გადაწყვეტილება №26624/2/2026
📜 საკანონმდებლო ნორმები
📄 სრული ტექსტი
№26624/2/2026
12 მარტი 2026
გ ა დ ა წ ყ ვ ე ტ ი ლ ე ბ ა
მომჩივანი: "------" (ს/ნ "------")
მოპასუხე: მომსახურების დეპარტამენტი
საქართველოს ფინანსთა სამინისტროსთან არსებულმა დავების განხილვის საბჭომ,26.02.2026 წელს განიხილა და მიიღო გადაწყვეტილება "------"-ის 12.02.2026 წელს რეგისტრირებულ საჩივარზე (რეგისტრაციის №26624/2/2026).
დავის საგანი:
დაკისრებული სანქციისგან გათავისუფლება საგადასახადო კოდექსის 269-ე მუხლის მე-7 ნაწილის საფუძველზე.
გასაჩივრებული გადაწყვეტილება:
1. მომსახურების დეპარტამენტის 14.01.2026 წლის №022-95/1 ბრძანება (№000-17 საგადასახადო მოთხოვნა);
2. შემოსავლების სამსახურის 23.01.2026 წლის №790 ბრძანება.
დარიცხული თანხა:
ჯარიმა - 3 046.72 ლარი.
ფაქტების აღწერა
მომჩივანმა 29.12.2025 წელს წარადგინა ID: "------" განცხადება დღგ-ის გადამხდელად რეგისტრაციის შესახებ (პირობა სავალდებულო, რეგისტაციის ძალაში შესვლის თარიღი 16.04.2025 წელი, თანხა, გარდა გათავისუფლებული ოპერაციებისა, 63 402 ლარი). დღგ-ის გადამხდელად რეგისტრაციის გარეშე საქმიანობისთვის (16.04.2025 – 29.12.2025 წლების პერიოდი) მომსახურების დეპარტამენტის 2025 წლის 29 დეკემბრის №022-95 საგადასახადო სამართალდარღვევის ოქმით, მომჩივანს შეეფარდა საგადასახადო კოდექსის 282-ე მუხლის პირველი ნაწილით გათვალისწინებული სანქცია - ჯარიმა 5 856.65 ლარის ოდენობით.
13.01.2026 წელს მომჩივანმა წარადგინა დღგ-ის სავალდებულო რეგისტრაციის ვადის დარღვევით მომართვის შესახებ განმეორებითი განცხადება (სადაც გარდა გათავისუფლებული ოპერაციებისა თანხა მიუთითა 7 203,4 ლარი), რაზეც მომსახურების დეპარტამენტის 14.01.2026 წლის №022-95/1 ბრძანებით (№000-17 საგადასახადო მოთხოვნა) დაეკისრა ჯარიმა 3 046.72 ლარის ოდენობით, რაც გასაჩივრდა შემოსავლების სამსახურში.
შემოსავლების სამსახურის 23.01.2026 წლის №790 ბრძანებით დაევალა მომსახურების დეპარტამენტს, შემოსავლების სამსახურის უფროსის 2022 წლის 11 აპრილის №9021 ბრძანების გათვალისწინებით, შეისწავლოს სადავო საკითხი და შესწავლის შედეგებიდან გამომდინარე, სათანადო საფუძვლების არსებობის შემთხვევაში, განახორციელოს დარიცხული ჯარიმის კორექტირება (შემცირება).
შემოსავლების სამსახურის 23.01.2026 წლის №790 ბრძანება გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.
შემოსავლების სამსახურის გადაწყვეტილების შინაარსი
შემოსავლების სამსახური მიუთითებს საგადასახადო კოდექსის 302-ე მუხლის მე-6 ნაწილზე, 43-ე, 269-ე, 270-ე, 282-ე მუხლებზე და ფაქტობრივ გარემოებებზე, რომლის გათვალისწინებით მიიჩნია, რომ განსახილველ შემთხვევაში უნდა დაევალოს მომსახურების დეპარტამენტს, შემოსავლების სამსახურის უფროსის 2022 წლის 11 აპრილის №9021 ბრძანების გათვალისწინებით, შეისწავლოს სადავო საკითხი და შესწავლის შედეგებიდან გამომდინარე, სათანადო საფუძვლების არსებობის შემთხვევაში, განახორციელოს დარიცხული ჯარიმის კორექტირება (შემცირება).
მომჩივნის არგუმენტაცია
შეცდომით მოხდა დღგ-ის გადამხდელად რეგისტრაციის თარიღის განსაზღვრა ნაცვლად 2025 წლის 23 ივლისისა დარეგისტრირდა 2025 წლის აპრილის თვიდან. 2025 წლის აპრილის თვიდან მეწარმის ბოლო 12 თვის შემოსავალი არ აჭარბებდა 100 000 ლარს. უთითებს კეთილსინდისიერ გადასახადის გადამხდელზე, რომელსაც უნდა მიეცეს საშუალება მოახდინოს რეგისტრაცია მაშინ, როდესაც მისმა შემოსავალმა გადააჭარბა 100 000 ლარს და არა არასწორად განსაზღვრული თარიღიდან, ვინაიდან არ ქონია არანაირი ინტერესი ნებაყოფლობით დამდგარიყო დღგ-ის გადამხდელად. ითხოვს საგადასახადო კოდექსის 269-ე მუხლის მე-7 ნაწილის საფუძველზე დაკისრებული სანქციისგან გათავისუფლებას.
დავების განხილვის საბჭო
მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:
საგადასახადო კოდექსის 270-ე მუხლის პირველის ნაწილის შესაბამისად, საგადასახადო სანქცია არის პასუხისმგებლობის ზომა ჩადენილი საგადასახადო სამართალდარღვევისათვის. ამავე მუხლის მე-2 ნაწილის თანახმად, საგადასახადო სანქცია გამოიყენება გაფრთხილების, საურავის, ფულადი ჯარიმის, სამართალდარღვევის საქონლის ან/და სატრანსპორტო საშუალების უსასყიდლოდ ჩამორთმევის სახით, ამ კოდექსით გათვალისწინებულ შემთხვევებში.
საგადასახადო კოდექსის 282-ე მუხლის პირველი ნაწილის თანახმად, დღგ-ის გადამხდელად რეგისტრაციის გარეშე საქმიანობა – იწვევს პირის დაჯარიმებას რეგისტრაციის გარეშე საქმიანობის პერიოდში განხორციელებული დღგ-ით დასაბეგრი ოპერაციების (გარდა გათავისუფლებული ოპერაციებისა) თანხის 5 პროცენტის ოდენობით.
საგადასახადო კოდექსის 269-ე მუხლის მე-7 ნაწილის მიხედვით, დავის განმხილველ ორგანოს უფლება აქვს, გაათავისუფლოს კეთილსინდისიერი გადასახადის გადამხდელი ამ კოდექსით გათვალისწინებული სანქციისაგან, თუ სამართალდარღვევა გამოწვეულია გადასახადის გადამხდელის შეცდომით/არცოდნით.
მომჩივანი განმარტავს, რომ შეცდომით მოხდა დღგ-ის გადამხდელად რეგისტრაციის თარიღის განსაზღვრა ნაცვლად 2025 წლის 23 ივლისისა დარეგისტრირდა 2025 წლის აპრილის თვიდან. 2025 წლის აპრილის თვიდან მეწარმის ბოლო 12 თვის შემოსავალი არ აჭარბებდა 100 000 ლარს. უთითებს კეთილსინდისიერ გადასახადის გადამხდელზე, რომელსაც უნდა მიეცეს საშუალება მოახდინოს რეგისტრაცია მაშინ, როდესაც მისმა შემოსავალმა გადააჭარბა 100 000 ლარს და არა არასწორად განსაზღვრული თარიღიდან, ვინაიდან არ ქონია არანაირი ინტერესი ნებაყოფლობით დამდგარიყო დღგის გადამხდელად.
შემოსავლების სამსახურის 23.01.2026 წლის №790 ბრძანებით დაევალა მომსახურების დეპარტამენტს, შემოსავლების სამსახურის უფროსის 2022 წლის 11 აპრილის №9021 ბრძანების გათვალისწინებით, შეისწავლოს სადავო საკითხი და შესწავლის შედეგებიდან გამომდინარე, სათანადო საფუძვლების არსებობის შემთხვევაში, განახორციელოს დარიცხული ჯარიმის კორექტირება (შემცირება).
ზემოაღნიშნული სამართლებრივი ნორმების, დადგენილი ფაქტობრივი გარემოებების და მხარეთა არგუმენტების გათვალისწინებით, საბჭო მიიჩნევს, რომ შემოსავლების სამსახურის სადავო ბრძანებით მიღებული გადაწყვეტილება საჩივრის ნაწილობრივ დაკმაყოფილების თაობაზე მართებულია და არ არსებობს განსხვავებული გადაწყვეტილების მიღების საფუძველი.
საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:
1. საჩივარი არ დაკმაყოფილდეს;
2. გადაწყვეტილება შეიძლება გასაჩივრდეს თბილისის საქალაქო სასამართლოში (ქ. თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.
სადავო საკითხი
მომჩივანი ითხოვს სსკ-ის 269-ე მუხლის მე-7 ნაწილის საფუძველზე დაკისრებული სანქციისგან გათავისუფლებას.
ფაქტობრივი გარემოებები
მომჩივანმა განცხადება დღგ-ის გადამხდელად რეგისტრაციის შესახებ.დღგ-ის გადამხდელად რეგისტრაციის გარეშე საქმიანობისთვის მომჩივანს შეეფარდა სსკ-ის 282-ე მუხლის პირველი ნაწილით გათვალისწინებული სანქცია.
გადაწყვეტილება
საბჭო მიიჩნევს, რომ შემოსავლების სამსახურის სადავო ბრძანებით მიღებული გადაწყვეტილება საჩივრის ნაწილობრივ დაკმაყოფილების თაობაზე მართებულია და არ არსებობს განსხვავებული გადაწყვეტილების მიღების საფუძველი.
დასაბუთება
შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს:
269,282