გადაწყვეტილება № 26794/2/2026

№ 26794/2/2026

02 აპრილი 2026

გ ა დ ა წ ყ ვ ე ტ ი ლ ე ბ ა

 

მომჩივანი: „------“ (ს/ნ -----)

მოპასუხე: აუდიტის დეპარტამენტი

 

საქართველოს ფინანსთა სამინისტროსთან არსებულმა დავების განხილვის საბჭომ, 12.03.2026 წელს განიხილა და მიიღო გადაწყვეტილება ---- 2.03.2026 წელს რეგისტრირებულ საჩივარზე (რეგისტრაციის №26794/2/2026).

 

დავის საგანი:

დაკისრებული სანქციებისგან გათავისუფლება.

 

გასაჩივრებული გადაწყვეტილება:

1. აუდიტის დეპარტამენტის 25.12.2025 წლის №007-395 საგადასახადო მოთხოვნა;

2. შემოსავლების სამსახურის 6.02.2026 წლის №2401 ბრძანება.

 

დარიცხული თანხა: 29 483,23 ლარი.

მათ შორის:

გადასახადი - 9 845,74

დღგ - 2 838,59

საშემოსავლო გადასახადი - 7 007,15

ჯარიმა - 14 702,57

საურავი - 4 934,92

 

ფაქტების აღწერა

გადასახადის გადამხდელის საქმიანობაა საცალო ვაჭრობა ხორცით. გადასახადის გადამხდელად რეგისტრირებულია 16.11.2006 წელს.

შემოსავლების სამსახურის აუდიტის დეპარტამენტის მიერ ჩატარდა გადასახადის გადამხდელის საქმიანობის 1.01.2022 წლიდან 15.03.2023 წლამდე პერიოდის თემატური, კამერალური საგადასახადო შემოწმება, საქართველოს ფინანსთა სამინისტროსთან არსებული დავების განხილვის საბჭოს 27.12.2024 წლის №24200/2/2024 გადაწყვეტილების შესაბამისად.

შემოწმების შედეგები აისახა 24.12.2025 წლის საგადასახადო შემოწმების აქტში, საიდანაც ირკვევა, რომ სადავო დარიცხვა გამოწვეულია შემდეგი გარემოებებით:

შემოსავლების სამსახურის გადასახადების ადმინისტრირების საინფორმაციო სისტემაში არსებული მონაცემებსა და სასაქონლო-მატერიალური ფასეულობების ინვენტარიზაციის შედეგებზე დაყრდნობით გაანგარიშდა გადასახადის გადამხდელის 2022 წლის ერთობლივი შემოსავალი. დეკლარირებულ და შემოწმებით დადგენილ ერთობლივ შემოსავალს შორის გამოვლინდა სხვაობა, რაზეც მომჩივანს, საგადასახადო კოდექსის მე-100 მუხლის გათვალისწინებით, დაერიცხა საშემოსავლო გადასახადი და დაეკისრა საგადასახადო კოდექსის 275-ე მუხლით გათვალისწინებული ჯარიმა.

გადასახადის გადამხდელი არ იყო დღგ-ის გადამხდელად რეგისტრირებული. დადგინდა, რომ მეწარმის მიერ ხორციელდებოდა იმპორტირებული ღორის ხორცის შეძენა, რომელიც არ ხვდებოდა დღგით დასაბეგრ ოპერაციებში. შემოწმების პროცესში განისაზღვრა დღგ-ის გადამხდელად სავალდებულო რეგისტრაციის თარიღი - 5.03.2022 წელი. აღნიშნული თარიღიდან გაანგარიშდა დღგ-ით დასაბეგრი ბრუნვები. შედეგად, საგადასახადო კოდექსის 165-ე და 159-ე მუხლების გათვალისწინებით, გადასახადის გადამხდელს დაერიცხა დღგ და დაეკისრა საგადასახადო კოდექსის 282-ე მუხლით განსაზღვრული ჯარიმა.

შემოწმების აქტის საფუძველზე 25.12.2025 წელს გამოიცა აუდიტის დეპარტამენტის №28335 ბრძანება და გადასახადის გადამხდელს წარედგინა ამავე თარიღის №----- საგადასახადო მოთხოვნა.

აღნიშნული აქტები გასაჩივრდა შემოსავლების სამსახურში, რომლის 6.02.2026 წლის №2401 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი

შემოსავლების სამსახური მიუთითებს ფაქტობრივ გარემოებებზე, რომლის მიხედვით, გადასახადის გადამხდელს არასრულად ჰქონდა შესრულებული საგადასახადო ვალდებულებები, ამასთან, მომჩივანი ვერ უთითებს ფაქტობრივ და სამართლებრივ გარემოებებზე, რომლითაც დადასტურდება, რომ გადასახადის გადამხდელი საგადასახადო ვალდებულებების არაჯეროვნად შესრულებისას მოქმედებდა სამართლებრივი შეცდომის არეალში. შესაბამისად, საგადასახადო შემოწმების შედეგად დარიცხული სანქციის მიმართ შემოსავლების სამსახურს მიზანშეწონილად არ მიაჩნია საქართველოს საგადასახადო კოდექსის 269-ე მუხლის მე-7 ნაწილის გამოყენება.

 

მომჩივნის არგუმენტაცია

მომჩივანი აღნიშნავს, არ გააჩნია ბუღალტერიის შესაბამისი ცოდნა, ასევე ხშირად არ ფლობდა ინფორმაციას შეძენილი საქონლის და ღორის ხორცის შესახებ ადგილობრივი იყო თუ იმპორტირებული, რამაც გამოიწვია დღგ-ის გადამხდელად რეგისტრაციის ვალდებულება. შეცდომები არ არის განზრახ დაშვებული და მზად არის გამოასწოროს აღნიშნული, ასევე აპირებს გადაიხადოს გადასახადი, თუმცა დარიცხული ჯარიმა თითქმის 2-ჯერ აღემატება გადასახადს, რაც ძალიან დიდ ტვირთად აწვება. შეცდომები გამოწვეულია გამოუცდელობით და არცოდნით. ასევე დარიცხული გადასახადის ძირითადი თანხა სრულად გადაიხადა ბიუჯეტში.

ყოველივე ზემოაღნიშნულის გათვალისწინებით, ითხოვს, ბათილად იქნეს ცნობილი სსიპ შემოსავლების სამსახურის აუდიტის დეპარტამენტის 2025 წლის 25 დეკემბრის №---- საგადასახადო მოთხოვნა, შემოსავლების სამსახურის 2025 წლის 25 დეკემბრის №28335 ბრძანება გადასახადების/გადასახდელების და საგადასახადო სანქციების თანხების დარიცხვის/შემცირების შესახებ, საგადასახადო შემოწმების 2025 წლის 24 დეკემბრის აქტი, შემოსავლების სამსახურის 2026 წლის 6 თებერვლის ბრძანება. დაკისრებული სანქციებისგან გათავისუფლებას მომჩივანი ითხოვს საგადასახადო კოდექსის 269-ე მუხლის მე-7 ნაწილის შესაბამისად.

 

დავების განხილვის საბჭო

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:

საგადასახადო კოდექსის 272-ე მუხლის პირველი ნაწილის თანახმად, საურავი არის საგადასახადო სანქცია, რომელიც პირს ეკისრება საგადასახადო კანონმდებლობით დადგენილ ვადაში გადასახადის გადასახდელი თანხის გადაუხდელობისათვის.

საგადასახადო კოდექსის 275-ე მუხლის პირველი - 22 ნაწილების თანახმად:

1. პირის მიერ საგადასახადო დეკლარაციაში/გაანგარიშებაში გადასახადის თანხის შემცირება, თუ იგი გამოწვეულია საგადასახადო კონტროლის განმახორციელებელი ორგანოს მიერ პირის საგადასახადო ვალდებულების წარმოშობის მომენტის (პერიოდის) შეცვლით, იწვევს პირის დაჯარიმებას შემცირებული გადასახადის თანხის 10 პროცენტის ოდენობით.

2. საგადასახადო დეკლარაციაში/გაანგარიშებაში გადასახადის თანხის შემცირება, გარდა ამ მუხლის პირველი, 21 და 22 ნაწილებით გათვალისწინებული შემთხვევებისა, იწვევს დაჯარიმებას შემცირებული გადასახადის თანხის 50 პროცენტის ოდენობით.

21 საგადასახადო დეკლარაციაში/გაანგარიშებაში გადასახადის შემცირება, თუ შემცირებული გადასახადის თანხა ამ დეკლარაციაში/გაანგარიშებაში აღნიშნული გადასახადის თანხის 5 პროცენტს არ აღემატება, იწვევს დაჯარიმებას შემცირებული გადასახადის თანხის 10 პროცენტის ოდენობით.

22 საგადასახადო დეკლარაციაში/გაანგარიშებაში გადასახადის შემცირება, თუ შემცირებული გადასახადის თანხა ამ დეკლარაციაში/გაანგარიშებაში აღნიშნული გადასახადის თანხის 5 პროცენტზე მეტია და 20 პროცენტს არ აღემატება, იწვევს დაჯარიმებას შემცირებული გადასახადის თანხის 25 პროცენტის ოდენობით.

საგადასახადო კოდექსის 282-ე მუხლის პირველი ნაწილის თანახმად, დღგ-ის გადამხდელად რეგისტრაციის გარეშე საქმიანობა იწვევს პირის დაჯარიმებას რეგისტრაციის გარეშე საქმიანობის პერიოდში განხორციელებული დღგ-ით დასაბეგრი ოპერაციების (გარდა გათავისუფლებული ოპერაციებისა) თანხის 5 პროცენტის ოდენობით.

საგადასახადო კოდექსის 269-ე მუხლის მე-7 ნაწილის თანახმად, დავის განმხილველ ორგანოს უფლება აქვს, გაათავისუფლოს კეთილსინდისიერი გადასახადის გადამხდელი ამ კოდექსით გათვალისწინებული სანქციისაგან, თუ სამართალდარღვევა გამოწვეულია გადასახადის გადამხდელის შეცდომით/არცოდნით.

მომჩივანი განმარტავს, რომ სამართალდარღვევა გამოწვეულია მისი გამოუცდელობით და არცოდნით და ითხოვს დაკისრებული სანციებისგან გათავისუფლებას საგადასახადო კოდექსის 269-ე მუხლის მე-7 ნაწილის საფუძველზე.

საბჭოს მიაჩნია, რომ განსახილველ შემთხვევაში საქმის ფაქტობრივი და სამართლებრივი გარემოებები არ იძლევა იმ ვარაუდის საფუძველს, რომ გადასახადის გადამხდელის მიერ ჩადენილი სამართალდარღვევა გამოწვეულია მისი შეცდომით/არცოდნით და შესაბამისად, მიზანშეწონილად არ მიიჩნია საგადასახადო კოდექსის 269-ე მუხლის მე-7 ნაწილის საფუძველზე მომჩივნის გათავისუფლება დაკისრებული სანქციებისგან.

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:

 

1. საჩივარი არ დაკმაყოფილდეს;

2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხი

დაკისრებული სანქციებისგან გათავისუფლება.

 

ფაქტობრივი გარემოებები

გადასახადის გადამხდელის საქმიანობაა საცალო ვაჭრობა ხორცით. გაანგარიშდა გადასახადის გადამხდელის 2022 წლის ერთობლივი შემოსავალი. დეკლარირებულ და შემოწმებით დადგენილ ერთობლივ შემოსავალს შორის გამოვლინდა სხვაობა, რაზეც მომჩივანს, დაერიცხა საშემოსავლო გადასახადი და ჯარიმა. გადასახადის გადამხდელი არ იყო დღგ-ის გადამხდელად რეგისტრირებული. დადგინდა, რომ მეწარმის მიერ ხორციელდებოდა იმპორტირებული ღორის ხორცის შეძენა, რომელიც არ ხვდებოდა დღგით დასაბეგრ ოპერაციებში. შემოწმების პროცესში განისაზღვრა დღგ-ის გადამხდელად სავალდებულო რეგისტრაციის თარიღი - 5.03.2022 წელი. აღნიშნული თარიღიდან გაანგარიშდა დღგ-ით დასაბეგრი ბრუნვები.

გადასახადის გადამხდელს დაერიცხა დღგ და დაეკისრა ჯარიმა.

 

გადაწყვეტილება

საბჭომ მიზანშეწონილად არ მიიჩნია საგადასახადო კოდექსის 269-ე მუხლის მე-7 ნაწილის საფუძველზე მომჩივნის გათავისუფლება დაკისრებული სანქციებისგან.

 

დასაბუთება

საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს;272(1);275;282(1);