ბრძანება N 6587

N 6587

25 მარტი 2026

ბ რ ძ ა ნ ე ბ ა

 

შპს „---ის“ (ს/ნ ---)

(ფაქტ. მის.: ---) 2026 წლის 25 იანვრის საჩივრის

ნაწილობრივ დაკმაყოფილების თაობაზე

 

შემოსავლების სამსახურმა დავების განხილვის საბჭოს 2026 წლის 19 მარტის სხდომაზე (ოქმი №24) განიხილა შპს „---ს“ (ს/ნ ---) 2026 წლის 25 იანვრის №100328/1/2026 საჩივარი, შემოსავლების სამსახურის აუდიტის დეპარტამენტის 2025 წლის 26 დეკემბრის №021-154 საგადასახადო მოთხოვნასთან დაკავშირებით.

 

სადავო საკითხი:

გადასახადის გადამხდელი არ ეთანხმება შემოწმების მიერ სალაროს ნაღდი ფულის ნაშთის გაანგარიშებას და საჩივარში მითითებული არგუმენტაციის/მტკიცებულებების გათვალისწინებით ითხოვს საკითხის დამატებით შესწავლას.

 

ფაქტობრივი გარემოებები:

საქმის მასალებით ირკვევა, რომ შემოსავლების სამსახურის აუდიტის დეპარტამენტის 2025 წლის 19 ივნისის №13121 და 24 დეკემბრის №28212 ბრძანებების საფუძველზე ჩატარდა შპს „---ის“ (ს/ნ ---) საქმიანობის კამერალური საგადასახადო შემოწმება. შესამოწმებელ პერიოდად განისაზღვრა 2022 წლის პირველი იანვრიდან 2025 წლის პირველ ივნისამდე საანგარიშო პერიოდები, ხოლო სალაროში ნაღდი ფულის რაოდენობის განსაზღვრის მიზნებისთვის 2025 წლის 19 ივნისის ჩათვლით პერიოდი. შემოწმების შედეგებზე 2025 წლის 25 დეკემბერს შედგენილ იქნა საგადასახადო შემოწმების აქტი, გამოიცა 2025 წლის 26 დეკემბრის №28594 ბრძანება და ამავე თარიღის №021-154 საგადასახადო მოთხოვნა, რომლის მიხედვით გადასახადის გადამხდელს დამატებით გადასახდელად განესაზღვრა სულ 243 359 ლარი, მათ შორის, გადასახადი 148 811 ლარი, ჯარიმა 74 653 ლარი, საურავი 19 895 ლარი.

 

საგადასახადო შემოწმების აქტის მიხედვით საგადასახადო ვალდებულებები განსაზღვრულია შემდეგი გარემოებებით:

გადასახადის გადამხდელის საქმიანობის სფეროს წარმოადგენს წყლის ფილტრების შეძენა (ძირითადად იმპორტით) და ადგილობრივ ბაზარზე რეალიზაცია. საწარმო ბუღალტრულ აღრიცხვას არ ახორციელებს, ხოლო, შემოწმების მიმდინარეობისას წარმოდგენილია საბუღალტრო პროგრამა „ორისი 7“- ის ასლი, რომელიც დაუსრულებელია, რადგან პროგრამაში არ არის ასახული ყველა სამეურნეო ოპერაცია როგორც შემოსავლებთან, ასევე, ხარჯებთან მიმართებით.

ამასთან, შეუძლებელია პროგრამით ხელმძღვანელობა საწარმოს მოგება/ზარალის, საქონლისა და ფულის მოძრაობის შესწავლის მიზნით, ასევე, პროგრამაში ასახული ინფორმაცია შეუსაბამობაშია გადამხდელის მიერ წარმოდგენილ ფინანსურ ანგარიშგებებში ასახულ ინფორმაციასთან. საგადასახადო მონიტორინგის დეპარტამენტის მიერ 2025 წლის 19 ივნისს ჩატარდა სალაროში ნაღდი ფულის ინვენტარზაცია, რომლის შედეგად ნაღდი ფულის ნაშთმა შეადგინა 340 ლარი. შემოწმებამ შემოსავლების სამსახურის გადასახადების ადმინისტრირების საინფორმაციო სისტემაში არსებულ ინფორმაცია/დოკუმენტაციაზე დაყრდნობით გაიანგარიშა კომპანიის ფულადი სახსრების მოძრაობა, გაითვალისწინა გადამხდელის მიერ წარმოდგენილი ინფორმაცია დებიტორულ/კრედიტორული დავალიანებების შესახებ, ასევე, ბიუჯეტში გადახდილი თანხები და საანგარიშო პერიოდის ბოლოს დარჩენილი ფულის ნაშთი ჩაითვალა დირექტორის მიერ მიღებულ სარგებლად. შედეგად, გადასახადის გადამხდელს, საქართველოს საგადასახადო კოდექსის 101-ე მუხლის საფუძველზე, დაერიცხა საშემოსავლო გადასახადი და საქართველოს საგადასახადო კოდექსის 275-ე მუხლით განსაზღვრული ჯარიმა.

 

შემოსავლების სამსახურმა განიხილა წარმოდგენილი საჩივარი და მიიჩნია, რომ გადასახადის გადამხდელის მოთხოვნა უნდა დაკმაყოფილდეს ნაწილობრივ შემდეგ გარემოებათა გამო:

საქართველოს საგადასახადო კოდექსის 302-ე მუხლის მე-2 ნაწილის მიხედვით, დავის განმხილველი ორგანო საჩივარს განიხილავს მხოლოდ მომჩივნის მოთხოვნის ფარგლებში. ამავე მუხლის მე-6 ნაწილის მიხედვით, დავის განმხილველ ორგანოებს უფლება აქვთ, საჩივარი განიხილონ დისტანციურად, ტექნიკურ საშუალებათა გამოყენებით. მათ ასევე უფლება აქვთ, საჩივარი განიხილონ მომჩივნის დაუსწრებლად, თუ საქმეში არსებული მასალებიდან სრულად დგინდება დავის საგანთან დაკავშირებული ფაქტობრივი გარემოებები.

 

სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.

საქართველოს საგადასახადო კოდექსის 61-ე მუხლის მე-3 ნაწილის თანახმად, საგადასახადო ორგანო უფლებამოსილია პირს დაარიცხოს გადასახადი თავის ხელთ არსებული ინფორმაციის საფუძველზე, თუ პირი მას არ წარუდგენს გადასახადის დასარიცხად საჭირო ინფორმაციას.

საქართველოს საგადასახადო კოდექსის 73-ე მუხლის მე-9 ნაწილის „ბ“ ქვეპუნქტის მიხედვით, საგადასახადო ვალდებულების განსაზღვრის მიზნით საგადასახადო ორგანოს უფლება აქვს სამეურნეო ოპერაციის ფორმისა და შინაარსის გათვალისწინებით შეცვალოს მისი კვალიფიკაცია, თუ ოპერაციის ფორმა არ შეესაბამება მის შინაარსს. ამავე მუხლის მე-4 ნაწილის თანახმად, თუ რაიმე თანხა გამოიყენება კონკრეტული პირის ინტერესებისათვის, ჩაითვლება, რომ ეს თანხა მიღებული აქვს ამ პირს.

საქართველოს საგადასახადო კოდექსის 101-ე მუხლის პირველი ნაწილის თანახმად, ხელფასის სახით მიღებულ შემოსავლებს განეკუთვნება ფიზიკური პირის მიერ დაქირავებით მუშაობის შედეგად მიღებული ნებისმიერი საზღაური ან სარგებელი, მათ შორის, წინა სამუშაო ადგილიდან პენსიის ან სხვა სახით მიღებული შემოსავალი, ან შემოსავალი მომავალი სამუშაო ადგილიდან.

საქართველოს საგადასახადო კოდექსის მე-12 მუხლის პირველი ნაწილის „გ“ ქვეპუნქტის თანახმად, დაქირავებით მუშაობად ითვლება ფიზიკური პირის მიერ საწარმოს ან ორგანიზაციის ხელმძღვანელად (დირექტორად) ყოფნა ან ხელმძღვანელის (დირექტორის) მოვალეობის შესრულება. საქართველოს საგადასახადო კოდექსის 154-ე მუხლის პირველი ნაწილის „ა“ ქვეპუნქტის თანახმად, გადახდის წყაროსთან გადასახადის დაკავება ევალება საგადასახადო აგენტს, რომელიც არის იურიდიული პირი, საწარმო/ორგანიზაცია ან მეწარმე ფიზიკური პირი, რომელიც დაქირავებულს უხდის ხელფასს.

ამავე მუხლის მე-2 ნაწილის „ა“ და „ბ“ ქვეპუნქტების თანახმად:

ა) გადასახადის დაკავებისა და ბიუჯეტში მისი გადარიცხვისათვის პასუხისმგებლობა ეკისრება შემოსავლის გადამხდელს;

ბ) გადასახადის თანხის დაუკავებლობის შემთხვევაში შემოსავლის გადამხდელი ვალდებულია ბიუჯეტში შეიტანოს დაუკავებელი გადასახადის თანხა ფაქტობრივად გადახდილი ანაზღაურების შესაბამისად და მასთან დაკავშირებული სანქციები.

საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.

საქართველოს ზოგადი ადმინისტრაციული კოდექსის 96-ე მუხლის თანახმად, ადმინისტრაციული ორგანო ვალდებულია ადმინისტრაციული წარმოებისას გამოიკვლიოს საქმისათვის ყველა მნიშვნელოვანი გარემოება და გადაწყვეტილება მიიღოს ამ გარემოებათა შეფასებისა და ურთიერთშეჯერების საფუძველზე.

დადგენილი ფაქტობრივი გარემოებაა, რომ გადამხდელის მიერ წარდგენილ ბუღალტრულ პროგრამაში არ არის ასახული ყველა სამეურნეო ოპერაცია როგორც შემოსავლებთან, ასევე, ხარჯებთან მიმართებით. ამასთან, შეუძლებელია პროგრამით ხელმძღვანელობა საწარმოს მოგება/ზარალის, საქონლისა და ფულის მოძრაობის შესწავლის მიზნით, ასევე, პროგრამაში ასახული ინფორმაცია შეუსაბამობაშია გადამხდელის მიერ წარდგენილ ფინანსურ ანგარიშგებებში ასახულ ინფორმაციასთან. საგადასახადო მონიტორინგის დეპარტამენტის მიერ ჩატარებული სალაროში ნაღდი ფულის ინვენტარზაციით ნაღდი ფულის ნაშთმა შეადგინა 340 ლარი. შემოწმებამ შემოსავლების სამსახურის გადასახადების ადმინისტრირების საინფორმაციო სისტემაში არსებულ ინფორმაცია/დოკუმენტაციაზე დაყრდნობით გაიანგარიშა კომპანიის ფულადი სახსრების მოძრაობა, გაითვალისწინა გადამხდელის მიერ წარდგენილი ინფორმაცია დებიტორულ/კრედიტორული დავალიანებების შესახებ, ასევე, ბიუჯეტში გადახდილი თანხები და საანგარიშო პერიოდის ბოლოს დარჩენილი ფულის ნაშთი ჩაითვალა დირექტორის მიერ მიღებულ სარგებლად.

შემოსავლების სამსახური ყურადღებას ამახვილებს გადასახადის გადამხდელის მიერ საჩივარში წარმოდგენილ არგუმენტებზე, რომლის მიხედვით, გადამხდელი არ ეთანხმება შემოწმების მიერ სალაროს ნაღდი ფულის ნაშთის გაანგარიშებას და მიუთითებს შემდეგს:

 კომპანიას აღებული აქვს სესხი ევროს ვალუტაში. მიაჩნია, რომ შემოწმების მხრიდან ადგილი აქვს მექანიკურ შეცდომას, კერძოდ, გაანგარიშებაში არასწორად არის მითითებული სესხის თანხა (690 736 ლარის ნაცვლად მითითებულია 687 763 ლარი). საჩივარზე დანართის სახით წარმოდგენილი აქვს საბანკო ამონაწერი ევროში;

 გადასახადის გადამხდელის ავტორიზებულ გვერდზე არსებული ინფორმაციის მიხედვით კომპანიის მიერ შეძენილი მომსახურების თანხები, საგადასახადო ანგარიშ-ფაქტურების მიხედვით, შეადგენს 107 618 ლარს. საჩივარზე დანართის სახით წარმოდგენილი აქვს კომპანიის მიერ შეძენილი მომსახურების საგადასახადო ანგარიშ-ფაქტურების ცხრილი;

 სასაქონლო ზედნადებებით შეძენილი საქონლის ღირებულება შემმოწმებელს მითითებული აქვს 245 943 ლარი, ხოლო, გადასახადის გადამხდელის ავტორიზებულ გვერდზე გადამოწმების შედეგად დადგინდა, რომ აღნიშნული თანხა შეადგენს 246 831 ლარს. გადამხდელს საჩივარზე თანდართული აქვს გადასახადის გადამხდელის ავტორიზებული გვერდიდან ჩამოტვირთული სასაქონლო ზედნადებების რეესტრი;

 გადასახადის გადამხდელის ავტორიზებულ გვერდზე არსებული იმპორტის რეესტრის მიხედვით დგინდება, რომ მიმდინარე პერიოდში საბაჟო დეკლარაციაში მითითებული ინვოისის ღირებულება შეადგენს 1 252 733 ლარს. გადამხდელის მიერ განხორციელებულია 1 363 189 ლარის ოდენობით იმპორტი, საბოლოო საქონლის იმპორტი შეადგენს 1 252 733 ლარს, ხოლო შემმოწმებლის გაანგარიშებით კი 1 233 297 ლარს;

 კომპანიის გარკვეული ხარჯები დირექტორმა დაფარა პირადი ანგარიშიდან, შესაბამისად, ვინაიდან, კომპანიის ანგარიშზე ფიქსირდებოდა არასაკმარისი თანხა, ასევე, მასზე გავრცელებული იყო ინკასო, დირექტორმა გადაიხადა სარეკლამო ხარჯები (ჯამში 1 570 ლარის ოდენობით) და კომპანიის სესხის თანხა. აღნიშნულის დასადასტურებლად საჩივარზე დანართის სახით წარმოადგენს სესხის ხელშეკრულებას და საგადახდო დავალებებს;

 შეძენილი ძირითადი საშუალების (ავტომობილის) თვითღირებულება შეადგენს 29 071 ლარს, ხოლო შემმოწმებლის გაანგარიშებაში დაფიქსირებულია 22 274 ლარი. საჩივარზე დანართის სახით წარმოდგენილი აქვს ინვოისები და პორტის მომსახურების თანხების გადახდის დამადასტურებელი დოკუმენტი;

 გაწეული მომსახურებისთვის (მონტაჟი) ინდივიდუალურ მეწარმესთან გადარიცხული აქვს თანხები, რომელიც მეწარმის მიერ დეკლარირებული და გადახდილია. აცხადებს, რომ აღნიშნულის დასადასტურებლად შეუძლია დამატებით წარმოადგინოს მტკიცებულებები;

 გააჩნია მივლინების ხარჯები, კერძოდ, სამუშაოს სპეციფიკიდან გამომდინარე, როგორც საქართველოს მასშტაბით, ისე უცხოეთში თანამშრომლებთან ერთად მიდიოდა მივლინებაში. აცხადებს, რომ აღნიშნულის დასადასტურებლად შეუძლია წარმოადგინოს სასტუმროს ჯავშნები და ინვოისები;

 აცხადებს, რომ დირექტორმა კაპიტალიდან გაიტანა 120 000 ლარი. გადამხდელი საჩივარზე დანართის სახით წარმოადგენს 2019 და 2021 წლების პარტნიორთა კრების ოქმებს;

 გააჩნია საწყობის რემონტის ხარჯები;

ზემოაღნიშნული სამართლებრივი ნორმების, დადგენილი ფაქტობრივი გარემოებებისა და გადასახადის გადამხდელის არგუმენტაციის გათვალისწინებით, შემოსავლების სამსახური მიიჩნევს, რომ სადავო საკითხი საჭიროებს დამატებით შესწავლას, კერძოდ, გადასახადის გადამხდელს უნდა მიეცეს წინადადება ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს საჩივარში მითითებული არგუმენტაციის დოკუმენტურად დადასტურებული მტკიცებულებები. თავის მხრივ, უნდა დაევალოს აუდიტის დეპარტამენტს, გადასახადის გადამხდელის მონაწილეობით, შეისწავლოს წარდგენილი მტკიცებულებები (მათ შორის, დავის განხილვის პროცესში წარმოდგენილი) და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება).

 

საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ:

 

1. შპს „---ს“ (ს/ნ ---) საჩივარი დაკმაყოფილდეს ნაწილობრივ;

2. სადავო საკითხთან დაკავშირებით:

ა) გადასახადის გადამხდელს მიეცეს წინადადება ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს საჩივარში მითითებული არგუმენტაციის დოკუმენტურად დადასტურებული მტკიცებულებები;

ბ) დაევალოს აუდიტის დეპარტამენტს, გადასახადის გადამხდელის მონაწილეობით, შეისწავლოს წარდგენილი მტკიცებულებები (მათ შორის, დავის განხილვის პროცესში წარმოდგენილი) და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება);

3. დანარჩენ ნაწილში საჩივარი არ დაკმაყოფილდეს;

4. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. №16) ან სასამართლოში (მის.: ქ. ქუთაისი, ვიქტორ კუპრაძის ქ. №11), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.

 

სადავო საკითხები:

გადასახადის გადამხდელი არ ეთანხმება შემოწმების მიერ სალაროს ნაღდი ფულის ნაშთის გაანგარიშებას და საჩივარში მითითებული არგუმენტაციის/მტკიცებულებების გათვალისწინებით ითხოვს საკითხის დამატებით შესწავლას.

 

ფაქტობრივი გარემოებები

დადგენილი ფაქტობრივი გარემოებაა, რომ გადამხდელის მიერ წარდგენილ ბუღალტრულ პროგრამაში არ არის ასახული ყველა სამეურნეო ოპერაცია როგორც შემოსავლებთან, ასევე, ხარჯებთან მიმართებით. ამასთან, შეუძლებელია პროგრამით ხელმძღვანელობა საწარმოს მოგება/ზარალის, საქონლისა და ფულის მოძრაობის შესწავლის მიზნით, ასევე, პროგრამაში ასახული ინფორმაცია შეუსაბამობაშია გადამხდელის მიერ წარდგენილ ფინანსურ ანგარიშგებებში ასახულ ინფორმაციასთან. საგადასახადო მონიტორინგის დეპარტამენტის მიერ ჩატარებული სალაროში ნაღდი ფულის ინვენტარზაციით ნაღდი ფულის ნაშთმა შეადგინა 340 ლარი. შემოწმებამ შემოსავლების სამსახურის გადასახადების ადმინისტრირების საინფორმაციო სისტემაში არსებულ ინფორმაცია/დოკუმენტაციაზე დაყრდნობით გაიანგარიშა კომპანიის ფულადი სახსრების მოძრაობა, გაითვალისწინა გადამხდელის მიერ წარდგენილი ინფორმაცია დებიტორულ/კრედიტორული დავალიანებების შესახებ, ასევე, ბიუჯეტში გადახდილი თანხები და საანგარიშო პერიოდის ბოლოს დარჩენილი ფულის ნაშთი ჩაითვალა დირექტორის მიერ მიღებულ სარგებლად.

 

გადაწყვეტილება

შემოსავლების სამსახური მიიჩნევს, რომ სადავო საკითხი საჭიროებს დამატებით შესწავლას, კერძოდ, გადასახადის გადამხდელს უნდა მიეცეს წინადადება ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს საჩივარში მითითებული არგუმენტაციის დოკუმენტურად დადასტურებული მტკიცებულებები. თავის მხრივ, უნდა დაევალოს აუდიტის დეპარტამენტს, გადასახადის გადამხდელის მონაწილეობით, შეისწავლოს წარდგენილი მტკიცებულებები (მათ შორის, დავის განხილვის პროცესში წარმოდგენილი) და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება).

 

დასაბუთება

შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 73 (4,9); 101 (1); 12 (1); 154 (1,2).