ბრძანება N 3806

N 3806

19 თებერვალი 2026

ბ რ ძ ა ნ ე ბ ა

 

ი/მ ----- ----- (ს/ნ -----) (მის.: ----- )

2026 წლის 22 იანვრის საჩივრის

დაკმაყოფილებაზე უარის თქმის თაობაზე.

 

შემოსავლების სამსახურმა დავების განხილვის საბჭოს 2026 წლის 12 თებერვლის სხდომაზე (ოქმი N 13) განიხილა ი/მ ----- (ს/ნ -----) 2026 წლის 22 იანვრის N 100210/1/2026 საჩივარი, შემოსავლების სამსახურის აუდიტის დეპარტამენტის 2025 წლის 24 დეკემბრის N 006-560 საგადასახადო მოთხოვნასთან დაკავშირებით.

 

სადავო საკითხი:

გადასახადის გადამხდელი არ ეთანხმება დღგ-ის გადამხდელად სავალდებულო რეგისტრაციის თარიღის განსაზღვრას და განმარტავს, რომ დღგ-ით დასაბეგრი ბრუნვის გაანგარიშებაში მონაწილეობს ხელფასი და პირადი გადარიცხვები, ასევე სესხები. მათ შორის, ისეთი თახნები, რომლებიც ახლობლებისგან აქვს მიღებული ვალდებულებების დასაფარად. ამასთან, დღგ-ით დასაბეგრი ბრუნვის გაანგარიშებაში არ არის გათვალისწინებული უკან დაბრუნებული თანხები. აცხადებს, რომ შეუძლია წარმოადგინოს მტკიცებულებები, რომლითაც შესაძლებელია დაიდენტიფიცირდეს არასამეწარმეო საქმიანობის ფარგლებში მიღებული თანხები.

 

ფაქტობრივი გარემოებები:

საქმის მასალებით დგინდება, რომ შემოსავლების სამსახურის აუდიტის დეპარტამენტის 2025 წლის 17 ოქტომბრის N 22140 ბრძანების საფუძველზე ჩატარდა ი/მ ----- (ს/ნ ----- ) საქმიანობის კამერალური საგადასახადო შემოწმება 2022 წლის პირველი იანვრიდან 2025 წლის პირველ სექტემბრამდე საანგარიშო პერიოდების დღგ-ის გადამხდელად სავალდებულო რეგისტრაციის სისწორის დადგენის მიზნით. საგადასახადო შემოწმების შედეგებზე 2025 წლის 23 დეკემბერს შედგა საგადასახადო შემოწმების აქტი, გამოიცა 2025 წლის 24 დეკემბრის N 28232 ბრძანება და ამავე თარიღის N 006-560 საგადასახადო მოთხოვნა, რომლის საფუძველზე გადასახადის გადამხდელს დამატებით გადასახდელად განესაზღვრა სულ 154 412 ლარი, მათ შორის გადასახადი 91 526 ლარი, ჯარიმა 26 364 ლარი და საურავი 36 522 ლარი.

 

საგადასახადო შემოწმების აქტის მიხედვით დარიცხვა განპირობებულია შემდეგი გარემოებით:

გადასახადის გადამხდელის საქმიანობის საგანს წარმოადგენს კვების მზა პროდუქტების და კერძების წარმოება. კერძოდ, გადასახადის გადამხდელს ქალაქ ----- ჰქონდა კომერციული ფართი, საიდანაც ხდებოდა სარეალიზაციო საქონლის წარმოება და შემდგომი რეალიზაცია (აღნიშნულ საქმიანობას ამ ეტაპზე აგრძელებს კომპანიის საშუალებით), აღნიშნული საქმიანობის ფარგლებში მეწარმეს გაწეული აქვს საფურშეტე მომსახურების ორგანიზება, რაც დასტურდება გამოწერილი დოკუმენტებით და საბანკო ჩარიცხვებით. ასევე, შემოწმების პროცესში დადგინდა, რომ აღნიშნულ მისამართზე გარდა რეგისტრაციით მითითებული საქმიანობისა, გადასახადის გადამხდელს აქვს რეგისტრირებული კომპანია, რომლის საქმიანობის საგანს წარმოადგენს საცალო ვაჭრობა არასპეციალიზებულ მაღაზიებში, უპირატესად საკვები პროდუქტებით, სასმელით და თამბაქოს ნაწარმით. ასევე, გადასახადის გადამხდელს 2018 წლის 6 თებერვლიდან მინიჭებული აქვს საკურორტო ფიქსირებული გადამხდელის სტატუსი, აღნიშნული სტატუსით სარგებლობს საცხოვრებელი ფართობის გაქირავების ნაწილში.

გადასახადის გადამხდელის მიერ მოწოდებული საბანკო ამონაწერების ანალიზის შედეგად და ასევე პირთან გასაუბრებით მოწოდებული ინფორმაციით საბანკო ჩარიცხვებში არის რიგი ტრანზაქციები, რომელიც არგუმენტირებულად და დოკუმენტურად ვერ იქნა გაშიფრული გადამხდელის მიერ. ამასთან, მეწარმე აცხადებს, რომ არის ისეთი ტრანზაქციები, რომლებიც არის მომსახურების გაწევიდან მიღებული. გადასახადის გადამხდელი არ აწარმოებს არანაირ აღრიცხვას. შემოსავლების სამსახურის გადასახადების ადმინისტრირების საინფორმაციო სისტემაში არსებული ინფორმაციისა და საბანკო ამონაწერების ანალიზის შედეგად, პირის დღგ-ის გადამხდელად სავალდებულო რეგისტრაციის თარიღად განისაზღვრა 2022 წლის პირველი ივლისი. გადასახადის გადამხდელის შემოსავლები გაანგარიშებულ იქნა შემდეგნაირად: ჩეკებით რეალიზებულ საქონელს დამატებულ იქნა ტერმინალის საშუალებით რეალიზებული საქონელი და ასევე ბანკში ჩარიცხვები, რომელიც გადამხდელის მიერ ნაწილობრივ იქნა გაშიფრული, როგორც რეალიზაციიდან მიღებული შემოსავალი. შესაძლებლობის ფარგლებში იდენტიფიცირებული იქნა ისეთი თანხების ჩარიცხვა, რაც არ არის მეწარმის საქმიანობასთან დაკავშირებული, კერძოდ, გაანგარიშებაში მონაწილეობა არ მიუღია სასტუმრო მომსახურებისთვის ჩარიცხულ თანხებს, რაც დაკავშირებულია მეწარმის დაფუძნებული კომპანიის საქმიანობასთან, ასევე სალიზინგო ნასყიდობის ხელშეკრულების ფარგლებში მიღებულ შემოსავალს.

ყოველივე ზემოაღნიშნულისა და საქართველოს საგადასახადო კოდექსის 951 , 165-ე და 159-ე მუხლების გათვალისწინებით პირს დაერიცხა გადასახადი და ჯარიმა საქართველოს საგადასახადო კოდექსის 282-ე მუხლის შესაბამისად.

 

შემოსავლების სამსახურმა განიხილა წარმოდგენილი საჩივარი და მიიჩნია, რომ გადასახადის გადამხდელის მოთხოვნა არ უნდა დაკმაყოფილდეს შემდეგ გარემოებათა გამო:

საქართველოს საგადასახადო კოდექსის 302-ე მუხლის მე-2 ნაწილის მიხედვით, დავის განმხილველი ორგანო საჩივარს განიხილავს მხოლოდ მომჩივნის მოთხოვნის ფარგლებში. ამავე მუხლის მე-6 ნაწილის მიხედვით, დავის განმხილველ ორგანოებს უფლება აქვთ, საჩივარი განიხილონ დისტანციურად, ტექნიკურ საშუალებათა გამოყენებით. მათ ასევე უფლება აქვთ, საჩივარი განიხილონ მომჩივნის დაუსწრებლად, თუ საქმეში არსებული მასალებიდან სრულად დგინდება დავის საგანთან დაკავშირებული ფაქტობრივი გარემოებები.

სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.

ამავე კოდექსის 61-ე მუხლის მე-3 ნაწილის თანახმად, საგადასახადო ორგანო უფლებამოსილია პირს დაარიცხოს გადასახადი თავის ხელთ არსებული ინფორმაციის საფუძველზე, თუ პირი მას არ წარუდგენს გადასახადის დასარიცხად საჭირო ინფორმაციას.

საქართველოს საგადასახადო კოდექსის 158-ე მუხლის პირველი ნაწილის თანახმად, დღგ-ით დასაბეგრ პირად (შემდგომ − დასაბეგრი პირი) განიხილება ნებისმიერი პირი, რომელიც ნებისმიერ ადგილზე დამოუკიდებლად ახორციელებს ნებისმიერი სახის ეკონომიკურ საქმიანობას, მიუხედავად ამ საქმიანობის მიზნისა და შედეგისა.

საქართველოს საგადასახადო კოდექსის 165-ე მუხლის პირველი ნაწილის თანახმად, დასაბეგრი პირი, თუ ამ კოდექსით სხვა რამ არ არის გათვალისწინებული, ვალდებულია მის მიერ ნებისმიერი უწყვეტი 12 კალენდარული თვის განმავლობაში განხორციელებული დღგ-ით დასაბეგრი საქონლის მიწოდების/მომსახურების გაწევის ოპერაციების ჯამური თანხის 100 000 ლარისთვის გადაჭარბების დღიდან, არაუგვიანეს 2 სამუშაო დღეში დღგ-ის გადამხდელად რეგისტრაციის მიზნით, მიმართოს საგადასახადო ორგანოს.

ამავე მუხლის მე-2 ნაწილის თანახმად, დასაბეგრ პირს დღგ-ის გამოანგარიშების და გადახდის ვალდებულება წარმოეშობა ამ მუხლის პირველი ნაწილით გათვალისწინებული დასაბეგრი ოპერაციის განხორციელების მომენტიდან (ამ ოპერაციის ჩათვლით), რომლის მიხედვითაც დასაბეგრი ოპერაციების ჯამურმა თანხამ 100 000 ლარს გადააჭარბა.

საქართველოს საგადასახადო კოდექსის 159-ე მუხლის პირველი ნაწილის „ა“ ქვეპუნქტის თანახმად, დღგ-ით დასაბეგრი ოპერაციაა დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ საქონლის მიწოდება

საქართველოს საგადასახადო კოდექსის 163-ე მუხლის პირველი და მე-2 ნაწილების თანახმად:

1. საქონლის მიწოდების/მომსახურების გაწევის დღგ-ით დაბეგვრა ხორციელდება საქონლის მიწოდების/მომსახურების გაწევის მომენტში, თუ ამ მუხლით სხვა რამ არ არის გათვალისწინებული.

2. თუ თანხა სრულად ან ნაწილობრივ ანაზღაურებულია საქონლის მიწოდებამდე/მომსახურების გაწევამდე, ანაზღაურებული თანხის შესაბამისი დღგ-ის გადახდა ხორციელდება ანაზღაურების თანხის გადახდის საანგარიშო პერიოდის მიხედვით, გარდა ამ მუხლის მე-5 და მე-9 ნაწილებით გათვალისწინებული შემთხვევებისა..

ამავე კოდექსის 164-ე მუხლის პირველი ნაწილის თანახმად, თუ ამ მუხლით სხვა რამ არ არის გათვალისწინებული, დღგ-ით დასაბეგრი თანხა არის საქონლის მიწოდების/მომსახურების გაწევის სანაცვლოდ მიღებული/მისაღები ანაზღაურება დღგ-ის გარეშე, საქონლის/მომსახურების ფასთან პირდაპირ დაკავშირებული სუბსიდიის ჩათვლით. აღნიშნული დებულება გამოიყენება საქონლის/მომსახურების გაცვლის ოპერაციის (ბარტერული ოპერაციის) შემთხვევაშიც.

საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.

გადასახადის გადამხდელის მიერ საჩივარში დაფიქსირებულ არგუმენტთან, დღგ-ით დასაბეგრი ბრუნვის გაანგარიშებაში ხელფასის, პირადი ჩარიცხვებისა და უკან დაბრუნებული თანხების მონაწილეობასთან დაკავშირებით, შემოსავლების სამსახური ყურადღებას ამახვილებს აუდიტის დეპარტამენტის მიერ მოწოდებულ ინფორმაციაზე, რომლის მიხედვით ირკვევა, რომ გადასახადის გადამხდელის შემოსავლები გაანგარიშებულ იქნა შემდეგნაირად: ჩეკებით რეალიზებულ საქონელს დამატებულ იქნა ტერმინალის საშუალებით რეალიზებული საქონელი და ასევე ბანკში ჩარიცხვები, რომელიც გადამხდელის მიერ ნაწილობრივ იქნა გაშიფრული, როგორც რეალიზაციიდან მიღებული შემოსავალი. შესაძლებლობის ფარგლებში იდენტიფიცირებული იქნა ისეთი თანხების ჩარიცხვა, რაც არ არის მეწარმის საქმიანობასთან დაკავშირებული, კერძოდ, გაანგარიშებაში მონაწილეობა არ მიუღია სასტუმრო მომსახურებისთვის ჩარიცხულ თანხებს, რაც დაკავშირებულია მეწარმის დაფუძნებული კომპანიის საქმიანობასთან, ასევე სალიზინგო ნასყიდობის ხელშეკრულების ფარგლებში მიღებულ შემოსავალს. შემოწმების პროცესში გადამხდელს დაევალა დოკუმენტურად და არგუმენტირებულად გაეშიფრა „პირადი გადარიცხვა“ დანიშნულებით ჩარიცხული თანხები, ვინაიდან გადამხდელის პირად საბანკო ანგარიშებზე იყო ჩარიცხვები, როგორც მზა კვების პროდუქტების რეალიზაციიდან და საფურშეტე მომსახურებიდან, ასევე სასტუმრო მომსახურებიდან და სპა ცენტრთან დაკავშირებული ტრანზაქციები. შემოწმების პროცესში გადამხდელის წარმომადგენელთან კომუნიკაციის საშუალებით მაქსიმალურად იქნა გათვალისწინებული და გამიჯნული ის ტრანზაქციები, რომლებიც არ იყო დაკავშირებული კონკრეტულად კვების ობიექტთან. ამასთან, გადამხდელის მიერ გაშიფრული ტრანზაქციების მიხედვით დადგინდა, რომ ჩამრიცხველებს შორის იყვნენ მზა კვების ობიექტში მომუშავე თანამშრომლები, რომლებიც ყოველდღიურად რიცხავდნენ კონკრეტულ თანხებს პირადი გადარიცხვის დანიშნულებით. ამასთან, ხელფასის სახით მიღებული თანხების დღგ-ით დასაბეგრი ბრუნვის გაანგარიშებაში მონაწილეობის საკითხი არ შეესაბამება სიმართლეს. გადამხდელის მხრიდან შემოწმების პროცესში მონაწილე წარმომადგენელს გაეგზავნა ცხრილი, რომელშიც ნათლად ჩანს, რომ დასაბეგრ ბრუნვაში მონაწილეობას იღებს ისეთი „პირადი გადარიცხვა“ დანიშნულებით ტრანზაქციები, რომლებიც გადამხდელმა არგუმენტირებულად/დოკუმენტურად ვერ გაშიფრა შემოწმების პროცესში.

ზემოაღნიშნულის გათვალისწინებით, შემოსავლების სამსახური განმარტავს, რომ დღგ-ის გადამხდელად რეგისტრაციის ვალდებულების განსაზღვრა და შესაბამისად, დღგ-ით დასაბეგრი ბრუნვის გაანგარიშება შეესაბამება კანონმდებლობის მოთხოვნებს. ამასთან, შემოსავლების სამსახური აღნიშნავს, რომ საგადასახადო დავის ეტაპზე მომჩივნის მხრიდან არ წარმოდგენილა მისი პოზიციის შესაბამისი რაიმე დოკუმენტაცია/მტკიცებულება, რომელიც შეცვლიდა საგადასახადო შემოწმებით დადგენილ ფაქტობრივ გარემოებებს.

ზემოაღნიშნული სამართლებრივი ნორმების, საქმეში არსებული მასალებისა და დადგენილი ფაქტობრივი გარემოებების გათვალისწინებით, სადავო საკითხთან დაკავშირებით, შემოსავლების სამსახურმა მიიჩნია, რომ შემოწმებით განსაზღვრული საგადასახადო ვალდებულებები შესაბამისობაშია კანონმდებლობის მოთხოვნებთან, ამდენად, წარმოდგენილი საჩივარი აღნიშნულ ნაწილში დაუსაბუთებელია და არ არსებობს მისი დაკმაყოფილების სამართლებრივი საფუძველი.

 

საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ:

 

1. ი/მ ----- (ს/ნ -----) საჩივარი არ დაკმაყოფილდეს;

2. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. N 16) ან სასამართლოში (მის.: ქ. თბილისი, დავით აღმაშენებლის ხეივანი N 64), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.

 

სადავო საკითხი:

გადასახადის გადამხდელი არ ეთანხმება დღგ-ის გადამხდელად სავალდებულო რეგისტრაციის თარიღის განსაზღვრას.

 

ფაქტობრივი გარემოებები:

დადგენილია, რომ ბრძანების საფუძველზე ჩატარდა ინდ მეწარმის საქმიანობის კამერალური საგადასახადო შემოწმება დღგ-ის გადამხდელად სავალდებულო რეგისტრაციის სისწორის დადგენის მიზნით. საგადასახადო შემოწმების შედეგებზე შედგა საგადასახადო შემოწმების აქტი, გამოიცა ბრძანება და საგადასახადო მოთხოვნა, რომლის საფუძველზე გადასახადის გადამხდელს დამატებით გადასახდელად განესაზღვრა გადასახადი თანხა, ჯარიმა და საურავი.

 

გადაწყვეტილება:

შემოსავლების სამსახურმა მიიჩნია, რომ წარმოდგენილი საჩივარი დაუსაბუთებელია და არ არსებობს მისი დაკმაყოფილების სამართლებრივი საფუძველი.

 

დასაბუთება:

შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: მუხლი 165; 159;