ბრძანება N 6233

N 6233

23 მარტი 2026

ბ რ ძ ა ნ ე ბ ა

 

შპს „-------“ (ს/ნ -------)

(მის.: -------, -------)

2026 წლის 28 იანვრის საჩივრის

დაკმაყოფილებაზე უარის თქმის თაობაზე

 

შემოსავლების სამსახურმა დავების განხილვის საბჭოს 2026 წლის 26 თებერვლის სხდომაზე (ოქმი №18) განიხილა შპს „-------“ (ს/ნ -------) 2026 წლის 28 იანვრის №100443/1/2026 საჩივარი, აუდიტის დეპარტამენტის 2025 წლის 30 დეკემბრის №002-228 საგადასახადო მოთხოვნასთან დაკავშირებით.

 

სადავო საკითხი:

გადასახადის გადამხდელი არ ეთანხმება საშემოსავლო გადასახადის დარიცხვას. აცხადებს, რომ შემოწმებას არ მოუთხოვია წინა საანგარიშო პერიოდის ბუღალტრული აღრიცხვის მონაცემები, რომლითაც დასტურდება შესამოწმებელი პერიოდის საწყისი ნაშთების ნამდვილობა. განმარტავს, რომ დამფუძნებლის შენატანის ოდენობა არ განსხვავდება კომპანიიდან გატანილი თანხის ოდენობისგან. ამასთან, საჩივარზე დანართის სახით წარმოადგენს 2021 წლის ბრუნვით უწყისსა და საბუღალტრო პროგრამას და აღნიშნულის საფუძველზე ითხოვს დარიცხული თანხების კორექტირებას.

 

ფაქტობრივი გარემოებები:

საქმის მასალებით ირკვევა, რომ შემოსავლების სამსახურის აუდიტის დეპარტამენტის 2025 წლის 15 ოქტომბრის №21840 ბრძანების საფუძველზე ჩატარდა შპს „-------“ (ს/ნ -------) საქმიანობის კამერალური საგადასახადო შემოწმება. შესამოწმებელ პერიოდად განისაზღვრა 2022 წლის პირველი იანვრიდან 2025 წლის პირველ სექტემბრამდე საანგარიშო პერიოდები. შემოწმების შედეგებზე 2025 წლის 29 დეკემბერს შედგენილ იქნა საგადასახადო შემოწმების აქტი, გამოიცა 2025 წლის 30 დეკემბრის №28953 ბრძანება და ამავე თარიღის №002-228 საგადასახადო მოთხოვნა, რომლის მიხედვით გადამხდელს დამატებით გადასახდელად განესაზღვრა სულ 146 399 ლარი, მათ შორის, გადასახადი 93 881 ლარი, ჯარიმა 46 940 ლარი, საურავი 5 578 ლარი.

 

საგადასახადო შემოწმების აქტის მიხედვით, საგადასახადო ვალდებულებები განსაზღვრულია შემდეგი გარემოებებით:

გადასახადის გადამხდელის საქმიანობის სფეროს წარმოადგენს სამშენებლო-სამონტაჟო სამუშაოები. შემოწმების პროცესში, გადამხდელმა წარმოადგინა საბუღალტრო პროგრამა, რომლის მიხედვით დამფუძნებლის მიერ სესხის სახით შეტანილი თანხების საწყისი ნაშთი შეადგენს 799 912 ლარს. აღნიშნული თანხა შესამოწმებელ პერიოდში ეტაპობრივად გატანილია დამფუძნებლის მიერ. შემოწმებამ განახორციელა გადასახადის გადამხდელის მიერ წარმოდგენილი ბუღალტრული ინფორმაციის ანალიზი, თუმცა, გადამხდელის მიერ არ არის წარმოდგენილი წინა საანგარიშო პერიოდის ბუღალტრული აღრიცხვის მონაცემები, რითაც დადასტურდებოდა შესამოწმებელი პერიოდის სასტარტო ნაშთების ნამდვილობა. შესამოწმებელი პერიოდის სასტარტო ნაშთების სისწორის/რეალობის დადგენის მიზნით, შემოსავლების სამსახურის გადასახადების ადმინისტრირების საინფორმაციო სისტემაში არსებულ მონაცემებზე დაყრდნობით, საქართველოს საგადასახადო კოდექსის 491 მუხლის საფუძველზე, განხორციელდა ანალიტიკური პროცედურები. ამასთან, დებიტორული და კრედიტორული დავალიანებების, საბანკო ანგარიშებზე ფულის ნაშთების გათვალისწინებით, დაზუსტდა 2022 წლის პირველი იანვრის მდგომარეობით კომპანიის აქტივების ოდენობა, რაც განსხვავდება წარდგენილ ბრუნვით უწყისში დაფიქსირებული ნაშთისგან. შემოწმების მიერ გადამხდელისგან მოთხოვნილ იქნა სასტარტო ნაშთების ფორმირებასთან დაკავშირებული ინფორმაცია, რაც გადამხდელის მიერ მოწოდებული არ ყოფილა. შესაბამისად, შემოწმებით დადგინდა დამფუძნებლის შენატანის ოდენობა, რაც განსხვავდება დამფუძნებლის მიერ შესამოწმებელ პერიოდში საწარმოდან გატანილი თანხის ოდენობისგან. შესაბამისად, ფულის ნაშთში გამოვლენილი სხვაობა, საქართველოს საგადასახადო კოდექსის 73-ე მუხლის თანახმად, ჩაითვალა დირექტორზე გაცემულ ხელფასად. შედეგად, გადასახადის გადამხდელს, საქართველოს საგადასახადო კოდექსის 101-ე მუხლის საფუძველზე, დაერიცხა საშემოსავლო გადასახადი და საქართველოს საგადასახადო კოდექსის 275-ე მუხლით განსაზღვრული ჯარიმა.

 

შემოსავლების სამსახურმა განიხილა წარმოდგენილი საჩივარი და მიიჩნია, რომ გადასახადის გადამხდელის მოთხოვნა არ უნდა დაკმაყოფილდეს შემდეგ გარემოებათა გამო:

საქართველოს საგადასახადო კოდექსის 302-ე მუხლის მე-6 ნაწილის მიხედვით, დავის განმხილველ ორგანოებს უფლება აქვთ, საჩივარი განიხილონ დისტანციურად, ტექნიკურ საშუალებათა გამოყენებით. მათ ასევე უფლება აქვთ, საჩივარი განიხილონ მომჩივნის დაუსწრებლად, თუ საქმეში არსებული მასალებიდან სრულად დგინდება დავის საგანთან დაკავშირებული ფაქტობრივი გარემოებები.

 

სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.

საქართველოს საგადასახადო კოდექსის 491 მუხლის თანახმად:

1. საგადასახადო ორგანო უფლებამოსილია განახორციელოს ზოგადი ანალიტიკური პროცედურები.

2. ზოგადი ანალიტიკური პროცედურები გულისხმობს პირის შესახებ ინფორმაციის შეკრებას, ანალიზს და ამ ანალიზის საფუძველზე გადასახადების ადმინისტრირების ღონისძიებების დაგეგმვასა და ოპტიმიზაციას, მათ შორის, გადასახადით დასაბეგრი ობიექტის თაობაზე ინფორმაციის შეგროვებასა და ანალიზს, ასევე, საგადასახადო დავალიანებისა და ზედმეტობის წარმოშობის მიზეზების შესწავლას. საქართველოს საგადასახადო კოდექსის 73-ე მუხლის მე-9 ნაწილის „ბ“ ქვეპუნქტის თანახმად, საგადასახადო ვალდებულების განსაზღვრის მიზნით საგადასახადო ორგანოს უფლება აქვს სამეურნეო ოპერაციის ფორმისა და შინაარსის გათვალისწინებით შეცვალოს მისი კვალიფიკაცია, თუ ოპერაციის ფორმა არ შეესაბამება მის შინაარსს. ამავე მუხლის მე-4 ნაწილის თანახმად, თუ რაიმე თანხა გამოიყენება კონკრეტული პირის ინტერესებისათვის, ჩაითვლება, რომ ეს თანხა მიღებული აქვს ამ პირს.

საქართველოს საგადასახადო კოდექსის 101-ე მუხლის პირველი ნაწილის თანახმად, ხელფასის სახით მიღებულ შემოსავლებს განეკუთვნება ფიზიკური პირის მიერ დაქირავებით მუშაობის შედეგად მიღებული ნებისმიერი საზღაური ან სარგებელი, მათ შორის, წინა სამუშაო ადგილიდან პენსიის ან სხვა სახით მიღებული შემოსავალი, ან შემოსავალი მომავალი სამუშაო ადგილიდან.

საქართველოს საგადასახადო კოდექსის 154-ე მუხლის პირველი ნაწილის „ა“ ქვეპუნქტის მიხედვით, გადახდის წყაროსთან გადასახადის დაკავება ევალება საგადასახადო აგენტს, რომელიც არის იურიდიული პირი, საწარმო/ორგანიზაცია ან მეწარმე ფიზიკური პირი, რომელიც დაქირავებულს უხდის ხელფასს.

ამავე მუხლის მე-2 ნაწილის „ა“ და „ბ“ ქვეპუნქტების თანახმად, გადახდის წყაროსთან გადასახადის დაკავებისას:

ა) გადასახადის დაკავებისა და ბიუჯეტში მისი გადარიცხვისათვის პასუხისმგებლობა ეკისრება შემოსავლის გადამხდელს;

ბ) გადასახადის თანხის დაუკავებლობის შემთხვევაში შემოსავლის გადამხდელი ვალდებულია ბიუჯეტში შეიტანოს დაუკავებელი გადასახადის თანხა ფაქტობრივად გადახდილი ანაზღაურების შესაბამისად და მასთან დაკავშირებული სანქციები.

საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.

დადგენილი ფაქტობრივი გარემოებაა, რომ შემოწმების პროცესში, გადამხდელმა წარადგინა საბუღალტრო პროგრამა, რომლის მიხედვით დამფუძნებლის მიერ სესხის სახით შეტანილი თანხების საწყისი ნაშთი შეადგენს 799 912 ლარს. აღნიშნული თანხა შესამოწმებელ პერიოდში ეტაპობრივად გატანილია დამფუძნებლის მიერ. გადამხდელმა არ წარადგინა წინა საანგარიშო პერიოდის ბუღალტრული აღრიცხვის მონაცემები, რითაც დადასტურდებოდა შესამოწმებელი პერიოდის სასტარტო ნაშთების ნამდვილობა. შესამოწმებელი პერიოდის სასტარტო ნაშთების სისწორის/რეალობის დადგენის მიზნით, შემოსავლების სამსახურის გადასახადების ადმინისტრირების საინფორმაციო სისტემაში არსებულ მონაცემებზე დაყრდნობით განხორციელდა ანალიტიკური პროცედურები. ამასთან, დებიტორული და კრედიტორული დავალიანებების, საბანკო ანგარიშებზე ფულის ნაშთების გათვალისწინებით დაზუსტდა 2022 წლის პირველი იანვრის მდგომარეობით კომპანიის აქტივების ოდენობა, რაც განსხვავდება წარდგენილ ბრუნვით უწყისში დაფიქსირებული ნაშთისგან. შემოწმების მიერ გადამხდელისგან მოთხოვნილ იქნა სასტარტო ნაშთების ფორმირებასთან დაკავშირებული ინფორმაცია, რაც გადამხდელის მიერ მიწოდებული არ ყოფილა. შესაბამისად, შემოწმებით დადგინდა დამფუძნებლის შენატანის ოდენობა, რაც განსხვავდება დამფუძნებლის მიერ შესამოწმებელ პერიოდში საწარმოდან გატანილი თანხის ოდენობისგან. შესაბამისად, ფულის ნაშთში გამოვლენილი სხვაობა ჩაითვალა დირექტორზე გაცემულ ხელფასად.

გადასახადის გადამხდელის მიერ საჩივარში წარმოდგენილ არგუმენტებთან დაკავშირებით, შემოსავლების სამსახური მიუთითებს აუდიტის დეპარტამენტის მიერ მოწოდებულ ინფორმაციაზე, რომლის მიხედვით, შემოწმების პროცესში გადამხდელის მიერ წარდგენილი საბუღალტრო პროგრამის თანახმად, დამფუძნებლის მიერ სესხის სახით შეტანილი თანხების საწყისი ნაშთი შეადგენს 799 912 ლარს, რომელიც ეტაპობრივად გატანილია დამფუძნებლის მიერ შესამოწმებელ პერიოდში. შემოწმების პროცესში ჩატარებული 2020-2021 წლების ფულადი სახსრების მოძრაობის ანალიზის საფუძველზე, ასევე, შემოსავლების სამსახურის გადასახადების ადმინისტრირების საინფორმაციო სისტემის მონაცემებისა და გადამხდელის მიერ წარდგენილ ინფორმაცია/დოკუმენტაციაზე დაყრდნობით დადგინდა, რომ შესამოწმებელი პერიოდის საწყის ნაშთად დამფუძნებლის მიერ სესხის სახით შეტანილი თანხა არ შეესაბამება რეალურ მონაცემებს. ზემოაღნიშნული ანალიზის საფუძველზე განისაზღვრა სესხის გონივრული ოდენობა (424 389 ლარი), რომელიც საჭირო იყო საწარმოს შემდგომი ფუქციონირებისთვის, ხოლო დარჩენილი თანხა (375 523 ლარი) ჩაითვალა ანგარიშვალდებულ პირზე გაცემულ ხელფასად. ამასთან, გადამხდელის მიერ საჩივარზე დანართის სახით წარდგენილ 2021 წლის ბრუნვით უწყისსა და საბუღალტრო პროგრამასთან დაკავშირებით, აუდიტის დეპარტამენტი განმარტავს, რომ აღნიშნული დოკუმენტაცია არ ცვლის შემოწმებით განსაზღვრულ საგადასახადო ვალდებულებებს, ხოლო ხარჯის დამადასტურებელი დამატებითი დოკუმენტაცია გადამხდელს არ წარმოუდგენია. ყოველივე აღნიშნულიდან გამომდინარე, შემოსავლების სამსახური მიიჩნევს, რომ გადამხდელის პრეტენზიები საფუძველს მოკლებულია.

ამასთან, შემოსავლების სამსახური აღნიშნავს, რომ მომჩივანი საჩივარში ვერ უთითებს ფაქტობრივ და სამართლებრივ გარემოებებზე, თუ რა ნაწილში იქნა განსაზღვრული საგადასახადო ვალდებულებები არამართლზომიერად. ხოლო, დავის წარმოების პროცესში არ ყოფილა წარმოდგენილი ისეთი არგუმენტები/მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს.

ზემოაღნიშნული სამართლებრივი ნორმების და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივარი დაუსაბუთებელია და არ უნდა დაკმაყოფილდეს.

 

საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ :

 

1. შპს „-------“ (ს/ნ -------) საჩივარი არ დაკმაყოფილდეს;

2. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. №16) ან სასამართლოში (მის.: ქ. თბილისი, დავით აღმაშენებლის ხეივანი №64), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.

 

სადავო საკითხები:

გადასახადის გადამხდელი არ ეთანხმება საშემოსავლო გადასახადის დარიცხვას.

 

ფაქტობრივი გარემოებები

შესამოწმებელი პერიოდის სასტარტო ნაშთების სისწორის/რეალობის დადგენის მიზნით, შემოსავლების სამსახურის გადასახადების ადმინისტრირების საინფორმაციო სისტემაში არსებულ მონაცემებზე დაყრდნობით განხორციელდა ანალიტიკური პროცედურები. ამასთან, დებიტორული და კრედიტორული დავალიანებების, საბანკო ანგარიშებზე ფულის ნაშთების გათვალისწინებით დაზუსტდა 2022 წლის პირველი იანვრის მდგომარეობით კომპანიის აქტივების ოდენობა, რაც განსხვავდება წარდგენილ ბრუნვით უწყისში დაფიქსირებული ნაშთისგან. შემოწმების მიერ გადამხდელისგან მოთხოვნილ იქნა სასტარტო ნაშთების ფორმირებასთან დაკავშირებული ინფორმაცია, რაც გადამხდელის მიერ მიწოდებული არ ყოფილა. შესაბამისად, შემოწმებით დადგინდა დამფუძნებლის შენატანის ოდენობა, რაც განსხვავდება დამფუძნებლის მიერ შესამოწმებელ პერიოდში საწარმოდან გატანილი თანხის ოდენობისგან. შესაბამისად, ფულის ნაშთში გამოვლენილი სხვაობა ჩაითვალა დირექტორზე გაცემულ ხელფასად.

 

გადაწყვეტილება

სამართლებრივი ნორმების და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივარი დაუსაბუთებელია და არ უნდა დაკმაყოფილდეს.

 

დასაბუთება

შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 73(9); 101; 154