გადწყვეტილება № 26935/2/2026
📜 საკანონმდებლო ნორმები
📄 სრული ტექსტი
№ 26935/2/2026
16 აპრილი 2026
გ ა დ ა წ ყ ვ ე ტ ი ლ ე ბ ა
მომჩივანი: შპს „------“ (ს/ნ -----)
მოპასუხე: აუდიტის დეპარტამენტი
საქართველოს ფინანსთა სამინისტროსთან არსებულმა დავების განხილვის საბჭომ, 2.04.2026 წელს განიხილა და მიიღო გადაწყვეტილება შპს „------“-ის 17.03.2026 წელს რეგისტრირებულ საჩივარზე (რეგისტრაციის №26935/2/2026).
დავის საგანი:
დაკისრებული ჯარიმისგან გათავისუფლება საგადასახადო კოდექსის 269-ე მუხლის მე-7 ნაწილის საფუძველზე.
გასაჩივრებული გადაწყვეტილება:
1. აუდიტის დეპარტამენტის 11.02.2026 წლის №068-3 საგადასახადო მოთხოვნა;
2. შემოსავლების სამსახურის 6.03.2026 წლის №4993 ბრძანება.
დარიცხული თანხა: 24 493,76 ლარი.
მათ შორის:
დღგ - 17 052,78
ჯარიმა - 7 314,9
საურავი - 126,08
ფაქტების აღწერა/დარიცხვის საფუძვლები
აუდიტის დეპარტამენტის 9.02.2026 წლის კამერალური საგადასახადო შემოწმების აქტით შემოწმებულია 1.08.2025 წლიდან 1.11.2025 წლამდე პერიოდი.
მომჩივნის საქმიანობაა სხვა სპეციალიზებული სამშენებლო სამუშაოები. შემოსავლების სამსახურის გადასახადების ადმინისტრირების საინფორმაციო სისტემის მონაცემებზე დაყრდნობით, მომჩივანს შესამოწმებელ საანგარიშო პერიოდებზე (2025 წლის აგვისტო, სექტემბერი და ოქტომბერი) წარდგენილი დღგ-ის დეკლარაციების მიხედვით დღგ-ით დასაბეგრი ბრუნვა შეადგენს 245 102 ლარს. შემოწმებით დადგინდა, რომ შესამოწმებელ პერიოდში კომპანიის მიერ დღგ-ით დასაბეგრ ბრუნვაში სრულად არ არის ასახული აღნიშნული პერიოდების საგადასახადო ანგარიშ-ფაქტურების თანხები, კერძოდ: საზოგადოების მიერ, 2025 წლის აგვისტოს თვის საანგარიშო პერიოდზე, დღგ-ით დასაბეგრ ბრუნვაში არ არის ასახული აღნიშნული პერიოდის ავანსის საგადასახადო ანგარიშ-ფაქტურა ------, თანხით - 27 100 ლარი (დღგ-ის გარეშე). ასევე, 2025 წლის სექტემბრის საანგარიშო პერიოდში დღგ-ით დასაბეგრ ბრუნვაში არ არის ასახული აღნიშნული პერიოდის საგადასახადო ანგარიშ-ფაქტურა ------, თანხით 54 023 ლარი (დღგ-ის გარეშე), ასევე აღნიშნულ პერიოდში მოხდა გამოწერილი საბოლოო ანგარიშ-ფაქტურით (------) გამოწერილი ავანსის ანგარიშ-ფაქტურების (-----, -----, -----) 101 625 ლარის განაშთვა. ასევე, არასრულად არის დეკლარირებული 2025 წლის ოქტომბრის საანგარიშო პერიოდში გამოწერილი საგადასახადო ანგარიშ-ფაქტურები, შედეგად შემოწმებით დღგ-ით დასაბეგრმა ბრუნვამ შეადგინა 339 842 ლარი.
საგადასახადო კოდექსის 159-ე მუხლის პირველი ნაწილის „ა“ და „ბ“ ქვეპუნქტების გათვალისწინებით დაკორექტირდა დღგ-ით დასაბეგრი ბრუნვები და 2025 წლის აგვისტოს, სექტემბრის და ოქტომბრის თვეებში დღგ-ით დასაბეგრ ბრუნვებში აისახა აღნიშნულ საანგარიშო პერიოდებში გამოწერილი საგადასახადო ანგარიშ-ფაქტურების თანხები. საგადასახადო კოდექსის 275-ე მუხლის მე-2 ნაწილის მიხედვით, გადასახადის გადამხდელი დაჯარიმდა დეკლარაციაში გადასახადის თანხის შემცირებისთვის.
შემოწმების აქტის საფუძველზე გადასახადის გადამხდელს წარედგინა აუდიტის დეპარტამენტის 11.02.2026 წლის №068-3 საგადასახადო მოთხოვნა, რაც გასაჩივრდა შემოსავლების სამსახურში.
შემოსავლების სამსახურის 6.03.2026 წლის №4993 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.
შემოსავლების სამსახურის გადაწყვეტილების შინაარსი
შემოსავლების სამსახური მიუთითებს საგადასახადო კოდექსის 302-ე მუხლის მე-2 და მე-6 ნაწილებზე, 43-ე მუხლის მე-4 ნაწილზე, 270-ე მუხლის პირველ და მე-2 ნაწილებზე, 275-ე მუხლის მე-2 ნაწილზე, 269-ე მუხლის მე-7 ნაწილზე და განმარტავს, რომ გადასახადის გადამხდელის კეთილსინდისიერება უკავშირდება მის მიერ დაშვებულ შეცდომას, გადამხდელი კეთილსინდისიერია იმ შემთხვევაში თუ სამართალდარღვევა გამოწვეულია მის მიერ დაშვებული შეცდომით (არცოდნით). კეთილსინდისიერება გულისხმობს პირის სუბიექტურ დამოკიდებულებას მის მიერ ჩადენილი ქმედებისადმი. პირი მოქმედებს საპატიებელი შეცდომის პირობებში ანუ მან არ იცოდა და არც შეიძლებოდა სცოდნოდა, რომ ჩადიოდა აკრძალულ ქმედებას (სამართალდარღვევას). საგადასახადო კოდექსის 269-ე მუხლის მე-7 ნაწილის მიზანია საგადასახადო პასუხისმგებლობისგან გაათავისუფლოს პირი, რომელიც სამართლებრივი შეცდომის არეალში მოქმედებდა, რადგან სამართლებრივი შეცდომის დროს პირი არასწორად აფასებს ჩადენილი ქმედების სამართლებრივ არსს და ამ ქმედებით გამოწვეულ სამართლებრივ შედეგს.
შემოსავლების სამსახური მიუთითებს ფაქტობრივ გარემოებებზე, რომლის მიხედვით, გადასახადის გადამხდელს არასრულად ჰქონდა შესრულებული საგადასახადო ვალდებულებები, ამასთან, მომჩივანი ვერ უთითებს ფაქტობრივ და სამართლებრივ გარემოებებზე, რომლითაც დადასტურდება, რომ გადასახადის გადამხდელი საგადასახადო ვალდებულებების არაჯეროვნად შესრულებისას მოქმედებდა სამართლებრივი შეცდომის არეალში. შესაბამისად, საგადასახადო შემოწმების შედეგად დარიცხული ჯარიმის მიმართ შემოსავლების სამსახურს მიზანშეწონილად არ მიაჩნია საგადასახადო კოდექსის 269-ე მუხლის მე-7 ნაწილის გამოყენება. ამდენად, შემოსავლების სამსახურმა მიიჩნია, რომ გადამხდელის საჩივარი დაუსაბუთებელია და არ უნდა დაკმაყოფილდეს.
მომჩივნის არგუმენტაცია
საგადასახადო მოთხოვნით დაერიცხა ბიუჯეტის სასარგებლოდ თანხები, რაც გამოწვეული იყო იმით, რომ შესრულებულ მომსახურებაზე მიღება-ჩაბარების აქტი შედგა 2025 წლის 15 ნოემბერს, ოპერაცია კი მოხდა 2025 წლის ოქტომბრის თვეში. გამომდინარე აქედან ვერ მოახვედრა 2025 წლის ოქტომბრის თვის დღგ-ის დეკლარაციაში და ასახა 2025 წლის ნოემბრის თვეში. ეს მოხდა გაურკვევლობით. ითხოვს გაუქმდეს ჯარიმა, რომელიც გამოწვეული იყო გაურკვევლობით და არ ცოდნით.
შემოწმების პერიოდში, რადგანაც ნოემბერის თვის დეკლარაციაში ჰქონდა ასახული და შემმოწმებელმა ოქტომბრის თვეში მოახდინა ასახვა, რომ არ მომხდარიყო გაორება ამიტომ დააზუსტა ნოემბრის დღგ-ის დეკლარაცია, საიდანაც ამოიღო შესაბამისი თანხა. ითხოვს ჯარიმის თანხის პატიებას.
დავების განხილვის საბჭო
მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:
საგადასახადო კოდექსის 275-ე მუხლის მე-2-22 ნაწილების თანახმად:
2. საგადასახადო დეკლარაციაში/გაანგარიშებაში გადასახადის თანხის შემცირება, გარდა ამ მუხლის პირველი, 21 და 22 ნაწილებით გათვალისწინებული შემთხვევებისა, − იწვევს დაჯარიმებას შემცირებული გადასახადის თანხის 50 პროცენტის ოდენობით.
21 . საგადასახადო დეკლარაციაში/გაანგარიშებაში გადასახადის შემცირება, თუ შემცირებული გადასახადის თანხა ამ დეკლარაციაში/გაანგარიშებაში აღნიშნული გადასახადის თანხის 5 პროცენტს არ აღემატება, − იწვევს დაჯარიმებას შემცირებული გადასახადის თანხის 10 პროცენტის ოდენობით.
22 . საგადასახადო დეკლარაციაში/გაანგარიშებაში გადასახადის შემცირება, თუ შემცირებული გადასახადის თანხა ამ დეკლარაციაში/გაანგარიშებაში აღნიშნული გადასახადის თანხის 5 პროცენტზე მეტია და 20 პროცენტს არ აღემატება, − იწვევს დაჯარიმებას შემცირებული გადასახადის თანხის 25 პროცენტის ოდენობით.
საგადასახადო კოდექსის 269-ე მუხლის მე-7 ნაწილის თანახმად, დავის განმხილველ ორგანოს უფლება აქვს, გაათავისუფლოს კეთილსინდისიერი გადასახადის გადამხდელი ამ კოდექსით გათვალისწინებული სანქციისაგან, თუ სამართალდარღვევა გამოწვეულია გადასახადის გადამხდელის შეცდომით/არცოდნით.
შემოწმების შედეგად განსაზღვრულია, რომ მომჩივნის მიერ დეკლარირებული გადასახადებით დაბეგვრის ობიექტი განსხვავებულია საგადასახადო შემოწმებით დადგენილი მონაცემებისგან.
აუდიტის დეპარტამენტის წარმომადგენილს განმარტებით, არაშესამოწმებელ პერიოდში, კერძოდ, 2025 წლის ნოემბრის და დეკემბრის საანგარიშო პერიოდებში გამოწერილი ელექტრონული ანგარიშფაქტურების მიხედვით 18%-იანი დასაბეგრი ბრუნვა სრულად შეესაბამება შესაბამისი პერიოდების დღგის დეკლარაციებში ასახულ 18%-იან დასაბეგრ ბრუნვას.
დარიცხვის შინაარსიდან გამომდინარე, საბჭოს მიაჩნია, რომ განსახილველ შემთხვევაში არ დასტურდება, რომ გადასახადის გადამხდელის მიერ საგადასახადო ვალდებულებების არასრულად დეკლარირება გამოწვეულია მისი შეცდომით/არცოდნით. შესაბამისად, არ არსებობს დაკისრებული ჯარიმისგან მომჩივნის საგადასახადო კოდექსის 269-ე მუხლის მე-7 ნაწილის საფუძველზე გათავისუფლების საფუძველი.
საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:
1. საჩივარი არ დაკმაყოფილდეს;
2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.
სადავო საკითხი
დაკისრებული ჯარიმისგან გათავისუფლება.
ფაქტობრივი გარემოებები
მომჩივნის საქმიანობაა სხვა სპეციალიზებული სამშენებლო სამუშაოები.
შემოწმების შედეგად განსაზღვრულია, რომ მომჩივნის მიერ დეკლარირებული გადასახადებით დაბეგვრის ობიექტი განსხვავებულია საგადასახადო შემოწმებით დადგენილი მონაცემებისგან. დაკორექტირდა დღგ-ით დასაბეგრი ბრუნვები და 2025 წლის აგვისტოს, სექტემბრის და ოქტომბრის თვეებში დღგ-ით დასაბეგრ ბრუნვებში აისახა აღნიშნულ საანგარიშო პერიოდებში გამოწერილი საგადასახადო ანგარიშ-ფაქტურების თანხები. გადასახადის გადამხდელი დაჯარიმდა დეკლარაციაში გადასახადის თანხის შემცირებისთვის.
გადაწყვეტილება
საბჭოს მიაჩნია, რომ განსახილველ შემთხვევაში არ დასტურდება, რომ გადასახადის გადამხდელის მიერ საგადასახადო ვალდებულებების არასრულად დეკლარირება გამოწვეულია მისი შეცდომით/არცოდნით. შესაბამისად, არ არსებობს დაკისრებული ჯარიმისგან მომჩივნის გათავისუფლების საფუძველი.
დასაბუთება
საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს;275(2;22)