გადაწყვეტილება №26651/2/2026

№26651/2/2026

24 მარტი 2026

გ ა დ ა წ ყ ვ ე ტ ი ლ ე ბ ა

 

მომჩივანი: ----- (ს/ნ ------)

მოპასუხე: მომსახურების დეპარტამენტი

 

საქართველოს ფინანსთა სამინისტროსთან არსებულმა დავების განხილვის საბჭომ, 6.03.2026 წელს განიხილა და მიიღო გადაწყვეტილება -----ის 17.02.2026 წელს რეგისტრირებულ საჩივარზე (რეგისტრაციის №26651/2/2026).

 

დავის საგანი: დღგ-ის გადამხდელად სავალდებულო რეგისტრაციის გარეშე საქმიანობისთვის დაკისრებული ჯარიმისგან გათავისუფლება.

 

გასაჩივრებული გადაწყვეტილება:

1. მომსახურების დეპარტამენტის 16.01.2026 წლის №011-22 საგადასახადო სამართალდარღვევის ოქმი;

2. შემოსავლების სამსახურის 5.02.2026 წლის №2285 ბრძანება. დარიცხული თანხა: ჯარიმა - 1 531.71 ლარი.

 

ფაქტების აღწერა

აუდიტის დეპარტამენტის 2025 წლის 17 ოქტომბრის №22110 ბრძანებით ჩატარდა მომჩივნის საქმიანობის 1.01.2022 წლიდან 31.08.2025 წლამდე საანგარიშო პერიოდის კამერალური საგადასახადო შემოწმება. შემოწმდა დღგ-ის გადამხდელად სავალდებულო რეგისტრაციის სისწორე. შემოწმების შედეგად მომჩივანს განესაზღვრა დღგ-ის გადამხდელად სავალდებულო რეგისტრაციის თარიღი - 2023 წლის 19 ნოემბერი.

გადასახადის გადამხდელი 2025 წლის 24 დეკემბრის ID:----- განცხადების საფუძველზე დარეგისტრირდა დღგ-ის გადამხდელად. შესაბამისად დღგ-ის რეგისტრაციის გარეშე საქმიანობა განახორციელა 19.11.2023 – 24.12.2025 წლების პერიოდში.

მომჩივანმა, 2026 წლის 15 იანვარს წარადგინა 2025 წლის სექტემბრის, ოქტომბრის და ნოემბრის თვის დღგ-ის დეკლარაციები, რაზეც მომსახურების დეპარტამენტის 16.01.2026 წლის №011-22 საგადასახადო სამართალდარღვევის ოქმით, შეეფარდა საგადასახადო კოდექსის 282-ე მუხლის პირველი ნაწილით გათვალისწინებული სანქცია - ჯარიმა 1 531.71 ლარის ოდენობით.

 

მომსახურების დეპარტამენტის 16.01.2026 წლის №011-22 საგადასახადო სამართალდარღვევის ოქმი გასაჩივრდა შემოსავლების სამსახურში, რომლის 5.02.2026 წლის №2285 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი

შემოსავლების სამსახური მიუთითებს საგადასახადო კოდექსის 302-ე მუხლის მე-6 ნაწილზე, 165-ე, 269-ე, 270-ე, 282-ე მუხლებზე და ფაქტობრივ გარემოებებზე, რომლის გათვალისწინებით გადასახადის გადამხდელის მხრიდან ადგილი ჰქონდა სადავო ოქმში აღნიშნული საგადასახადო სამართალდარღვევის ჩადენის ფაქტს, რაზეც შემოსავლების სამსახურმა მიიჩნია, რომ გადასახადის გადამხდელის საჩივარი დაუსაბუთებელია, მომსახურების დეპარტამენტის სადავო საგადასახადო სამართალდარღვევის ოქმი შედგენილია კანონმდებლობის მოთხოვნათა დაცვით და გაუქმებას არ ექვემდებარება. ამასთან, განსახილველ შემთხვევაში საგადასახადო კოდექსის 269-ე მუხლის მე-7 ნაწილის გამოყენება შემოსავლების სამსახურს მიზანშეწონილად არ მიაჩნია.

 

მომჩივნის არგუმენტაცია

ჩატარდა საგადასახადო შემოწმება, რომელსაც ეთანხმება. აღნიშნული შემოწმებით დღგ-ის რეგისტრაციის თარიღი განისაზღვრა 2023 წლის დეკემბრის თვე, ხოლო შემოწმება ჩატარდა 2025 წლის აგვისტოს თვის ჩათვლით. შესაბამისად, 2025 წლის სექტემბერი - ნოემბრის თვეები მიეკუთვნება დღგ-ის დეკლარაციის სავალდებულო წარდგენის პერიოდს, რაც წარადგინა მომჩივანმა და დამატებით დაერიცხა ჯარიმა 1 531.71 ლარი. ფინანსური მდგომარეობიდან გამომდინარე ითხოვს დაკისრებული ჯარიმის შემცირებას.

 

დავების განხილვის საბჭო

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:

საქართველოს საგადასახადო კოდექსის 165-ე მუხლის პირველი და მე-2 ნაწილების მიხედვით, დასაბეგრი პირი, თუ ამ კოდექსით სხვა რამ არ არის გათვალისწინებული, ვალდებულია მის მიერ ნებისმიერი უწყვეტი 12 კალენდარული თვის განმავლობაში განხორციელებული დღგ-ით დასაბეგრი საქონლის მიწოდების/მომსახურების გაწევის ოპერაციების ჯამური თანხის 100 000 ლარისთვის გადაჭარბების დღიდან, არაუგვიანეს 2 სამუშაო დღეში დღგ-ის გადამხდელად რეგისტრაციის მიზნით, მიმართოს საგადასახადო ორგანოს. დასაბეგრ პირს დღგ-ის გამოანგარიშების და გადახდის ვალდებულება წარმოეშობა ამ მუხლის პირველი ნაწილით გათვალისწინებული დასაბეგრი ოპერაციის განხორციელების მომენტიდან (ამ ოპერაციის ჩათვლით), რომლის მიხედვითაც დასაბეგრი ოპერაციების ჯამურმა თანხამ 100 000 ლარს გადააჭარბა.

საგადასახადო კოდექსის 270-ე მუხლის პირველი ნაწილის თანახმად, საგადასახადო სანქცია არის პასუხისმგებლობის ზომა ჩადენილი საგადასახადო სამართალდარღვევისათვის. ამავე მუხლის მე-2 ნაწილის თანახმად, საგადასახადო სანქცია გამოიყენება გაფრთხილების, საურავის, ფულადი ჯარიმის, სამართალდარღვევის საქონლის ან/და სატრანსპორტო საშუალების უსასყიდლოდ ჩამორთმევის სახით, ამ კოდექსით გათვალისწინებულ შემთხვევებში.

საგადასახადო კოდექსის 282-ე მუხლის პირველი ნაწილის თანახმად, დღგ-ის გადამხდელად რეგისტრაციის გარეშე საქმიანობა – იწვევს პირის დაჯარიმებას რეგისტრაციის გარეშე საქმიანობის პერიოდში განხორციელებული დღგ-ით დასაბეგრი ოპერაციების (გარდა გათავისუფლებული ოპერაციებისა) თანხის 5 პროცენტის ოდენობით.

საგადასახადო კოდექსის 269-ე მუხლის მე-7 ნაწილის მიხედვით, დავის განმხილველ ორგანოს უფლება აქვს, გაათავისუფლოს კეთილსინდისიერი გადასახადის გადამხდელი ამ კოდექსით გათვალისწინებული სანქციისაგან, თუ სამართალდარღვევა გამოწვეულია გადასახადის გადამხდელის შეცდომით/არცოდნით.

სადავო საკითხზე წარმოდგენილია მომსახურების დეპარტამენტის 19.02.2026 წლის №----21-11 წერილი საიდანაც ირკვევა, რომ 2025 წლის 24 დეკემბრის ID:----- განცხადებით გადასახადის გადამხდელი დარეგისტრირდა დღგ-ის გადამხდელად და დღგ-ის რეგისტრაციის გარეშე საქმიანობა განახორციელა 19.11.2023 – 24.12.2025 წლების პერიოდში. ამასთან, 2026 წლის 15 იანვარს გადასახადის გადამხდელმა წარადგინა 2025 წლის სექტემბრის, ოქტომბრის და ნოემბრის თვის დღგ-ის დეკლარაციები, რაზეც განესაზღვრა ჯარიმა 1 531.71 ლარი.

მომჩივანი ეთანხმება განხორციელებულ დარიცხვას, განმარტავს, რომ აღნიშნული შემოწმებით დღგ-ის რეგისტრაციის თარიღი განისაზღვრა 2023 წლის დეკემბრის თვე, ხოლო შემოწმება ჩატარდა 2025 წლის აგვისტოს თვის ჩათვლით. შესაბამისად, 2025 წლის სექტემბერი - ნოემბრის თვეები მიეკუთვნება დღგ-ის დეკლარაციის სავალდებულო წარდგენის პერიოდს, რაც მან წარადგინა, თუმცა ფინანსური მდგომარეობიდან გამომდინარე ითხოვს დაკისრებული ჯარიმის შემცირებას.

საბჭო განმარტავს, რომ აღნიშნული სამართალდარღვევიდან გამომდინარე, სახეზე არ არის სამართლებრივი საფუძველი დაკისრებული სანქციის გაუქმებასთან დაკავშირებით. ამდენად, პირის მოთხოვნა სანქციის გაუქმებასთან დაკავშირებით ვერ დაკმაყოფილდება.

ზემოაღნიშნული სამართლებრივი ნორმების და ფაქტობრივი გარემოებების გათვალისწინებით, საბჭოს მიაჩნია, რომ შემოსავლების სამსახურის მიერ მიღებული გადაწყვეტილება საჩივრის არ დაკმაყოფილების თაობაზე მართლზომიერია, არ არსებობს მისი გაუქმების და განსხვავებული გადაწყვეტილების მიღების საფუძველი.

ამასთან, საბჭო მიიჩნევს, რომ განსახილველ შემთხვევაში საქმის ფაქტობრივი და სამართლებრივი გარემოებები არ იძლევა იმ ვარაუდის საფუძველს, რომ გადასახადის გადამხდელი კეთილსინდისიერად შეცდა, ან არ იყო მისთვის ცნობილი ისეთი გარემოება, რამაც მისი პასუხისმგებლობა გამოიწვია. შესაბამისად, მოცემულ შემთხვევაში არ არსებობს დაკისრებული სანქციისგან საგადასახადო კოდექსის 269-ე მუხლის მე-7 ნაწილით მომჩივნის გათავისუფლების საფუძველი.

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:

 

1. საჩივარი არ დაკმაყოფილდეს;

2. გადაწყვეტილება შეიძლება გასაჩივრდეს თბილისის საქალაქო სასამართლოში (ქ. თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხი

დღგ-ის გადამხდელად სავალდებულო რეგისტრაციის გარეშე საქმიანობისთვის დაკისრებული ჯარიმისგან გათავისუფლება.

 

ფაქტობრივი გარემოებები

აუდიტის დეპარტამენტის ბრძანებით ჩატარდა მომჩივნის საქმიანობის კამერალური საგადასახადო შემოწმება. შემოწმდა დღგ-ის გადამხდელად სავალდებულო რეგისტრაციის სისწორე. შემოწმების შედეგად მომჩივანს განესაზღვრა დღგ-ის გადამხდელად სავალდებულო რეგისტრაციის თარიღი - 2023 წლის 19 ნოემბერი. გადასახადის გადამხდელი 2025 წლის 24 დეკემბრის განცხადების საფუძველზე დარეგისტრირდა დღგ-ის გადამხდელად. შესაბამისად დღგ-ის რეგისტრაციის გარეშე საქმიანობა განახორციელა 19.11.2023 – 24.12.2025 წლების პერიოდში.

მომჩივანმა, 2026 წლის 15 იანვარს წარადგინა 2025 წლის სექტემბრის, ოქტომბრის და ნოემბრის თვის დღგ-ის დეკლარაციები, რაზეც მომსახურების დეპარტამენტის 16.01.2026 წლის საგადასახადო სამართალდარღვევის ოქმით, შეეფარდა საგადასახადო კოდექსის 282-ე მუხლის პირველი ნაწილით გათვალისწინებული სანქცია - ჯარიმა.

 

გადაწყვეტილება

საბჭო განმარტავს, რომ აღნიშნული სამართალდარღვევიდან გამომდინარე, სახეზე არ არის სამართლებრივი საფუძველი დაკისრებული სანქციის გაუქმებასთან დაკავშირებით. ამდენად, პირის მოთხოვნა სანქციის გაუქმებასთან დაკავშირებით ვერ დაკმაყოფილდება.

 

დასაბუთება

საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 269(7); 282(1).