გადაწყვეტილება №26808/2/2026

N 26808/2/2026

31 მარტი 2026

გ ა დ ა წ ყ ვ ე ტ ი ლ ე ბ ა

 

მომჩივანი: შპს ----- (ს/ნ ----- )

მოპასუხე: საბაჟო დეპარტამენტი.

 

საქართველოს ფინანსთა სამინისტროსთან არსებულმა დავების განხილვის საბჭომ 19.03.2026 წელს განიხილა და მიიღო გადაწყვეტილება შპს ----- 04.03.2026 წელს რეგისტრირებულ საჩივარზე (რეგისტრაციის N 26808/2/2026).

 

დავის საგანი:

საბაჟო დეკლარაციებში არასწორი მონაცემის შეტანით იმპორტის გადასახდელის ოდენობის შემცირება.

 

გასაჩივრებული გადაწყვეტილება:

1. საბაჟო დეპარტამენტის 25.12.2025 წლის N 081-363 საგადასახადო მოთხოვნა;

2. შემოსავლების სამსახურის 19.02.2026 წლის N 3810 ბრძანება.

 

დარიცხული თანხა: 16 125.85 ლარი.

მათ შორის:

დღგ - 10 080.16 ლარი;

ჯარიმა - 2 133.7 ლარი;

საურავი - 3 911.99 ლარი;.

 

ფაქტების აღწერა/დარიცხვის საფუძვლები.

გადასახადის გადამხდელის საქმიანობაა ფარმაცევტული პრეპარატების წარმოება.

საბაჟო დეპარტამენტის 03.12.2025 წლის N 26539 ბრძანების საფუძველზე ჩატარდა კომპანიის მიერ N -----/----- 24.03.2022წ., N -----/----- 29.04.2022წ., N -----/----- 06.01.2023წ. და N ----/----- 03.05.2023წ. საბაჟო დეკლარაციებით გაფორმებული საქონლის გაშვების შემდგომი კამერალური შემოწმება. შემოწმების შედეგები აისახა 25.12.2025 წლის N ----- საქონლის გაშვების შემდგომი კონტროლის შემოწმების აქტში, საიდანაც ირკვევა რომ:

მომჩივნის სახელზე გაფორმებული N -----/----- 24.03.2022წ., N -----/----- 29.04.2022წ., N -----/----- 06.01.2023წ. და N -----/----- 03.05.2023წ. საქონლის საბაჟო დეკლარაციების საფუძველზე თავისუფალ მიმოქცევაში იმპორტის გადასახდელისგან გათავისუფლების პირობით (მიზნობრივი დანიშნულებით შემოტანა) გაეშვა სხვადასხვა ფარმაცევტული სუბსტანციები, მათ შორის: 15 235,88 ლარის საბაჟო ღირებულების „-----“; 9 715,5 ლარის საბაჟო ღირებულების „------“; 9 480,1 ლარის საბაჟო ღირებულების „-----“ და ჯამურად, 21 571,05 ლარის საბაჟო ღირებულების „-----“.

აღნიშნული საბაჟო დეკლარაციები შეირჩა მწვანე დერეფანში.

„-----“-ს N -----/----- 06.01.2023წ. საქონლის საბაჟო დეკლარაციაში განესაზღვრა 29420000000 სეს ესნ კოდი, „-----“-ს N -----/----- 24.03.2022წ., N -----/----- 29.04.2022წ. და N -----/----- 03.05.2023წ. საქონლის საბაჟო დეკლარაციებში განესაზღვრა 29420000000 და 29419000000 სეს ესნ კოდები, „-----“-ს N -----/----- 24.03.2022წ. საქონლის საბაჟო დეკლარაციაში განესაზღვრა 29372200000 სეს ესნ კოდი, „-----“-ს N ------ 06.01.2023წ. საქონლის საბაჟო დეკლარაციებში განესაზღვრა 29221900000 და მათი იმპორტი გათავისუფლდა დამატებული ღირებულების გადასახადისგან.

საგადასახადო კოდექსის 173-ე მუხლი „ა“ პუნქტისა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრისა და საქართველოს ფინანსთა მინისტრის 2020 წლის 29 დეკემბერის N 01-132/ნ/322 ერთობლივი ბრძანების თანახმად, 29221900000 სეს ესნ კოდით კლასიფიცირებული საქონლის იმპორტი თავისუფლდება დამატებული ღირებულების გადასახადისაგან იმ შემთხვევაში, თუ ის წარმოადგენს ტრიეთანოლამინის მარილს. ამავდროულად, საბაჟო დეკლარაციის თანმხლები დოკუმენტაციის შემოწმებისას, არ იკვეთება ინფორმაცია/დოკუმენტაცია, რომელიც დაადასტურებს, რომ ტილორონის დიჰიდროქლორიდი („-----“) წარმოადგენს ტრიეთანოლამინის მარილს. აღსანიშნავია, რომ სსიპ სამედიცინო და ფარმაცევტული საქმიანობის რეგულირების სააგენტოსგან შემოსული 13.08.2024 წლის N ----- (შემ. N ----- 08.2024წ.) წერილის თანახმად, „ტილორონის დიჰიდროქლორიდი და ტილორონის ტრიეთანოლამინი წარმოადგენენ ტილორონის სხვადასხვა მარილებს“ და ტრიეთანოლამინის მარილის შემცველი ფარმაცევტული პროდუქტი არ არის დაშვებული/რეგისტრირებული საქართველოს ბაზარზე. ასევე, არ არსებობს დოკუმენტი/ინფორმაცია, რომელიც დაადასტურებდა, რომ „------“ წარმოადგენს ტრიეთანოლამინის მარილს. ამავდროულად, „-----“ კლასიფიცირდება 29224985000 სასაქონლო ქვესუბპოზიციაში, თუმცა, ზემოაღნიშნული ერთობლივი ბრძანების ნუსხაში მითითებული სეს ესნ კოდი არ ფიქსირდებოდა.

შემოწმების ფარგლებში, საბაჟო კოდექსის მე-13 მუხლის შესაბამისად, დეკლარანტისაგან (საბაჟო დეპარტამენტის 03.12.2025 წლის N ----- წერილით) სხვადასხვა დოკუმენტაციასთან ერთად გამოთხოვილი იქნა ზემოაღნიშნულ საქონლის საბაჟო დეკლარაციებში მითითებული სუბსტანციების სპეციფიკაციები ან სხვა დოკუმენტაცია, რომელშიც მითითებული იქნებოდა საქონლის CAS ნომრები (შესაძლებლობის შემთხვევაში). დეკლარანტმა (ელ. განცხადებები -----) ვერ შეძლო დოკუმენტაციის სრულყოფილად მიწოდება.

საბაჟო ღირებულებისა და საქონლის კლასიფიკაციის სამმართველოს N ----- 25.12.2025წ., N ----- 30.08.2024წ. და N ----- 20.12.2024წ. წერილებიდან ირკვევა, რომ -----“ კლასიფიცირდება 29221900000 სასაქონლო ქვესუბპოზიციაში, ფარმაცევტული სუბსტანცია „-----“ კლასიფიცირდება 39139000000 სასაქონლო ქვესუბპოზიციაში, „-----“ კლასიფიცირდება 29224985000 სასაქონლო ქვესუბპოზიციაში, „-----“ კლასიფიცირდება 29221900000 სასაქონლო ქვესუბპოზიციაში. შესაბამისად, საქონლის იმპორტი არ უნდა გათავისუფლებულიყო დამატებული ღირებულების გადასახადისაგან.

შემოწმების შედეგად, მოპოვებულ დოკუმენტებზე/ინფორმაციაზე დაყრდნობით, საბაჟო დეკლარაციებში გამოიკვეთა იმპორტის გადასახდელის შემცირება, კომპანიას დამატებით გადასახდელად დაერიცხა სულ იმპორტის გადასახდელი (დღგ) 10 080,16 ლარი, ხოლო სანქცია ჯარიმის სახით დაეკისრა საბაჟო კოდექსის 167-ე მუხლის პირველი ნაწილის შესაბამისად 2 133,7 ლარი. ამავდროულად, ვინაიდან, N ----- 24.03.2022წ. და N ----- 06.01.2023წ. საბაჟო დეკლარაციებში არასწორი მონაცემის შეტანით იმპორტის გადასახდელის ოდენობა შემცირდა იმ საქონელზე, რომლის საბაჟო ღირებულება აჭარბებს 15 000 ლარს, მოცემული სამართალდარღვევისთვის საბაჟო კოდექსის 167-ე მუხლის პირველი ნაწილით გათვალისწინებული სანქციის დაკისრების საკითხი (ამავე მუხლის შენიშვნის გათვალისწინებით) გადაწყდება საქმეზე საგამოძიებო ორგანოს ან სასამართლოს მიერ შესაბამისი გადაწყვეტილების მიღების შემდეგ.

შემოწმების აქტის საფუძველზე გამოიცა საბაჟო დეპარტამენტის 25.12.2025 წლის N 28403 ბრძანება და ამავე თარიღის N 081-363 საგადასახადო მოთხოვნა, რა გასაჩივრდა შემოსავლების სამსახურში, რომლის 19.02.2026 წლის N 3810 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი:

შემოსავლების სამსახური მიუთითებს საგადასახადო კოდექსის 302-ე მუხლის მე-6 ნაწილზე, საბაჟო კოდექსის 27-ე მუხლის პირველი ნაწილის „თ“ ქვეპუნქტზე, 30-ე მუხლის მე-2 ნაწილზე, ამავე მუხლის მე9, მე-10, მე-11 და მე-12 ნაწილებზე, 34-ე მუხლზე, 35-ე მუხლის პირველ, მე-3 და მე-4 ნაწილებზე, საგადასახადო კოდექსის 173-ე მუხლი „ა“ ქვეპუნქტზე, „იმ საქონლის ნუსხის დამტკიცების თაობაზე, რომელთა მიწოდება ან/და იმპორტი გათავისუფლებულია დამატებული ღირებულების გადასახადისაგან“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრისა და საქართველოს ფინანსთა მინისტრის 2020 წლის 29 დეკემბერის N 01-132/ნ/322 ერთობლივი ბრძანებით დამტკიცებული სამკურნალო/ფარმაცევტული მიზნებისათვის განკუთვნილი, საგარეო - ეკონომიკური საქმიანობის ეროვნული სასაქონლო ნომენკლატურის 28-ე და 29-ე ჯგუფებში შემავალი ნედლეულისა და სუბსტანციების ნუსხაზე (დანართი N 1), „საქართველოს საბაჟო ტერიტორიაზე საქონლის გადაადგილებისა და გაფორმების შესახებ ინსტრუქციების დამტკიცების თაობაზე“ საქართველოს ფინანსთა მინისტრის 2019 წლის 29 აგვისტოს N 257 ბრძანებით დამტკიცებული „საბაჟო კონტროლის შესახებ“ ინსტრუქციის (დანართი N 2) 39-ე მუხლის პირველი პუნქტის „გ“ ქვეპუნქტზე, ამავე ინსტრუქციის მე-41 მუხლის მე-3 პუნქტზე, საბაჟო კოდექსის 163-ე მუხლის პირველ ნაწილზე, 167-ე მუხლის პირველ ნაწილზე, 49-ე მუხლის და მე-2 ნაწილებზე, საგადასახადო კოდექსის 64-ე მუხლზე, 272-ე მუხლზე, დადგენილ ფაქტობრივ გარემოებებზე და მიუთითებს, რომ მომჩივნის მხრიდან ადგილი ჰქონდა საბაჟო დეკლარაციასა და მის თანმხლებ დოკუმენტში არასწორი მონაცემის არსებობისას იმპორტის გადასახდელის ოდენობის შემცირების ფაქტს, რაც არის პირის მართლსაწინააღმდეგო ქმედება (მოქმედება ან უმოქმედობა), რომლის ჩადენისთვისაც საქართველოს საბაჟო კოდექსით გათვალისწინებულია პასუხისმგებლობა. აღნიშნულის გათვალისწინებით, მომჩივნისთვის სადავო აქტებით დამატებით გადასახდელად იმპორტის გადასახდელების დარიცხვა და N ----- 29.04.2022წ. და N ----- 03.05.2023წ. საქონლის საბაჟო დეკლარაციებში არასწორი მონაცემის შეტანით იმპორტის გადასახდელის ოდენობის შემცირების ფაქტზე საბაჟო კოდექსის 167-ე მუხლის პირველი ნაწილის შესაბამისად ჯარიმის დაკისრება მართლზომიერია.

ზემოაღნიშნული სამართლებრივი ნორმებისა და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ სადავო ადმინისტრაციული აქტები და დარიცხული თანხები შეესაბამება საქართველოს კანონმდებლობით გათვალისწინებულ მოთხოვნებს და არ არსებობს საჩივრის დაკმაყოფილების საფუძველი.

 

მომჩივნის არგუმენტაცია:

აქტში აღწერილი ფაქტობრივი გარემოებების მიხედვით, აღნიშნული საბაჟო დეკლარაციების საფუძველზე თავისუფალ მიმოქცევაში, იმპორტის გადასახდელებისგან გათავისუფლების პირობით (მიზნობრივი დანიშნულებით), გაეშვა სხვადასხვა ფარმაცევტული სუბსტანციები.

აღნიშნული საბაჟო დეკლარაციები შერჩეულ იქნა ე.წ. „მწვანე დერეფანში“, რაც „საქართველოს საბაჟო ტერიტორიაზე საქონლის გადაადგილებისა და გაფორმების შესახებ ინსტრუქციების დამტკიცების თაობაზე“ საქართველოს ფინანსთა მინისტრის 2019 წლის 29 აგვისტოს N 257 ბრძანებით დამტკიცებული მე-2 დანართის, მე-2 თავის, მე-5 მუხლის მე-3 პუნქტის „ა“ ქვეპუნქტის შესაბამისად, გულისხმობს საქონლის გაშვებას საბაჟო დეკლარაციისა და თანხმლები დოკუმენტების კამერალური შემოწმებისა და საქონლის ფიზიკური დათვალიერების გარეშე. აღნიშნული პროცედურა წარმოადგენს საბაჟო ორგანოს მიერ რისკების შეფასების საფუძველზე მიღებულ გადაწყვეტილებას, რომლის ფარგლებშიც საქონელი მიჩნეულ იქნა არასარისკოდ. ვინაიდან საბაჟო დეკლარაციებს განესაზღვრა „მწვანე დერეფანი“, არც ერთ შემთხვევაში არ განხორციელებულა საქონლის დათვალიერება, ექსპერტიზის დანიშვნა ან სხვა დამატებითი საბაჟო კონტროლის ღონისძიება, ხოლო საქონელი დეკლარანტს გადაეცა დამატებითი საბაჟო პროცედურების გარეშე. აღნიშნული გარემოება ადასტურებს, რომ საბაჟო ორგანოს მხრიდან დეკლარაციის მიღების ეტაპზე არ არსებობდა არც ეჭვი საქონლის კლასიფიკაციის, არც მისი ღირებულების და არც მიზნობრივი დანიშნულების კანონიერებასთან დაკავშირებით. ამასთან, საბაჟო დეპარტამენტში წარდგენილი საბაჟო დეკლარაციების თანხმლებ დოკუმენტაციაში მკაფიოდ იკვეთებოდა იმპორტირებული ფარმაცევტული სუბსტანციების მიზნობრივი დანიშნულება.

„მწვანე დერეფნის“ პროცედურა არ ითვალისწინებს შემოტანილი საქონლის სავალდებულო დათვალიერებას, ექსპერტიზის ჩატარებას ან სეს ესნ-ის კოდის დამატებით დადგენას საბაჟო ორგანოს მიერ. აღნიშნული სუბსტანციები საქართველოს ტერიტორიაზე შემოტანილია სხვადასხვა საანგარიშო წლებში - 2022 და 2023 წლებში, ხოლო საქონლის გაშვების შემდგომი კამერალური შემოწმება ინიცირებულ იქნა მხოლოდ 03.12.2025 წელს (საბაჟო დეპარტამენტის N 26539 ბრძანების საფუძველზე), ანუ საქონლის საქართველოში შემოტანიდან თითქმის სამი წლის გასვლის შემდეგ. კონტროლის ასეთ დაგვიანებულ ეტაპზე განხორციელება მნიშვნელოვნად ზღუდავს დეკლარანტის დაცვის შესაძლებლობას და ეწინააღმდეგება სამართლებრივი განსაზღვრულობისა და ლეგიტიმური მოლოდინის პრინციპებს. დამატებით აღსანიშნავია, რომ კომპანია ამ ეტაპზე არ ახორციელებს ეკონომიკურ საქმიანობას და არ ფლობს მოქმედ ლიცენზიებს, თუმცა კომპანიის არქივში ინახება ხარისხის დამადასტურებელი დოკუმენტაცია (COA სერტიფიკატები), რომლებიც ადასტურებს იმპორტირებული ფარმაცევტული სუბსტანციების შესაბამისობას დადგენილ სტანდარტებთან. იმპორტირებული ყველა სუბსტანცია გამოყენებული იქნა სწორედ იმ მიზნობრივი დანიშნულებით, რომლის საფუძველზეც განხორციელდა მათი იმპორტი. ამ პირობებში, მტკიცება, თითქოს ზემოაღნიშნულ საბაჟო დეკლარაციებში ადგილი ჰქონდა იმპორტის გადასახდელების შემცირებას, არ ეფუძნება არც ფაქტობრივ და არც სამართლებრივ გარემოებებს. საგადასახადო ორგანოს მიერ განხორციელებული დარიცხვა ეფუძნება შეფასებით მიდგომას და ჰიპოთეტურ ვარაუდებს, ხოლო არა კონკრეტულ, ობიექტურ მტკიცებულებებს, რის გამოც აღნიშნულ დასკვნებს კომპანია არ ეთანხმება.

აღნიშნული ფაქტობრივი გარემოებებისა და წარდგენილი მტკიცებულებების ერთობლივი შეფასების საფუძველზე, კომპანია ითხოვს სადავო აქტების გაუქმებას. ასევე, მიუთითებს, რომ საჩივრის განხილვისას, დავის განმხილველმა ორგანომ უნდა იხელმძღვანელოს სამართლიანობის, ობიექტურობის, მხარეთა თანასწორობისა და მიუკერძოებლობის პრინციპებით და მხედველობაში მიიღოს, რომ საქონლის გაშვების შემდგომი კონტროლი განხორციელდა საგადასახადო კანონმდებლობით დადგენილი ვადის ფარგლებში, თუმცა მისი ინიცირება მოხდა ვადის ბოლო ეტაპზე, რაც მნიშვნელოვნად ზღუდავს დეკლარანტის შესაძლებლობას, სრულად უზრუნველყოს საკუთარი პოზიციის დადასტურება. აღნიშნული გარემოება, სხვა ფაქტობრივ და სამართლებრივ გარემოებებთან ერთობლიობაში, უნდა შეფასდეს დარიცხვის კანონიერებისა და დასაბუთებულობის განსაზღვრისას. შესაბამისად, დავების განხილვის საბჭომ უნდა მიიღოს დასაბუთებული და ობიექტური გადაწყვეტილება და უზრუნველყოს სადავო საგადასახადო მოთხოვნით დარიცხული გადასახდელის, ჯარიმის და საურავის გაუქმება.

 

დავების განხილვის საბჭო:

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:

საბაჟო კოდექსის 27-ე მუხლის პირველი ნაწილის „თ“ ქვეპუნქტის შესაბამისად, საბაჟო ორგანო უფლებამოსილია განახორციელოს საბაჟო კონტროლი ნებისმიერი ფორმით, მათ შორის განახორციელოს საქონლის გაშვების შემდგომი კონტროლი.

საბაჟო კოდექსის 30-ე მუხლის მე-9, მე-10, მე-11 და მე-12 ნაწილების თანახმად, თუ საქონლის გაშვების შემდგომი კონტროლის შედეგად გამოვლინდა პირისთვის იმპორტის გადასახდელის დარიცხვის ან/და საბაჟო სანქციის შეფარდების აუცილებლობა, საბაჟო ორგანო იღებს გადაწყვეტილებას პირისთვის იმპორტის გადასახდელის დარიცხვის ან/და საბაჟო სანქციის შეფარდების შესახებ. ამ მუხლის მე-9 ნაწილით გათვალისწინებულ შემთხვევაში შემოწმების აქტი და მის საფუძველზე მიღებული გადაწყვეტილება პირს წარედგინება საქართველოს საგადასახადო კოდექსის 64-ე მუხლით გათვალისწინებულ საგადასახადო მოთხოვნასთან (შემდგომ − საგადასახადო მოთხოვნა) ერთად. შემოწმების აქტის საფუძველზე იმპორტის გადასახდელის დარიცხვის და შესაბამისი საგადასახადო მოთხოვნის წარდგენის ხანდაზმულობის ვადაა 3 წელი. ეს ვადა არ გამოიყენება ამ კოდექსის 141-ე მუხლის მე-3 ნაწილით გათვალისწინებულ შემთხვევაში. ამ მუხლის მე-11 ნაწილით დადგენილი ვადა აითვლება იმპორტის გადასახდელის გადახდის ვალდებულების წარმოშობის შესაბამისი კალენდარული წლის დასრულებიდან.

საგადასახადო კოდექსის 173-ე მუხლის „ა.ა“ ქვეპუნქტის თანახმად, დღგ-ისგან გათავისუფლებულია საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრისა და საქართველოს ფინანსთა მინისტრის ერთობლივი ბრძანებით დადგენილი ნუსხის მიხედვით სამკურნალო/ფარმაცევტული მიზნისთვის განკუთვნილი სეს ესნ-ის 28-ე და 29-ე ჯგუფებით გათვალისწინებული ნედლეულის ან/და სუბსტანციების იმპორტი.

საბაჟო კოდექსის 35-ე მუხლის მე-3 და მე-4 ნაწილების მიხედვით, საქონლის დეკლარირებისას სასაქონლო კოდს სეს ესნ-ის შესაბამისად განსაზღვრავს დეკლარანტი. საბაჟო ორგანო აკონტროლებს დეკლარანტის მიერ განსაზღვრული სასაქონლო კოდის სისწორეს.

„იმ საქონლის ნუსხის დამტკიცების თაობაზე, რომელთა მიწოდება ან/და იმპორტი გათავისუფლებულია დამატებული ღირებულების გადასახადისაგან“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრისა და საქართველოს ფინანსთა მინისტრის 2020 წლის 29 დეკემბრის N 01-132/ნ/322 ერთობლივი ბრძანებით დამტკიცებულია „სამკურნალო/ფარმაცევტული მიზნებისათვის განკუთვნილი, საგარეო - ეკონომიკური საქმიანობის ეროვნული სასაქონლო ნომენკლატურის 28-ე და 29-ე ჯგუფებში შემავალი ნედლეულისა და სუბსტანციების ნუსხა, რომელთა იმპორტი გათავისუფლებულია დამატებული ღირებულების გადასახადისაგან (დანართი N 1).

ხსენებული ნუსხის მიხედვით:

IX. ნაერთები აზოტშემცველი ფუნქციური ჯგუფით

2922 ამინონაერთები, ჟანგბადშემცველი ფუნქციური ჯგუფის შემცველი:

2922 19 000 00* – – დანარჩენი (ტრეითანოლამინის მარილები)

XI. პროვიტამინები, ვიტამინები და ჰორმონები 2937 22 000 00 – – ქორდიკოსტეროიდული ჰორმონების ჰალოგენირებული წარმოებულები

XIII. ორგანული ნაერთები დანარჩენი

2941 90 000 00 – დანარჩენი

2942 00 000 00 ორგანული ნაერთები დანარჩენი.

შენიშვნა: 1. „*“-თი აღნიშნულ სასაქონლო კოდში კლასიფიცირებული საქონლიდან გათავისუფლება შეეხება მხოლოდ იმ საქონელს, რომელთა დასახელებაც ფრჩხილებშია ჩასმული.

საბჭოს სხდომაზე მომჩივნის წარმომადგენლებმა აღნიშნეს და საჩივარშიც მითითებულია, რომ „მწვანე დერეფანი“ გულისხმობს საქონლის გაშვებას საბაჟო დეკლარაციისა და თანხმლები დოკუმენტების კამერალური შემოწმებისა და საქონლის ფიზიკური დათვალიერების გარეშე. აღნიშნული პროცედურა წარმოადგენს საბაჟო ორგანოს მიერ რისკების შეფასების საფუძველზე მიღებულ გადაწყვეტილებას, რომლის ფარგლებშიც საქონელი მიჩნეულ იქნა არასარისკოდ. აღნიშნული გარემოება ადასტურებს, რომ საბაჟო ორგანოს მხრიდან დეკლარაციის მიღების ეტაპზე არ არსებობდა არც ეჭვი საქონლის კლასიფიკაციის, არც მისი ღირებულების და არც მიზნობრივი დანიშნულების კანონიერებასთან დაკავშირებით. აღნიშნული სუბსტანციები საქართველოს ტერიტორიაზე შემოტანილია სხვადასხვა საანგარიშო წლებში - 2022 და 2023 წლებში, ხოლო საქონლის გაშვების შემდგომი კამერალური შემოწმება ინიცირებულ იქნა მხოლოდ 03.12.2025 წელს, კონტროლის ასეთ დაგვიანებულ ეტაპზე განხორციელება მნიშვნელოვნად ზღუდავს დეკლარანტის დაცვის შესაძლებლობას და ეწინააღმდეგება სამართლებრივი განსაზღვრულობისა და ლეგიტიმური მოლოდინის პრინციპებს. კომპანიის არქივში ინახება ხარისხის დამადასტურებელი დოკუმენტაცია (COA სერტიფიკატები), რომლებიც ადასტურებს იმპორტირებული ფარმაცევტული სუბსტანციების შესაბამისობას დადგენილ სტანდარტებთან. იმპორტირებული ყველა სუბსტანცია გამოყენებული იქნა სწორედ იმ მიზნობრივი დანიშნულებით, რომლის საფუძველზეც განხორციელდა მათი იმპორტი. ამასთან, კომპანიისთვის მნიშვნელოვანია დაკისრებული ჯარიმისგან გათავისუფლება.

საქონლის საბაჟო დეკლარაციებში მითითებულია შემდეგი სეს ესნ კოდები:

- „-----“ 29420000000 სეს ესნ კოდი; -„-----“ 29420000000 და 29419000000 სეს ესნ კოდები; - „-----“ 29372200000 სეს ესნ კოდი; - „-----“ 29221900000 სეს ესნ კოდი.

საბაჟო ღირებულებისა და საქონლის კლასიფიკაციის სამმართველოს N ----- 25.12.2025წ., N ----- 30.08.2024წ. და N ----- 20.12.2024წ. წერილებიდან ირკვევა, რომ:

,,------“ კლასიფიცირდება 29221900000 სასაქონლო ქვესუბპოზიციაში;

- „-----“ კლასიფიცირდება 39139000000 სასაქონლო ქვესუბპოზიციაში;

- „-----“ კლასიფიცირდება 29224985000 სასაქონლო ქვესუბპოზიციაში;

- „-----“ კლასიფიცირდება 29221900000 სასაქონლო ქვესუბპოზიციაში.

საბაჟო დეპარტამენტი მიუთითებს, რომ საგადასახადო კოდექსის 173-ე მუხლი „ა“ პუნქტისა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრისა და საქართველოს ფინანსთა მინისტრის 2020 წლის 29 დეკემბერის N 01-132/ნ/322 ერთობლივი ბრძანების თანახმად, 29221900000 სეს ესნ კოდით კლასიფიცირებული საქონლის იმპორტი თავისუფლდება დამატებული ღირებულების გადასახადისაგან იმ შემთხვევაში, თუ ის წარმოადგენს ტრიეთანოლამინის მარილს. ამავდროულად, საბაჟო დეკლარაციის თანმხლები დოკუმენტაციის შემოწმებისას, არ იკვეთება ინფორმაცია/დოკუმენტაცია, რომელიც დაადასტურებს, რომ ტილორონის დიჰიდროქლორიდი („-----“) წარმოადგენს ტრიეთანოლამინის მარილს. აღსანიშნავია, რომ სსიპ სამედიცინო და ფარმაცევტული საქმიანობის რეგულირების სააგენტოსგან შემოსული 13.08.2024 წლის N ----- (შემ. N ----- 15.08.2024წ.) წერილის თანახმად, „ტილორონის დიჰიდროქლორიდი და ტილორონის ტრიეთანოლამინი წარმოადგენენ ტილორონის სხვადასხვა მარილებს“ და ტრიეთანოლამინის მარილის შემცველი ფარმაცევტული პროდუქტი არ არის დაშვებული/რეგისტრირებული საქართველოს ბაზარზე. ასევე, არ არსებობს დოკუმენტი/ინფორმაცია, რომელიც დაადასტურებდა, რომ „-----“ წარმოადგენს ტრიეთანოლამინის მარილს. ამავდროულად, „-----“ კლასიფიცირდება 29224985000 სასაქონლო ქვესუბპოზიციაში, თუმცა, ზემოაღნიშნულ, საქონლის გაფორმების პერიოდში მოქმედ, ნუსხაში ზემოთ მითითებული სეს ესნ კოდი არ ფიქსირდებოდა.

ზემოთ აღნიშნულიდან გამომდინარე, საბჭო იზიარებს საბაჟო დეპარტამენტის მსჯელობას, რომ საქონლის იმპორტი არ უნდა გათავისუფლებულიყო დამატებული ღირებულების გადასახადისაგან და გადასახადის გადამხდელის მხრიდან ადგილი ჰქონდა საბაჟო დეკლარაციებში იმპორტის გადასახდელის შემცირებას. ამდენად, არ არსებობს მომჩივნის არგუმენტების გათვალისწინების და საჩივრის დაკმაყოფილების საფუძველი.

ამასთან, მომჩივნის მოთხოვნაზე გათავისუფლდეს ჯარიმისაგან საბჭო მიუთითებს, საბაჟო კოდექსის 163-ე მუხლის მე-11 ნაწილზე, რომლის მიხედვით, დავის განმხილველ ორგანოს უფლება აქვს, პირი გაათავისუფლოს ამ კოდექსით გათვალისწინებული საბაჟო სანქციისგან, თუ შესაბამისი საბაჟო სამართალდარღვევა ჩადენილია შეცდომით/არცოდნით.

საბჭოს მიაჩნია, რომ განსახილველ შემთხვევაში ფაქტობრივი და სამართლებრივი გარემოებები არ იძლევა იმ ვარაუდის საფუძველს, რომ გადასახადის გადამხდელის მხრიდან სამართალდარღვევის ჩადენა გამოწვეულია მისი შეცდომით/არცოდნით.

აღნიშნულიდან გამომდინარე, არ არსებობს დაკისრებული სანქციებისგან საბაჟო კოდექსის 163-ე მუხლის მე-11 ნაწილით მომჩივნის გათავისუფლების საფუძველი.

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:

 

1. საჩივარი არ დაკმაყოფილდეს;

2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი N 64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხი:

საბაჟო დეკლარაციებში არასწორი მონაცემის შეტანით იმპორტის გადასახდელის ოდენობის შემცირება.

 

ფაქტობრივი გარემოებები:

კომპანიის მიერ იმპორტირებული ფარმაცევტული სუბსტანციების შემოწმებამ აჩვენა, რომ ისინი უკანონოდ იყო გათავისუფლებული დამატებული ღირებულების გადასახადისგან, რადგან არ აკმაყოფილებდნენ კანონით დადგენილ პირობებს და არასწორად იყვნენ კლასიფიცირებული. კომპანიამ ვერ წარმოადგინა შესაბამისი დამადასტურებელი დოკუმენტაცია. შედეგად, მას დაერიცხა დამატებითი გადასახდელი თანხა და ჯარიმა. საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

გადაწყვეტილება:

საბჭოს მიაჩნია, რომ საჩივარი არ უნდა დაკმაყოფილდეს

 

დასაბუთება:

საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საბაჟო კოდექსის შემდეგ ნორმებს: 163 (11); 35 (3 - 4); 30 მე-9, მე-10, მე-11 და მე-12 ნაწილები.