გადაწყვეტილება №26054/2/2025

N 26054/2/2025

27 ნოემბერი 2025

გ ა დ ა წ ყ ვ ე ტ ი ლ ე ბ ა

 

საქართველოს ფინანსთა სამინისტროსთან არსებულმა დავების განხილვის საბჭომ, 13.11.2025 წელს განიხილა და მიიღო გადაწყვეტილება ----- ----- 20.10.2025 წელს რეგისტრირებულ საჩივარზე (რეგისტრაციის N 26054/2/2025).

 

დავის საგანი:

დღგ-ით დასაბეგრი ბრუნვის გაზრდა კორექტირების ანგარიშ - ფაქტურის გათვალისწინებით.

 

გასაჩივრებული გადაწყვეტილება:

1. აუდიტის დეპარტამენტის 11.08.2025 წლის N 261-17 საგადასახადო მოთხოვნა;

2. შემოსავლების სამსახურის 17.10.2025 წლის N 22265 ბრძანება.

 

დარიცხული თანხა: 7 017,38 ლარი.

მათ შორის:

დღგ - 4 005,76;

ჯარიმა - 1 946,4;

საურავი - 1 065,22

 

ფაქტების აღწერა/დარიცხვის საფუძვლები:

გადასახადის გადამხდელის საქმიანობაა სამშენებლო მანქანების და მოწყობილობების იჯარა ოპერატორთან ერთად.

აუდიტის დეპარტამენტის 30.07.2025 წლის კამერალური საგადასახადო შემოწმების აქტით შემოწმებულია ელექტრონულად გამოწერილი საგადასახადო ანგარიშ - ფაქტურების/სასაქონლო ზედნადებების, მიღებული საგადასახადო ანგარიშ-ფაქტურებისა და საბაჟო დეკლარაციების 2023 წლის ნოემბრისა და 2024 წლის იანვრის საანგარიშო პერიოდების დღგ-ის დეკლარაციებში ასახვის სისწორე. შემოწმების აქტიდან ირკვევა, რომ სადავო დარიცხვა გამოწვეულია შემდეგი გარემოებებით:

კომპანიას 2023 წლის ნოემბრის თვეში დღგ-ით დასაბეგრი ბრუნვა შემცირებული აქვს 225 ლარით, ხოლო 2024 წლის იანვრის თვეში გამოწერილი აქვს კორექტირების საგადასახადო ანგარიშ - ფაქტურა ( ----- ), საიდანაც 21 000 ლარი არ აქვს ამავე პერიოდის დეკლარაციაში ასახული, შესაბამისად არ აქვს დაბეგრილი.

აღნიშნულიდან გამომდინარე, გამოწერილი ელექტრონული საგადასახადო ანგარიშ - ფაქტურების საფუძველზე განისაზღვრა შესამოწმებელი პერიოდის დღგ-ით დასაბეგრი ბრუნვა. მომჩივანს დაერიცხა დღგ და დაეკისრა ჯარიმა საგადასახადო კოდექსის 275-ე მუხლის მიხედვით.

შემოწმების აქტის საფუძველზე გადასახადის გადამხდელს წარედგინა აუდიტის დეპარტამენტის 11.08.2025 წლის N 261-17 საგადასახადო მოთხოვნა, რაც გასაჩივრდა შემოსავლების სამსახურში.

შემოსავლების სამსახურის 17.10.2025 წლის N 22265 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი:

შემოსავლების სამსახური მიუთითებს საგადასახადო კოდექსის 302-ე მუხლის მე-2 და მე-6 ნაწილებზე, 43-ე მუხლის მე-4 ნაწილზე, 269-ე მუხლის პირველ და მე-7 ნაწილებზე, 270-ე მუხლის პირველ და მე-2 ნაწილებზე, 275-ე მუხლზე, 272-ე მუხლის პირველ ნაწილზე, 69-ე მუხლის პირველ ნაწილზე, 179-ე მუხლის პირველ, მე-2 და მე-4 ნაწილებზე და განმარტავს, რომ გადასახადის გადამხდელის კეთილსინდისიერება უკავშირდება მის მიერ დაშვებულ შეცდომას, გადასახადის გადამხდელი კეთილსინდისიერია იმ შემთხვევაში თუ სამართალდარღვევა გამოწვეულია მის მიერ დაშვებული შეცდომით (არცოდნით). კეთილსინდისიერება გულისხმობს პირის სუბიექტურ დამოკიდებულებას მის მიერ ჩადენილი ქმედებისადმი. საგადასახადო კოდექსის 269-ე მუხლის მე-7 ნაწილის მიზანია საგადასახადო პასუხისმგებლობისგან გაათავისუფლოს პირი, რომელიც სამართლებრივი შეცდომის არეალში მოქმედებდა, რადგან სამართლებრივი შეცდომის დროს პირი არასწორად აფასებს ჩადენილი ქმედების სამართლებრივ არსს და ამ ქმედებით გამოწვეულ სამართლებრივ შედეგს.

შემოსავლების სამსახური მიუთითებს საქმეში არსებულ ფაქტობრივ გარემოებებზე, რომლის მიხედვით, გადასახადის გადამხდელს არასრულად ჰქონდა შესრულებული საგადასახადო ვალდებულებები. ამასთან, მომჩივანს არ აქვს წარმოდგენილი საჩივარში მითითებული არგუმენტაციის დამადასტურებელი მტკიცებულებები შემოწმებით განსაზღვრული სანქციის არამართლზომიერებასთან დაკავშირებით.

ვშირებით. ზემოაღნიშნული სამართლებრივი ნორმებისა და საქმეზე არსებული მასალების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად დარიცხული სანქცია განსაზღვრულია საგადასახადო კანონმდებლობის შესაბამისად, ამასთან, განსახილველ შემთხვევაში საგადასახადო შემოწმების შედეგად დარიცხული ჯარიმის მიმართ შემოსავლების სამსახურს მიზანშეწონილად არ მიაჩნია საგადასახადო კოდექსის 269-ე მუხლის მე-7 ნაწილის გამოყენება.

 

მომჩივნის არგუმენტაცია:

რადგან დასაბეგრი ოპერაცია 2023 წლის დეკემბრის საანგარიშო თვეში სწორად არის დაბეგრილი და რადგან შესამოწმებელი პერიოდი არ მოიცავდა დეკემბრის თვეს, 2024 წლის იანვრის თვეზე გამოვლენილი დარღვევის ნაწილში, სწორად ვერ მოხდა სურათის აღქმა/დანახვა, რამაც გამოიწვია მეწარმე სუბიექტის დაჯარიმება არასწორად. 2023 წლის დეკემბრის საოპერაციო თვეზე გამოწერილი ანგარიშ - ფაქტურა დაკორექტირდა, კორექტირების პერიოდში მოხდა ტექნიკური შეცდომა. ანგარიშ - ფაქტურას ავტომატურად მიეთითა კორექტირების პერიოდი და გამორჩა მიეთითებინა 2023 წლის დეკემბერი, ამის აღმოჩენის შემდეგ კვლავ დაკორექტირდა ანგარიშ-ფაქტურა და საბოლოო დაზუსტებულ ანგარიშფაქტურაზე (----- -----) როგორც დასაბეგრი თანხის ოდენობა, ასევე საანგარიშო პერიოდი არის სწორად მითითებული. სულ 2023 წლის დეკემბრის თვეში დასაბეგრი ოპერაცია შეადგენს 52 004,24 ლარს, რაც ასახულია დაზუსტებულ დეკლარაციაში ( ----- ) დაზუსტებული ანგარიშ - ფაქტურა არ არის მიბმული დეკლარაციის დანართში, თუმცა დასაბეგრი ოპერაცია 2023 წლის დეკემბრის თვეში სწორად არის დაბეგრილი. 2024 წლის იანვრის დასაბეგრი ბრუნვა შეადგენს 10 250 ლარს და აღნიშნული თვის დეკლარაციაც სწორად არის დაბეგრილი ( ----- ) ხოლო ----- დაკორექტირებულია და მისი საბოლოო დაზუსტებულ ანგარიშ - ფაქტურის ნომერია ----- და იგი ეკუთვნის დეკემბრის თვის ბრუნვას და ასევე დაბეგრილია დეკემბრის თვის დეკლარაციით. რაც შეეხება 2023 წლის ნოემბრის თვეში გამოვლენილ დარღვევას ეთანხმება.

ითხოვს გათვალისწინებულ იქნას აღნიშნული გარემოება და N 261-17 საგადასახადო მოთხოვნა დაკორექტირდეს. აღნიშნული ოპერაცია დაბეგრილია 2023 წლის დეკემბრის თვეში. ასევე სრულად უნდა მოხდეს დეკემბრის საანგარიშო თვის შესწავლა, რომ არ მოხდეს სურათის არასრულად აღქმა და მეწარმე სუბიექტის ორმაგად დაბეგვრა/დაჯარიმება.

27.10.2025 წლის განცხადებაში მომჩივანი მიუთითებს, რომ 2023 წლის დეკემბრის თვეში შპს ----- გაუწია მომსახურება, რაზეც მომხმარებელმა (შპს ----- ) გადაურიცხა 8 319 ლარი. აღნიშნულ 8 319 ლარზე გამოუწერეს საგადასახდო ანგარიშ - ფაქტურა ( ----- ), თუმცა 2024 წლის იანვრის თვეში შეგროვებული ინფორმაციის და დოკუმენტაციის საფუძველზე ცნობილი გახდა, რომ გაწეული მომსახურების სრული ღირებულება შეადგენდა 33 099 ლარს. ვინაიდან ბუღალტრულ აღრიცხვას აწარმოებს დარიცხვის მეთოდით (და არა საკასო მეთოდით), მოხდა საგადასახადო ანგარიშ - ფაქტურის დაკორექტირება გაწეული მომსახურების შესაბამისად 33 099 ლარზე (ეკ 10854471). აღნიშნული ფაქტის აღმოჩენისთანავე აღარ დაელოდა ანგარიშ - ფაქტურის დადასტურებას მომხმარებლის მხრიდან და საგადასახადო სამართალდარღვევის აღმოსაფხვრელად მაშინვე დააკორექტირა დასაბეგრი თანხის მიხედვით და გააგზავნა დეკლარაცია, თუმცა დაკორექტირების მომენტში მოხდა ტექნიკური შეცდომა და დეკემბრის თვის მაგივრად ანგარიშ - ფაქტურაში ავტომატურად გამოტანილი იანვრის თვით მოხდა ანგარიშ - ფაქტურის გაგზავნა. აღნიშნულის აღმოჩენისთანავე (კერძოდ 3 კალენდარულ დღეში) დაკორექტირდა ისევ ანგარიშ - ფაქტურა და მიუთითა სწორი სააღრიცხვო თვე 2023 წლის დეკემბერი ( ----- ). ანუ მომსახურების გაწევის შესაბამისად საგადასახადო ანგარიშ - ფაქტურა საბოლოოდ დაკორექტირდა დეკემბრის თვით (ამ დროისათვის დეკლარაცია უკვე გასწორებული და დაკორექტირებული იყო გაგზავნილი).

ამდენი კორექტირება სწორი ბუღალტრული აღრიცხვისთვის გააკეთა, სამუშაო პროცესში ხშირია შემთხვევა, როცა ვერ ხდება საჭირო ვადებში სწორი ინფორმაციის მოპოვება და უწევს სწორი ბუღალტრული აღრიცხვისთვის კორექტირება.

 

დავების განხილვის საბჭო:

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი უნდა დაკმაყოფილდეს ნაწილობრივ შემდეგ გარემოებათა გამო:

საგადასახადო კოდექსის 159-ე მუხლის პირველი ნაწილის „ბ“ ქვეპუნქტის თანახმად, დღგ-ით დასაბეგრი ოპერაციაა დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ მომსახურების გაწევა.

საგადასახადო კოდექსის 163-ე მუხლის პირველი და მე-2 ნაწილების თანახმად, საქონლის მიწოდების/მომსახურების გაწევის დღგ-ით დაბეგვრა ხორციელდება საქონლის მიწოდების/მომსახურების გაწევის მომენტში, თუ ამ მუხლით სხვა რამ არ არის გათვალისწინებული. თუ თანხა სრულად ან ნაწილობრივ ანაზღაურებულია საქონლის მიწოდებამდე/მომსახურების გაწევამდე, ანაზღაურებული თანხის შესაბამისი დღგ-ის გადახდა ხორციელდება ანაზღაურების თანხის გადახდის საანგარიშო პერიოდის მიხედვით, გარდა ამ მუხლის მე-5 და მე-9 ნაწილებით გათვალისწინებული შემთხვევებისა.

საგადასახადო კოდექსის 179-ე მუხლის პირველი და მე-2 ნაწილების თანახმად დღგ-ით დასაბეგრი თანხა და, შესაბამისად, დღგ-ის ჩასათვლელი თანხა კორექტირდება, თუ შეიცვალა ის გარემოებები/ფაქტორები, რომელთა საფუძველზეც დასაბეგრი ოპერაციის განხორციელების დროს განისაზღვრა დღგ-ით დასაბეგრი თანხა. დასაბეგრი ოპერაციის თანხის კორექტირება ხორციელდება კორექტირების გამომწვევი გარემოების დადგომის საანგარიშო პერიოდში.

შემოწმების შედეგად დადგინდა, რომ მომჩივანს 2023 წლის ნოემბრის თვეში დღგ-ით დასაბეგრი ბრუნვა შემცირებული აქვს 225 ლარით, ხოლო 2024 წლის იანვრის თვეში გამოწერილი აქვს კორექტირების საგადასახადო ანგარიშ - ფაქტურა (----- ), საიდანაც 21 000 ლარი არ აქვს ამავე პერიოდის დეკლარაციაში ასახული.

მომჩივანი განმარტავს, რომ ეთანხმება 2023 წლის ნოემბრის თვის საანგარიშო პერიოდზე დარიცხვას, ხოლო 2024 წლის იანვრის თვის საანგარიშო პერიოდზე დარიცხულ თანხას არ ეთანხმება, ვინაიდან აღნიშნული კორექტირების შედეგები ეკუთვნოდა 2023 წლის დეკემბრის თვეს და კორექტირების დროს დაშვებული იყო შეცდომა, რაც მოგვიანებით გასწორებულია. ითხოვს სრულად იქნას შესწავლილი დეკემბრის საანგარიშო თვე, რომ არ მოხდეს ორმაგად დაბეგვრა/დაჯარიმება.

სადავო საკითხზე წარმოდგენილია აუდიტის დეპარტამენტის 13.11.2025 წლის ----- წერილი, საიდანაც ირკვევა, რომ მომჩივანს 2024 წლის იანვრის სანგარიშო პერიოდში გამოწერილი აქვს კორექტირების ანგარიშ - ფაქტურა ----- (33 099 ლარზე), რომლის ოპერაციის განხორციელების პერიოდია 2024 წლის იანვარი. კორექტირების ანგარიშ - ფაქტურა ----- ისევ დააკორექტირა 2024 წლის იანვარში ----- ანგარიშ - ფაქტურით და ოპერაციის პერიოდად მიუთითა დეკემბრის თვე, მაგრამ დაზუსტებულ დეკლარაციაში არ ასახა.

საბჭო ყურადღებას ამახვილებს იმ გარემოებაზე, რომ აუდიტის დეპარტამენტის 30.07.2025 წლის კამერალური საგადასახადო შემოწმების აქტში ასახულია 2023 წლის ნოემბრისა და 2024 წლის იანვრის საანგარიშო პერიოდების შემოწმების შედეგები დღგ-ის ნაწილში, ხოლო 2024 წლის იანვრის საანგარიშო პერიოდში დამატებით გამოვლენილ საგადასახადო ვალდებულებებთან მიმართებით, მომჩივანი აღნიშნავს, რომ ოპერაცია ეკუთვნის 2023 წლის დეკემბრის საანგარიშო პერიოდს, რაზეც გამოწერილი აქვს შესაბამისი კორექტირების ანგარიშ - ფაქტურა.

საბჭო მიუთითებს საქმის გარემოებებზე, მხარეთა არგუმენტაციაზე და მიიჩნევს, რომ მომჩივნის მიერ მითითებული გარემოება, კორექტირების შედეგების საანგარიშო პერიოდის სიწორესთან დაკავშირებით, საჭიროებს დამატებით შესწავლას. ამ მიზნით, დღგ-ის ნაწილში 30.07.2025 წლის კამერალური საგადასახადო შემოწმების აქტით შემოწმებულ საანგარიშო პერიოდებთან ერთად აუდიტის დეპარტამენტმა უნდა განახორციელოს 2023 წლის დეკემბრის თვის საანგარიშო პერიოდის საგადასახადო შემოწმება და სათანადო საფუძვლების არსებობის შემთხვევაში, უზრუნველყოს გასაჩივრებული აქტებით დარიცხული თანხების კორექტირება (შემცირება).

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „ბ“ ქვეპუნქტით და გადაწყვიტა:

 

1. საჩივარი დაკმაყოფილდეს ნაწილობრივ;

2. ნაწილობრივ გაუქმდეს შემოსავლების სამსახურის 17.10.2025 წლის N 22265 ბრძანება;

3. აუდიტის დეპარტამენტს დაევალოს შეისწავლოს სადავო საკითხი ამ გადაწყვეტილების შესაბამისად და სათანადო საფუძვლების არსებობის შემთხვევაში, უზრუნველყოს გადასახადის გადამხდელის საგადასახადო ვალდებულებების კორექტირება (შემცირება);

4. დანარჩენ ნაწილში საჩივარი არ დაკმაყოფილდეს;

5. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი N 64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხი:

დღგ-ით დასაბეგრი ბრუნვის გაზრდა კორექტირების ანგარიშ - ფაქტურის გათვალისწინებით.

 

ფაქტობრივი გარემოებები:

გადასახადის გადამხდელის საქმიანობაა სამშენებლო მანქანების და მოწყობილობების იჯარა ოპერატორთან ერთად. აუდიტის დეპარტამენტის კამერალური საგადასახადო შემოწმების აქტით შემოწმდა ელექტრონულად გამოწერილი საგადასახადო ანგარიშ - ფაქტურების/სასაქონლო ზედნადებების, მიღებული საგადასახადო ანგარიშ - ფაქტურებისა და საბაჟო დეკლარაციების დღგ-ის დეკლარაციებში ასახვის სისწორე. შემოწმების აქტიდან ირკვევა, რომ სადავო დარიცხვა გამოწვეულია შემდეგი გარემოებებით: კომპანიას 2023 წლის ნოემბრის თვეში დღგ-ით დასაბეგრი ბრუნვა შემცირებული აქვს 225 ლარით, ხოლო 2024 წლის იანვრის თვეში გამოწერილი აქვს კორექტირების საგადასახადო ანგარიშ - ფაქტურა, საიდანაც 21 000 ლარი არ აქვს ამავე პერიოდის დეკლარაციაში ასახული, შესაბამისად არ აქვს დაბეგრილი. აღნიშნულიდან გამომდინარე, გამოწერილი ელექტრონული საგადასახადო ანგარიშ - ფაქტურების საფუძველზე განისაზღვრა შესამოწმებელი პერიოდის დღგ-ით დასაბეგრი ბრუნვა. მომჩივანს დაერიცხა დღგ და დაეკისრა ჯარიმა საგადასახადო კოდექსის 275-ე მუხლის მიხედვით. შემოწმების აქტის საფუძველზე გადასახადის გადამხდელს წარედგინა აუდიტის დეპარტამენტის საგადასახადო მოთხოვნა, რაც გასაჩივრდა შემოსავლების სამსახურში. შემოსავლების სამსახურის ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

გადაწყვეტილება:

საბჭო მიუთითებს საქმის გარემოებებზე, მხარეთა არგუმენტაციაზე და მიიჩნევს, რომ მომჩივნის მიერ მითითებული გარემოება, კორექტირების შედეგების საანგარიშო პერიოდის სიწორესთან დაკავშირებით, საჭიროებს დამატებით შესწავლას. ამ მიზნით, დღგ-ის ნაწილში 30.07.2025 წლის კამერალური საგადასახადო შემოწმების აქტით შემოწმებულ საანგარიშო პერიოდებთან ერთად აუდიტის დეპარტამენტმა უნდა განახორციელოს 2023 წლის დეკემბრის თვის საანგარიშო პერიოდის საგადასახადო შემოწმება და სათანადო საფუძვლების არსებობის შემთხვევაში, უზრუნველყოს გასაჩივრებული აქტებით დარიცხული თანხების კორექტირება (შემცირება).

 

დასაბუთება:

საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: მუხლი 269 (7); 275; 272; 179; 69;.