გადაწყვეტილება №26357/2/2025

№26357/2/2025

04 თებერვალი 2026

გ ა დ ა წ ყ ვ ე ტ ი ლ ე ბ ა

 

მომჩივანი: შპს „-------“ (ს/ნ -------)

მოპასუხე: აუდიტის დეპარტამენტი

 

საქართველოს ფინანსთა სამინისტროსთან არსებულმა დავების განხილვის საბჭომ, 29.01.2026 წელს განიხილა და მიიღო გადაწყვეტილება შპს „-------“-ს 23.12.2025 წელს რეგისტრირებულ საჩივარზე (რეგისტრაციის №26357/2/2025).

 

დავის საგანი:

შემოსავლების სამსახურის 24.06.2025 წლის №13413 ბრძანების აღსრულების შედეგები.

 

გასაჩივრებული გადაწყვეტილება:

1. აუდიტის დეპარტამენტის 3.09.2025 წლის №005-164 საგადასახადო მოთხოვნა;

2. შემოსავლების სამსახურის 3.12.2025 წლის №26525 ბრძანება.

 

დარიცხული თანხა: 179 041.75 ლარი.

მათ შორის:

დღგ - 172 903.67

საურავი - 6 138.08

 

ფაქტების აღწერა/დარიცხვის საფუძვლები

კომპანიის საქმიანობაა სარესტორნო მომსახურება.

დღგ-ის გადამხდელად სავალდებულო რეგისტრაციის სისწორის დადგენის მიზნით, აუდიტის დეპარტამენტის 5.03.2025 წლის №3796 ბრძანების საფუძველზე ჩატარდა კომპანიის საქმიანობის, 7.09.2022 წლიდან 1.01.2025 წლამდე საანგარიშო პერიოდების, გასვლითი საგადასახადო შემოწმება. საგადასახადო შემოწმების შედეგები აისახა 21.03.2025 წლის საგადასახადო შემოწმების აქტში, საიდანაც ირკვევა, რომ სადავო დარიცხვა გამოწვეულია შემდეგი გარემოებებით:

- შემოწმების მიმდინარეობისას გადასახადის გადამხდელმა წარადგინა საბანკო ანგარიშები შესაბამისი ამონაწერებით, ხოლო ბუღალტრული პროგრამა არ არის წარდგენილი. შემოსავლების სამსახურის გადასახადების ადმინისტრირების საინფორმაციო სისტემის და გადასახადის გადამხდელის მიერ მიწოდებული ინფორმაციის (საბანკო ამონაწერების) საფუძველზე დადგინდა, რომ შესამოწმებელ პერიოდში 30.07.2023 წელს, საწარმოს მიერ მიღებულმა შემოსავალმა 12 კალენდარული თვის განმავლობაში გადააჭარბა 100 000 ლარს, შედეგად, აღნიშნული თარიღიდან საწარმოს განესაზღვრა დღგის გადამხდელად რეგისტრაციის ვალდებულება. ამდენად, დღგ-ის გადამხდელად რეგისტრაციის თარიღიდან განხორციელებული ოპერაციები, დაექვემდებარა დღგ-ით დასაბეგრ ბრუნვაში ასახვას. გადასახადის გადამხდელს დაერიცხა დღგ და დაეკისრა ჯარიმა საგადასახადო კოდექსის 282-ე მუხლის პირველი ნაწილით.

- შესამოწმებელ პერიოდში გადასახადის გადამხდელს მიღებული აქვს დადასტურებული საგადასახადო ანგარიშ-ფაქტურები დღგ-ის თანხით 85 982 ლარი. შესაბამისად, დადასტურებული სტატუსის მქონე მიღებული ელექტრონული საგადასახადო ანგარიშ-ფაქტურების მიხედვით, რომლის დაკავშირებაც მოხდა ეკონომიკურ საქმიანობასთან, გათვალისწინებულ იქნა დღგ-ის ჩასათვლელი თანხის გაანგარიშებაში.

შემოწმების აქტის საფუძველზე გამოიცა 28.03.2025 წლის №5870 ბრძანება და ამავე თარიღის №005- 24 საგადასახადო მოთხოვნა, რაც გასაჩივრდა შემოსავლების სამსახურში, რომლის 24.06.2025 წლის №13413 ბრძანებით საჩივრები დაკმაყოფილდა ნაწილობრივ:

- პირველ სადავო საკითხთან დაკავშირებით, აუდიტის დეპარტამენტს დაევალა გადასახადის გადამხდელის მონაწილეობით და მისი არგუმენტაციის გათვალისწინებით, შეისწავლოს დღგ-ით დასაბეგრი ბრუნვის განსაზღვრის სისწორე და შესწავლის შედეგებიდან გამომდინარე, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება);

- მე-2 სადავო საკითხთან დაკავშირებით, დღგ-ის ჩასათვლელი თანხის დაზუსტების მიზნით:

ა) გადასახადის გადამხდელს მიეცა წინადადება ბრძანების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს დღგ-ის ჩათვლის უფლების დამადასტურებელი მტკიცებულებები;

ბ) აუდიტის დეპარტამენტს დაევალა, სადავო საკითხი შეისწავლოს მ.შ. „ცალკეულ შემთხვევებში გადასახადის გადამხდელისათვის საგადასახადო ანგარიშ-ფაქტურის, საგადასახადო დოკუმენტის გამოწერის/დადასტურების და სასაქონლო ზედნადების გამოწერის გადამხდელის მიერ გამოწერილი ელექტრონული საგადასახადო ანგარიშ-ფაქტურის გამოყენების სპეციალური წესის განსაზღვრის შესახებ“ ინსტრუქციის დამტკიცების თაობაზე“ შემოსავლების სამსახურის უფროსის 2022 წლის 16 თებერვლის №3751 ბრძანებაში ცვლილების შეტანის თაობაზე 2023 წლის 14 დეკემბრის №31614 ბრძანების შესაბამისად და დღგ-ის ჩათვლის მიღებასთან დაკავშირებით კანონმდებლობით დადგენილი შეზღუდვების გათვალისწინებით, უზრუნველყოს საგადასახადო ვალდებულებების კორექტირება (შემცირება);

- კომპანია საგადასახადო კოდექსის 269-მუხლის მე-7 ნაწილის საფუძველზე, გათავისუფლდა აუდიტის დეპარტამენტის 28.03.2025 წლის №005-24 საგადასახადო მოთხოვნით განსაზღვრული ჯარიმისგან და აღნიშნული საგადასახადო მოთხოვნის საფუძველზე განსაზღვრულ საგადასახადო ვალდებულებებზე დარიცხული საურავისგან (ამ გადაწყვეტილების მიღების თარიღისთვის);

- დანარჩენ ნაწილში საჩივრები არ დაკმაყოფილდა.

შემოსავლების სამსახურის 24.06.2025 წლის №13413 ბრძანება საქართველოს ფინანსთა სამინისტროსთან არსებულ დავების განხილვის საბჭოში არ გასაჩივრებულა.

შემოსავლების სამსახურის 24.06.2025 წლის №13413 ბრძანების აღსრულების შედეგად აუდიტის დეპარტამენტის 27.08.2025 წლის დასკვნის მიხედვით შემოწმების შედეგად დარიცხული თანხა შემცირდა სულ 150 403.42 ლარით, მათ შორის, გადასახადი 61 427.92 ლარით და ჯარიმა 88 975.5 ლარით.

დასკვნის საფუძველზე გამოიცა აუდიტის დეპარტამენტის 3.09.2025 წლის №19438 ბრძანება და ამავე თარიღის №005-164 საგადასახადო მოთხოვნა, რაც გასაჩივრდა შემოსავლების სამსახურში.

შემოსავლების სამსახურის 3.12.2025 წლის №26525 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი

შემოსავლების სამსახური მიუთითებს საგადასახადო კოდექსის 304-ე მუხლის 21 ნაწილზე და აღნიშნავს, რომ შემოწმების შედეგად დღგ-ით დასაბეგრი ბრუნვის განსაზღვრასთან მიმართებით, გადასახადის გადამხდელის მიერ დამატებით წარდგენილი ინფორმაცია გათვალისწინებული იყო საგადასახადო შემოწმების აქტში, შესაბამისად აღნიშნული ნაწილში დარიცხული თანხები დარჩა უცვლელი. ამასთან, დამატებით ჩათვლას დაექვემდებარა დადასტურებული სტატუსის მქონე საგადასახადო ანგარიშ-ფაქტურები დღგ-ის თანხით 61 428 ლარის ოდენობით. გადასახადის გადამხდელი ასევე გათავისუფლდა დაკისრებული სანქციისგან.

შემოსავლების სამსახური აღნიშნავს, რომ მომჩივანს საგადასახადო დავის ეტაპზე არ წარუდგენია ისეთი დოკუმენტაცია/მტკიცებულება, რომელიც შეცვლიდა საგადასახადო შემოწმების შედეგების გადაანგარიშებაზე გამოცემულ დასკვნაში ასახულ ფაქტობრივ გარემოებებს.

საქმეზე არსებული მტკიცებულებების, აუდიტის დეპარტამენტის დასკვნის და შესაბამისად, განხორციელებული გადაანგარიშების შედეგებზე დაყრდნობით, შემოსავლების სამსახური მიიჩნევს, რომ შემოსავლების სამსახურის გადაწყვეტილების აღსრულება განხორციელებულია საქმისთვის არსებითი მნიშვნელობის მქონე ყველა გარემოებების გამოკვლევის/შესწავლის საფუძველზე, გასაჩივრებული ადმინისტრაციული აქტის შინაარსი შეესაბამება დავის განხილვისას მიღებულ გადაწყვეტილებას და არ არსებობს საჩივრის დაკმაყოფილების საფუძველი.

 

მომჩივნის არგუმენტაცია

კომპანიის საქმიანობიდან შემოსავლის ძირითადი ნაწილის მიიღება ხდება უნაღდო ანგარიშსწორებით (ტერმინალით). შემოსავლების სამსახურიდან გამოითხოვა ინფორმაცია/დოკუმენტაცია (გაანგარიშების ცხრილები და სხვა სახის ინფორმაცია), დარიცხული თანხების სისწორის დასადგენად, რომელიც შედარდა ფაქტობრივ მონაცემებს, კერძოდ ტერმინალებისა და სალარო აპარატის საშუალებით მიღებულ შემოსავლებს (შემცირებულია მხოლოდ სალარო ტერმინალზე მითითებული დაბრუნებული თანხა და არ არის გათვალისწინებული ასევე დაბრუნებამდე სალარო ტერმინალზე გატარებული თანხა, შესაბამისად ორივე თანხა უნდა იქნას გათვალისწინებული დღგ-ის ბრუნვის გაანგარიშებისას, როგორც შესამცირებელი ბრუნვა) შორის გამოვლინდა უზუსტობები, კერძოდ ცალკეულ თვეებში აუდიტის დეპარტამენტის მიერ დადგენილი დღგ-ით დასაბეგრი ბრუნვები აღემატება ფაქტობრივ მონაცემებს.

ითხოვს, გადასახადის გადამხდელის წარმომადგენლებთან ერთად მოხდეს გაანგარიშების ცხრილების დეტალური შესწავლა და შესაბამისი საფუძვლების გამოვლენის შემთხვევაში დარიცხული თანხების კორექტირება/შემცირება.

კომპანია ახორციელებს სრულად დღგ-ით დასაბეგრ ოპერაციებს, საგადასახადო შემოწმების პროცესში აუდიტის დეპარტამენტის მიერ მოხდა კომპანიის დღგ-ის გადამხდელად სავალდებულო რეგისტრაციის თარიღის განსაზღვრა 30.07.2023 წელს. კომპანია ნედლეულისა და სხვა სმფ-ების შეძენას ახორციელებს ძირითადად დღგ-ის გადამხდელი კომპანიებისგან, შესაბამისად აღნიშნული ოპერაციის ფარგლებში დღგ-ის გადამხდელად რეგისტრაციის დღიდან (მათ შორის რეგისტრაციის თარიღისთვის არსებულ სმფ-ების ნაშთებზე) წარმოეშობა კუთვნილი დღგ-ის ჩათვლის უფლება.

განმარტავს, რომ შემმოწმებელი აუდიტორის მიერ, საგადასახადო შემოწმების აქტის გადაანგარიშებისას, მის მიერ კი განხორციელდა მიღებული საგადასახადო - ანგარიშ ფაქტურების დღგის ჩასათვლელ თანხაში ასახვა, მაგრამ სამწუხაროდ სრულად არა, რადგან საგადასახადო შემოწმების აქტის გადაანგარიშების მიმდინარეობისას ჯერ კიდევ სრულად არ იყო მიღებული საგადასახდო ანგარიშფაქტურები, სამწუხაროდ დროულად არ ხდება კონტრაგენტი პირების მიერ გამოწერა, რაც გამოიწვევდა დარიცხული დღგ-ის შემცირებას/კორექტირებას.

ზემოაღნიშნული ფაქტობრივი გარემოებიდან გამომდინარე, ითხოვს:

- მომწოდებლებისგან მიღებული/მისაღები საგადასახადო ანგარიშ-ფაქტურების საფუძველზე მიეცეს უფლება მოახდინოს კუთვნილი დღგ-ის ჩათვლა რეგისტრაციის დღიდან (მათ შორის რეგისტრაციის თარიღისთვის არსებულ სმფ-ების ნაშთებზე);

- მიღებული შედეგების გათვალისწინებით, განხორციელდეს დამატებული ღირებულების გადასახადისა თანხებისა და შესაბამისი სანქციების კორექტირება/შემცირება, ხოლო შემდგომ დარჩენილ გადასახადზე დაკისრებული ჯარიმისა და საურავისგან გათავისუფლებას საგადასახადო კოდექსის 269-ე მუხლის მე-7 ნაწილით.

 

დავების განხილვის საბჭო

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი უნდა დაკმაყოფილდეს ნაწილობრივ შემდეგ გარემოებათა გამო:

შემოსავლების სამსახურის 24.06.2025 წლის №13413 ბრძანებით:

- პირველ სადავო საკითხთან დაკავშირებით, აუდიტის დეპარტამენტს დაევალა გადასახადის გადამხდელის მონაწილეობით და მისი არგუმენტაციის გათვალისწინებით, შეისწავლოს დღგ-ით დასაბეგრი ბრუნვის განსაზღვრის სისწორე და შესწავლის შედეგებიდან გამომდინარე, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება);

- მე-2 სადავო საკითხთან დაკავშირებით, დღგ-ის ჩასათვლელი თანხის დაზუსტების მიზნით:

ა) გადასახადის გადამხდელს მიეცა წინადადება ბრძანების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს დღგ-ის ჩათვლის უფლების დამადასტურებელი მტკიცებულებები;

ბ) აუდიტის დეპარტამენტს დაევალა, სადავო საკითხი შეისწავლოს მ.შ. „ცალკეულ შემთხვევებში გადასახადის გადამხდელისათვის საგადასახადო ანგარიშ-ფაქტურის, საგადასახადო დოკუმენტის გამოწერის/დადასტურების და სასაქონლო ზედნადების გამოწერის გადამხდელის მიერ გამოწერილი ელექტრონული საგადასახადო ანგარიშ-ფაქტურის გამოყენების სპეციალური წესის განსაზღვრის შესახებ“ ინსტრუქციის დამტკიცების თაობაზე“ შემოსავლების სამსახურის უფროსის 2022 წლის 16 თებერვლის №3751 ბრძანებაში ცვლილების შეტანის თაობაზე 2023 წლის 14 დეკემბრის №31614 ბრძანების შესაბამისად და დღგ-ის ჩათვლის მიღებასთან დაკავშირებით კანონმდებლობით დადგენილი შეზღუდვების გათვალისწინებით, უზრუნველყოს საგადასახადო ვალდებულებების კორექტირება (შემცირება);

- კომპანია საგადასახადო კოდექსის 269-მუხლის მე-7 ნაწილის საფუძველზე, გათავისუფლდა აუდიტის დეპარტამენტის 28.03.2025 წლის №005-24 საგადასახადო მოთხოვნით განსაზღვრული ჯარიმისგან და აღნიშნული საგადასახადო მოთხოვნის საფუძველზე განსაზღვრულ საგადასახადო ვალდებულებებზე დარიცხული საურავისგან (ამ გადაწყვეტილების მიღების თარიღისთვის).

შემოსავლების სამსახურის 24.06.2025 წლის №13413 ბრძანების აღსრულების შედეგებზე შედგენილი აუდიტის დეპარტამენტის 27.08.2025 წლის დასკვნიდან ირკვევა, რომ:

- დღგ-ით დასაბეგრი ბრუნვის განსაზღვრასთან მიმართებით, გადასახადის გადამხდელის მიერ დამატებით წარდგენილი ინფორმაცია გათვალისწინებული იყო საგადასახადო შემოწმების აქტის გამოცემისას, შესაბამისად აღნიშნული ნაწილში არ განხორციელდა თანხის კორექტირება/შემცირება.

- გადაანგარიშების ეტაპზე, შესწავლილ იქნა შემოსავლების სამსახურის გადასახადების ადმინისტრირების საინფორმაციო სისტემაში არსებული დღგ-ის ჩათვლის უფლების დამადასტურებელი დოკუმენტები. შედეგად, დამატებით ჩათვლას დაექვემდებარა დადასტურებული სტატუსის მქონე საგადასახადო ანგარიშ-ფაქტურები დღგ-ის თანხით 61 428 ლარის ოდენობით.

- სანქციის ნაწილში შემოწმების აქტით დაკისრებული თანხა დაკორექტირდა, კერძოდ, შემცირდა საგადასახადო კოდექსის 282-ე მუხლით შეფარდებული ჯარიმა 88 976 ლარი და საგადასახადო ვალდებულებებზე დაკისრებული შესაბამისი საურავი.

საბჭოს სხდომაზე, საჩივრის ზეპირი განხილვისას, მომჩივნის წარმომადგენლის განმარტებით:

- შემოსავლების სამსახურიდან გამოითხოვა ინფორმაცია/დოკუმენტაცია (გაანგარიშების ცხრილები და სხვა სახის ინფორმაცია), რომელიც შეადარა ფაქტობრივ მონაცემებს და გამოვლინდა უზუსტობები, კერძოდ, შემცირებულია მხოლოდ დაბრუნებული თანხა და არ არის გათვალისწინებული დაბრუნებამდე გატარებული თანხა, შესაბამისად ორივე თანხა უნდა იქნას გათვალისწინებული დღგ-ის ბრუნვის გაანგარიშებისას, როგორც შესამცირებელი ბრუნვა;

- საგადასახადო შემოწმების მიმდინარეობისას ჯერ კიდევ სრულად არ იყო მიღებული საგადასახდო ანგარიშ-ფაქტურები, სამწუხაროდ დროულად არ ხდება კონტრაგენტი პირების მიერ გამოწერა. აღნიშნულიდან გამომდინარე, ითხოვს მომწოდებლებისგან მიღებული/მისაღები საგადასახადო ანგარიშფაქტურების საფუძველზე მიეცეს უფლება მოახდინოს კუთვნილი დღგ-ის ჩათვლა რეგისტრაციის დღიდან (მათ შორის რეგისტრაციის თარიღისთვის არსებულ სმფ-ების ნაშთებზე);

- მიღებული შედეგების გათვალისწინებით, განხორციელდეს დამატებული ღირებულების გადასახადისა თანხებისა და შესაბამისი სანქციების კორექტირება/შემცირება, ხოლო შემდგომ დარჩენილ გადასახადზე დაკისრებული ჯარიმისა და საურავისგან გათავისუფლებას საგადასახადო კოდექსის 269-ე მუხლის მე-7 ნაწილით ან/და საურავის დაკისრების შეჩერება.

საბჭოს სხდომაზე, მოპასუხე ორგანოს წარმომადგენელმა მომჩივნის არგუმენტზე განმარტა, რომ:

- აღნიშნული საკითხი მომჩივნის წარმომადგენელთან ერთად შესწავლილია დავის პირველ ეტაპზე და შეთანხმდნენ, რომ დაბრუნებები გათვალისწინებულია და გაორება არ მომხდარა, შესაბამისად გაუგებარია ამ ნაწილში დავის არსი;

- რაც შეეხება დღგ-ის ჩასათვლელ თანხას, შემოსავლების სამსახურის ბრძანების შესაბამისად მომჩივანს მიეცა უფლება დაედასტურებინა ანგარიშ-ფაქტურები, რაც გადასახადის გადამხდელმა განახორციელა, კონკრეტული პერიოდის რამდენიმე ანგარიშ-ფაქტურის გარდა და შედეგად განხორციელდა გადაანგარიშება. თუმცა, ახლა მომჩივანი ითხოვს სწორედ იმ დარჩენილი ანგარიშფაქტურების (რომელიც მოცემულ მომენტშიც დასადასტურებელია) დადასტურების უფლებას და ჩათვლის მიღებას.

აღნიშნული გარემოებებიდან გამომდინარე, საბჭოს მიაჩნია, რომ დღგ-ის ჩასათვლელი თანხის დაზუსტების მიზნით გადასახადის გადამხდელს უნდა მიეცეს წინადადება ამ გადაწყვეტილების ჩაბარებიდან 10 კალენდარული დღის ვადაში აუდიტის დეპარტამენტს წარუდგინოს დღგ-ის ჩათვლის უფლების დამადასტურებელი მტკიცებულებები (შემოსავლების სამსახურის 24.06.2025 წლის №13413 ბრძანების აღსრულების პერიოდისთვის უკვე გამოწერილი ანგარიშ-ფაქტურები), ხოლო აუდიტის დეპარტამენტს დაევალოს სადავო საკითხი შეისწავლოს მ.შ. „ცალკეულ შემთხვევებში გადასახადის გადამხდელისათვის საგადასახადო ანგარიშ-ფაქტურის, საგადასახადო დოკუმენტის გამოწერის/დადასტურების და სასაქონლო ზედნადების გამოწერის გადამხდელის მიერ გამოწერილი ელექტრონული საგადასახადო ანგარიშ-ფაქტურის გამოყენების სპეციალური წესის განსაზღვრის შესახებ“ ინსტრუქციის დამტკიცების თაობაზე“ შემოსავლების სამსახურის უფროსის 2022 წლის 16 თებერვლის №3751 ბრძანებაში ცვლილების შეტანის თაობაზე 2023 წლის 14 დეკემბრის №31614 ბრძანების შესაბამისად და დღგ-ის ჩათვლის მიღებასთან დაკავშირებით კანონმდებლობით დადგენილი შეზღუდვების გათვალისწინებით და სათანადო საფუძვლების არსებობის შემთხვევაში, უზრუნველყოს მომჩივნის საგადასახადო ვალდებულებების კორექტირება (შემცირება).

რაც შეეხება დანარჩენ ნაწილს, საბჭოს მიაჩნია, რომ შემოსავლების სამსახურის 24.06.2025 წლის №13413 ბრძანება აუდიტის დეპარტამენტის მიერ აღსრულებულია მიღებული გადაწყვეტილების შესაბამისად და არ არსებობს ამ ნაწილში მომჩივნის არგუმენტების გათვალისწინების და საჩივრის დაკმაყოფილების საფუძველი.

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „ბ“ ქვეპუნქტით და გადაწყვიტა:

 

1. საჩივარი დაკმაყოფილდეს ნაწილობრივ;

2. ნაწილობრივ გაუქმდეს შემოსავლების სამსახურის 3.12.2025 წლის №26525 ბრძანება;

3. დღგ-ის ჩასათვლელი თანხის დაზუსტების მიზნით:

ა) გადასახადის გადამხდელს მიეცეს წინადადება ამ გადაწყვეტილების ჩაბარებიდან 10 კალენდარული დღის ვადაში აუდიტის დეპარტამენტს წარუდგინოს დღგ-ის ჩათვლის უფლების დამადასტურებელი მტკიცებულებები;

ბ) აუდიტის დეპარტამენტს დაევალოს, შეისწავლოს სადავო საკითხი ამ გადაწყვეტილების შესაბამისად და სათანადო საფუძვლების არსებობის შემთხვევაში, უზრუნველყოს მომჩივნის საგადასახადო ვალდებულებების კორექტირება (შემცირება);

4. დანარჩენ ნაწილში საჩივარი არ დაკმაყოფილდეს;

5. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხები:

შემოსავლების სამსახურის 24.06.2025 წლის №13413 ბრძანების აღსრულების შედეგები.

 

ფაქტობრივი გარემოებები

შემოწმების შედეგად დღგ-ით დასაბეგრი ბრუნვის განსაზღვრასთან მიმართებით, გადასახადის გადამხდელის მიერ დამატებით წარდგენილი ინფორმაცია გათვალისწინებული იყო საგადასახადო შემოწმების აქტში, შესაბამისად აღნიშნული ნაწილში დარიცხული თანხები დარჩა უცვლელი. ამასთან, დამატებით ჩათვლას დაექვემდებარა დადასტურებული სტატუსის მქონე საგადასახადო ანგარიშ-ფაქტურები. გადასახადის გადამხდელი ასევე გათავისუფლდა დაკისრებული სანქციისგან.

შემოსავლების სამსახური აღნიშნავს, რომ მომჩივანს საგადასახადო დავის ეტაპზე არ წარუდგენია ისეთი დოკუმენტაცია/მტკიცებულება, რომელიც შეცვლიდა საგადასახადო შემოწმების შედეგების გადაანგარიშებაზე გამოცემულ დასკვნაში ასახულ ფაქტობრივ გარემოებებს.

საქმეზე არსებული მტკიცებულებების, აუდიტის დეპარტამენტის დასკვნის და შესაბამისად, განხორციელებული გადაანგარიშების შედეგებზე დაყრდნობით, შემოსავლების სამსახური მიიჩნევს, რომ შემოსავლების სამსახურის გადაწყვეტილების აღსრულება განხორციელებულია საქმისთვის არსებითი მნიშვნელობის მქონე ყველა გარემოებების გამოკვლევის/შესწავლის საფუძველზე, გასაჩივრებული ადმინისტრაციული აქტის შინაარსი შეესაბამება დავის განხილვისას მიღებულ გადაწყვეტილებას და არ არსებობს საჩივრის დაკმაყოფილების საფუძველი.

 

გადაწყვეტილება

დღგ-ის ჩასათვლელი თანხის დაზუსტების მიზნით გადასახადის გადამხდელს მიეცეს წინადადება ამ გადაწყვეტილების ჩაბარებიდან 10 კალენდარული დღის ვადაში აუდიტის დეპარტამენტს წარუდგინოს დღგ-ის ჩათვლის უფლების დამადასტურებელი მტკიცებულებები. აუდიტის დეპარტამენტს დაევალოს, შეისწავლოს სადავო საკითხი ამ გადაწყვეტილების შესაბამისად და სათანადო საფუძვლების არსებობის შემთხვევაში, უზრუნველყოს მომჩივნის საგადასახადო ვალდებულებების კორექტირება (შემცირება); დანარჩენ ნაწილში საჩივარი არ დაკმაყოფილდეს.

 

დასაბუთება

საქართველოს ფინანსთა სამინისტორსთან არსებული დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 159; 165; 175; 282; 269(7)