გადაწყვეტილება №25893/2/2025

№25893/2/2025

09 დეკემბერი 2025

გ ა დ ა წ ყ ვ ე ტ ი ლ ე ბ ა

 

მომჩივანი: შპს „-------“ (ს/ნ „-------“)

მოპასუხე: აუდიტის დეპარტამენტი

 

საქართველოს ფინანსთა სამინისტროსთან არსებულმა დავების განხილვის საბჭომ,28.11.2025 წელს განიხილა და მიიღო გადაწყვეტილება შპს „-------“-ის 24.09.2025 წელს რეგისტრირებულ საჩივარზე (რეგისტრაციის №25893/2/2025).

 

დავის საგანი:

საგადასახადო დავის განახლება ახლად აღმოჩენილ/გამოვლენილი გარემოების გამო.

 

გასაჩივრებული გადაწყვეტილება:

1. აუდიტის დეპარტამენტის 29.05.2025 წლის №225-3 საგადასახადო მოთხოვნა;

2. შემოსავლების სამსახურის 2025 წლის 8 სექტემბრის №19661 ბრძანება.

 

დარიცხული თანხა: 250 463,03 ლარი.

მათ შორის:

გადასახადი - 143 257

დღგ - 57 970

საშემოსავლო გადასახადი - 85 287

ჯარიმა - 70 659

საურავი - 36 547,03

 

ფაქტების აღწერა

გადასახადის გადამხდელის საქმიანობის საგანია სასტუმრო და სარესტორნო მომსახურების გაწევა, „-------“-ის რაიონში, სოფელ „-------“-ში.

შემოსავლების სამსახურის აუდიტის დეპარტამენტის მიერ განხორციელდა მომჩივნის საქმიანობის 2023 წლის 15 მარტიდან 2023 წლის პირველ ნოემბრამდე საანგარიშო პერიოდების კამერალური საგადასახადო შემოწმება. შემოწმების შედეგები აისახა 2023 წლის 27 დეკემბრის საგადასახადო შემოწმების აქტში, საიდანაც ირკვევა, რომ მომჩივნის ეკონომიკური საქმიანობიდან მიღებული შემოსავლები გაანგარიშდა არაპირდაპირი მეთოდით, რამაც გამოიწვია დღგ-ით დასაბეგრი ბრუნვის გაზრდა 379 210 ლარით. ამასთან, ვინაიდან აღნიშნული შემოსავალი არ არის დაფიქსირებული არც საბანკო ანგარიშებზე და არც ბუღალტრულ აღრიცხვაში, აღნიშნული თანხები ჩაითვალა ანგარიშვალდებულ პირზე გაცემულ ხელფასად.

შემოწმების შედეგად მომჩივანს დაერიცხა დღგ და საშემოსავლო გადასახადი, ასევე შეეფარდა საგადასახადო კოდექსის 275-ე მუხლით გათვალისწინებული სანქცია.

შემოწმების აქტის საფუძველზე გამოიცა გადასახადების/გადასახდელების და საგადასახადო სანქციების თანხების დარიცხვის/შემცირების შესახებ აუდიტის დეპარტამენტის 2023 წლის 28 დეკემბრის №33457 ბრძანება და ამავე თარიღის №225-32 საგადასახადო მოთხოვნა.

აღნიშნული დარიცხვა გასაჩივრდა შემოსავლების სამსახურში. შემოსავლების სამსახურის 2024 წლის 11 მარტის №5202 ბრძანებით საჩივარი დაკმაყოფილდა ნაწილობრივ:

1. არაპირდაპირი მეთოდის გამოყენებით განსაზღვრული საგადასახადო ვალდებულებების დაზუსტების მიზნით, გადასახადის გადამხდელს მიეცა წინადადება ამ ბრძანების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს საჩივარში მითითებული არგუმენტაციის დოკუმენტურად დადასტურებული მტკიცებულებები;

2. აუდიტის დეპარტამენტს დაევალა:

ა) გადასახადის გადამხდელის მონაწილეობით, ყოველმხრივ შეისწავლოს წარდგენილი მტკიცებულებები და შესწავლის შედეგების გათვალისწინებით, სათანადო საფუძვლის არსებობის შემთხვევაში, განახორციელოს განსაზღვრული საგადასახადო ვალდებულებების კორექტირება (შემცირება);

ბ) ამ ბრძანების სარეზოლუციო ნაწილის მე-2 პუნქტის შესრულების შედეგების გათვალისწინებით, განახორციელოს საბანკო ანგარიშებსა და ბუღალტრულ პროგრამაში აღურიცხავი შემოსავლის ხელფასად განხილვის საფუძვლით დარიცხული თანხების კორექტირება (შემცირება);

3. დანარჩენ ნაწილში საჩივარი არ დაკმაყოფილდა.

შემოსავლების სამსახურის 2024 წლის 11 მარტის №5202 ბრძანების აღსრულების შედეგად გამოიცა აუდიტის დეპარტამენტის 2024 წლის 28 ივნისის დასკვნა საგადასახადო შემოწმების შედეგების გადაანგარიშების თაობაზე და 2024 წლის 4 ივლისის №225-13 კორექტირებული საგადასახადო მოთხოვნა, რომლის საფუძველზე გადასახადის გადამხდელს შეუმცირდა სულ 10 483 ლარი, მათ შორის გადასახადი 6 105 ლარი, ხოლო ჯარიმა 4 378 ლარი.

აუდიტის დეპარტამენტის 2024 წლის 4 ივლისის №225-13 კორექტირებული საგადასახადო მოთხოვნა გასაჩივრდა შემოსავლების სამსახურში. შემოსავლების სამსახურის 14.08.2024 წლის №18776 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

საბჭოს 17.10.2024 წლის №23853/2/2024 გადაწყვეტილებით საჩივარი, მომჩივნის მონაწილეობით, ხელახლა განსახილველად დაუბრუნდა ამავე სამსახურს.

შემოსავლების სამსახურმა 2.12.2024 წლის №25231 ბრძანებით საჩივარი დააკმაყოფილა ნაწილობრივ:

- აუდიტის დეპარტამენტს დაევალა გადასახადის გადამხდელის მიერ შეძენილი 18 ტონა ხორბალი და 15 ტონა სიმინდი განიხილოს იმავე სახეობის საქონელზე დადგენილი აუდირებული ფასნამატით რეალიზებულად და აღნიშნულის გათვალისწინებით, განახორციელოს საგადასახადო ვალდებულებების კორექტირება (შემცირება);

მე-2 სადავო საკითხთან დაკავშირებით:

ა) გადასახადის გადამხდელს მიეცა წინადადება ამ ბრძანების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს მისი არგუმენტაციის დოკუმენტურად დადასტურებული მტკიცებულებები;

ბ) განსაზღვრულ ვადაში მტკიცებულებების წარდგენის შემთხვევაში, აუდიტის დეპარტამენტს დაევალა შეისწავლოს წარმოდგენილი მტკიცებულებები და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების შესაბამისი კორექტირება (შემცირება). დანარჩენ ნაწილში საჩივარი არ დაკმაყოფილდა.

შემოსავლების სამსახურის 2.12.2024 წლის №25231 ბრძანების აღსრულების მიზნით, გამოიცა 21.05.2025 წლის №195 დასკვნა, საგადასახადო შემოწმების შედეგების გადაანგარიშებაზე და 2025 წლის 29 მაისის №225-3 კორექტირებული საგადასახადო მოთხოვნა. მომჩივანს შეუმცირდა სულ 45 784 ლარი, მათ შორის გადასახადი - 30 760 ლარი და ჯარიმა 15 024 ლარი.

2025 წლის 29 მაისის №225-3 კორექტირებული საგადასახადო მოთხოვნა გასაჩივრდა შემოსავლების სამსახურში.

შემოსავლების სამსახურის 2025 წლის 8 სექტემბრის №19661 ბრძანებით მიღებულია შემდეგი გადაწყვეტილება.

- საჩივარი, აუდიტის დეპარტამენტის 2025 წლის 29 მაისის №225-3 კორექტირებულ საგადასახადო მოთხოვნასთან დაკავშირებით დავის დაწყების მოთხოვნის ნაწილში არ დაკმაყოფილდა;

- საჩივარი აუდიტის დეპარტამენტის 2025 წლის 29 მაისის №225-3 კორექტირებულ საგადასახადო მოთხოვნასთან დაკავშირებით დარჩა განუხილველი, საგადასახადო კოდექსის 301-ე მუხლის „ე“ ქვეპუნქტის საფუძველზე.

შემოსავლების სამსახურის 2025 წლის 8 სექტემბრის №19661 ბრძანება, ახლად აღმოჩენილი/გამოვლენილი გარემოების გამო დავის დაწყებაზე უარის თქმის ნაწილში გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი

შემოსავლების სამსახური მიუთითებს საქართველოს საგადასახადო კოდექსის 302-ე მუხლის მე-6 ნაწილზე, 299-ე მუხლის მე-6 ნაწილზე, ამავე მუხლის მე-7 ნაწილზე და აღნიშნავს, რომ მომჩივანი ვალდებულია, დაამტკიცოს, რომ კონკრეტული გარემოება, რომელსაც იგი ემყარება დავის დაწყების მოთხოვნისას, ახლად აღმოჩენილი ან ახლად გამოვლენილი გარემოებაა და აღნიშნული გარემოების შესახებ არ იცოდა და არ შეეძლო სცოდნოდა მისთვის არასასურველი გადაწყვეტილების მიღებამდე.

ყოველივე ზემოაღნიშნულის გათვალისწინებით, შემოსავლების სამსახური მიიჩნევს, რომ წარმოდგენილ საჩივარში მითითებული გარემოებები არ წარმოადგენს ახლად აღმოჩენილ ან ახლად გამოვლენილ გარემოებას, რომელიც შეიძლება გახდეს დავის დაწყების საფუძველი საქართველოს საგადასახადო კოდექსის 299-ე მუხლის მე-6 ნაწილის გათვალისწინებით.

ამდენად, შემოსავლების სამსახურმა მიიჩნია, რომ გადასახადის გადამხდელის მიერ წარმოდგენილი საჩივარი აღნიშნულ ნაწილში დაუსაბუთებელია და არ არსებობს მისი დაკმაყოფილების სამართლებრივი საფუძველი.

 

მომჩივნის არგუმენტაცია

გასაჩივრებული ბრძანებისა და საგადასახადო მოთხოვნის ელექტრონულ ვებ გვერდზე ჩაბარება ბუღალტრის მიერ განხორციელდა 2 ივნისს თუმცა, მისი დაუდევრობის ფონზე ხელმძღვანელობისათვის შეუტყობინებლობის გამო გასულია კანონით გათვალისწინებული ვადა. საქმის მასალების საფუძვლიანი შესწავლის შედეგად გამოიკვეთა ახლად აღმოჩენილი გარემოება რაზედაც ქვემოთ იქნება საუბარი.

შემმოწმებლების მიერ საშემოსავლო გადასახადით დაიბეგრა დეკლარირებული შემოსავლისა და არაპირდაპირი მეთოდით დათვლილი შემოსავალის სხვაობა, რაც ტექნიკურად და სამართლებრივად არასწორია. ანუ დეკლარაციით დაფიქსირებული შემოსავალი არ გულისხმობს შემოსულ ფულს. რეალურად უნდა დაებეგრა საბუღალტრო მონაცემით (პროგრამა ორისი) მიღებული ფულისა და არაპირდაპირი მეთოდით დათვლილი აბსტრაქტული ფულის სხვაობა. ანუ, ეს მიდგომა გულისხმობს გარემოებას, როდესაც გადამხდელმა არ აჩვენა შემოსავალი და ე.წ. დამალული შემოსავალი უნდა გამოკლებოდა ბუღალტრულად დაფიქსირებულ შემოსულ ფულს. ეს გარემოება არსებითად ცვლის დამატებით დარიცხული საშემოსავლო გადასახადის მოცულობას და შესაბამისად, მისგან გამოწვეულ ჯარიმა საურავებს. ითხოვს სსკ-ის 297-ე მუხლის მე-6 და მე-7 ნაწილების გათვალისწინებით, საქმის წარმოებაში მიღებას და საკითხის შესწავლის შესაბამისად დარიცხული თანხის გადაანგარიშებას.

 

დავების განხილვის საბჭო

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:

საგადასახადო კოდექსის 308-ე მუხლის შესაბამისად, საქართველოს ფინანსთა სამინისტროს სისტემაში დავის განახლება დასაშვებია მხოლოდ ახლად აღმოჩენილი ან ახლად გამოვლენილი გარემოების შემთხვევაში, გადაწყვეტილების მიღებიდან 6 წლის ვადაში. დავის განახლების მოთხოვნით დავის განმხილველი ორგანოსათვის მიმართვის უფლება აქვს მხოლოდ მომჩივანს. მომჩივანი ახლად აღმოჩენილი ან ახლად გამოვლენილი გარემოებით მიმართავს დავის განმხილველ ბოლო ორგანოს, რომელმაც არსებითად იმსჯელა მომჩივნის მიერ მითითებულ დავის საგანზე.

საგადასახადო კოდექსის 299-ე მუხლის მე-7 ნაწილის თანახმად, ახლად აღმოჩენილად ან ახლად გამოვლენილად ჩაითვლება ისეთი გარემოებები ან მტკიცებულებები, რომლებიც მომჩივანმა არ იცოდა და არ შეეძლო სცოდნოდა მისთვის არასასურველი გადაწყვეტილების მიღებამდე და რომელთა დროულად წარდგენა გამოიწვევდა მომჩივნისათვის ხელსაყრელი გადაწყვეტილების მიღებას.

გადასახადის გადამხდელი წარმოდგენილ საჩივარში მიუთითებს რომ შემმოწმებლის მიერ საშემოსავლო გადასახადით დაიბეგრა დეკლარირებული შემოსავლისა და არაპირდაპირი მეთოდით დათვლილი შემოსავლის სხვაობა, რაც ტექნიკურად და სამართლებრივად არასწორია. რეალურად შემოწმებით უნდა დაბეგრილიყო საბუღალტრო მონაცემებით (პროგრამა ორისი) მიღებული ფულისა და არაპირდაპირი მეთოდით დათვლილი აბსტრაქტული ფულის სხვაობა, რაც მომჩივნის აზრით წარმოადგენს ახლად აღმოჩენილ გარემოებას.

გადასახადის გადამხდელი არ წარმოადგენს ისეთ გარემოებებს ან მტკიცებულებებს, რომლებიც მან არ იცოდა და არ შეეძლო სცოდნოდა მისთვის არასასურველი გადაწყვეტილების მიღებამდე და რომელთა დროულად წარდგენა გამოიწვევდა მომჩივნისათვის ხელსაყრელი გადაწყვეტილების მიღებას.

აღნიშნულიდან გამომდინარე, გადასახადის გადამხდელის არგუმენტის გათვალისწინებით, საბჭოს მიაჩნია, რომ არ არსებობს მომჩივნის მოთხოვნის დაკმაყოფილების და დავის განახლების საფუძველი.

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:

 

1. საჩივარი არ დაკმაყოფილდეს;

2. გადაწყვეტილება შეიძლება გასაჩივრდეს თბილისის საქალაქო სასამართლოში (ქ. თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხი

მომჩივანი ითხოვს სსკ-ის 297-ე მუხლის მე-6 და მე-7 ნაწილების გათვალისწინებით, საქმის წარმოებაში მიღებას და საკითხის შესწავლის შესაბამისად დარიცხული თანხის გადაანგარიშებას.

 

ფაქტობრივი გარემოებები

გადამხდელის საქმიანობის საგანია სასტუმრო და სარესტორნო მომსახურების გაწევა.შემოწმებით ირკვევა,რომ მომჩივნის ეკონომიკური საქმიანობიდან მიღებული შემოსავლები გაანგარიშდა არაპირდაპირი მეთოდით, რამაც გამოიწვია დღგ-ით დასაბეგრი ბრუნვის გაზრდა.ვინაიდან აღნიშნული შემოსავალი არ არის დაფიქსირებული არც საბანკო ანგარიშებზე და არც ბუღალტრულ აღრიცხვაში, აღნიშნული თანხები ჩაითვალა ანგარიშვალდებულ პირზე გაცემულ ხელფასად.შედეგად მომჩივანს დაერიცხა დღგ და საშემოსავლო გადასახადი, ასევე შეეფარდა სსკ-ის 275-ე მუხლით გათვალისწინებული სანქცია.

 

გადაწყვეტილება

საბჭოს მიაჩნია, რომ არ არსებობს მომჩივნის მოთხოვნის დაკმაყოფილების და დავის განახლების საფუძველი.

 

დასაბუთება

საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს :

299(7),308.