ბრძანება N 5891
📜 საკანონმდებლო ნორმები
📄 სრული ტექსტი
N 5891
18 მარტი 2026
ბ რ ძ ა ნ ე ბ ა
შპს „-------“ (ს/ნ -------)
(მის.: --------, -------)
2026 წლის 9 თებერვლის და 4 მარტის საჩივრების
დაკმაყოფილებაზე უარის თქმის თაობაზე
შემოსავლების სამსახურმა დავების განხილვის საბჭოს 2026 წლის 5 მარტის სხდომაზე (ოქმი №20) განიხილა შპს „-------“ (ს/ნ -------) 2026 წლის 9 თებერვლის №100652/1/2026 და 4 მარტის №101136/1/2026 საჩივრები, შემოსავლების სამსახურის აუდიტის დეპარტამენტის 2025 წლის 26 დეკემბრის №006-587 საგადასახადო მოთხოვნასთან დაკავშირებით.
სადავო საკითხები:
1. გადასახადის გადამხდელი არ ეთანხმება დამფუძნებლის მიერ კომპანიის კაპიტალში შეტანილი უძრავი ქონების რეალიზაციის შედეგად დღგ-ში განსაზღვრულ საგადასახადო ვალდებულებებს. განმარტავს, რომ შპს „-------“ არის ამხანაგობა „-------“-ის წევრი. შესაბამისად, მის მიერ შპს „-------“-სთვის ქონების მიწოდებით, ეს უკანასკნელი ავტომატურად გახდა ამხანაგობის წევრი. ხოლო, თავის მხრივ შპს „-------“, რომელიც არის შპს „-------“ დამფუძნებელი და 100%-იანი წილის მფლობელი, მშენებარე ბინები შეიტანა მის კაპიტალში, რითაც შპს „-------“, სასამართლოს ერთგვაროვანი პრაქტიკის მიხედვით ასევე გახდა ამხანაგობა „-------“-ის წევრი. აქედან გამომდინარე მიიჩნევს, რომ შპს „-------“ მიერ ფიზიკური პირისთვის უძრავი ქონების მიწოდებაზე უნდა გავრცელდეს ამხანაგობაზე 2009 წლის 7 აგვისტომდე განსაზღვრული საქართველოს საგადასახადო კოდექსით დადგენილი შეღავათები. აღნიშნულთან დაკავშირებით აპელირებს საქართველო უზენაესი სასამართლოს მიერ მიღებულ შპს „-------“ და ------- გადაწყვეტილებაზე. ზემოაღნიშნულის გათვალისწინებით, ითხოვს საგადასახადო მოთხოვნის გაუქმებას.
2. გადასახადის გადამხდელი არ ეთანხმება შემოწმების მიერ გამოვლენილი ფულის ნაშთის დირექტორზე გაცემულ ხელფასად კვალიფიკაციას. აცხადებს, რომ აღნიშნულ ნაწილში დარიცხვა უკანონოა, ვინაიდან რეალიზებულ ბინებზე სახელშეკრულებო ფასის გადახდა ნაწილობრივ ხდებოდა 2022 წლამდე პერიოდში, წინარე ხელშეკრულების საფუძველზე, სამშენებლო სფეროში არსებული პრაქტიკის მიხედვით. შესაბამისად, ითხოვს სალაროს ნაშთის შემცირებას 2022 წლამდე მიღებული თანხებით.
ფაქტობრივი გარემოებები:
საქმეში არსებული მასალებით დგინდება, რომ შემოსავლების სამსახურის აუდიტის დეპარტამენტის 2025 წლის 20 ოქტომბრის №22433 და 3 დეკემბრის №26649 ბრძანებების საფუძველზე განხორციელდა შპს „-------“ (ს/ნ ------- საქმიანობის კამერალური საგადასახადო შემოწმება. შესამოწმებელ პერიოდად განისაზღვრა 2022 წლის პირველი იანვრიდან 2025 წლის პირველ სექტემბრამდე საანგარიშო პერიოდები, ხოლო სალაროში ნაღდი ფულის რაოდენობის განსაზღვრის მიზნებისათვის 2025 წლის 28 ოქტომბრის ჩათვლით პერიოდი. საგადასახადო შემოწმების შედეგებზე 2025 წლის 25 დეკემბერს შედგენილ იქნა საგადასახადო შემოწმების აქტი, გამოიცა 2025 წლის 26 დეკემბრის №28608 ბრძანება და ამავე თარიღის №006-587 საგადასახადო მოთხოვნა, რომლის მიხედვით გადასახადის გადამხდელს ბიუჯეტში გადასახდელად დამატებით განესაზღვრა სულ 609 200 ლარი, მათ შორის გადასახადი 308 867 ლარი, ჯარიმა 154 433 ლარი, საურავი 145 900 ლარი.
სადავო საკითხებთან დაკავშირებით, საგადასახადო შემოწმების აქტის მიხედვით, დარიცხვა განპირობებულია შემდეგი გარემოებებით:
1. შპს „-------“ საქმიანობის სფეროს წარმოადგენს საკუთარი ან იჯარით აღებული არასაცხოვრებელი შენობების გაქირავება და მართვა. საწარმო ბუღალტრულ აღრიცხვას არ აწარმოებს, ასევე შესამოწმებელ პერიოდში ბინების გაქირავებიდან მიღებული შემოსავალი არ უფიქსირდება. პირს მხოლოდ განხორციელებული აქვს დამფუძნებლის მიერ საწესდებო კაპიტალში შეტანილი უძრავი ქონების რეალიზაცია, კერძოდ, საცხოვრებელი ბინებისა და ავტოფარეხების. 2021 წლის 16 დეკემბრის კრების ოქმის საფუძველზე შპს „-------“ მიერ განხორციელდა შპს „-------“ საწესდებო კაპიტალში (ე.წ. შავი კარკასის სტანდარტით) უძრავი ქონებების (საცხოვრებელი ბინების) შეტანა, შემდეგი მახასიათებლებით: -------, ------- საცხოვრებელი ბინა (932,5 კვ.მ) და 6 ავტოფარეხი (130,1 კვ.მ). შესამოწმებელ პერიოდში კომპანიის მიერ ნასყიდობის ხელშეკრულებების საფუძველზე ფიზიკურ პირზე რეალიზებული და საჯარო რეესტრით გადაფორმებული აქვს 6 საცხოვრებელი ბინა (590 კვ.მ) და 6 ავტოფარეხი (130კვ.მ) სულ 590 280 აშშ დოლარის ღირებულების ოდენობით. სსიპ საჯარო რეესტრის ეროვნული სააგენტოს მონაცემებისა და დოკუმენტაციის შესწავლით, დადგინდა, რომ პირს სრულად არ აქვს შესრულებული საქმიანობის ფარგლებში წარმოშობილი საგადასახადო კანონმდებლობით დაკისრებული ვალდებულებები. სსიპ საჯარო რეესტრის ეროვნული სააგენტოს ინფორმაცია/დოკუმენტაციით, გადასახადის გადამხდელის მიერ წარმოდგენილი საბანკო ამონაწერებისა და სააღრიცხვო დოკუმენტაციის მიხედვით განისაზღვრა შესამოწმებელ პერიოდში დღგ-ით დასაბეგრი ბრუნვა. შედეგად, საქართველოს საგადასახადო კოდექსის 160-ე, 162-ე, 163-ე და 164-ე მუხლების გათვალისწინებით, პირს დაერიცხა გადასახადი და ჯარიმა ამავე კოდექსის 275-ე მუხლის მიხედვით.
2. შპს „-------" საგადასახადო მონიტორინგის დეპარტამენტის 2025 წლის 21 ოქტომბრის №22834 ბრძანების საფუძველზე ჩატარებული სალაროში ნაღდი ფულის განსაზღვრის პროცედურის შედეგად 2025 წლის 25 ოქტომბრის მდგომარეობით ნაღდი ფულის ნაშთი განისაზღვრა 0 ლარით. საწარმო ბუღალტრულ აღრიცხვას არ აწარმოებს და არ არის წარმოდგენილი ფულადი სახსრების მოძრაობის გაანგარიშება. შესამოწმებელ პერიოდში განხორციელდა ფულადი სახსრების მოძრაობის შესწავლა, რის შედეგადაც დადგინდა, რომ მყიდველების მიერ უძრავი ქონების ღირებულების ანაზღაურება ძირითადად ხდებოდა უნაღდო ანგარიშსწორებით, გარდა რამდენიმე შემთხვევისა, რაც ჩაითვალა ნაღდი ანგარიშსწორებით გადახდილად (ხელშეკრულებებში მითითებულია, რომ საკუთრების უფლების რეგისტრაციისას ნასყიდობის თანხა დაფარულია სრულად). ამასთან, საბანკო დაწესებულებიდან ანგარიშვალდებული პირის, -------, მიერ საქვეანგარიშოდ გამოტანილია თანხა (2000 ლარი) რაზეც არ არის წარმოდგენილი ხარჯვის დამადასტურებელი დოკუმენტი. ზემოაღნიშნულის გათვალისწინებით, შემოწმებით დადგინდა ფულის ნაშთი, რომელმაც 2025 წლის 25 ოქტომბრის მდგომარეობით შეადგინა 169 313 ლარი, გამოვლენილია ფიქტიური ფულის ნაშთი (169313-0) 169 313 ლარის ოდენობით. შემოწმების მიმდინარეობისას საწარმოს დირექტორის მიერ წერილობითი ახსნა-განმარტება წარმოდგენილი არ არის, შესაბამისად, ფიქტიური ნაშთი დაკვალიფიცირდა საწარმოს დირექტორზე და ანგარიშვალდებულ პირზე, -------, გაცემულ ხელფასად. შედეგად, საქართველოს საგადასახადო კოდექსის 101-ე და 154-ე მუხლების გათვალისწინებით, პირს დაერიცხა გადასახადი და ჯარიმა ამავე კოდექსის 275-ე მუხლის მიხედვით.
შემოსავლების სამსახურმა განიხილა წარმოდგენილი საჩივრები და მიიჩნია, რომ გადასახადის გადამხდელის მოთხოვნა არ უნდა დაკმაყოფილდეს შემდეგ გარემოებათა გამო:
პირველ სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.
ამავე კოდექსის 61-ე მუხლის მე-3 ნაწილის თანახმად, საგადასახადო ორგანო უფლებამოსილია პირს დაარიცხოს გადასახადი თავის ხელთ არსებული ინფორმაციის საფუძველზე, თუ პირი მას არ წარუდგენს გადასახადის დასარიცხად საჭირო ინფორმაციას.
საქართველოს საგადასახადო კოდექსის მე-16 მუხლის პირველი ნაწილის თანახმად, საქონლის მიწოდებად ითვლება პირის მიერ სხვა პირისათვის საქონელზე საკუთრების უფლების გადაცემა სასყიდლით (მათ შორის, საქონლის რეალიზაცია, გაცვლა, ხელფასის ან ნატურალური ფორმით ანაზღაურება) ან უსასყიდლოდ.
საქართველოს საგადასახადო კოდექსის 158-ე მუხლის თანახმად, დღგ-ით დასაბეგრ პირად (შემდგომ − დასაბეგრი პირი) განიხილება ნებისმიერი პირი, რომელიც ნებისმიერ ადგილზე დამოუკიდებლად ახორციელებს ნებისმიერი სახის ეკონომიკურ საქმიანობას, მიუხედავად ამ საქმიანობის მიზნისა და შედეგისა.
ამავე კოდექსის 159-ე მუხლის პირველი ნაწილის „ა“ და „ბ“ ქვეპუნქტების თანახმად, დღგ-ით დასაბეგრი ოპერაციებია, დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ საქონლის მიწოდება/მომსახურების გაწევა.
საქართველოს საგადასახადო კოდექსის 160-ე მუხლის პირველი ნაწილის თანახმად, საქონლის მიწოდება არის მატერიალური ქონების განკარგვაზე მესაკუთრის უფლების გადაცემა.
ამავე მუხლის მე-3 ნაწილის „ა“ ქვეპუნქტის თანახმად, ანაზღაურების სანაცვლოდ, საქონლის მიწოდებად ასევე განიხილება დასაბეგრი პირის მიერ საქონლის უსასყიდლოდ მიწოდება, თუ მას ამ საქონელზე ან მასზე გაწეულ ხარჯზე დღგ სრულად ან ნაწილობრივ აქვს ჩათვლილი.
საქართველოს საგადასახადო კოდექსის 163-ე მუხლის პირველი და მე-2 ნაწილების თანახმად:
1. საქონლის მიწოდების/მომსახურების გაწევის დღგ-ით დაბეგვრა ხორციელდება საქონლის მიწოდების/მომსახურების გაწევის მომენტში, თუ ამ მუხლით სხვა რამ არ არის გათვალისწინებული.
2. თუ თანხა სრულად ან ნაწილობრივ ანაზღაურებულია საქონლის მიწოდებამდე/მომსახურების გაწევამდე, ანაზღაურებული თანხის შესაბამისი დღგ-ის გადახდა ხორციელდება ანაზღაურების თანხის გადახდის საანგარიშო პერიოდის მიხედვით, გარდა ამ მუხლის მე-5 და მე-9 ნაწილებით გათვალისწინებული შემთხვევებისა.
ამავე მუხლის მე-6 ნაწილის „ბ“ ქვეპუნქტის თანახმად, თუ არ დადგა ამ მუხლის მე-2 ნაწილით გათვალისწინებული პირობა, დღგ-ით დაბეგვრა ხორციელდება, გარდა ამ კოდექსის 160-ე მუხლის მე-5 ნაწილით გათვალისწინებული შემთხვევისა, უძრავი ნივთის მიწოდებისას, საკუთრების უფლების რეგისტრაციისთვის მარეგისტრირებელ ორგანოში წარსადგენი საკუთრების უფლების დამადასტურებელი დოკუმენტის შედგენის მომენტში, ხოლო, თუ საკუთრების უფლების რეგისტრაცია (გადაცემა) დამოკიდებულია ამ დოკუმენტის მხარის (მხარეების) მიერ გარკვეული ვალდებულების შესრულებაზე ან/და პირობის დადგომაზე − ასეთი ვალდებულების შესრულების/პირობის დადგომის მომენტში.
საქართველოს საგადასახადო კოდექსის 164-ე მუხლის პირველი ნაწილის თანახმად, თუ ამ მუხლით სხვა რამ არ არის გათვალისწინებული, დღგ-ით დასაბეგრი თანხა არის საქონლის მიწოდების/მომსახურების გაწევის სანაცვლოდ მიღებული/მისაღები ანაზღაურება დღგ-ის გარეშე, საქონლის/მომსახურების ფასთან პირდაპირ დაკავშირებული სუბსიდიის ჩათვლით. აღნიშნული დებულება გამოიყენება საქონლის/მომსახურების გაცვლის ოპერაციის (ბარტერული ოპერაციის) შემთხვევაშიც.
საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.
დადგენილი ფაქტობრივი გარემოებაა, რომ 2021 წლის 16 დეკემბრის კრების ოქმის საფუძველზე შპს „-------“ შპს „-------“ საწესდებო კაპიტალში შეიტანა უძრავი ქონება, კერძოდ, საცხოვრებელი ბინები და ავტოფარეხები. შესამოწმებელ პერიოდში გადასახადი გადამხდელმა ნასყიდობის ხელშეკრულების საფუძველზე განახორციელა აღნიშნული უძრავი ქონების რეალიზაცია ფიზიკურ პირზე, რომლის სახელშეკრულებო ფასმაც სულ შეადგინა 590 280 აშშ დოლარი. შემოწმების მიერ სსიპ საჯარო რეესტრის ეროვნული სააგენტოს ინფორმაცია/დოკუმენტაციის, გადასახადის გადამხდელის მიერ წარდგენილი საბანკო ამონაწერებისა და სააღრიცხვო დოკუმენტაციის შესწავლის შედეგად დადგინდა, რომ საწარმოს სრულად არ ჰქონდა შესრულებული საგადასახადო ვალდებულებები. შედეგად, განისაზღვრა შესამოწმებელ პერიოდში პირის დღგ-ით დასაბეგრი ბრუნვა.
გადასახადის გადამხდელის მიერ საჩივარში დაფიქსირებულ პოზიციასთან, შპს „-------“ მიერ ფიზიკური პირისთვის უძრავი ქონების მიწოდების ოპერაციაზე 2009 წლის 7 აგვისტომდე განსაზღვრული საქართველოს საგადასახადო კოდექსით დადგენილი შეღავათების გამოყენების მოთხოვნასთან მიმართებით, შემოსავლების სამსახური განმარტავს, რომ აღნიშნულ ოპერაციებზე ვერ გავრცელდება საქართველოს საგადასახადო კოდექსის 309-ე მუხლის 12-ე ნაწილით გათვალისწინებული შეღავათი, ვინაიდან საგადასახადო შემოწმებით დადგენილი გარემოებაა, რომ შპს „-------“ 2021 წლის 16 დეკემბერს განახორციელა მის საწესდებო კაპიტალში, დამფუძნებლის - შპს „-------“ მიერ შეტანილი უძრავი ქონების რეალიზაცია, ხოლო, საქართველოს საგადასახადო კოდექსის 309-ე მუხლის 12-ე ნაწილით დღგ-ით არ იბეგრება 2009 წლის 7 აგვისტომდე შექმნილი ამხანაგობის მიერ საკუთარი წევრისთვის წილის სანაცვლოდ საქონლის მიწოდება/მომსახურების გაწევა, რასაც განსახილველ შემთხვევაში ადგილი არ ჰქონია.
ამასთან, შემოსავლების სამსახური აღნიშნავს, რომ მომჩივანი საჩივარში ვერ უთითებს ფაქტობრივ და სამართლებრივ გარემოებებზე, თუ რა ნაწილში იქნა განსაზღვრული საგადასახადო ვალდებულებები არამართლზომიერად. ხოლო, დავის წარმოების პროცესში არ ყოფილა წარმოდგენილი რაიმე მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს და გახდებოდა საგადასახადო ვალდებულებების კორექტირების საფუძვერლი.
ზემოაღნიშნული სამართლებრივი ნორმებისა და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივრები დაუსაბუთებელია და არ უნდა დაკმაყოფილდეს.
მე-2 სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.
ამავე კოდექსის 61-ე მუხლის მე-3 ნაწილის თანახმად, საგადასახადო ორგანო უფლებამოსილია პირს დაარიცხოს გადასახადი თავის ხელთ არსებული ინფორმაციის საფუძველზე, თუ პირი მას არ წარუდგენს გადასახადის დასარიცხად საჭირო ინფორმაციას.
საქართველოს საგადასახადო კოდექსის 73-ე მუხლის მე-9 ნაწილის „ბ“ ქვეპუნქტის მიხედვით, საგადასახადო ვალდებულების განსაზღვრის მიზნით საგადასახადო ორგანოს უფლება აქვს სამეურნეო ოპერაციის ფორმისა და შინაარსის გათვალისწინებით შეცვალოს მისი კვალიფიკაცია, თუ ოპერაციის ფორმა არ შეესაბამება მის შინაარსს. ამავე მუხლის მე-4 ნაწილის თანახმად, თუ რაიმე თანხა გამოიყენება კონკრეტული პირის ინტერესებისათვის, ჩაითვლება, რომ ეს თანხა მიღებული აქვს ამ პირს.
საქართველოს საგადასახადო კოდექსის 101-ე მუხლის პირველი ნაწილის თანახმად, ხელფასის სახით მიღებულ შემოსავლებს განეკუთვნება ფიზიკური პირის მიერ დაქირავებით მუშაობის შედეგად მიღებული ნებისმიერი საზღაური ან სარგებელი, მათ შორის, წინა სამუშაო ადგილიდან პენსიის ან სხვა სახით მიღებული შემოსავალი, ან შემოსავალი მომავალი სამუშაო ადგილიდან.
საქართველოს საგადასახადო კოდექსის მე-12 მუხლის პირველი ნაწილის „გ“ ქვეპუნქტის თანახმად, დაქირავებით მუშაობად ითვლება ფიზიკური პირის მიერ საწარმოს ან ორგანიზაციის ხელმძღვანელად (დირექტორად) ყოფნა ან ხელმძღვანელის (დირექტორის) მოვალეობის შესრულება.
საქართველოს საგადასახადო კოდექსის 154-ე მუხლის პირველი ნაწილის „ა“ ქვეპუნქტის თანახმად, გადახდის წყაროსთან გადასახადის დაკავება ევალება საგადასახადო აგენტს, რომელიც არის იურიდიული პირი, საწარმო/ორგანიზაცია ან მეწარმე ფიზიკური პირი, რომელიც დაქირავებულს უხდის ხელფასს.
ამავე მუხლის მე-2 ნაწილის „ა“ და „ბ“ ქვეპუნქტების თანახმად:
ა) გადასახადის დაკავებისა და ბიუჯეტში მისი გადარიცხვისათვის პასუხისმგებლობა ეკისრება შემოსავლის გადამხდელს;
ბ) გადასახადის თანხის დაუკავებლობის შემთხვევაში შემოსავლის გადამხდელი ვალდებულია ბიუჯეტში შეიტანოს დაუკავებელი გადასახადის თანხა ფაქტობრივად გადახდილი ანაზღაურების შესაბამისად და მასთან დაკავშირებული სანქციები.
საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.
დადგენილი ფაქტობრივი გარემოებაა, რომ გადასახადის გადამხდელი შესამოწმებელ პერიოდში არ აწარმოებდა ბუღალტრულ აღრიცხვას და შემოწმებისთვის არ წარუდგენია ფულადი სახსრების მოძრაობის გაანგარიშება. შპს „-------" საგადასახადო მონიტორინგის დეპარტამენტის 2025 წლის 21 ოქტომბრის №22834 ბრძანების საფუძველზე ჩატარებული სალაროში ნაღდი ფულის განსაზღვრის პროცედურის შედეგად კი 2025 წლის 25 ოქტომბრის მდგომარეობით კომპანიის ნაღდი ფულის ნაშთი განისაზღვრა 0 ლარით. ამასთან, კონტრაჰენტების მიერ უძრავი ქონების ღირებულების ანაზღაურება ძირითადად ხდებოდა უნაღდო ანგარიშსწორებით, გარდა რამდენიმე შემთხვევისა, რაც ჩაითვალა ნაღდი ანგარიშსწორებით გადახდილად, ვინაიდან ხელშეკრულებებში მითითებულია, რომ საკუთრების უფლების რეგისტრაციისას ნასყიდობის თანხა დაფარულია სრულად. ასევე, კომპანიიდან ანგარიშვალდებული პირის, მიერ საქვეანგარიშოდ გატანილია (2000 ლარი), რაზეც შემოწმებისთვის არ არის წარდგენილი ხარჯვის დამადასტურებელი დოკუმენტი. ზემოაღნიშნულის გათვალისწინებით, შემოწმებით დადგინდა ფულის ნაშთი, რომელმაც 2025 წლის 25 ოქტომბრის მდგომარეობით შეადგინა 169 313 ლარი. აღნიშნული დაკვალიფიცირდა საწარმოს დირექტორსა და ანგარიშვალდებულ პირზე გაცემულ ხელფასად, შესაბამისად დაექვემდებარა საშემოსავლო გადასახადით დაბეგვრას.
გადასახადის გადამხდელის მიერ საჩივარში დაფიქსირებულ პოზიციასთან, კომპანიის მიერ რეალიზებულ ბინებზე სახელშეკრულებო ფასის 2022 წლამდე პერიოდში, წინარე ნასყიდობის ხელშეკრულების საფუძველზე გადახდასთან დაკავშირებით, შემოსავლების სამსახური ყურადღებას ამახვილებს აუდიტის დეპარტამენტის მიერ მოწოდებულ ინფორმაციაზე, რომლის მიხედვითაც შპს „-------” შემოწმების მიმდინარეობისას და აღნიშნული საკითხის გასაჩივრებისას არ წარუდგენია დოკუმენტები, რომლითაც დადასტურდებოდა გაყიდული ბინების ღირებულების ნაწილის 2022 წლამდე პერიოდში გადახდის ფაქტი.
ამასთან, შემოსავლების სამსახური აღნიშნავს, რომ მომჩივანი საჩივარში ვერ უთითებს ფაქტობრივ და სამართლებრივ გარემოებებზე, თუ რა ნაწილში იქნა განსაზღვრული საგადასახადო ვალდებულებები არამართლზომიერად. ხოლო, დავის წარმოების პროცესში არ ყოფილა წარმოდგენილი რაიმე მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს.
ზემოაღნიშნული სამართლებრივი ნორმებისა და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივრები დაუსაბუთებელია და არ უნდა დაკმაყოფილდეს.
საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ :
1. შპს „-------“ (ს/ნ -------) საჩივრები არ დაკმაყოფილდეს;
2. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. №16) ან სასამართლოში (მის.: ქ. თბილისი, დავით აღმაშენებლის ხეივანი №64), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.
სადავო საკითხები:
1. დამფუძნებლის მიერ კომპანიის კაპიტალში შეტანილი უძრავი ქონების რეალიზაციის შედეგად დღგ-ში განსაზღვრული საგადასახადო ვალდებულებები.
2. შემოწმების მიერ გამოვლენილი ფულის ნაშთის დირექტორზე გაცემულ ხელფასად კვალიფიკაცია.
ფაქტობრივი გარემოებები
1. მომჩივანის საქმიანობის სფეროს წარმოადგენს საკუთარი ან იჯარით აღებული არასაცხოვრებელი შენობების გაქირავება და მართვა. საწარმო ბუღალტრულ აღრიცხვას არ აწარმოებს, ასევე შესამოწმებელ პერიოდში ბინების გაქირავებიდან მიღებული შემოსავალი არ უფიქსირდება. პირს მხოლოდ განხორციელებული აქვს დამფუძნებლის მიერ საწესდებო კაპიტალში შეტანილი უძრავი ქონების რეალიზაცია, შესამოწმებელ პერიოდში კომპანიის მიერ ნასყიდობის ხელშეკრულებების საფუძველზე ფიზიკურ პირზე რეალიზებული და საჯარო რეესტრით გადაფორმებული აქვს 6 საცხოვრებელი ბინა და 6 ავტოფარეხი. სსიპ საჯარო რეესტრის ეროვნული სააგენტოს მონაცემებისა და დოკუმენტაციის შესწავლით, დადგინდა, რომ პირს სრულად არ აქვს შესრულებული საქმიანობის ფარგლებში წარმოშობილი საგადასახადო კანონმდებლობით დაკისრებული ვალდებულებები. შედეგად, პირს დაერიცხა გადასახადი და ჯარიმა.
2. საწარმო ბუღალტრულ აღრიცხვას არ აწარმოებს და არ არის წარმოდგენილი ფულადი სახსრების მოძრაობის გაანგარიშება. შესამოწმებელ პერიოდში განხორციელდა ფულადი სახსრების მოძრაობის შესწავლა, რის შედეგადაც დადგინდა, რომ მყიდველების მიერ უძრავი ქონების ღირებულების ანაზღაურება ძირითადად ხდებოდა უნაღდო ანგარიშსწორებით, გარდა რამდენიმე შემთხვევისა, რაც ჩაითვალა ნაღდი ანგარიშსწორებით გადახდილად. ამასთან, საბანკო დაწესებულებიდან ანგარიშვალდებული პირის მიერ საქვეანგარიშოდ გამოტანილია თანხა რაზეც არ არის წარმოდგენილი ხარჯვის დამადასტურებელი დოკუმენტი. ზემოაღნიშნულის გათვალისწინებით, შემოწმებით დადგინდა ფულის ნაშთი, რაც დაკვალიფიცირდა საწარმოს დირექტორზე და ანგარიშვალდებულ პირზე გაცემულ ხელფასად. შედეგად, პირს დაერიცხა გადასახადი და ჯარიმა.
გადაწყვეტილება
სამართლებრივი ნორმებისა და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივრები დაუსაბუთებელია და არ უნდა დაკმაყოფილდეს.
დასაბუთება
შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 73(9); 101; 154; 159; 163; 164; 309(12)