გადაწყვეტილება №26681/2/2026

№26681/2/2026

18 მარტი 2026

გ ა დ ა წ ყ ვ ე ტ ი ლ ე ბ ა

 

მომჩივანი: „----------“ (ს/ნ ----------)

მოპასუხე: აუდიტის დეპარტამენტი

 

საქართველოს ფინანსთა სამინისტროსთან არსებულმა დავების განხილვის საბჭომ, 12.03.2026 წელს განიხილა და მიიღო გადაწყვეტილება „----------“ 19.02.2026 წელს რეგისტრირებულ საჩივარზე (რეგისტრაციის №26681/2/2026).

 

დავის საგანი:

დღგ-ის გადამხდელად სავალდებულო რეგისტრაციის თარიღის განსაზღვრა და დასაბეგრი ბრუნვის გაანგარიშება.

 

გასაჩივრებული გადაწყვეტილება:

1. აუდიტის დეპარტამენტის 9.12.2025 წლის №022-30 საგადასახადო მოთხოვნა;

2. შემოსავლების სამსახურის 3.02.2026 წლის №2064 ბრძანება.

 

დარიცხული თანხა: 90 651,16 ლარი.

მათ შორის:

დღგ - 65 438,35

ჯარიმა - 20 300

საურავი - 4 912,81

 

ფაქტების აღწერა/დარიცხვის საფუძვლები

მომჩივნის საქმიანობაა სარესტორნო მომსახურების გაწევა. გადასახადის გადამხდელად რეგისტრირებულია 6.02.2020 წელს.

აუდიტის დეპარტამენტის 8.12.2025 წლის კამერალური საგადასახადო შემოწმების აქტით შემოწმდა 1.01.2022 წლიდან 1.09.2025 წლამდე პერიოდში გადასახადის გადამხდელის დღგ-ის გადამხდელად სავალდებულო რეგისტრაციის სისწორე. შემოწმების აქტიდან ირკვევა, რომ სადავო დარიცხვა გამოწვეულია შემდეგი გარემოებებით:

მომჩივანი გადასახადის გადამხდელად რეგისტრაციიდან შესამოწმებელი პერიოდის ბოლომდე არ ყოფილა დღგ-ის გადამხდელი. მისი განმარტებით, არ აწარმოებს ბუღალტრულ აღრიცხვას ბუღალტრული პროგრამის საშუალებით. საკონტროლო-სალარო აპარატით და საბანკო ამონაწერებით დაფიქსირებული ბრუნვების ანალიზის შედეგად დადგინდა, რომ საკონტროლო-სალარო აპარატის, რეგისტრირებული პოსტერმინალისა და საბანკო ამონაწერებში დაფიქსირებული სხვა დღგ-ით დასაბეგრი შემოსავლების ჯამი შესამოწმებელ პერიოდში შეადგენს 406 000 ლარს.

საგადასახადო კოდექსის 165-ე მუხლის გათვალისწინებით, მეწარმეს 22.02.2025 წლიდან დაუდგინდა დღგ-ის გადამხდელად სავალდებულო რეგისტრაციის ვალდებულება. მომჩივანს დაერიცხა დღგ (73 080,03 ლარი) და შეეფარდა საგადასახადო კოდექსის 282-ე მუხლის პირველი ნაწილით გათვალისწინებული ჯარიმა დღგ-ის გადამხდელად რეგისტრაციის გარეშე საქმიანობის პერიოდში განხორციელებული დღგ-ით დასაბეგრი ოპერაციების თანხის 5%-ის ოდენობით (20 300 ლარი).

საგადასახადო შემოწმების აქტის საფუძველზე გადასახადის გადამხდელს წარედგინა აუდიტის დეპარტამენტის 9.12.2025 წლის №022-30 საგადასახადო მოთხოვნა, რაც გასაჩივრდა შემოსავლების სამსახურში.

შემოსავლების სამსახურის 3.02.2026 წლის №2064 ბრძანებით საჩივარი დაკმაყოფილდა ნაწილობრივ, რაც გასაჩივრდა (არ დაკმაყოფილებულ ნაწილში) საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი

შემოსავლების სამსახური მიუთითებს საგადასახადო კოდექსის 302-ე მუხლის მე-6 ნაწილზე, 136-ე მუხლის მე-3 ნაწილზე, 61-ე მუხლის მე-3 ნაწილზე, 158-ე მუხლზე, 165-ე მუხლის პირველ და მე-2 ნაწილებზე, 159-ე მუხლის პირველი ნაწილის „ა“ და „ბ“ ქვეპუნქტებზე, 163-ე მუხლის პირველ და მე-2 ნაწილებზე, 164-ე მუხლის პირველ ნაწილზე და 43-ე მუხლის მე-4 ნაწილზე, დადგენილ გარემოებებზე, გადასახადის გადამხდელის მიერ საჩივარში დაფიქსირებულ პოზიციაზე, პირადი ჩარიცხვებისა და ანგარიშზე თანხის შეტანების დღგ-ით დასაბეგრ ბრუნვაში ასახვასთან მიმართებით, ყურადღებას ამახვილებს აუდიტის დეპარტამენტის მიერ მოწოდებულ ინფორმაციაზე, რომლის მიხედვითაც, შემოწმების პროცესში გადასახადის გადამხდელს მიეცა წინადადება პირადი და ეკონომიკური საქმიანობით მიღებული თანხების გამიჯვნასთან დაკავშირებით. აღნიშნულზე გადასახადის გადამხდელმა შემოწმებას წარუდგინა ახსნა-განმარტება, რომლის თანახმადაც, ანგარიშზე შეტანილი თანხები წარმოადგენდა ეკონომიკური საქმიანობით მიღებულ შედეგებს/ნავაჭრ თანხას.

ამასთან, შემოსავლების სამსახური აღნიშნავს, რომ მომჩივანი საჩივარში ვერ უთითებს ფაქტობრივ და სამართლებრივ გარემოებებზე, თუ რა ნაწილში იქნა განსაზღვრული საგადასახადო ვალდებულებები არამართლზომიერად. ხოლო, დავის წარმოების პროცესში არ ყოფილა წარმოდგენილი ისეთი მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს.

ზემოაღნიშნული სამართლებრივი ნორმებისა და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივარი აღნიშნულ ნაწილში დაუსაბუთებელია და არ უნდა დაკმაყოფილდეს.

 

მომჩივნის არგუმენტაცია

არ ჰყავდა ბუღალტერი და დეკლარაციებს თვითონ წარადგენდა, გარკვეულ საკითხებში კი ეხმარებოდა ოჯახის ახლობელი. რაც შეეხება ახსნა-განმარტებას იმაზე, რომ საბანკო ანგარიშზე ჩარიცხული თანხები იყო ნავაჭრი თანხა, ვერ გაიაზრა ეს და გაუთვითცნობიერებლად მოაწერა ხელი, რაზეც ძალიან წუხს რადგან ეს არ შეესაბამება სიმართლეს. აღნიშნული ჩარიცხვები არის პირადი და არანაირი კავშირი არა აქვს ეკონომიკურ საქმიანობასთან. არ გაურბის პასუხისმგებლობას და სრულიად იაზრებს დარღვევას დღგ-ის რეგისტრაციის დაგვიანებაზე, თუმცა გაანგარიშებაში ვერ დაეთანხმება და ითხოვს ხელახლა დაანგარიშებას.

მხოლოდ 2024 წელში აუდიტორს გაანგარიშებაში შეყვანილი აქვს 65 696 ლარი, 2024 წელს საერთოდ არ ჰქონია ეკონომიკური საქმიანობა, რაც მტკიცდება იჯარის ხელშეკრულებით და ბანკის მიერ გაცემული ცნობით თუ როდის აიღო ტერმინალი. შესაბამისად ვერანაირი ნავაჭრი თანხა ვერ იქნებოდა, არც საბანკო ამონაწერში არ ჩანს ასეთი დანიშნულებით შემოტანილი თანხა, აღნიშნული თანხები წარმოადგენს პირად ჩარიცხვებს, ასევე პირადი ჩარიცხვები აქვს 2025 წელშიც. როგორც წინა საჩივარში აღნიშნა დასაბეგრი ბრუნვა შეადგენს 231 396,97 ლარს, დღგ კი შეადგენს 41 651,45 ლარს, აპრილიდან აგვისტოს ჩათვლით გამოწერილი ანგარიშ-ფაქტურებით ჩასათვლელი თანხა შეადგენს 19 910 ლარს.

ითხოვს გათვალისწინებულ იქნას არ ცოდნით და ტექნიკურად დაშვებული შეცდომა მოწოდებულ ახსნა-განმარტებაზე ითხოვს გათვალისწინებულ იქნას მოწოდებული ინფორმაცია ბიზნესის დაწყების თარიღთან დაკავშირებით, მოხდეს საბანკო ანგარიშზე ყოველთვიური ბრუნვის ხელახლა დაანგარიშება და გაიმიჯნოს პირადი ჩარიცხვები ეკონომიკური საქმიანობიდან მიღებული ჩარიცხვებიდან. აქედან გამომდინარე დაკორექტირდეს ძირითადი გადასახადის თანხა და ჯარიმა.

 

დავების განხილვის საბჭო

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი უნდა დაკმაყოფილდეს ნაწილობრივ შემდეგ გარემოებათა გამო:

საგადასახადო კოდექსის 165-ე მუხლის პირველი და მე-2 ნაწილების მიხედვით, დასაბეგრი პირი, თუ ამ კოდექსით სხვა რამ არ არის გათვალისწინებული, ვალდებულია მის მიერ ნებისმიერი უწყვეტი 12 კალენდარული თვის განმავლობაში განხორციელებული დღგ-ით დასაბეგრი საქონლის მიწოდების/მომსახურების გაწევის ოპერაციების ჯამური თანხის 100 000 ლარისთვის გადაჭარბების დღიდან, არაუგვიანეს 2 სამუშაო დღეში დღგ-ის გადამხდელად რეგისტრაციის მიზნით, მიმართოს საგადასახადო ორგანოს. დასაბეგრ პირს დღგ-ის გამოანგარიშების და გადახდის ვალდებულება წარმოეშობა ამ მუხლის პირველი ნაწილით გათვალისწინებული დასაბეგრი ოპერაციის განხორციელების მომენტიდან (ამ ოპერაციის ჩათვლით), რომლის მიხედვითაც დასაბეგრი ოპერაციების ჯამურმა თანხამ 100 000 ლარს გადააჭარბა.

საგადასახადო კოდექსის 159-ე მუხლის პირველი ნაწილის „ა“ და „ბ“ ქვეპუნქტების თანახმად, დღგით დასაბეგრი ოპერაციებია, დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ საქონლის მიწოდება/მომსახურების გაწევა.

საგადასახადო კოდექსის 164-ე მუხლის პირველი ნაწილის თანახმად, თუ ამ მუხლით სხვა რამ არ არის გათვალისწინებული, დღგ-ით დასაბეგრი თანხა არის საქონლის მიწოდების/მომსახურების გაწევის სანაცვლოდ მიღებული/მისაღები ანაზღაურება დღგ-ის გარეშე, საქონლის/მომსახურების ფასთან პირდაპირ დაკავშირებული სუბსიდიის ჩათვლით. აღნიშნული დებულება გამოიყენება საქონლის/მომსახურების გაცვლის ოპერაციის (ბარტერული ოპერაციის) შემთხვევაშიც.

საგადასახადო კოდექსის 282-ე მუხლის პირველი ნაწილის თანახმად, დღგ-ის გადამხდელად რეგისტრაციის გარეშე საქმიანობა იწვევს პირის დაჯარიმებას რეგისტრაციის გარეშე საქმიანობის პერიოდში განხორციელებული დღგ-ით დასაბეგრი ოპერაციების (გარდა გათავისუფლებული ოპერაციებისა) თანხის 5 პროცენტის ოდენობით.

მომჩივნის წარმომადგენელმა საბჭოს სხდომაზე განმარტა, რომ 2024 წელში აუდიტორს გაანგარიშებაში შეყვანილი აქვს 65 696 ლარი, მაშინ როცა ამ პერიოდში საერთოდ არ ჰქონია დაწყებული ეკონომიკური საქმიანობა, რაც მტკიცდება იჯარის ხელშეკრულებით და ბანკის მიერ გაცემული ცნობით თუ როდის აიღო საბანკო ტერმინალი. შესაბამისად ვერანაირი ნავაჭრი თანხა ვერ იქნებოდა, არც საბანკო ამონაწერში არ ჩანს ასეთი დანიშნულებით შემოტანილი თანხა, აღნიშნული თანხები წარმოადგენს პირად ჩარიცხვებს, ასევე პირადი ჩარიცხვები აქვს 2025 წელშიც. ითხოვს საბანკო ანგარიშზე ბრუნვის ხელახლა დაანგარიშებას და პირადი ჩარიცხვების ეკონომიკური საქმიანობიდან მიღებული ჩარიცხვებისგან გამიჯვნას.

საბჭო მიუთითებს საქმის გარემოებებზე, მხარეთა არგუმენტაციაზე და სადავო შემთხვევაში არსებული გარემოებების გათვალისწინებით მიიჩნევს, რომ დღგ-ის გადამხდელად სავალდებულო რეგისტრაციის თარიღის განსაზღვრის და დასაბეგრი ბრუნვის გაანგარიშების საკითხი საჭიროებს დამატებით შესწავლას. ამ მიზნით, გადასახადის გადამხდელს უნდა მიეცეს წინადადება, ამ გადაწყვეტილების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს საბანკო ანგარიშებზე ჩარიცხული იმ თანხების დანიშნულების/არაეკონომიკური შინაარსის დამადასტურებელი მტკიცებულებები, რომელთა დღგ-ით დასაბეგრი ბრუნვიდან ამორიცხვას ითხოვს. ხოლო, აუდიტის დეპარტამენტს დაევალოს, შეისწავლოს წარდგენილი მტკიცებულებები და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო შემოწმებით დარიცხული თანხების კორექტირება (შემცირება).

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „ბ“ ქვეპუნქტით და გადაწყვიტა:

 

1. საჩივარი დაკმაყოფილდეს ნაწილობრივ;

2. ნაწილობრივ გაუქმდეს შემოსავლების სამსახურის 3.02.2026 წლის №2064 ბრძანება;

3. მომჩივანს მიეცეს წინადადება, ამ ბრძანების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს საბანკო ანგარიშებზე ჩარიცხული იმ თანხების დანიშნულების/არაეკონომიკური შინაარსის დამადასტურებელი მტკიცებულებები, რომელთა დღგით დასაბეგრი ბრუნვიდან ამორიცხვას ითხოვს;

4. აუდიტის დეპარტამენტს დაევალოს, წარდგენილი მტკიცებულებების შესწავლა და შესწავლის შედეგების გათვალისწინებით, სათანადო საფუძვლების არსებობის შემთხვევაში, შემოწმების შედეგად დარიცხული თანხების კორექტირება (შემცირება);

5. დანარჩენ ნაწილში საჩივარი არ დაკმაყოფილდეს;

6. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხი

დღგ-ის გადამხდელად სავალდებულო რეგისტრაციის თარიღის განსაზღვრა და დასაბეგრი ბრუნვის გაანგარიშება.

 

ფაქტობრივი გარემოებები

მომჩივნის წარმომადგენელმა საბჭოს სხდომაზე განმარტა, რომ 2024 წელში აუდიტორს გაანგარიშებაში შეყვანილი აქვს 65 696 ლარი, მაშინ როცა ამ პერიოდში საერთოდ არ ჰქონია დაწყებული ეკონომიკური საქმიანობა, რაც მტკიცდება იჯარის ხელშეკრულებით და ბანკის მიერ გაცემული ცნობით თუ როდის აიღო საბანკო ტერმინალი. შესაბამისად ვერანაირი ნავაჭრი თანხა ვერ იქნებოდა, არც საბანკო ამონაწერში არ ჩანს ასეთი დანიშნულებით შემოტანილი თანხა, აღნიშნული თანხები წარმოადგენს პირად ჩარიცხვებს, ასევე პირადი ჩარიცხვები აქვს 2025 წელშიც. ითხოვს საბანკო ანგარიშზე ბრუნვის ხელახლა დაანგარიშებას და პირადი ჩარიცხვების ეკონომიკური საქმიანობიდან მიღებული ჩარიცხვებისგან გამიჯვნას.

გადაწყვეტილება

დავების საბჭომ მიიჩნია, რომ დღგ-ის გადამხდელად სავალდებულო რეგისტრაციის თარიღის განსაზღვრის და დასაბეგრი ბრუნვის გაანგარიშების საკითხი საჭიროებს დამატებით შესწავლას. ამ მიზნით, გადასახადის გადამხდელს უნდა მიეცეს წინადადება, ამ გადაწყვეტილების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს საბანკო ანგარიშებზე ჩარიცხული იმ თანხების დანიშნულების/არაეკონომიკური შინაარსის დამადასტურებელი მტკიცებულებები, რომელთა დღგ-ით დასაბეგრი ბრუნვიდან ამორიცხვას ითხოვს. ხოლო, აუდიტის დეპარტამენტს დაევალოს, შეისწავლოს წარდგენილი მტკიცებულებები და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო შემოწმებით დარიცხული თანხების კორექტირება (შემცირება).

 

დასაბუთება

ფინანსთა სამინისტროს დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 165; 282