ბრძანება N 5659

N 5659

13 მარტი 2026

ბ რ ძ ა ნ ე ბ ა

 

შპს „---“-ის (ს/ნ ---)

(მის.:---) 2026 წლის 26 თებერვლის

საჩივრის დაკმაყოფილებაზე უარის თქმის თაობაზე

 

გადასახადის გადამხდელის პოზიცია:

გადასახადის გადამხდელი წარმოდგენილ საჩივარში განმარტავს, რომ კომპანია დარეგისტრირდა 2025 წლის 12 დეკემბერს. გაფორმებული აქვს 15 მიმდინარე შრომითი ხელშეკრულება და ეწევა კანონიერ, სრულფასოვან საქმიანობას. ვარაუდობს, რომ კვალიფიციური დღგ-ის გადამხდელის სტატუსის მინიჭებაზე უარის მიზეზს წარმოადგენს ის, რომ შპს „---“-ის (ს/ნ ---) დირექტორის და დამფუძნებლის მამას გააჩნია კომპანია, რომელსაც აქვს საბიუჯეტო დავალიანება. განმარტავს, რომ ეს ორი კომპანია სრულიად განსხვავებული იურიდიული პირები არიან საქართველოს კანონმდებლობის შესაბამისად და ერთი კომპანიის ვალდებულება არ შეიძლება გახდეს სხვა, სრულიად განცალკევებული კომპანიის მიმართ სტატუსის მინიჭებაზე უარის თქმის საფუძველი. კვალიფიციური დღგ-ის გადამხდელის სტატუსის არარსებობის გამო შპს „---“ (ს/ნ ---) ვერ ახერხებს საგადასახადო ანგარიშ-ფაქტურის გამოწერას, რის გამოც ფერხდება უკვე მიწოდებული საქონლისა და მომსახურების ანაზღაურების მიღება. კომპანია ფაქტობრივად ასრულებს ვალდებულებებს, თუმცა ანაზღაურებას ვერ იღებს მხოლოდ სტატუსის არარსებობის გამო. გადასახადის გადამხდელი განმარტავს, რომ ვერ შეძლებს ხელშეკრულებებით ნაკისრი ვალდებულებების შესრულებას კანონმდებლობის სრული დაცვით, რაც დიდ ფინანსურ და სამართლებრივ ზიანს მიაყენებს როგორც კომპანიას, ისე ხელშეკრულებებში ჩართულ ყველა კონტრაგენტს, და ასევე გამოიწვევს სანქციების დარიცხვის რისკს.

ზემოაღნიშნულიდან გამომდინარე, მომჩივანი ითხოვს კვალიფიციური დღგ-ის გადამხდელის სტატუსის მინიჭებას.

 

ფაქტობრივი გარემოებები:

საგადასახადო მონიტორინგის დეპარტამენტის ინფორმაციის თანახმად, გადასახადის გადამხდელმა კვალიფიციური დღგ-ის გადამხდელის სტატუსის მინიჭების მოთხოვნით 2026 წლის იანვრის და თებერვლის თვეებში განცხადებებით მიმართა შემოსავლების სამსახურს. წარმოდგენილი განცხადებები განხილულ იქნა შემოსავლების სამსახურის უფროსის 2025 წლის 8 აპრილის №6734 ბრძანების შესაბამისად. 2026 წლის 28 იანვარს შპს „---“-ს (ს/ნ ---) მიენიჭა არაკვალიფიციური დღგ-ის გადამხდელის სტატუსი, ვინაიდან კომპანიის დირექტორთან სატელეფონო კომუნიკაციის შედეგად დადგინდა, რომ კომპანიის საქმიანობის სახეს წარმოადგენდა რძის პროდუქტების რეალიზაცია, თუმცა კომპანიის მხრიდან არ იქნა მოწოდებული საქმიანობის დამადასტურებელი დოკუმენტაცია. ამასთან, 2026 წლის 13 თებერვალს შპს „---“-ს (ს/ნ ----) კვლავ მიენიჭა არაკვალიფიციური დღგ-ის გადამხდელის სტატუსი, ვინაიდან კომპანიის წარმომადგენელთან - ---თან სატელეფონო კომუნიკაციის შედეგად დადგინდა, რომ კომპანიის საქმიანობის სახეს წარმოადგენს მზა საკვების მიწოდება სატენდერო ხელშეკრულების შესაბამისად.

დამატებითი შესწავლის შედეგად დადგინდა, რომ დირექტორი კომპანიის შესახებ არ ფლობდა სრულ ინფორმაციას და ასევე, არ იყო გარკვეული დღგ-ის გადამხდელის უფლება-მოვალეობებში. ასევე, გასათვალისწინებელი ის ფაქტიც, რომ შპს „---“-ის (ს/ნ ----) დირექტორის და დამფუძნებლის მამას გააჩნია კომპანია, რომელსაც აქვს საბიუჯეტო დავალიანება. შესაბამისად, დამფუძნებლები წარმოადგენენ ურთიერთდამოკიდებულ პირებს. ზემოაღნიშნული ფაქტობრივი გარემოებებიდან გამომდინარე, შპს „---“-ს (ს/ნ ----) საგადასახადო მონიტორინგის დეპარტამენტის ID:---- გადაწყვეტილებით უარი ეთქვა კვალიფიციური დღგ-ის გადამხდელის სტატუსის მინიჭებაზე.

 

შემოსავლების სამსახურმა განიხილა აღნიშნული საჩივარი და მიიჩნია, რომ გადასახადის გადამხდელის მოთხოვნა არ უნდა დაკმაყოფილდეს შემდეგ გარემოებათა გამო:

„გადასახადების ადმინისტრირების შესახებ“ საქართველოს ფინანსთა მინისტრის 2010 წლის 31 დეკემბრის №996 ბრძანებით დამტკიცებული ინსტრუქციის 563 მუხლის პირველი პუნქტის „გ“ ქვეპუნქტის თანახმად, საგადასახადო ორგანო უფლებამოსილია დღგ-ის გადამხდელად რეგისტრირებულ პირს შეუჩეროს ამ ინსტრუქციის 51-ე და 561 მუხლებით გათვალისწინებული საგადასახადო ანგარიშ-ფაქტურებისა და საგადასახადო დოკუმენტების გამოყენების (ელექტრონული ფორმით გამოწერის/დადასტურების ან/და ჩათვლის მიღების) უფლება ან/და პირს უარი უთხრას აღნიშნული დოკუმენტების მატერიალური ფორმით გაცემაზე, ასევე პირს შეუჩეროს საბაჟო დეკლარაციის გამოყენების უფლება დღგ-ის ჩათვლის მიღების მიზნით შემოსავლების სამსახურის უფროსის ბრძანების საფუძველზე და მის მიერ დამტკიცებული მეთოდოლოგიის მიხედვით. „ცალკეულ შემთხვევებში გადასახადის გადამხდელისათვის საგადასახადო ანგარიშ-ფაქტურის, საგადასახადო დოკუმენტის გამოწერის/დადასტურების და სასაქონლო ზედნადების გამოწერის უფლების შეზღუდვის და გადასახადის გადამხდელის მიერ გამოწერილი ელექტრონული საგადასახადო ანგარიშ-ფაქტურის გამოყენების სპეციალური წესის განსაზღვრის შესახებ“ ინსტრუქციის დამტკიცების თაობაზე შემოსავლების სამსახურის უფროსის 2022 წლის 16 თებერვლის №3751 ბრძანების პირველი მუხლის პირველი პუნქტის თანახმად, გადასახადის გადამხდელს დღგ-ის გადამხდელად რეგისტრაციის მომენტიდან, ასევე წინამდებარე „ცალკეულ შემთხვევებში გადასახადის გადამხდელისათვის საგადასახადო ანგარიშ-ფაქტურის, საგადასახადო დოკუმენტის გამოწერის/დადასტურების და სასაქონლო ზედნადების გამოწერის უფლების შეზღუდვის და გადასახადის გადამხდელის მიერ გამოწერილი ელექტრონული საგადასახადო ანგარიშ-ფაქტურის გამოყენების სპეციალური წესის განსაზღვრის შესახებ“ ინსტრუქციით (შემდგომში - ინსტრუქცია) განსაზღვრული სხვა საფუძვლების არსებობისას ენიჭება კვალიფიციური დღგ-ის გადამხდელის ან არაკვალიფიციური დღგ-ის გადამხდელის სტატუსი.

ამავე მუხლის მე-2 პუნქტის თანახმად, არაკვალიფიციური დღგ-ის გადამხდელის სტატუსის მქონეა პირი, რომელსაც „გადასახადების ადმინისტრირების შესახებ“ საქართველოს ფინანსთა მინისტრის 2010 წლის 31 დეკემბრის №996 ბრძანებით დამტკიცებული ინსტრუქციის 563 მუხლის პირველი პუნქტის „გ“ ქვეპუნქტის შესაბამისად, აღნიშნული სტატუსის მოქმედების პერიოდში შეჩერებული აქვს საგადასახადო ანგარიშ-ფაქტურებისა და საგადასახადო დოკუმენტების გამოყენების (ელექტრონული ფორმით გამოწერის/დადასტურების ან/და ჩათვლის მიღების) უფლება, აღნიშნული დოკუმენტების მატერიალური ფორმით გაცემა, ასევე საბაჟო დეკლარაციის გამოყენების უფლება დღგ-ის ჩათვლის მიღების მიზნით და რომელსაც ამ ინსტრუქციის შესაბამისად მინიჭებული აქვს არაკვალიფიციური დღგის გადამხდელის სტატუსი. ამავე ბრძანების მე-2 მუხლის პირველი პუნქტის „ა“ ქვეპუნქტის თანახმად, არაკვალიფიციური დღგ-ის გადამხდელის სტატუსის მინიჭების საფუძველია გადასახადის გადამხდელის დღგ-ის გადამხდელად რეგისტრაცია. ხოლო ამავე მუხლის მე-3 პუნქტის თანახმად, გადასახადის გადამხდელის მიმართვის შემთხვევაში, არაკვალიფიციური დღგ-ის გადამხდელისთვის კვალიფიციური დღგ-ის გადამხდელის სტატუსის მინიჭების ან მინიჭებაზე უარის თქმის თაობაზე გადაწყვეტილებას იღებს საგადასახადო ორგანოს უფლებამოსილი პირი, შემოსავლების სამსახურის უფროსის მიერ დადგენილი წესით, გარდა ამ მუხლის პირველი პუნქტის „გ“ ქვეპუნქტით განსაზღვრული შემთხვევისა.

ზემოაღნიშნული სამართლებრივი ნორმების, ფაქტობრივი გარემოებებისა და საქმეზე არსებული მასალების შესწავლის შედეგად, შემოსავლების სამსახურმა მიიჩნია, რომ გადამხდელის საჩივარი დაუსაბუთებელია, საგადასახადო მონიტორინგის დეპარტამენტის სადავო გადაწყვეტილება შესაბამისობაშია საგადასახადო კანონმდებლობის მოთხოვნებთან და საჩივარი არ უნდა დაკმაყოფილდეს.

 

საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ :

 

1. შპს „---“-ის (ს/ნ ----) საჩივარი არ დაკმაყოფილდეს;

2. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის: ქ. თბილისი, ვახტანგ გორგასლის ქ. №16) ან სასამართლოში (მის.: ქ. ქუთაისი, ვიქტორ კუპრაძის ქუჩა №11), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.

 

სადავო საკითხები:

მომჩივანი ითხოვს კვალიფიციური დღგ-ის გადამხდელის სტატუსის მინიჭებას.

 

ფაქტობრივი გარემოებები

დამატებითი შესწავლის შედეგად დადგინდა, რომ დირექტორი კომპანიის შესახებ არ ფლობდა სრულ ინფორმაციას და ასევე, არ იყო გარკვეული დღგ-ის გადამხდელის უფლება-მოვალეობებში. ასევე, გასათვალისწინებელი ის ფაქტიც, რომ საწარმოს დირექტორის და დამფუძნებლის მამას გააჩნია კომპანია, რომელსაც აქვს საბიუჯეტო დავალიანება. შესაბამისად, დამფუძნებლები წარმოადგენენ ურთიერთდამოკიდებულ პირებს. ზემოაღნიშნული ფაქტობრივი გარემოებებიდან გამომდინარე, საგადასახადო მონიტორინგის დეპარტამენტის გადაწყვეტილებით მომჩივანს უარი ეთქვა კვალიფიციური დღგ-ის გადამხდელის სტატუსის მინიჭებაზე.

 

გადაწყვეტილება

შემოსავლების სამსახურმა მიიჩნია, რომ გადამხდელის საჩივარი დაუსაბუთებელია, საგადასახადო მონიტორინგის დეპარტამენტის სადავო გადაწყვეტილება შესაბამისობაშია საგადასახადო კანონმდებლობის მოთხოვნებთან და საჩივარი არ უნდა დაკმაყოფილდეს.

 

დასაბუთება

შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა:

„ცალკეულ შემთხვევებში გადასახადის გადამხდელისათვის საგადასახადო ანგარიშ-ფაქტურის, საგადასახადო დოკუმენტის გამოწერის/დადასტურების და სასაქონლო ზედნადების გამოწერის უფლების შეზღუდვის და გადასახადის გადამხდელის მიერ გამოწერილი ელექტრონული საგადასახადო ანგარიშ-ფაქტურის გამოყენების სპეციალური წესის განსაზღვრის შესახებ“ ინსტრუქციის დამტკიცების თაობაზე შემოსავლების სამსახურის უფროსის 2022 წლის 16 თებერვლის №3751 ბრძანებას.