გადაწყვეტილება №26275/2/2025

№26275/2/2025

26 დეკემბერი 2025

გ ა დ ა წ ყ ვ ე ტ ი ლ ე ბ ა

 

მომჩივანი: შპს „---“ (ს/ნ ---)

მოპასუხე: აუდიტის დეპარტამენტი

 

საქართველოს ფინანსთა სამინისტროსთან არსებულმა დავების განხილვის საბჭომ, 19.12.2025 წელს განიხილა და მიიღო გადაწყვეტილება შპს „---“-ის 8.12.2025 წელს რეგისტრირებულ საჩივარზე (რეგისტრაციის №26275/2/2025).

 

დავის საგანი:

დამატებული ღირებულების გადასახადის დარიცხვის მართლზომიერება.

 

გასაჩივრებული გადაწყვეტილება:

1. აუდიტის დეპარტამენტის 17.09.2025 წლის №006-357 საგადასახადო მოთხოვნა;

2. შემოსავლების სამსახურის 13.11.2025 წლის №24947 ბრძანება.

 

დარიცხული თანხა: 190 115,59 ლარი.

მათ შორის: დღგ - 3 283,17

ჯარიმა - 186 020,82

საურავი - 811,60

 

ფაქტების აღწერა

გადასახადის გადამხდელად რეგისტრირებულია 29.03.2010 წელს. დღგ-ის გადამხდელად რეგისტრირებულია 29.04.2010 წლიდან. პირის საქმიანობაა ავეჯის წარმოება და რეალიზაცია. შემოსავლების სამსახურის აუდიტის დეპარტამენტის მიერ ჩატარდა გადასახადის გადამხდელის საქმიანობის 1.01.2022 წლიდან 1.07.2025 წლამდე პერიოდის თემატური კამერალური საგადასახადო შემოწმება ელექტრონულად გამოწერილი საგადასახადო ანგარიშ-ფაქტურების/სასაქონლო ზედნადებების, მიღებული საგადასახადო ანგარიშ-ფაქტურებისა და საბაჟო დეკლარაციების 2022 წლის იანვრის, თებერვლის, აპრილის, 2023 წლის აპრილის, ივნისის, ივლისის, აგვისტოს, სექტემბრის, 2024 წლის იანვრის, თებერვლის, მარტის და ივნისის დღგ-ის დეკლარაციებში ასახვის სისწორის დადგენის მიზნით. შემოწმების შედეგები აისახა 15.09.2025 წლის საგადასახადო შემოწმების აქტში, საიდანაც ირკვევა, რომ სადავო დარიცხვა გამოწვეულია შემდეგი გარემოებებით:

საქართველოს ფინანასთა სამინისტროს საგამოძიებო სამსახურის 2025 წლის 30 ივლისის №10873/15- 04-01 წერილში მითითებულია, რომ სისხლის სამართლის №092261223030 საქმეზე ჩატარებული გამოძიების შედეგად, საქმეში ფიგურანტი კომპანიის - შპს „---“- ს სახელით, შპს „---“-სათვის (ს/ნ ---), ჯამში 233 732 ლარის ღირებულების მომსახურებაზე, გამოწერილია ერთი ერთეული ყალბი ავანსის და 5 ერთეული ყალბი ანგარიშ-ფაქტურა, ხოლო შპს „---“-სათვის, ჯამში 365 244 ლარის საქონლის/მომსახურების მიწოდებაზე, 3 ერთეული ყალბი ავანსის და 2 ერთეული ყალბი ანგარიშ-ფაქტურა. გამოძიების მასალებსა და გადასახადების ადმინისტრირების საინფორმაციოს სისტემის მონაცემებზე დაყრდნობით შესამოწმებელ პერიოდებზე გაანგარიშდა კომპანიის დღგ-ით დასაბეგრი ბრუნვა, კომპანიას დაეკისრა დღგ 3 283 ლარის ოდენობით და დაეკისრა საგადასახადო კოდექსის 282-ე და 275-ე მუხლებით გათვალისწინებული ჯარიმა.

შემოწმების აქტის საფუძველზე 17.09.2025 წელს გამოიცა აუდიტის დეპარტამენტის №20446 ბრძანება და გადამხდელს წარედგინა ამავე თარიღის №006-357 საგადასახადო მოთხოვნა. აღნიშნული აქტები გასაჩივრდა შემოსავლების სამსახურში, რომლის 13.11.2025 წლის №24947 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი

შემოსავლების სამსახური ყურადღებას ამახვილებს შემოწმებით დადგენილ ფაქტობრივ გარემოებაზე, რომლის თანახმად, საგამოძიებო სამსახურის მიერ მოწოდებული ინფორმაციის მიხედვით, შპს „---“-ს (ს/ნ ---) საქონლის/მომსახურების მიწოდებაზე შპს „---“-სათვის და შპს „---“-სათვის გამოწერილი ჰქონდა ყალბი საგადასახადო ანგარიშ-ფაქტურები. შემოწმების მიერ, საგამოძიებო სამსახურის მასალებზე და შემოსავლების სამსახურის გადასახადების ადმინისტრირების საინფორმაციო სისტემაში არსებულ ინფორმაციაზე დაყრდნობით განისაზღვრა კომპანიის დღგ-ით დასაბეგრი ბრუნვის ოდენობა. ამასთან, წარმოდგენილ საჩივარში გადასახადის გადამხდელი ვერ უთითებს ფაქტობრივ და სამართლებრივ გარემოებებზე, თუ რა ნაწილში იქნა საგადასახადო ვალდებულებები განსაზღვრული არამართლზომიერად, ხოლო დავის წარმოების პროცესში არ ყოფილა წარმოდგენილი მისი არგუმენტაციის ისეთი მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს.

ზემოხსენებულ სამართლებრივ ნორმებზე, საქმეში არსებულ მასალებსა და ფაქტობრივ გარემოებებზე დაყრდნობით, შემოსავლების სამსახურმა მიიჩნია, რომ წარმოდგენილი საჩივარი დაუსაბუთებელია და არ არსებობს მისი დაკმაყოფილების სამართლებრივი საფუძველი.

 

მომჩივნის არგუმენტაცია

იმ მხარემ, რომელიც რეალურად იყო დამნაშავე პროცესებში, აღიარა დანაშაული და აანაზღაურა სახელმწიფოსთვის მიყენებული ზიანი. ჯარიმები ძირითადად გამოწვეულია ფინანსთა სამინისტროს საგამოძიებო სამსახურში მიმდინარე საქმესთან დაკავშირებით. ორგანიზაციის ყოფილმა ბუღალტერმა გამოიყენა მისი უფლებამოსილება ბოროტად, რის შემდეგაც გამოწერა ყალბი საგადასახადო დოკუმენტები. ამის შესახებ საქმის კურსში არ ყოფილა არც დირექტორი, არც რომელიმე დამფუძნებელი და არც რომელიმე ხელმძღვანელი. ყოველივე ეს დასტურდება/დადასტურდება გამოძიების შედეგად. მომჩივანი ითხოვს გამოძიების დასრულებამდე გაუქმდეს დარიცხული თანხები და მათი დარიცხვა მოხდეს მხოლოდ მას შემდეგ, თუ დადასტურდება ორგანიზაციის ან დირექტორის ბრალეულობა.

 

დავების განხილვის საბჭო

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:

საგადასახადო კოდექსის 136-ე მუხლის მე-3 ნაწილის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.

საგადასახადო კოდექსის 61-ე მუხლის მე-3 ნაწილის თანახმად, საგადასახადო ორგანო უფლებამოსილია პირს დაარიცხოს გადასახადი თავის ხელთ არსებული ინფორმაციის საფუძველზე, თუ პირი მას არ წარუდგენს გადასახადის დასარიცხად საჭირო ინფორმაციას.

საგადასახადო კოდექსის 158-ე მუხლის პირველი ნაწილის თანახმად, დღგ-ით დასაბეგრ პირად (შემდგომ − დასაბეგრი პირი) განიხილება ნებისმიერი პირი, რომელიც ნებისმიერ ადგილზე დამოუკიდებლად ახორციელებს ნებისმიერი სახის ეკონომიკურ საქმიანობას, მიუხედავად ამ საქმიანობის მიზნისა და შედეგისა.

საგადასახადო კოდექსის 159-ე მუხლის პირველი ნაწილის „ა“ და ,,ბ“ ქვეპუნქტების თანახმად, დღგით დასაბეგრი ოპერაციებია დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ საქონლის მიწოდება/მომსახურების გაწევა.

საგადასახადო კოდექსის 163-ე მუხლის პირველი და მე-2 ნაწილების თანახმად:

1. საქონლის მიწოდების/მომსახურების გაწევის დღგ-ით დაბეგვრა ხორციელდება საქონლის მიწოდების/მომსახურების გაწევის მომენტში, თუ ამ მუხლით სხვა რამ არ არის გათვალისწინებული.

2. თუ თანხა სრულად ან ნაწილობრივ ანაზღაურებულია საქონლის მიწოდებამდე/მომსახურების გაწევამდე, ანაზღაურებული თანხის შესაბამისი დღგ-ის გადახდა ხორციელდება ანაზღაურების თანხის გადახდის საანგარიშო პერიოდის მიხედვით, გარდა ამ მუხლის მე-5 და მე-9 ნაწილებით გათვალისწინებული შემთხვევებისა.

საგადასახადო კოდექსის 164-ე მუხლის პირველი ნაწილის თანახმად, თუ ამ მუხლით სხვა რამ არ არის გათვალისწინებული, დღგ-ით დასაბეგრი თანხა არის საქონლის მიწოდების/მომსახურების გაწევის სანაცვლოდ მიღებული/მისაღები ანაზღაურება დღგ-ის გარეშე, საქონლის/მომსახურების ფასთან პირდაპირ დაკავშირებული სუბსიდიის ჩათვლით. აღნიშნული დებულება გამოიყენება საქონლის/მომსახურების გაცვლის ოპერაციის (ბარტერული ოპერაციის) შემთხვევაშიც.

საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.

საგადასახადო კოდექსის 275-ე მუხლის თანახმად:

1. პირის მიერ საგადასახადო დეკლარაციაში/გაანგარიშებაში გადასახადის თანხის შემცირება, თუ იგი გამოწვეულია საგადასახადო კონტროლის განმახორციელებელი ორგანოს მიერ პირის საგადასახადო ვალდებულების წარმოშობის მომენტის (პერიოდის) შეცვლით, იწვევს პირის დაჯარიმებას შემცირებული გადასახადის თანხის 10 პროცენტის ოდენობით.

2. საგადასახადო დეკლარაციაში/გაანგარიშებაში გადასახადის თანხის შემცირება, გარდა ამ მუხლის პირველი, 21 და 22 ნაწილებით გათვალისწინებული შემთხვევებისა, იწვევს დაჯარიმებას შემცირებული გადასახადის თანხის 50 პროცენტის ოდენობით.

2 1 . საგადასახადო დეკლარაციაში/გაანგარიშებაში გადასახადის შემცირება, თუ შემცირებული გადასახადის თანხა ამ დეკლარაციაში/გაანგარიშებაში აღნიშნული გადასახადის თანხის 5 პროცენტს არ აღემატება, იწვევს დაჯარიმებას შემცირებული გადასახადის თანხის 10 პროცენტის ოდენობით.

2 2 . საგადასახადო დეკლარაციაში/გაანგარიშებაში გადასახადის შემცირება, თუ შემცირებული გადასახადის თანხა ამ დეკლარაციაში/გაანგარიშებაში აღნიშნული გადასახადის თანხის 5 პროცენტზე მეტია და 20 პროცენტს არ აღემატება, იწვევს დაჯარიმებას შემცირებული გადასახადის თანხის 25 პროცენტის ოდენობით.

5. საგადასახადო შემოწმების შედეგად ამ მუხლის შესაბამისად შეფარდებული ჯარიმების ჯამური ოდენობა არ უნდა აღემატებოდეს ამ საგადასახადო შემოწმების შედეგად გადასახდელად დარიცხული გადასახადების თანხების ოდენობას.

საგადასახადო კოდექსის 282-ე მუხლის მე-3 ნაწილის თანახმად, პირის მიერ ფიქტიური გარიგების/უსაქონლო ოპერაციის ამსახველი ან ყალბი საგადასახადო ანგარიშ-ფაქტურის გამოწერა – იწვევს საგადასახადო ანგარიშ-ფაქტურის გამომწერი/გამცემი პირის დაჯარიმებას საგადასახადო ანგარიშფაქტურაში მითითებული დღგ-ის თანხის 200 პროცენტის ოდენობით.

საქმის მასალებიდან ირკვევა და მომჩივანიც არ უარყოფს გამოძიებით დადგენილ ფაქტს იმის თაობაზე, რომ შპს „---“-ის სახელით საქონლის/მომსახურების მიწოდებაზე შპს „---“- სათვის და შპს „---“-სათვის გამოიწერა ყალბი საგადასახადო ანგარიშ-ფაქტურები, აღნიშნულის გათვალისწინებით განისაზღვრა მომჩივნის საგადასახადო ვალდებულებები და სანქციები. მომჩივანი ითხოვს გამოძიების დასრულებამდე გაუქმდეს დარიცხული თანხები და მათი დარიცხვა მოხდეს მხოლოდ მას შემდეგ, თუ დადასტურდება ორგანიზაციის ან დირექტორის ბრალეულობა. საბჭო აღნიშნავს, რომ საგადასახადო კანონმდებლობით არ არის დადგენილი ნორმა, რომლითაც შესაძლებელია მომჩივნის მოთხოვნის დაკმაყოფილება, შესაბამისად, გადასახადის გადამხდელის მოთხოვნა უსაფუძვლოა.

ყოველივე ზემოაღნიშნულიდან გამომდინარე, საბჭოს მიაჩნია, რომ განსახილველ შემთხვევაში საგადასახადო ორგანოს მიერ მომჩივნის საგადასახადო ვალდებულებები განსაზღვრულია მართებულად და არ არსებობს საჩივრის დაკმაყოფილების საფუძველი.

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:

 

1. საჩივარი არ დაკმაყოფილდეს;

2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხები:

დამატებული ღირებულების გადასახადის დარიცხვის მართლზომიერება.

 

ფაქტობრივი გარემოებები

საგამოძიებო სამსახურის ინფორმაციით მიმდინარეობს გამოძიება სისხლის სამართლის საქმეზე. საქმეზე ჩატარებული გამოძიების შედეგად დადგინდა, რომ საქმეში ფიგურანტი კომპანიის სახელით, მომჩივნისთვის ჯამში 233 732 ლარის ღირებულების მომსახურებაზე გამოწერილია 1 ერთეული ყალბი ავანსის და 5 ერთეული ყალბი საგადასახადო ანგარიშ-ფაქტურა, ასევე, ჯამში 365 244 ლარის საქონლის/მომსახურების მიწოდებაზე გამოწერილია 3 ერთეული ყალბი ავანსის და 2 ერთეული ყალბი საგადასახადო ანგარიშ-ფაქტურა.

შემოწმების მიერ, საგამოძიებო მასალებზე და შემოსავლების სამსახურის გადასახადების ადმინისტრირების საინფორმაციო სისტემაში არსებულ ინფორმაციაზე დაყრდნობით განისაზღვრა შემოწმების ბრძნებით მოცეულ პერიოდებზე კომპანიის დღგ-ით დასაბეგრი ბრუნვა. გადასახადის გადამხდელს დაერიცხა დღგ და განესაზღვრა ჯარიმა.

 

გადაწყვეტილება

საბჭოს მიაჩნია, რომ განსახილველ შემთხვევაში საგადასახადო ორგანოს მიერ მომჩივნის საგადასახადო ვალდებულებები განსაზღვრულია მართებულად და არ არსებობს საჩივრის დაკმაყოფილების საფუძველი.

 

დასაბუთება

საქართველოს ფინანსთა სამინისტორსთან არსებული დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 159 (1); 163 (1,2); 164 (1); 282 (3).