ბრძანება N 28537
📜 საკანონმდებლო ნორმები
📄 სრული ტექსტი
N 28537
26 დეკემბერი 2025
ბ რ ძ ა ნ ე ბ ა
შპს------- (ს/ნ ---------------)
(მის.: -----------------)
2025 წლის 25 და 26 ნოემბრის საჩივრების
დაკმაყოფილებაზე უარის თქმის თაობაზე
შემოსავლების სამსახურმა დავების განხილვის საბჭოს 2025 წლის 4 დეკემბრის სხდომაზე (ოქმი №101) განიხილა შპს „-----“-ის (ს/ნ -----) 2025 წლის 25 ნოემბრის №187444/21 და 26 ნოემბრის №99045/1/2025 საჩივრები, შემოსავლების სამსახურის აუდიტის დეპარტამენტის 2025 წლის 27 ოქტომბრის №225-21 საგადასახადო მოთხოვნასთან დაკავშირებით.
სადავო საკითხები:
1. გადასახადის გადამხდელი არ ეთანხმება დღგ-ის დასაბეგრ ბრუნვას. განმარტავს, რომ საქმიანობას წარმოადგენს სახელმწიფო ტენდერებში მონაწილეობით და ხელშეკრულებების შესაბამისად სამშენებლო-სარემონტო სამუშაოების შესრულება. შემოწმების პერიოდში კომპანია ასრულებდა სამუშაოებს 13 სხვადასხვა ტენდერის ფარგლებში და დამატებით სამშენებლო მასალის მიწოდებას შპს „-----სთვის. შემოწმებისას კომპანიამ წარადგინა: ბანკის ცნობა და საბანკო ამონაწერები; ხელშეკრულებები და მიღება-ჩაბარების აქტები; ინფორმაცია ტენდერების შესახებ, თანამშრომლობდა შემოწმებასთან და სრულად წარადგენდა ყველა არსებული დოკუმენტი. ------ ტენდერის მიღებაჩაბარების დოკუმენტებზე ანგარიშ-ფაქტურის არქონა არ შეიძლება ჩაითვალოს რეალიზაციის დამალვად. მიღება-ჩაბარების აქტები დამტკიცებულია ------ მუნიციპალიტეტის მიერ. შემოწმების შედეგები ეფუძნება მხოლოდ სახელმწიფო შესყიდვების საიტს და საბანკო ამონაწერებს, რაც არ იძლევა სრული ბუნვის სწორ ასახვას, შესყიდვების სააგენტოს საიტზე განთავსებული ინფორმაცია შეიცავს ტენდერის ღირებულებას და არა ფაქტობრივად მიღებულ შემოსავალს.
2. გადასახადის გადამხდელი არ ეთანხმება საშემოსავლო გადასახადში განსაზღვრულ ვალდებულებებს. განმარტავს, რომ ----- ტენდერის ფარგლებში შესრულებული სამუშაოების ღირებულება არ არის ანაზღაურებული და დარჩენილია პირგასამტეხლოს სახით. შესაბამისად, შემოსავლად ვერ ჩაითვლება თანხა, რომელიც რეალურად არ მიუღია კომპანიას. მიღება-ჩაბარების აქტის დადება არ ნიშნავს რეალიზაციის დასრულებას, თუ არ არსებობს ანგარიშ-ფაქტურა და გადახდა. შპს ----- არ მიუღია ანაზღაურება მომსახურების სანაცვლოდ და იგი არ შეიძლება ჩაითვალოს დასაბეგრ ოპერაციად.
ფაქტობრივი გარემოებები:
საქმის მასალებით ირკვევა, რომ შემოსავლების სამსახურის აუდიტის დეპარტამენტის 2025 წლის 21 მაისის №10310 ბრძანების საფუძველზე ჩატარდა შპს „-----“-ის (ს/ნ -----) საქმიანობის კამერალური საგადასახადო შემოწმება. შესამოწმებელ პერიოდად განისაზღვრა 2022 წლის პირველი იანვრიდან 2025 წლის პირველ აპრილამდე საანგარიშო პერიოდები, გარდა აუდიტის დეპარტამენტის 2023 წლის 13 სექტემბრის №22317 ბრძანებით მოცული საკითხებისა. შემოწმების შედეგებზე 2025 წლის 17 ოქტომბერს შედგენილ იქნა საგადასახადო შემოწმების აქტი, გამოიცა 2025 წლის 27 ოქტომბრის №23572 ბრძანება და №225-21 საგადასახადო მოთხოვნა, რომლის მიხედვით გადასახადის გადამხდელს დამატებით გადასახდელად განესაზღვრა სულ 38 456 ლარი, მათ შორის, გადასახადი 18 148 ლარი, ჯარიმა 18 146 ლარი, საურავი 2 162 ლარი.
საგადასახადო შემოწმების აქტის მიხედვით საგადასახადო ვალდებულებები განსაზღვრულია შემდეგი გარემოებებით:
შპს „-----“-ის (ს/ნ -----) საქმიანობას წარმოადგენს სახელმწიფო ტენდერებში მონაწილეობის საფუძველზე, დადებული ხელშეკრულების შესაბამისად მომსახურების გაწევა, კონკრეტულად, შესამოწმებელ პერიოდში ასრულებს სამუშაოებს 13 ტენდერის ფარგლებში, ძირითადი მომსახურება შესრულებული აქვს მუნიციპალიტეტებისთვის (ქ. -----), სსიპებისთვის და ააიპებისთვის. ასევე ,შპს ,,----"-ს აწვდის სამშენებლო მასალას. შესასრულებელ სამუშაოებს წარმოადგენს: საჯარო სკოლის რეაბილიტაცია, სკოლის მიმდებარე ტერიტორიაზე სკვერის მოწყობა, საჯარო სკოლის შეღობვის სამუშაოები, სოფელ ------ ----- რეაბილიტაციის სამუშაოების შესრულება და ა.შ. გადასახადის გადამხდელი თანამშრომლობს შემოწმებასთან, წარმოდგენილია ბანკიდან ცნობა და საბანკო ანგარიშის ამონაწერები. გადამხდელს არ გააჩნია ბუღალტრული აღრიცხვის პროგრამა, მისი განცხადებით არ აქვს დაზუსტრებული ინფორმაცია დებიტორ-კრედიტორული ნაშთების შესახებ. შპს „------“-ის საქმიანობის კამერალური საგადასახადო შემოწმების შესამოწმებელ პერიოდში ჩატარებულია თემატური საგადასახადო შემოწმება, 2022 წლის აპრილსა და ივლისის თვეში, დღგ-ის დეკლარაციაში ასახვის სისწორის განსაზღვრის მიზნით. თემატური შემოწმების შედეგები გათვალისწინებულია აღნიშნულ სრული კამერალური საგადასახადო შემოწმების შედეგების გაანგარიშებისას. შემოწმების შედეგები გამოყვანილია სახელმწიფო შესყიდვების საიტზე (------), საბანკო ამონაწერებზე და შემოსავლების სამსახურის გადასახადების ადმინისტრირების საინფორმაციო სისტემაში არსებულ მასალაზე დაყრდნობით. შემოწმებით ირკვევა, რომ საწარმოს სახელმწიფო შესყიდვების ტენდერის ------- ფარგლებში გაწეული მომსახურების შესაბამისად მიღებული აქვს მიღება-ჩაბარების დოკუმენტები, რომელზეც არ აქვს ანგარიშ-ფაქტურა გამოწერილი და არ არის გათვალისწინებული 18%-იანი ბრუნვის გაანგარიშებისას. აღნიშული თანხა ------მუნიციპალიტეტის მიერ არ ანაზღაურებულა და დაკავებულია პირგასამტეხლოს სახით. ამას გარდა, მომწოდებლების მიერ მოხდა გადამხდელის მიერ მიღებული ჩათვლის ანგარიშ-ფაქტურების კორექტირება, შპს ,,------“-ს კორექტირების შედეგად შესამცირებელი აქვს ჩასათვლელი დღგის თანხა და აღნიშნული არ აქვს გათვალისწინებული შესაბამისი პერიოდის დეკლარაციით.
ვინაიდან, გადასახადის გადამხდელს საგადასახადო ანგარიშ-ფაქტურის მიხედვით, კორექტირების შედეგად შესამცირებელი აქვს ჩასათვლელი დღგ-ის თანხა და აღნიშნული არ აქვს გათვალისწინებული შესაბამისი პერიოდის დეკლარაციით, გადასახადის გადამხდელს დაერიცხა გადასახადი და ჯარიმა საქართველოს საგადასახადო კოდექსის 275-ე მუხლის შესაბამისად.
დეკლარირებული (თითოეულ პირზე ხელფასის განაცემის, წყროსთან დასაკავებელი მიღებული მომსახურების) მონაცემებისა და საბანკო ამონაწერების ანალიზით დადგინდა, რომ გადასახადის გადამხდელს მიღებული მომსახურების სანაცვლოდ საბანკო ამონაწერების მიხედვით გაცემული აქვს თანხები გადასახადის არაგადამხდელი პირთათვის, რომელიც ექვემდებარება გადახდის წყაროსთნ დაბეგვრას. შემოწმებით ასევე განისაზღვრა სალაროში ნაღდი ფულის ნაშთი შესამოწმებელი პერიოდის ბოლოს. შემოსავლების სამსახურის უფროსის 2019 წლის 8 ივლისის №22708 ბრძანების დანართი №9 ,,მეთოდური მითითება სალაროში ნაღდი ფულის შესახებ"-ის მიხედვით და სალაროს ინვენტარიზაციის შედეგის გათვალისწინებით (0 ლარი), მიღებული თავისუფალი ფულადი სახსრები ჩათვლილ იქნა კომპანიის დირექტორ/დამფუძნებელზე ხელფასის სახით განაცემად. თავისუფალი თანხები გაანგარიშებისას გათვალისწინებული იქნა მიღებული შემოსავალი და გაწეული ხარჯები, დამფუძნებლის მიერ თანხის შეტანა/გამოტანა, სესხის სახით მიღებული შემოსავალი, ბიუჯეტში გადახდილი თანხები და ბანკის საკომისიო.
ყოველივე ზემოაღნიშნულისა და საქართველოს საგადასახადო კოდექსის 154-ე მუხლის გათვალისწინებით, პირს დაერიცხა გადასახადი და ჯარიმა საქართველოს საგადასახადო კოდექსის 275-ე მუხლის შესაბამისად.
შემოსავლების სამსახურმა განიხილა წარმოდგენილი საჩივრები და მიიჩნია, რომ გადასახადის გადამხდელის მოთხოვნა არ უნდა დაკმაყოფილდეს შემდეგ გარემოებათა გამო:
საქართველოს საგადასახადო კოდექსის 302-ე მუხლის მე-6 ნაწილის თანახმად, დავის განმხილველ ორგანოებს უფლება აქვთ, საჩივარი განიხილონ დისტანციურად, ტექნიკურ საშუალებათა გამოყენებით. მათ ასევე უფლება აქვთ, საჩივარი განიხილონ მომჩივნის დაუსწრებლად, თუ საქმეში არსებული მასალებიდან სრულად დგინდება დავის საგანთან დაკავშირებული ფაქტობრივი გარემოებები.
პირველ სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.
საქართველოს საგადასახადო კოდექსის 158-ე მუხლის პირველი ნაწილის თანახმად, დღგ-ით დასაბეგრ პირად (შემდგომ - დასაბეგრი პირი) განიხილება ნებისმიერი პირი, რომელიც ნებისმიერ ადგილზე დამოუკიდებლად ახორციელებს ნებისმიერი სახის ეკონომიკურ საქმიანობას, მიუხედავად ამ საქმიანობის მიზნისა და შედეგისა.
ამავე კოდექსის 159-ე მუხლის პირველი ნაწილის „ა“ და „ბ“ ქვეპუნქტების თანახმად, დღგ-ით დასაბეგრი ოპერაციებია, დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ საქონლის მიწოდება/მომსახურების გაწევა.
საქართველოს საგადასახადო კოდექსის 163-ე მუხლის პირველი და მე-2 ნაწილების თანახმად:
1. საქონლის მიწოდების/მომსახურების გაწევის დღგ-ით დაბეგვრა ხორციელდება საქონლის მიწოდების/მომსახურების გაწევის მომენტში, თუ ამ მუხლით სხვა რამ არ არის გათვალისწინებული.
2. თუ თანხა სრულად ან ნაწილობრივ ანაზღაურებულია საქონლის მიწოდებამდე/მომსახურების გაწევამდე, ანაზღაურებული თანხის შესაბამისი დღგ-ის გადახდა ხორციელდება ანაზღაურების თანხის გადახდის საანგარიშო პერიოდის მიხედვით, გარდა ამ მუხლის მე-5 და მე-9 ნაწილებით გათვალისწინებული შემთხვევებისა.
საქართველოს საგადასახადო კოდექსის 164-ე მუხლის პირველი ნაწილის თანახმად, თუ ამ მუხლით სხვა რამ არ არის გათვალისწინებული, დღგ-ით დასაბეგრი თანხა არის საქონლის მიწოდების/მომსახურების გაწევის სანაცვლოდ მიღებული/მისაღები ანაზღაურება დღგ-ის გარეშე, საქონლის/მომსახურების ფასთან პირდაპირ დაკავშირებული სუბსიდიის ჩათვლით. აღნიშნული დებულება გამოიყენება საქონლის/მომსახურების გაცვლის ოპერაციის (ბარტერული ოპერაციის) შემთხვევაშიც.
საქართველოს საგადასახადო კოდექსის 174-ე მუხლის პირველი ნაწილის თანახმად, დღგ-ის ჩათვლა არის დასაბეგრი პირის უფლება, შეიმციროს გადასახდელი დღგ-ის თანხა საქონლის მიწოდებასთან/მომსახურების გაწევასთან დაკავშირებული ხარჯის სხვადასხვა კომპონენტის ღირებულებაზე პირდაპირ მიკუთვნებული დღგ-ის თანხით.
ამავე მუხლის მე-2 ნაწილის თანახმად, დღგ-ის ჩათვლის უფლება წარმოიშობა ჩასათვლელი დღგის თანხის დარიცხვის ვალდებულების წარმოშობის (შესაბამისი ოპერაციის დღგ-ით დაბეგვრის) მომენტიდან. ამავე მუხლის მე-3 ნაწილის თანახმად, დღგ-ის ჩათვლის უფლება აქვს მხოლოდ დღგ-ის გადამხდელად რეგისტრირებულ დასაბეგრ პირს.
საქართველოს საგადასახადო კოდექსის 175-ე მუხლის პირველი ნაწილის „ა“ ქვეპუნქტის თანახმად, თუ საქონელი/მომსახურება გამიზნულია ან გამოიყენება დღგ-ით დასაბეგრი ოპერაციის განხორციელებისთვის, დასაბეგრ პირს უფლება აქვს ჩაითვალოს საქართველოს ტერიტორიაზე სხვა დასაბეგრი პირისგან ამ საქონლის/მომსახურების შეძენისთვის გადახდილი/გადასახდელი დღგ.
საქართველოს საგადასახადო კოდექსის 176-ე მუხლის პირველი ნაწილის „ა“ ქვეპუნქტის თანახმად, დღგ-ის ჩათვლის მიღების საფუძველია ამ კოდექსის 175-ე მუხლის პირველი ნაწილის „ა“ და „ბ“ ქვეპუნქტებითა და მე-2 ნაწილით გათვალისწინებულ შემთხვევებში – საქონლის/მომსახურების შეძენასთან დაკავშირებით ამ კოდექსით დადგენილი წესით გამოწერილი საგადასახადო ანგარიშფაქტურა.
საქართველოს საგადასახადო კოდექსის 179-ე მუხლის პირველი, მე-2 და მე-4 ნაწილების თანახმად:
1. დღგ-ით დასაბეგრი თანხა და, შესაბამისად, დღგ-ის ჩასათვლელი თანხა კორექტირდება, თუ შეიცვალა ის გარემოებები/ფაქტორები, რომელთა საფუძველზეც დასაბეგრი ოპერაციის განხორციელების დროს განისაზღვრა დღგ-ით დასაბეგრი თანხა.
2. დასაბეგრი ოპერაციის თანხის კორექტირება ხორციელდება კორექტირების გამომწვევი გარემოების დადგომის საანგარიშო პერიოდში.
4. დღგ-ით დასაბეგრი თანხის კორექტირების შემთხვევებს, აგრეთვე დოკუმენტის გამოწერისა და წარდგენის წესს განსაზღვრავს საქართველოს ფინანსთა მინისტრი.
საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.
დადგენილი ფაქტობრივი გარემოებების მიხედვით, საწარმოს სახელმწიფო შესყიდვების ტენდერის ----- ფარგლებში გაწეული მომსახურების შესაბამისად მიღებული აქვს მიღებაჩაბარების დოკუმენტები, რომელზეც არ აქვს ანგარიშ-ფაქტურა გამოწერილი და არ არის გათვალისწინებული 18%-იანი ბრუნვის გაანგარიშებისას. აღნიშული თანხა ------ მუნიციპალიტეტის მიერ არ ანაზღაურებულა და დაკავებულია პირგასამტეხლოს სახით. ამას გარდა, მომწოდებლების მიერ მოხდა გადამხდელის მიერ მიღებული ჩათვლის ანგარიშ-ფაქტურების კორექტირება, შპს ,,-------“-ს კორექტირების შედეგად შესამცირებელი აქვს ჩასათვლელი დღგის თანხა და აღნიშნული არ აქვს გათვალისწინებული შესაბამისი პერიოდის დეკლარაციით.
შემოსავლების სამსახური აღნიშნავს, რომ მომჩივანი საჩივარში ვერ უთითებს ფაქტობრივ და სამართლებრივ გარემოებებზე, თუ რა ნაწილში იქნა საგადასახადო ვალდებულებები განსაზღვრული არამართლზომიერად. ხოლო, დავის წარმოების პროცესში არ ყოფილა წარმოდგენილი იმგვარი არგუმენტები/მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს.
ზემოაღნიშნული სამართლებრივი ნორმების და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივარი დაუსაბუთებელია და არ უნდა დაკმაყოფილდეს.
მე-2 სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.
საქართველოს საგადასახადო კოდექსის 73-ე მუხლის მე-9 ნაწილის „ბ“ ქვეპუნქტის თანახმად, საგადასახადო ვალდებულების განსაზღვრის მიზნით საგადასახადო ორგანოს უფლება აქვს სამეურნეო ოპერაციის ფორმისა და შინაარსის გათვალისწინებით შეცვალოს მისი კვალიფიკაცია, თუ ოპერაციის ფორმა არ შეესაბამება მის შინაარსს.
ამავე მუხლის მე-4 ნაწილის თანახმად, თუ რაიმე თანხა გამოიყენება კონკრეტული პირის ინტერესებისათვის, ჩაითვლება, რომ ეს თანხა მიღებული აქვს ამ პირს.
საქართველოს საგადასახადო კოდექსის 101-ე მუხლის პირველი ნაწილის თანახმად, ხელფასის სახით მიღებულ შემოსავლებს განეკუთვნება ფიზიკური პირის მიერ დაქირავებით მუშაობის შედეგად მიღებული ნებისმიერი საზღაური ან სარგებელი, მათ შორის, წინა სამუშაო ადგილიდან პენსიის ან სხვა სახით მიღებული შემოსავალი, ან შემოსავალი მომავალი სამუშაო ადგილიდან.
საქართველოს საგადასახადო კოდექსის 154-ე მუხლის პირველი ნაწილის ,,ა“ ქვეპუნქტის მიხედვით, გადახდის წყაროსთან გადასახადის დაკავება ევალება საგადასახადო აგენტს, რომელიც არის იურიდიული პირი, საწარმო/ორგანიზაცია ან მეწარმე ფიზიკური პირი, რომელიც დაქირავებულს უხდის ხელფასს.
ამავე მუხლის მე-2 ნაწილის „ა“ და „ბ“ ქვეპუნქტების მიხედვით, გადახდის წყაროსთან გადასახადის დაკავებისას:
ა) გადასახადის დაკავებისა და ბიუჯეტში მისი გადარიცხვისათვის პასუხისმგებლობა ეკისრება შემოსავლის გადამხდელს;
ბ) გადასახადის თანხის დაუკავებლობის შემთხვევაში შემოსავლის გადამხდელი ვალდებულია ბიუჯეტში შეიტანოს დაუკავებელი გადასახადის თანხა ფაქტობრივად გადახდილი ანაზღაურების შესაბამისად და მასთან დაკავშირებული სანქციები.
საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.
დადგენილი ფაქტობრივი გარემოებისა და აუდიტის დეპარტამენტის ინფორმაციით დგინდება, რომ ფულადი სახსრების მოძრაობის გაანგარიშებისას გათვალიწინებულ იქნა, მხოლოდ ის შემოსავალი, რომლის მიღებაც გადასახადის გადამხდელს რეალურად უფიქსირდება. ვინაიდან, ------ ტენდერის ფარგლებში მიღება-ჩაბარების თანხა სრულად არ არის ანაზღაურებული, ფულადი სახსრების მოძრაობის გაანგარიშებისას გათვალისწინებულია თანხის მხოლოდ ის ნაწილი, რომლის მიღებაც რეალურად ფიქსირდება. მიუღებელი თანხები არ არის გათვალისწინებული სალაროს ნაშთის გაანაგარიშებაში.
შემოსავლების სამსახური აღნიშნავს, რომ მომჩივანი საჩივარში ვერ უთითებს ფაქტობრივ და სამართლებრივ გარემოებებზე, თუ რა ნაწილში იქნა საგადასახადო ვალდებულებები განსაზღვრული არამართლზომიერად. ხოლო, დავის წარმოების პროცესში არ ყოფილა წარმოდგენილი იმგვარი არგუმენტები/მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს.
ზემოაღნიშნული სამართლებრივი ნორმების და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივარი დაუსაბუთებელია და არ უნდა დაკმაყოფილდეს.
საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ:
1. შპს „-----“-ის (ს/ნ -----) საჩივრები არ დაკმაყოფილდეს;
2. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. №16) ან სასამართლოში (მის.: ქ. თბილისი, დავით აღმაშენებლის ხეივანი №64), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.
სადავო საკითხი
1. გადასახადის გადამხდელი არ ეთანხმება დღგ-ის დასაბეგრ ბრუნვას.
2. გადასახადის გადამხდელი არ ეთანხმება საშემოსავლო გადასახადში განსაზღვრულ ვალდებულებებს.
ფაქტობრივი გარემოებები
შპს-ს საქმიანობას წარმოადგენს სახელმწიფო ტენდერებში მონაწილეობის საფუძველზე, დადებული ხელშეკრულების შესაბამისად მომსახურების გაწევა.კონკრეტულად, შესამოწმებელ პერიოდში ასრულებს სამუშაოებს 13 ტენდერის ფარგლებში. გადამხდელს არ გააჩნია ბუღალტრული აღრიცხვის პროგრამა, მისი განცხადებით არ აქვს დაზუსტრებული ინფორმაცია დებიტორ-კრედიტორული ნაშთების შესახებ.
შემოწმებით ირკვევა, რომ საწარმოს სახელმწიფო შესყიდვების ტენდერის ფარგლებში გაწეული მომსახურების შესაბამისად მიღებული აქვს მიღება-ჩაბარების დოკუმენტები, რომელზეც არ აქვს ანგარიშ-ფაქტურა გამოწერილი და არ არის გათვალისწინებული 18%-იანი ბრუნვის გაანგარიშებისას. აღნიშული თანხა მუნიციპალიტეტის მიერ არ ანაზღაურებულა და დაკავებულია პირგასამტეხლოს სახით. ამას გარდა, მომწოდებლების მიერ მოხდა გადამხდელის მიერ მიღებული ჩათვლის ანგარიშ-ფაქტურების კორექტირება, შპს -ს კორექტირების შედეგად შესამცირებელი აქვს ჩასათვლელი დღგ-ის თანხა და აღნიშნული არ აქვს გათვალისწინებული შესაბამისი პერიოდის დეკლარაციით. გადასახადის გადამხდელს დაერიცხა გადასახადი და ჯარიმა.
გადასახადის გადამხდელს მიღებული მომსახურების სანაცვლოდ გაცემული აქვს თანხები გადასახადის არაგადამხდელი პირთათვის, რომელიც ექვემდებარება გადახდის წყაროსთნ დაბეგვრას. შემოწმებით ასევე განისაზღვრა სალაროში ნაღდი ფულის ნაშთი შესამოწმებელი პერიოდის ბოლოს. სალაროს ინვენტარიზაციის შედეგის გათვალისწინებით (0 ლარი), მიღებული თავისუფალი ფულადი სახსრები ჩათვლილ იქნა კომპანიის დირექტორ/დამფუძნებელზე ხელფასის სახით განაცემად. თავისუფალი თანხები გაანგარიშებისას გათვალისწინებული იქნა მიღებული შემოსავალი და გაწეული ხარჯები, დამფუძნებლის მიერ თანხის შეტანა/გამოტანა, სესხის სახით მიღებული შემოსავალი, ბიუჯეტში გადახდილი თანხები და ბანკის საკომისიო. პირს დაერიცხა გადასახადი და ჯარიმა.
გადაწყვეტილება
შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივარი დაუსაბუთებელია და არ უნდა დაკმაყოფილდეს.
დასაბუთება
შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს:158(1);159(1);163(1,2)164(1);174(1);175(1);176(1);179(2,4);73(9);101(1);154(1);