ბრძანება N 2922

N 2922

11 თებერვალი 2026

ბ რ ძ ა ნ ე ბ ა

 

შპს „-------“ (ს/ნ -------)

(მის.: -------, -------)

2026 წლის 12 იანვრის საჩივრის

ნაწილობრივ დაკმაყოფილების თაობაზე

 

შემოსავლების სამსახურმა დავების განხილვის საბჭოს 2026 წლის 5 თებერვლის სხდომაზე (ოქმი №11) განიხილა შპს „-------“ (ს/ნ -------) 2026 წლის 12 იანვრის №99889/1/2026 საჩივარი, შემოსავლების სამსახურის აუდიტის დეპარტამენტის 2025 წლის 16 დეკემბრის №047-30 „საგადასახადო მოთხოვნასთან“ დაკავშირებით.

 

სადავო საკითხები:

1. გადასახადის გადამხდელი არ ეთანხმება ფულის ნაშთის დირექტორზე გაცემულ ხელფასად განხილვას. განმარტავს, რომ ფულის ნაშთი შემმოწმებელს მაქსიმუმ შეიძლება ჩაეთვალა გაცემულ სესხად, თუმცა არც ეს კვალიფიკაცია იქნებოდა სწრორი, რადგან ანგარიშვალდებულ პირზე არსებული ნაშთი (106 818,71 ლარი) სრულად გახარჯულია კომპანიის საჭიროებისთვის შემდეგი თვეების განმავლობაში. განმარტავს, რომ კომპანიას აქვს სრულყოფილი ფინანსური აღრიცხვა პროგრამა „1C“-ში, სადაც ჩანს სად იხარჯება თანხები. 219 216 ლარი, რომელიც ნაშთად უნდა ყოფილიყო სალაროში, შედგება ეკონომიკური საქმიანობის ფარგლებში მიღებულ მომსახურებებზე გადახდილი სხვადასხვა თანხებისაგან. გადამხდელს წარმოდგენილი აქვს ინფორმაცია ცხრილის სახით და აცხადებს, რომ გადახდილი თანხებიდან მხოლოდ რატი ქარქაშაძისათვის გადახდილი თანხა შეადგენს საშემოსავლო გადასახადით დასაბეგრ ბაზას (გაცემის პერიოდში რატი ქარქაშაძე მეწარმე არ არის). დანარჩენი თანხები გაცემულია მეწარმედ რეგისტრირებულ პირებზე (იურიდიულ და ფიზიკურ პირებზე), რომლებისგანაც მიღებული მომსახურებები გამოიყენება კომპანიის ეკონომიკური საქმიანობისათვის. მითითებული ჩამონათვლიდან არის მომსახურებები, რომლებზეც გამოწერილია საგადასახადო ანგარიშ-ფაქტურები. ანგარიშ-ფაქტურებში, რომლებიც ადასტურებენ გაწეულ მომსახურებას ზომის ერთეულში ნაცვლად „მომსახურებისა“ მითითებულია „ცალი“ და შესაძლოა ეს იყოს მიზეზი თუ რატომ იქნა გამორჩენილი შემმოწმებლის მიერ აგებულ ფულის მოძრაობაში აღნიშნული მონაცემები. ხოლო რაც შეეხება დანარჩენ ნაწილს ყველა მათგანზე შედგენილია შესაბამისი დოკუმენტი, რაც ნათლად ჩანს ფინანსური აღრიცხვის ამსახველ ბუღალტრულ პროგრამაში. გადასამხდელს წარმოდგენილი აქვს ანგარიშვალდებული პირის ბარათი, საბანკო ამონაწერები, საგადასახადო ანგარიშ-ფაქტურები, მიღება-ჩაბარების და შესყიდვის აქტები.

2. გადასახადის გადამხდელი არ ეთანხმება ფიზიკური პირებისთვის გადარიცხული თანხის დოკუმენტურად დაუდასტურებელ ხარჯად დაბეგვრას. გადამხდელს წარმოდგენილი აქვს ინფორმაცია ცხრილის სახით და განმარტავს, რომ აბსოლუტური უმრავლესობა გაცემულია შესაბამისი დანიშნულებით, რაც ან დაბეგრილია ან/და მიღებული დოკუმენტები სრულად შეესაბამება ეკონომიკურ საქმიანობას, მხოლოდ მცირე ნაწილია დასაბეგრი, რაც მითითებულია ცხრილის საბუთის დანიშნულების გრაფაში.

 

ფაქტობრივი გარემოებები:

საქმეში არსებული მასალებით ირკვევა, რომ შემოსავლების სამსახურის აუდიტის დეპარტამენტის 2025 წლის 18 მარტის №4689 ბრძანების საფუძველზე დაინიშნა შპს „-------“ (ს/ნ -------) საქმიანობის კამერალური საგადასახადო შემოწმება. შესამოწმებელ პერიოდად განისაზღვრა 2024 წლის 1 იანვრიდან 2025 წლის 1 თებერვლამდე საანგარიშო პერიოდები. შემოწმების შედეგებზე 2025 წლის 11 დეკემბერს შედგენილ იქნა საგადასახადო შემოწმების აქტი, გამოიცა აუდიტის დეპარტამენტის 2025 წლის 16 დეკემბრის №27611 ბრძანება გადასახადების/გადასახდელების და საგადასახადო სანქციების თანხების დარიცხვის/შემცირების შესახებ და ამავე თარიღის №047-30 საგადასახადო მოთხოვნა, რომლის მიხედვით გადამხდელს დამატებით გადასახდელად განესაზღვრა სულ 102 492 ლარი, მათ შორის, გადასახადი 63 825 ლარი, ჯარიმა 31 913 ლარი და საურავი 6 754 ლარი.

 

საგადასახადო შემოწმების აქტის მიხედვით, საგადასახადო ვალდებულებები განსაზღვრულია შემდეგი გარემოებებით:

1. შესამოწმებელ პერიოდში ხდება საქვეანგარიშოდ თანხების გატანა, რომელიც ზოგიერთ შემთხვევაში არ არის ჩამოწერილი. აქედან გამომდინარე განხორციელდა საწარმოს ფულადი სახსრების ანალიზი, საიდანაც დადგინდა, რომ ფულის ნაშთი უნდა ყოფილიყო 219 216 ლარი. შემოწმების მიერ აღნიშნული ფულის ნაშთი ჩაითვალა დირექტორზე გაცემულ ხელფასად. საქართველოს საგადასახადო კოდექსის 101-ე მუხლის გათვალისწინებით, გადამხდელს დაერიცხა საშემოსავლო გადასახადი და ჯარიმა საქართველოს საგადასახადო კოდექსის 275-ე მუხლის შესაბამისად.

2. შემოწმების მიერ განხორციელდა გადამხდელის კუთვნილი საბანკო ანგარიშების შესწავლა, საიდანც დადგინდა, რომ გადარიცხულია თანხები ფიზიკურ პირებთან სხვადასხვა მომსახურების გაწევაზე. შემოწმების პროცესში წარმოდგენილ იქნა აღნიშნულ პირებთან გაფორმებული შედარების აქტები, თუმცა სრულყოფილად წარმოდგენა ვერ განხორციელდა. საქართველოს საგადასახადო კოდექსის 97-ე, 982 მუხლების შესაბამისად, ის გადახდები, რომელთა დოკუმენტურად დადასტურება ვერ განხორციელდა შემოწმების მიერ დაიბეგრა მოგების გადასახადით. გადამხდელს დაერიცხა მოგების გადასახადი და ჯარიმა საქართველოს საგადასახადო კოდექსის 275-ე მუხლის შესაბამისად.

 

შემოსავლების სამსახურმა განიხილა წარმოდგენილი საჩივარი და მიიჩნია, რომ გადასახადის გადამხდელის მოთხოვნა უნდა დაკმაყოფილდეს ნაწილობრივ, შემდეგ გარემოებათა გამო:

საქართველოს საგადასახადო კოდექსის 302-ე მუხლის მე-6 ნაწილის თანახმად, დავის განმხილველ ორგანოებს უფლება აქვთ, საჩივარი განიხილონ დისტანციურად, ტექნიკურ საშუალებათა გამოყენებით. მათ ასევე უფლება აქვთ, საჩივარი განიხილონ მომჩივნის დაუსწრებლად, თუ საქმეში არსებული მასალებიდან სრულად დგინდება დავის საგანთან დაკავშირებული ფაქტობრივი გარემოებები.

 

პირველ სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.

საქართველოს საგადასახადო კოდექსის 73-ე მუხლის მე-9 ნაწილის „ბ“ ქვეპუნქტის თანახმად, საგადასახადო ვალდებულების განსაზღვრის მიზნით საგადასახადო ორგანოს უფლება აქვს სამეურნეო ოპერაციის ფორმისა და შინაარსის გათვალისწინებით შეცვალოს მისი კვალიფიკაცია, თუ ოპერაციის ფორმა არ შეესაბამება მის შინაარსს. ამავე მუხლის მე-4 ნაწილის თანახმად, თუ რაიმე თანხა გამოიყენება კონკრეტული პირის ინტერესებისათვის, ჩაითვლება, რომ ეს თანხა მიღებული აქვს ამ პირს.

საქართველოს საგადასახადო კოდექსის 101-ე მუხლის პირველი ნაწილის თანახმად, ხელფასის სახით მიღებულ შემოსავლებს განეკუთვნება ფიზიკური პირის მიერ დაქირავებით მუშაობის შედეგად მიღებული ნებისმიერი საზღაური ან სარგებელი, მათ შორის, წინა სამუშაო ადგილიდან პენსიის ან სხვა სახით მიღებული შემოსავალი, ან შემოსავალი მომავალი სამუშაო ადგილიდან.

საქართველოს საგადასახადო კოდექსის 154-ე მუხლის პირველი ნაწილის ,,ა“ ქვეპუნქტის მიხედვით, გადახდის წყაროსთან გადასახადის დაკავება ევალება საგადასახადო აგენტს, რომელიც არის იურიდიული პირი, საწარმო/ორგანიზაცია ან მეწარმე ფიზიკური პირი, რომელიც დაქირავებულს უხდის ხელფასს.

ამავე მუხლის მე-2 ნაწილის „ა“ და „ბ“ ქვეპუნქტების მიხედვით, გადახდის წყაროსთან გადასახადის დაკავებისას:

ა) გადასახადის დაკავებისა და ბიუჯეტში მისი გადარიცხვისათვის პასუხისმგებლობა ეკისრება შემოსავლის გადამხდელს;

ბ) გადასახადის თანხის დაუკავებლობის შემთხვევაში შემოსავლის გადამხდელი ვალდებულია ბიუჯეტში შეიტანოს დაუკავებელი გადასახადის თანხა ფაქტობრივად გადახდილი ანაზღაურების შესაბამისად და მასთან დაკავშირებული სანქციები.

საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.

საქმეში არსებული ფაქტობრივი გარემოების თანახმად, შესამოწმებელ პერიოდში საქვეანგარიშოდ ხდება თანხების გატანა, რომელიც ზოგიერთ შემთხვევაში არ არის ჩამოწერილი. საგადასახადო შემოწმების მიერ გაანგარიშდა ფულის ნაშთი, რომელიც საქართველოს საგადასახადო კოდექსის 73-ე მუხლის საფუძველზე დაკვალიფიცირდა კომპანიის დირექტორზე გაცემულ ხელფასად.

შემოსავლების სამსახური ყურადღებას ამახვილებს გადასახადის გადამხდელის პოზიციაზე, რომლის თანახმად, ანგარიშვალდებულ პირზე არსებული ნაშთი (106 818,71 ლარი) სრულად გახარჯულია კომპანიის საჭიროებისთვის შემდეგი თვეების განმავლობაში. აცხადებს, რომ კომპანიას აქვს სრულყოფილი ბუღალტრული აღრიცხვა პროგრამა „1C“-ში, სადაც ჩანს სად იხარჯება თანხები. 219 216 ლარი, რომელიც ნაშთად უნდა ყოფილიყო სალაროში, შედგება ეკონომიკური საქმიანობის ფარგლებში მიღებულ მომსახურებებზე გადახდილი სხვადასხვა თანხებისაგან. გადამხდელს წარმოდგენილი აქვს ინფორმაცია ცხრილის სახით, ასევე წარმოდგენილი აქვს ანგარიშვალდებული პირის ბარათი, საბანკო ამონაწერები, საგადასახადო ანგარიშ-ფაქტურები, მიღება-ჩაბარების და შესყიდვის აქტები.

ზემოაღნიშნული სამართლებრივი ნორმების, საქმეზე არსებული მასალებისა და გადასახადის გადამხდელის არგუმენტების გათვალისწინებით, შემოსავლების სამსახურმა მიიჩნია, რომ სადავო საკითხი საჭიროებს დამატებით შესწავლას, კერძოდ, გადასახადის გადამხდელს უნდა მიეცეს წინადადება, ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს საჩივარში მითითებული არგუმენტაციის დოკუმენტურად დადასტურებული მტკიცებულებები. დაევალოს აუდიტის დეპარტამენტს შეისწავლოს/გამოიკვლიოს გადასახადის გადამხდელის მიერ წარდგენილი მტკიცებულებები (მ.შ. საჩივარზე თანდართული) და შესწავლის შედეგების გათვალისწინებით, სათანადო საფუძვლის არსებობის შემთხვევაში, განახორციელოს საგადასახადო ვალდებულებების კორექტირება (შემცირება).

 

მე-2 სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.

საქართველოს საგადასახადო კოდექსის 72-ე მუხლის პირველ ნაწილზე, რომლის თანახმად, პირველადი საგადასახადო დოკუმენტი არის წერილობითი დოკუმენტი, რომლითაც შესაძლებელია სამეურნეო ოპერაციის მონაწილე მხარეთა იდენტიფიცირება, აქვს თარიღი და მოიცავს მიწოდებული საქონლის/გაწეული მომსახურების ჩამონათვალსა და ღირებულებას.

საქართველოს საგადასახადო კოდექსის 96-ე მუხლის „ა“ ქვეპუნქტის მიხედვით, მოგების გადასახადის გადამხდელია რეზიდენტი საწარმო.

საქართველოს საგადასახადო კოდექსის 97-ე მუხლის პირველი ნაწილის „ბ“ ქვეპუნქტის მიხედვით, რეზიდენტი საწარმოს მოგების გადასახადით დაბეგვრის ობიექტია გაწეული ხარჯი ან სხვა გადახდა, რომელიც ეკონომიკურ საქმიანობასთან დაკავშირებული არ არის.

საქართველოს საგადასახადო კოდექსის 982 მუხლის პირველი ნაწილის „ა“ ქვეპუნქტის მიხედვით, ამ მუხლის მიზნებისათვის ხარჯს, რომელიც ეკონომიკურ საქმიანობასთან დაკავშირებული არ არის, მიეკუთვნება ხარჯი, რომელიც დოკუმენტურად დადასტურებული არ არის, თუ ეს ვალდებულება დადგენილია ამ კოდექსის შესაბამისად.

საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.

საქმეში არსებული ფაქტობრივი გარემოების თანახმად, გადასახადის გადამხდელს სხვადასხვა მომსახურების გაწევაზე ფიზიკური პირებისთვის გადარიცხული აქვს თანხები. შემოწმების პროცესში გადასახადის გადამხდელის მიერ აღნიშნულ პირებთან გაფორმებული შედარების აქტების სრულყოფილად წარდგენა ვერ განხორციელდა. აღნიშნულიდან გამომდინარე, საგადასახადო შემოწმების მიერ ის გადახდები, რომელთა დოკუმენტურად დადასტურება ვერ განხორციელდა დაიბეგრა როგორც დოკუმენტურად დაუდასტურებელი ხარჯი.

შემოსავლების სამსახური ყურადღებას ამახვილებს გადასახადის გადამხდელის მიერ საჩივარში წარმოდგენილ ინფორმაციაზე/დოკუმენტებზე და განმარტავს, რომ სადავო საკითხი საჭიროებს დამატებით შესწავლას.

ზემოაღნიშნული სამართლებრივი ნორმების, საქმეზე არსებული მასალებისა და გადასახადის გადამხდელის არგუმენტების გათვალისწინებით, შემოსავლების სამსახურმა მიიჩნია, რომ გადასახადის გადამხდელს უნდა მიეცეს წინადადება, ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს საჩივარში მითითებული არგუმენტაციის დოკუმენტურად დადასტურებული მტკიცებულებები. დაევალოს აუდიტის დეპარტამენტს შეისწავლოს/გამოიკვლიოს გადასახადის გადამხდელის მიერ წარდგენილი მტკიცებულებები (მ.შ. საჩივარზე თანდართული) და შესწავლის შედეგების გათვალისწინებით, სათანადო საფუძვლის არსებობის შემთხვევაში, განახორციელოს საგადასახადო ვალდებულებების კორექტირება (შემცირება).

 

საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ :

 

1. შპს „-------“ (ს/ნ -------) საჩივარი დაკმაყოფილდეს ნაწილობრივ;

2. სადავო საკითხებთან დაკავშირებით:

ა) გადასახადის გადამხდელს მიეცეს წინადადება, ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს საჩივარში მითითებული არგუმენტაციის დოკუმენტურად დადასტურებული მტკიცებულებები;

ბ) დაევალოს აუდიტის დეპარტამენტს, შეისწავლოს/გამოიკვლიოს გადასახადის გადამხდელის მიერ წარდგენილი მტკიცებულებები (მ.შ. საჩივარზე თანდართული) და შესწავლის შედეგების გათვალისწინებით, სათანადო საფუძვლის არსებობის შემთხვევაში, განახორციელოს საგადასახადო ვალდებულებების შესაბამისი კორექტირება (შემცირება);

3. დანარჩენ ნაწილში საჩივარი არ დაკმაყოფილდეს;

4. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. №16) ან სასამართლოში (მის.: ქ. ქუთაისი, ვიქტორ კუპრაძის ქ. №11), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში

 

სადავო საკითხები:

1. ფულის ნაშთის დირექტორზე გაცემულ ხელფასად განხილვა.

2. ფიზიკური პირებისთვის გადარიცხული თანხის დოკუმენტურად დაუდასტურებელ ხარჯად დაბეგვრა.

 

ფაქტობრივი გარემოებები

1. შესამოწმებელ პერიოდში ხდება საქვეანგარიშოდ თანხების გატანა, რომელიც ზოგიერთ შემთხვევაში არ არის ჩამოწერილი. აქედან გამომდინარე განხორციელდა საწარმოს ფულადი სახსრების ანალიზი, საიდანაც დადგინდა ფულის ნაშთი. შემოწმების მიერ აღნიშნული ფულის ნაშთი ჩაითვალა დირექტორზე გაცემულ ხელფასად. გადამხდელს დაერიცხა საშემოსავლო გადასახადი და ჯარიმა.

2. შემოწმების მიერ განხორციელდა გადამხდელის კუთვნილი საბანკო ანგარიშების შესწავლა, საიდანც დადგინდა, რომ გადარიცხულია თანხები ფიზიკურ პირებთან სხვადასხვა მომსახურების გაწევაზე. შემოწმების პროცესში წარმოდგენილ იქნა აღნიშნულ პირებთან გაფორმებული შედარების აქტები, თუმცა სრულყოფილად წარმოდგენა ვერ განხორციელდა. ის გადახდები, რომელთა დოკუმენტურად დადასტურება ვერ განხორციელდა შემოწმების მიერ დაიბეგრა მოგების გადასახადით. გადამხდელს დაერიცხა მოგების გადასახადი და ჯარიმა.

 

გადაწყვეტილება

სადავო საკითხებთან დაკავშირებით გადასახადის გადამხდელს მიეცეს წინადადება, ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს საჩივარში მითითებული არგუმენტაციის დოკუმენტურად დადასტურებული მტკიცებულებები; დაევალოს აუდიტის დეპარტამენტს, შეისწავლოს/გამოიკვლიოს გადასახადის გადამხდელის მიერ წარდგენილი მტკიცებულებები (მ.შ. საჩივარზე თანდართული) და შესწავლის შედეგების გათვალისწინებით, სათანადო საფუძვლის არსებობის შემთხვევაში, განახორციელოს საგადასახადო ვალდებულებების შესაბამისი კორექტირება (შემცირება); დანარჩენ ნაწილში საჩივარი არ დაკმაყოფილდეს;

 

დასაბუთება

შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 73(9); 101; 154; 982(1-ა)