ ან/და მის ბალანსზე რიცხულ (გარდა ლიზინგით მიღებული ქონებისა) ნებისმიერ ქონებას, აღიარებული საგადასახადო დავალიანების გადახდევინების უზრუნველყოფის მოცულობის ფარგლებში. ქონებაზე ყადაღის დადების შესახებ საგადასახადო ორგანოს უფლებამოსილი პირი გამოსცემს ინდივიდუალურ ადმინისტრაციულსამართლებრივ აქტს.

ამავე მუხლის მე-2 ნაწილის მიხედვით, ამ კოდექსის მიზნებისათვის ქონებაზე ყადაღის დადება არის პირის ქონების აღწერა ამ ქონების განკარგვის (პირის მიერ ქონების ნებისმიერი ფორმით გასხვისების, დაგირავების, იპოთეკის, უზუფრუქტის, სერვიტუტის ან აღნაგობით დატვირთვის, თხოვების, ქირავნობისა და იჯარის ხელშეკრულებების დადების, სხვისთვის დროებით ან მუდმივ მფლობელობაში გადაცემის) აკრძალვა. საგადასახადო ორგანოს წარმომადგენელი ყადაღადადებულ ნივთებს აღნუსხავს ქონებაზე ყადაღის დადების აქტში.

ხოლო ამავე მუხლის მე-4 ნაწილის თანახმად, ქონებაზე ყადაღის დადების აქტს ხელს აწერენ საგადასახადო ორგანოს/აღსრულების ეროვნული ბიუროს წარმომადგენელი, ქონების შემნახველი, გადასახადის გადამხდელი/ვალდებული პირი და სხვა პირები, რომლებიც ესწრებოდნენ ქონებაზე ყადაღის დადებას. თუ ამ პირებმა უარი განაცხადეს ხელმოწერაზე, აქტში კეთდება შესაბამისი აღნიშვნა.

,,მიმდინარე კონტროლის პროცედურების ჩატარების, სასაქონლო-მატერიალურ ფასეულობათა ჩამოწერის, აღიარებული საგადასახადო დავალიანების დაფარვის, საგადასახადო დავალიანების გადახდევინების უზრუნველყოფის ღონისძიებების განხორციელების, სამართალდარღვევათა საქმისწარმოების წესის დამტკიცების თაობაზე“ ფინანსთა მინისტრის 2010 წლის 31 დეკემბრის №994 ბრძანებით დამტკიცებული ინსტრუქციის 42–ე მუხლის მე-4 პუნქტის თანახმად, საგადასახადო ორგანოს წარმომადგენელი ყადაღადადებულ ნივთებს აღნუსხავს ქონებაზე ყადაღის დადების აქტში. ამავე მუხლის მე–6 პუნქტის შესაბამისად ქონებაზე ყადაღის (აღწერის) დადების დროს იგულისხმება, რომ ნივთები, რომლებიც გადასახადის გადამხდელთანაა, მას ეკუთვნის. ხოლო მე-7 პუნქტის თანახმად, პირის ქონებაზე ყადაღის დადების პროცედურა შეწყდება, თუ გადასახადის გადამხდელი საგადასახადო ორგანოს უფლებამოსილ პირს წარუდგენს აღიარებული საგადასახადო დავალიანების გადახდის დამადასტურებელ დოკუმენტს.

საქართველოს საგადასახადო კოდექსის 269-ე მუხლის პირველი ნაწილის თანახმად, საგადასახადო სამართალდარღვევად ითვლება პირის მართლსაწინააღმდეგო ქმედება (მოქმედება ან უმოქმედობა), რომლისთვისაც ამ კოდექსით გათვალისწინებულია პასუხისმგებლობა. საგადასახადო სამართალდარღვევისათვის პირს პასუხისმგებლობა შეიძლება დაეკისროს მხოლოდ ამ კოდექსით დადგენილი საფუძვლითა და წესით.

საქართველოს საგადასახადო კოდექსის 270-ე მუხლის მიხედვით:

1. საგადასახადო სანქცია არის პასუხისმგებლობის ზომა ჩადენილი საგადასახადო სამართალდარღვევისათვის.

2. საგადასახადო სანქცია გამოიყენება გაფრთხილების, საურავის, ფულადი ჯარიმის, სამართალდარღვევის საქონლის ან/და სატრანსპორტო საშუალების უსასყიდლოდ ჩამორთმევის სახით, ამ კოდექსით გათვალისწინებულ შემთხვევებში.

საქართველოს საგადასახადო კოდექსის 278-ე მუხლის თანახმად, საგადასახადო ორგანოსთან შეთანხმების გარეშე, ყადაღადადებული ქონების პირის მიერ განკარგვა ან საგადასახადო ორგანოს ან აღსრულების ეროვნული ბიუროს მიერ დადებული ლუქის ახსნა – იწვევს პირის დაჯარიმებას 4 000 ლარის ოდენობით.

საქართველოს საგადასახადო კოდექსის 269-ე მუხლის მე-7 ნაწილის თანახმად, საგადასახადო ორგანოს/დავის განმხილველ ორგანოს ან სასამართლოს უფლება აქვს, გაათავისუფლოს კეთილსინდისიერი გადასახადის გადამხდელი ამ კოდექსით გათვალისწინებული სანქციისაგან, თუ სამართალდარღვევა გამოწვეულია გადასახადის გადამხდელის შეცდომით/არცოდნით.

შემოსავლების სამსახური მიუთითებს, რომ ვალის მართვის დეპარტამენტის მე-4 სამმართველოს მიერ მოწოდებული ინფორმაციის თანახმად, ფ/პ ------- (პ/ნ -------) ვერ უზრუნველყო ყადაღადადებული ქონების (------- ცისტერნა ლურჯი 1990 წ. სახ. ნომერი -------) წარმოდგენა. ზემოაღნიშნულიდან გამომდინარე, 2025 წლის 3 დეკემბერს ფ/პ ------- (პ/ნ -------) საქართველოს საგადასახადო კოდექსის 278-ე მუხლის თანახმად, დაეკისრა ჯარიმა 4000 ლარის ოდენობით.

ზემოაღნიშნული სამართლებრივი ნორმების, ფაქტობრივი გარემოებებისა და საქმეზე არსებული მასალების შესწავლის შედეგად, ვინაიდან დგინდება, რომ გადასახადის გადამხდელის მხრიდან ადგილი ჰქონდა სადავო ოქმში აღნიშნული საგადასახადო სამართალდარღვევის ჩადენის ფაქტს, შემოსავლების სამსახური მიიჩნევს, რომ ვალის მართვის დეპარტამენტის მიერ სადავო საგადასახადო სამართალდარღვევის ოქმი შედგენილია კანონმდებლობის მოთხოვნათა დაცვით, გადამხდელის საჩივრები დაუსაბუთებელია და არ უნდა დაკმაყოფილდეს. ამასთან, განსახილველ შემთხვევაში, საქართველოს საგადასახადო კოდექსის 269-ე მუხლის მე-7 ნაწილის გამოყენება შემოსავლების სამსახურს მიზანშეწონილად არ მიაჩნია.

 

საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ :

 

1. ფ/პ ------- (პ/ნ -------) საჩივრები არ დაკმაყოფილდეს;

2. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. №16) ან სასამართლოში (მის.: ქ. თბილისი, დავით აღმაშენებლის ხეივანი №64), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.

 

სადავო საკითხები:

გადამხდელი ითხოვს სადავო საგადასახადო სამართალდარღვევის ოქმით შეფარდებული სანქციისგან გათავისუფლებას.

 

ფაქტობრივი გარემოებები

შემოსავლების სამსახური მიუთითებს, რომ ვალის მართვის მიერ მოწოდებული ინფორმაციის თანახმად, მომჩივანმა ვერ უზრუნველყო ყადაღადადებული ქონების წარმოდგენა. ზემოაღნიშნულიდან გამომდინარე, დაეკისრა ჯარიმა 4000 ლარის ოდენობით.

 

გადაწყვეტილება

სამართლებრივი ნორმების, ფაქტობრივი გარემოებებისა და საქმეზე არსებული მასალების შესწავლის შედეგად, ვინაიდან დგინდება, რომ გადასახადის გადამხდელის მხრიდან ადგილი ჰქონდა სადავო ოქმში აღნიშნული საგადასახადო სამართალდარღვევის ჩადენის ფაქტს, შემოსავლების სამსახური მიიჩნევს, რომ ვალის მართვის დეპარტამენტის მიერ სადავო საგადასახადო სამართალდარღვევის ოქმი შედგენილია კანონმდებლობის მოთხოვნათა დაცვით, გადამხდელის საჩივრები დაუსაბუთებელია და არ უნდა დაკმაყოფილდეს. ამასთან, განსახილველ შემთხვევაში, საქართველოს საგადასახადო კოდექსის 269-ე მუხლის მე-7 ნაწილის გამოყენება შემოსავლების სამსახურს მიზანშეწონილად არ მიაჩნია.

 

დასაბუთება

შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 278; 269(7)