გადაწყვეტილება №26121/2/2025
📜 საკანონმდებლო ნორმები
📄 სრული ტექსტი
№26121/2/2025
24 დეკემბერი 2025
გ ა დ ა წ ყ ვ ე ტ ი ლ ე ბ ა
მომჩივანი: შპს „------“ (ს/ნ -----)
მოპასუხე: აუდიტის დეპარტამენტი
საქართველოს ფინანსთა სამინისტროსთან არსებულმა დავების განხილვის საბჭომ, 27.11.2025 წელს განიხილა და მიიღო გადაწყვეტილება შპს ,,-----“-ს 3.11.2025 წელს რეგისტრირებულ საჩივარზე (რეგისტრაციის №26121/2/2025).
დავის საგანი:
შემოსავლების სამსახურის 5.11.2024 წლის №23591 ბრძანების აღსრულების შედეგები.
გასაჩივრებული გადაწყვეტილება:
1. აუდიტის დეპარტამენტის 8.07.2025 წლის №007-152 საგადასახადო მოთხოვნა;
2. შემოსავლების სამსახურის 23.09.2025 წლის №20739 ბრძანება.
დარიცხული თანხა: 86 063,62 ლარი.
მათ შორის:
გადასახადი - 43 118
დღგ - 23 709
საშემოსავლო გადასახადი - 18 243
ქონების გადასახადი - 1 166
ჯარიმა - 21 683
საურავი - 21 262,62
ფაქტების აღწერა/დარიცხვის საფუძვლები
საწარმოს საქმიანობაა საბითუმო და საცალო ვაჭრობა ქვიშა-ხრეშით და სხვადასხვა სამშენებლო მასალით.
აუდიტის დეპარტამენტის 25.08.2020 წლის საგადასახდო შემოწმების აქტის საფუძველზე შემოწმებულია მომჩივნის საქმიანობის 7.12.2017 წლიდან 1.05.2020 წლამდე საანგარიშო პერიოდი. შემოწმების აქტიდან დგინდება, რომ სადავო დარიცხვა გამოწვეულია შემდეგი გარემოებებით:
გადასახადის გადამხდელი შესამოწმებელ პერიოდში არ აწარმოებდა ბუღალტრულ აღრიცხვას კანონმდებლობით დადგენილი წესით. ამასთან, გადასახადის გადამხდელს შესამოწმებელ პერიოდში გაცემული არ აქვს დივიდენდი და გადახდილი აქვს მცირე ოდენობის ხელფასი. შესამოწმებელ პერიოდში არსებული პირველადი დოკუმენტების და ერთიან ელექტრონულ ბაზებზე დაყრდნობით მოხდა შეძენის დამადასტურებელი დოკუმენტების დაკავშირება რეალიზაციის დოკუმენტებთან. თითოეული დასახელების პროდუქციას მიენიჭა კონკრეტული კატეგორია და განისაზღვრა დოკუმენტური ფასნამატი. ანალიზისთვის გამოყენებული იქნა საკონტროლო შესყიდვის ოქმში დაფიქსირებული ფასებიც. ფასნამატი განისაზღვრა გადამხდელის დოკუმენტური ფასნამატიდან გამომდინარე. მიღებულ შედეგებსა და გადამხდელის მიერ დეკლარირებულ მონაცემებს შორის 2017-2019 წლებში გამოვლინდა სხვაობა. ამდენად, საწარმოს შესაბამისი პერიოდების მიხედვით დამატებით დარიცხულ გადასახადთან ერთად დაეკისრა ჯარიმა საგადასახადო კოდექსის 275-ე მუხლის მე-2 ნაწილის მიხედვით. ამასთან, არაპირდაპირი მეთოდით მიღებული შემოსავალი დოკუმენტურად დადასტურებული ხარჯების გათვალისწინებით, განხილულ იქნა ანგარიშვალდებული პირისთვის გადახდილ ხელფასად და დაიბეგრა გადახდის წყაროსთან. ამასთან, გადამხდელს დაეკისრა ჯარიმა ამავე კოდექსის 275-ე მუხლის მიხედვით.
გადასახადის გადამხდელს ასევე დაეკისრა საგადასახადო კოდექსის 291-ე მუხლით განსაზღვრული ჯარიმა, სულ 2 900 ლარის ოდენობით.
შემოწმების აქტის საფუძველზე გადასახადის გადამხდელს წარედგინა აუდიტის დეპარატმენტის 15.09.2020 წლის №007-334 საგადასახადო მოთხოვნა, რაც გასაჩივრდა შემოსავლების სამსახურში. შემოსავლების სამსახურის 30.12.2020 წლის №39791 ბრძანებით საჩივარი ნაწილობრივ დაკმაყოფილდა:
არაპირდაპირი მეთოდის გამოყენებით განსაზღვრული ფასნამატის დაზუსტების მიზნით, გადასახადის გადამხდელს მიეცა წინადადება ამ ბრძანების ჩაბარებიდან 15 დღის ვადაში, აუდიტის დეპარტამენტისთვის წარედგინა შესაბამისი სააღრიცხვო დოკუმენტაცია (მათ შორის, ინფორმაცია ცხრილის სახით საქონლის სახეობების/ჯგუფების მიხედვით ფასნამატის შესახებ);
აუდიტის დეპარტამენტს დაევალა, წარდგენილი მტკიცებულების გადასახადის გადამხდელის მონაწილეობით შესწავლა და სათანადო საფუძვლების არსებობის შემთხვევაში, საგადასახადო შემოწმებით განსაზღვრული საგადასახადო ვალდებულებების კორექტირება (შემცირება) და შესწავლის შედეგების გათვალისწინებით განეხორციელებინა დეკლარირებულ და შემოწმებით გამოვლენილ მონაცემებს შორის სხვაობის ხელფასად განხილვის საფუძვლით დარიცხული თანხების კორექტირება (შემცირება);
საგადასახადო კოდექსის 291-ე მუხლის საფუძველზე განსაზღვრული ჯარიმები განხილულ იქნა ერთ სამართალდარღვევად და შეფარდებული ფულადი ჯარიმის ნაცვლად გამოყენებული იქნეს გაფრთხილება;
დანარჩენ ნაწილში საჩივარი არ დაკმაყოფილდა.
შემოსავლების სამსახურის 30.12.2020 წლის №39791 ბრძანების აღსრულების შედეგად, აუდიტის დეპარტამენტის 24.03.2022 წლის დასკვნის საფუძველზე, დამატებით დარიცხული თანხები შემცირდა, რაზეც გადასახადის გადამხდელს წარედგინა 13.04.2022 წლის №007-85 კორექტირებული საგადასახადო მოთხოვნა, რაც გასაჩივრდა შემოსავლების სამსახურში.
შემოსავლების სამსახურის 16.09.2022 წლის №23890 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.
საბჭოს 11.11.2022 წლის №17942/2/2022 გადაწყვეტილებით საჩივარი მომჩივნის მონაწილეობით ხელახლა განსახილველად დაუბრუნდა შემოსავლების სამსახურს.
შემოსავლების სამსახურის 20.06.2023 წლის №13961 ბრძანებით საჩივარი დაკმაყოფილდა ნაწილობრივ. შემოსავლების სამსახურის 30.12.2020 წლის №39791 ბრძანების სრულყოფილად აღსრულების მიზნით, დაევალა აუდიტის დეპარტამენტს გადასახადის გადამხდელის მონაწილეობით, შეისწავლოს სადავო საკითხი და შესწავლის შედეგებიდან გამომდინარე, სათანადო საფუძვლების არსებობის შემთხვევაში, განახორციელოს საგადასახადო ვალდებულებების შესაბამისი კორექტირება (შემცირება). დანარჩენ ნაწილში საჩივარი არ დაკმაყოფილდა.
შემოსავლების სამსახურის 20.06.2023 წლის №13961 ბრძანების აღსრულების მიზნით აუდიტის დეპარტამენტმა გამოსცა 9.08.2024 წლის დასკვნა.
გადასახადო შემოწმების შედეგების გადაანგარიშების თაობაზე გამოცემული დასკვნის მიხედვით დგინდება, რომ შემოსავლების სამსახურის ბრძანების მიხედვით, გადამხდელმა დამატებით წარმოადგინა ფასნამატთან დაკავშირებული ცხრილი შესაბამისი მტკიცებულებებით. კერძოდ, გადამხდელის მიერ იდენტიფიცირებული და დაზუსტებული იქნა შემოწმების მიერ დაკავშირებული საქონელი კატეგორიების მიხედვით და დაზუსტდა გარკვეული საქონლის თვითღირებულებები, რამაც გამოიწვია საშუალო შეწონილი ფასნამატის შემცირება. შედეგად, საგადასახადო შემოწმების აქტით დარიცხული თანხები დღგ-სა და საშემოსავლო გადასახადის ნაწილში დაექვემდებარა შემცირებას.
დასკვნის საფუძველზე გადასახადის გადამხდელს წარედგინა აუდიტის დეპარტამენტის 23.08.2024 წლის №007-228 საგადასახადო მოთხოვნა, რაც გასაჩივრდა შემოსავლების სამსახურში. შემოსავლების სამსახურის 5.11.2024 წლის №23591 ბრძანებით საჩივარი ნაწილობრივ დაკმაყოფილდა:
გადასახადის გადამხდელს მიეცა წინადადება, ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს საჩივარში მითითებული არგუმენტაციის (გაწეული ხარჯის) დოკუმენტურად დადასტურებული მტკიცებულებები;
განსაზღვრულ ვადაში შესაბამისი მტკიცებულებების წარდგენის შემთხვევაში, დაევალა აუდიტის დეპარტამენტს შეისწავლოს/გამოიკვლიოს წარდგენილი მტკიცებულებები და შესწავლის შედეგების გათვალისწინებით, სათანადო საფუძვლის არსებობის შემთხვევაში, განახორციელოს საგადასახადო ვალდებულებების შესაბამისი კორექტირება (შემცირება);
დანარჩენ ნაწილში საჩივარი არ დაკმაყოფილდა.
შემოსავლების სამსახურის 5.11.2024 წლის №23591 ბრძანების აღსრულების მიზნით გამოიცა აუდიტის დეპარტამენტის 30.06.2025 წლის დასკვნა.
გადასახადო შემოწმების შედეგების გადაანგარიშების თაობაზე გამოცემული დასკვნის მიხედვით დგინდება, რომ შემოსავლების სამსახურის ბრძანების შესაბამისად, გადამხდელმა გადაანგარიშების ეტაპზე წარმოადგინა განკარგვადი თანხის გაანგარიშებასთან დაკავშირებით დოკუმენტაცია. კერძოდ, შესყიდვის აქტით შეძენილი ავტომანქანის გადახდის დოკუმენტი. ამასთანავე, გადამხდელის მიერ მოწოდებულ იქნა კრედიტორულ დავალიანებასთან დაკავშირებით დამოწმებული ურთიერთშედარების აქტები. აღნიშნული დოკუმენტების შესწავლის შედეგად, საგადასახადო შემოწმების აქტით დარიცხული თანხები საშემოსავლო გადასახადის ნაწილში დაექვემდებარა შემცირებას.
ასევე, შემოწმების მიერ ფასნამატის გაანგარიშების დროს გათვალისწინებულ იქნა მზა პროდუქციის თვითღირებულება. აღნიშნულ ნაწილში დარიცხული თანხები არ დაექვემდებარა გადაანგარიშებას.
დასკვნის საფუძველზე გადასახადის გადამხდელს წარედგინა აუდიტის დეპარტამენტის 8.07.2025 წლის №007-152 საგადასახადო მოთხოვნა, რაც გასაჩივრდა შემოსავლების სამსახურში. შემოსავლების სამსახურის 23.09.2025 წლის №20739 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.
შემოსავლების სამსახურის გადაწყვეტილების შინაარსი
შემოსავლების სამსახური მიუთითებს საგადასახადო კოდექსის 302-ე მუხლის მე-6 ნაწილზე, 304-ე მუხლის 21 ნაწილზე, ფაქტობრივ გარემოებებზე და მიიჩნევს, რომ შემოსავლების სამსახურის გადაწყვეტილების აღსრულება განხორციელებულია საქმისთვის არსებითი მნიშვნელობის მქონე ყველა გარემოებების გამოკვლევის/შესწავლის საფუძველზე, გასაჩივრებული ადმინისტრაციული აქტის შინაარსი შეესაბამება დავის განხილვისას მიღებულ გადაწყვეტილებას და არ არსებობს წარმოდგენილი საჩივრის დაკმაყოფილების საფუძველი.
მომჩივნის არგუმენტაცია
წარდგენილი იქნა სააღრიცხვო მასალები და დოკუმენტები. მათ შორის გაანგარიშების ცხრილი და ამ მასალების საფუძველზე დასარიცხი თანხების ანალიზი. მიუხედავად იმისა, რომ წარდგენილი მასალები და ანგარიში ემყარებოდა პირველად დოკუმენტებს, კერძოდ, გაანგარიშებაში შეიტანა შესწორება შემდეგი სახით, გაანგარიშებაში შეტანილი იყო მზა პროდუქცია შესაბამისი კალკულაციით გაანგარიშებული თვითღირებულებით (მხოლოდ მასალების თვითღირებულება), შემმოწმებელმა მზა პროდუქცია შეიტანა ,,0” თვითღირებულებით, ე.ი. მზა პროდუქციით გაზარდა რეალიზაცია, მაგრამ მისი თვითღირებულება ხარჯებში არ გაითვალისწინა. რაც აბსურდია და ყოველგვარ მსჯელობას და ლოგიკას მოკლებულია. შემოსავალს დაამატა ამ თვითღირებულების მასალების რეალიზაცია, და ისევ ,,მონდომებით” გაზარდა დასაბეგრი ბაზა (გაორებული მასალების რეალიზაციით). ე.ი ფასნამატის გაანგარიშებაში არის უხეში მათემატიკური შეცდომა, რომელიც კვლავ არ შეასწორა აუდიტორმა, და მოხდა ერთიდაიგივე მარაგების გაორებულად დაბეგვრა, როგორც მარაგის საცალო რეალიზაცია და იგივე მარაგით წარმოებული მზა პროდუქციის რეალიზაცია. დირექტორის ხელფასად დაბეგრილი ფულის ნაშთის გაანგარიშების ნაწილში არ გაიზიარა ფულის გასავალი შესაბამისი გადახდის და ხარჯის დამადასტურებელი დოკუმენტების ყველა დოკუმენტი. შემმოწმებლის მიერ დირექტორის ხელფასის სახით განაცემის ოდენობის გაანგარიშება მოხდა მხოლოდ არაპირდაპირი მეთოდით გაზრდილი შემოსავლის პროპორციულად. შემოწმების მიერ არაპირდაპირი მეთოდით დადგენილ ფულის ნაშთში, გონივრული ნაშთი გათვალისწინებული არ არის. აუდიტორებს შემოსავლების სამსახურის ბრძანების შესაბამისად არ უხელმძღვანელიათ „ცალკეულ შემთხვევებში პირის საგადასახადო ვალდებულებების განსაზღვრის მიზნით მეთოდური მითითებების დამტკიცების თაობაზე“ შემოსავლების სამსახურის უფროსის 2019 წლის 8 ივლისის №22708 ბრძანებით დამტკიცებული დანართი №9-ის შესაბამისად.
დავების განხილვის საბჭო
მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:
შემოსავლების სამსახურის 5.11.2024 წლის №23591 ბრძანებით საჩივარი ნაწილობრივ დაკმაყოფილდა:
გადასახადის გადამხდელს მიეცა წინადადება, ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს საჩივარში მითითებული არგუმენტაციის (გაწეული ხარჯის) დოკუმენტურად დადასტურებული მტკიცებულებები;
განსაზღვრულ ვადაში შესაბამისი მტკიცებულებების წარდგენის შემთხვევაში, დაევალა აუდიტის დეპარტამენტს შეისწავლოს/გამოიკვლიოს წარდგენილი მტკიცებულებები და შესწავლის შედეგების გათვალისწინებით, სათანადო საფუძვლის არსებობის შემთხვევაში, განახორციელოს საგადასახადო ვალდებულებების შესაბამისი კორექტირება (შემცირება);
დანარჩენ ნაწილში საჩივარი არ დაკმაყოფილდა.
შემოსავლების სამსახურის 5.11.2024 წლის №23591 ბრძანების აღსრულების მიზნით გამოიცა აუდიტის დეპარტამენტის 30.06.2025 წლის დასკვნა.
გადასახადო შემოწმების შედეგების გადაანგარიშების თაობაზე გამოცემული დასკვნის მიხედვით დგინდება, რომ შემოსავლების სამსახურის ბრძანების შესაბამისად, გადამხდელმა გადაანგარიშების ეტაპზე წარმოადგინა განკარგვადი თანხის გაანგარიშებასთან დაკავშირებით დოკუმენტაცია. კერძოდ, შესყიდვის აქტით შეძენილი ავტომანქანის გადახდის დოკუმენტი. ამასთანავე, გადამხდელის მიერ მოწოდებულ იქნა კრედიტორულ დავალიანებასთან დაკავშირებით დამოწმებული ურთიერთშედარების აქტები. აღნიშნული დოკუმენტების შესწავლის შედეგად, საგადასახადო შემოწმების აქტით დარიცხული თანხები საშემოსავლო გადასახადის ნაწილში დაექვემდებარა შემცირებას.
ასევე, შემოწმების მიერ ფასნამატის გაანგარიშების დროს გათვალისწინებულ იქნა მზა პროდუქციის თვითღირებულება. აღნიშნულ ნაწილში დარიცხული თანხები არ დაექვემდებარა გადაანგარიშებას.
საბჭოს სხდომაზე აუდიტის დეპარტამენტის წარმომადგენელმა განმარტა, რომ გადასახადის გადამხდელის მიერ წარდგენილ იქნა შესყიდვის აქტით შეძენილი ავტომანქანის გადახდის დოკუმენტი და ასევე კრედიტორულ დავალიანებასთან დაკავშირებით დამოწმებული ურთიერთშედარების აქტები, რომლებიც შემოწმების მიერ გათვალისწინებულ იქნა გადაანგარიშების ეტაპზე. ამასთან, შემოწმების მიერ ფასნამატის გაანგარიშების დროს გათვალისწინებულ იქნა მზა პროდუქციის თვითღირებულება, შესაბამისად, აღნიშნულ ნაწილში დარიცხული თანხები გადაანგარიშებას არ დაექვემდებარა.
მომჩივანს არ წარმოუდგენია რაიმე მტკიცებულება, რომელიც შეცვლიდა საგადასახადო შემოწმების აქტით დადგენილ ფაქტობრივ გარემოებებს და გახდებოდა დარიცხული თანხების შემცირების საფუძველი.
მხარეთა არგუმენტების, სადავო საქმეზე არსებული მასალების შესწავლის/შეფასების და განხორციელებული გადაანგარიშების შედეგებზე დაყრდნობით, საბჭოს მიაჩნია, რომ აუდიტის დეპარტამენტის მიერ, შემოსავლების სამსახურის 5.11.2024 წლის №23591 ბრძანება აღსრულებულია ამავე ბრძანებით მიღებული გადაწყვეტილების შესაბამისად და არ არსებობს საჩივრის დაკმაყოფილების საფუძველი.
საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:
1. საჩივარი არ დაკმაყოფილდეს;
2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.
სადავო საკითხი
შემოსავლების სამსახურის 5.11.2024 წლის №23591 ბრძანების აღსრულების შედეგები.
ფაქტობრივი გარემოებები
საწარმოს საქმიანობაა საბითუმო და საცალო ვაჭრობა ქვიშა-ხრეშით და სხვადასხვა სამშენებლო მასალით.
გადასახადო შემოწმების შედეგების გადაანგარიშების თაობაზე გამოცემული დასკვნის მიხედვით დგინდება, რომ შემოსავლების სამსახურის ბრძანების შესაბამისად, გადამხდელმა გადაანგარიშების ეტაპზე წარმოადგინა განკარგვადი თანხის გაანგარიშებასთან დაკავშირებით დოკუმენტაცია. კერძოდ, შესყიდვის აქტით შეძენილი ავტომანქანის გადახდის დოკუმენტი. ამასთანავე, გადამხდელის მიერ მოწოდებულ იქნა კრედიტორულ დავალიანებასთან დაკავშირებით დამოწმებული ურთიერთშედარების აქტები. აღნიშნული დოკუმენტების შესწავლის შედეგად, საგადასახადო შემოწმების აქტით დარიცხული თანხები საშემოსავლო გადასახადის ნაწილში დაექვემდებარა შემცირებას. ასევე, შემოწმების მიერ ფასნამატის გაანგარიშების დროს გათვალისწინებულ იქნა მზა პროდუქციის თვითღირებულება. აღნიშნულ ნაწილში დარიცხული თანხები არ დაექვემდებარა გადაანგარიშებას.
გადაწყვეტილება
საბჭოს მიაჩნია, რომ არ არსებობს საჩივრის დაკმაყოფილების საფუძველი.
დასაბუთება
საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს; 275(2); 291