ბრძანება N 8227

N 8227

07 აპრილი 2026

ბ რ ძ ა ნ ე ბ ა

 

შპს „-------“ (ს/ნ -------)

(მის.: -------, -------)

2026 წლის 16 თებერვლის საჩივრის

ნაწილობრივ დაკმაყოფილების თაობაზე

 

შემოსავლების სამსახურმა დავების განხილვის საბჭოს 2026 წლის 26 მარტის და 2 აპრილის სხდომებზე (ოქმები №26 და №29) განიხილა შპს „-------“ (ყოფ. შპს „-------“) (ს/ნ 448416973) 2026 წლის 16 თებერვლის №24772/21 საჩივარი, შემოსავლების სამსახურის აუდიტის დეპარტამენტის 2026 წლის 30 იანვრის №081-2 კორექტირებულ საგადასახადო მოთხოვნასთან დაკავშირებით.

 

სადავო საკითხი საგადასახადო შემოწმების გადაანგარიშების შედეგებთან დაკავშირებით:

გადასახადის გადამხდელი არ ეთანხმება საშემოსავლო გადასახადის დარიცხვას, კერძოდ, შემოწმების მიერ კომპანიის მიმართ არსებული დებიტორული დავალიანების მიღებულად ჩათვლას და აღნიშნული თანხის დირექტორზე გაცემულ ხელფასად განხილვას. განმარტავს, რომ შპს „-------“ გადამხდელის მიმართ აღნიშნული დებიტორული დავალიანება დღემდე არ აქვს ანაზღაურებული. აცხადებს, რომ შემოწმება დაეყრდნო შპს „-------“ მიერ წარდგენილ სალაროს გასავლის ორდერს, რომლის ნამდვილობა საეჭვოა, რადგან გადამხდელისთვის ცნობილი არ იყო აღნიშნული დოკუმენტის არსებობის შესახებ. ითხოვს დარიცხული თანხების გაუქმებას.

 

ფაქტობრივი გარემოებები:

საქმეში არსებული მასალებით დგინდება, რომ შემოსავლების სამსახურის 2025 წლის 23 სექტემბრის №20738 ბრძანებით ნაწილობრივ დაკმაყოფილდა შპს „-------“ (ყოფ. შპს „-------“) (ს/ნ -------) საჩივარი. კერძოდ, ბრძანების სარეზოლუციო ნაწილის მიხედვით:

„1. შპს „-------“ (ს/ნ -------) საჩივარი დაკმაყოფილდეს ნაწილობრივ;

2. პირველ სადავო საკითხთან დაკავშირებით:

ა) გადასახადის გადამხდელს მიეცეს წინადადება ამ ბრძანების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს საჩივარში მითითებული არგუმენტაციის დოკუმენტურად დადასტურებული მტკიცებულებები;

ბ) დაევალოს აუდიტის დეპარტამენტს ყოველმხრივ შეისწავლოს/გამოიკვლიოს წარდგენილი მტკიცებულებები (მათ შორის, დავის წარმოების პროცესში წარდგენილი), დაადგინოს საქმის ირგვლივ არსებული ფაქტობრივი გარემოებები, მათ შორის მესამე მხარისგან (ოპერაციის მონაწილე მხარისგან) გამოითხოვოს ინფორმაცია/დოკუმენტაცია და შესწავლის შედეგების გათვალისწინებით, სათანადო საფუძვლის არსებობის შემთხვევაში, განახორციელოს საგადასახადო ვალდებულებების კორექტირება (შემცირება);

3. დანარჩენ ნაწილში საჩივარი არ დაკმაყოფილდეს.“

შემოსავლების სამსახურის 2025 წლის 23 სექტემბრის №20738 ბრძანების აღსრულების მიზნით, აუდიტის დეპარტამენტმა გამოსცა 2026 წლის 28 იანვრის დასკვნა საგადასახადო შემოწმების შედეგების გადაანგარიშებაზე, რომლის მიხედვით, გადასახადის გადამხდელს არ შეუმცირდა დარიცხული თანხები. აღნიშნულზე, გადასახადის გადამხდელს წარედგინა 2026 წლის 30 იანვრის №081-2 კორექტირებული საგადასახადო მოთხოვნა.

 

საგადასახადო შემოწმების შედეგების გადაანგარიშების თაობაზე გამოცემული დასკვნის მიხედვით დგინდება შემდეგი:

შემოწმებამ შპს „-------“ მიღებული მასალების მიხედვით (2022 წლის 17 ოქტომბრის სალაროს გასავლის ორდერი, ასევე, საბუღალტრო პროგრამიდან 3110 ანგარიშის ამონაწერი) დაადგინა, რომ გადამხდელს 275 366 ლარი (დღგ-ის ჩათვლით) მიღებული აქვს 2022 წლის 17 ოქტომბერს. ამასთან, გადამხდელმა დამატებით წარადგინა ------- საქალაქო სასამართლოს 2025 წლის 25 ივლისის განჩინება სარჩელის უზრუნველყოფის შესახებ და იმავე თარიღის სააღსრულებო ფურცელი, რომლის მიხედვით გადამხდელის მიერ წარდგენილი შუამდგომლობა დაკმაყოფილდა ნაწილობრივ და სარჩელის უზრუნველყოფის მიზნით ყადაღა დაედო შპს „-------“ საბანკო ანგარიშებს საქართველოში მოქმედ ყველა საბანკო დაწესებულებაში 275 389 ლარის ფარგლებში. იმის გათვალისწინებით, რომ ამ ეტაპზე გადამხდელის მიერ შემოწმებისთვის არ არის წარმოდგენილი არგუმენტირებული მტკიცებულება, რაც დაადასტურებდა იმ ფაქტს, რომ შპს „-------“ მიერ თანხა არ არის გადახდილი, შემოწმების აქტით დარიცხული თანხები კორექტირებას (შემცირებას) არ დაექვემდებარა.

 

შემოსავლების სამსახურმა განიხილა წარმოდგენილი საჩივარი და მიიჩნია, რომ გადასახადის გადამხდელის მოთხოვნა უნდა დაკმაყოფილდეს ნაწილობრივ შემდეგ გარემოებათა გამო:

საქართველოს საგადასახადო კოდექსის 302-ე მუხლის მე-6 ნაწილის თანახმად, დავის განმხილველ ორგანოებს უფლება აქვთ, საჩივარი განიხილონ დისტანციურად, ტექნიკურ საშუალებათა გამოყენებით. მათ ასევე უფლება აქვთ, საჩივარი განიხილონ მომჩივნის დაუსწრებლად, თუ საქმეში არსებული მასალებიდან სრულად დგინდება დავის საგანთან დაკავშირებული ფაქტობრივი გარემოებები.

 

სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.

საქართველოს საგადასახადო კოდექსის 61-ე მუხლის მე-3 ნაწილის მიხედვით, საგადასახადო ორგანო უფლებამოსილია პირს დაარიცხოს გადასახადი თავის ხელთ არსებული ინფორმაციის საფუძველზე, თუ პირი მას არ წარუდგენს გადასახადის დასარიცხად საჭირო ინფორმაციას.

საქართველოს საგადასახადო კოდექსის 73-ე მუხლის მე-9 ნაწილის „ბ“ ქვეპუნქტის თანახმად, საგადასახადო ვალდებულების განსაზღვრის მიზნით საგადასახადო ორგანოს უფლება აქვს სამეურნეო ოპერაციის ფორმისა და შინაარსის გათვალისწინებით შეცვალოს მისი კვალიფიკაცია, თუ ოპერაციის ფორმა არ შეესაბამება მის შინაარსს. ამავე მუხლის მე-4 ნაწილის თანახმად, თუ რაიმე თანხა გამოიყენება კონკრეტული პირის ინტერესებისათვის, ჩაითვლება, რომ ეს თანხა მიღებული აქვს ამ პირს.

საქართველოს საგადასახადო კოდექსის 101-ე მუხლის პირველი ნაწილის თანახმად, ხელფასის სახით მიღებულ შემოსავლებს განეკუთვნება ფიზიკური პირის მიერ დაქირავებით მუშაობის შედეგად მიღებული ნებისმიერი საზღაური ან სარგებელი, მათ შორის, წინა სამუშაო ადგილიდან პენსიის ან სხვა სახით მიღებული შემოსავალი, ან შემოსავალი მომავალი სამუშაო ადგილიდან.

საქართველოს საგადასახადო კოდექსის მე-12 მუხლის პირველი ნაწილის „გ“ ქვეპუნქტის თანახმად, დაქირავებით მუშაობად ითვლება ფიზიკური პირის მიერ საწარმოს ან ორგანიზაციის ხელმძღვანელად (დირექტორად) ყოფნა ან ხელმძღვანელის (დირექტორის) მოვალეობის შესრულება.

საქართველოს საგადასახადო კოდექსის 154-ე მუხლის პირველი ნაწილის „ა“ ქვეპუნქტის თანახმად, გადახდის წყაროსთან გადასახადის დაკავება ევალება საგადასახადო აგენტს, რომელიც არის იურიდიული პირი, საწარმო/ორგანიზაცია ან მეწარმე ფიზიკური პირი, რომელიც დაქირავებულს უხდის ხელფასს.

ამავე მუხლის მე-2 ნაწილის „ა“ და „ბ“ ქვეპუნქტების თანახმად:

ა) გადასახადის დაკავებისა და ბიუჯეტში მისი გადარიცხვისათვის პასუხისმგებლობა ეკისრება შემოსავლის გადამხდელს;

ბ) გადასახადის თანხის დაუკავებლობის შემთხვევაში შემოსავლის გადამხდელი ვალდებულია ბიუჯეტში შეიტანოს დაუკავებელი გადასახადის თანხა ფაქტობრივად გადახდილი ანაზღაურების შესაბამისად და მასთან დაკავშირებული სანქციები.

საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.

საქართველოს ზოგადი ადმინისტრაციული კოდექსის 96-ე მუხლის თანახმად, ადმინისტრაციული ორგანო ვალდებულია ადმინისტრაციული წარმოებისას გამოიკვლიოს საქმისათვის ყველა მნიშვნელოვანი გარემოება და გადაწყვეტილება მიიღოს ამ გარემოებათა შეფასებისა და ურთიერთშეჯერების საფუძველზე.

შემოსავლების სამსახური ყურადღებას ამახვილებს გადასახადის გადამხდელის მიერ საჩივარში წარმოდგენილ არგუმენტზე, რომლის მიხედვით, შპს „-------“ გადასახადის გადამხდელის მიმართ უფიქსირდება დებიტორული დავალიანება, რომელიც დღესაც არ არის ანაზღაურებული. გადამხდელი ეჭვქვეშ აყენებს შპს „-------“ მიერ შემოწმებისთვის წარდგენილ სალაროს გასავლის ორდერის ნამდვილობას, რადგან აღნიშნული დოკუმენტის არსებობის შესახებ ინფორმაცია არ ჰქონდა და ასევე, უცნობია მასზე ხელმომწერი პირის ვინაობა. გადამხდელი შპს „-------“ თანხის მიუღებლობის ფაქტის დასადასტურებლად აცხადებს, რომ სასამართლოში შეტანილი აქვს სარჩელი შპს „-------“ წინააღმდეგ თანხის გადახდევინების მიზნით, ხოლო საჩივარზე დანართის სახით წარმოდგენილი აქვს ------- საქალაქო სასამართლოს სამოქალაქო საქმეთა კოლეგიის განჩინება სარჩელის უზრუნველყოფის სახით შპს „-------“ საბანკო ანგარიშებზე ყადაღის დადებასთან დაკავშირებით. ამასთან, გადამხდელი განმარტავს, რომ შპს „-------“ გაეგზავნა სარჩელი, თუმცა, დადგენილ ვადაში არ წარმოუდგენია შესაგებელი, შესაბამისად, გადამხდელმა სასამართლოში წარადგინა განცხადება დაუსწრებელი გადაწყვეტილების მიღების მოთხოვნის შესახებ. აღნიშნულიდან გამომდინარე, მიაჩნია, რომ სასამართლოს მიერ მიღებული გადაწყვეტილების გათვალისწინებით უნდა მოხდეს შემოსავლების სამსახურის ბრძანების აღსრულება.

საქმეში არსებული მასალების, დადგენილი ფაქტობრივი გარემოებების, გადასახადის გადამხდელის არგუმენტაციისა და საკანონმდებლო ნორმების გათვალისწინებით, შემოსავლების სამსახური მიიჩნევს, რომ აუდიტის დეპარტამენტის მიერ არ არის აღსრულებული შემოსავლების სამსახურის 2025 წლის 23 სექტემბრის №20738 ბრძანება, კერძოდ, შემოსავლების სამსახური მიუთითებს, რომ ვინაიდან, ------- საქალაქო სასამართლოს სამოქალაქო საქმეთა კოლეგიაში მიმდინარეობს დავა დებიტორულ დავალიანებასთან დაკავშირებით შპს „-------“ (ყოფ. შპს „-------“) და შპს „-------“ შორის, ხოლო საბოლოო გადაწყვეტილება მიღებული არ არის, სადავო საკითხი საჭიროებს დამატებით შესწავლას. ამდენად, უნდა დაევალოს აუდიტის დეპარტამენტს, გადასახადის გადამხდელის არგუმენტების გათვალისწინებით, ყოველმხრივ შეისწავლოს/გამოიკვლიოს სადავო საკითხი და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება).

 

საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ :

 

1. შპს „-------“ (ყოფ. შპს „-------“) (ს/ნ -------) საჩივარი დაკმაყოფილდეს ნაწილობრივ;

2. სადავო საკითხთან დაკავშირებით, დაევალოს აუდიტის დეპარტამენტს, გადასახადის გადამხდელის არგუმენტების გათვალისწინებით, ყოველმხრივ შეისწავლოს/გამოიკვლიოს სადავო საკითხი და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება);

3. დანარჩენ ნაწილში საჩივარი არ დაკმაყოფილდეს;

4. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. №16) ან სასამართლოში (მის.: ქ. ქუთაისი, ვიქტორ კუპრაძის ქ. №11), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.

 

სადავო საკითხები:

გადასახადის გადამხდელი არ ეთანხმება საშემოსავლო გადასახადის დარიცხვას.

 

ფაქტობრივი გარემოებები

შემოსავლების სამსახური ყურადღებას ამახვილებს გადასახადის გადამხდელის მიერ საჩივარში წარმოდგენილ არგუმენტზე, რომლის მიხედვით, შპს ------- მომჩივანის მიმართ უფიქსირდება დებიტორული დავალიანება, რომელიც დღესაც არ არის ანაზღაურებული. გადამხდელი ეჭვქვეშ აყენებს შპს ------- მიერ შემოწმებისთვის წარდგენილ სალაროს გასავლის ორდერის ნამდვილობას, რადგან აღნიშნული დოკუმენტის არსებობის შესახებ ინფორმაცია არ ჰქონდა და ასევე, უცნობია მასზე ხელმომწერი პირის ვინაობა. გადამხდელი თანხის მიუღებლობის ფაქტის დასადასტურებლად აცხადებს, რომ სასამართლოში შეტანილი აქვს სარჩელი შპს-ს წინააღმდეგ თანხის გადახდევინების მიზნით, ხოლო საჩივარზე დანართის სახით წარმოდგენილი აქვს საქალაქო სასამართლოს სამოქალაქო საქმეთა კოლეგიის განჩინება სარჩელის უზრუნველყოფის სახით შპს-ს საბანკო ანგარიშებზე ყადაღის დადებასთან დაკავშირებით. ამასთან, გადამხდელი განმარტავს, რომ შპს „-------“ გაეგზავნა სარჩელი, თუმცა, დადგენილ ვადაში არ წარმოუდგენია შესაგებელი, შესაბამისად, გადამხდელმა სასამართლოში წარადგინა განცხადება დაუსწრებელი გადაწყვეტილების მიღების მოთხოვნის შესახებ. აღნიშნულიდან გამომდინარე, მიაჩნია, რომ სასამართლოს მიერ მიღებული გადაწყვეტილების გათვალისწინებით უნდა მოხდეს შემოსავლების სამსახურის ბრძანების აღსრულება.

 

გადაწყვეტილება

საქმეში არსებული მასალების, დადგენილი ფაქტობრივი გარემოებების, გადასახადის გადამხდელის არგუმენტაციისა და საკანონმდებლო ნორმების გათვალისწინებით, შემოსავლების სამსახური მიიჩნევს, რომ აუდიტის დეპარტამენტის მიერ არ არის აღსრულებული შემოსავლების სამსახურის 2025 წლის 23 სექტემბრის №20738 ბრძანება, სადავო საკითხი საჭიროებს დამატებით შესწავლას. ამდენად, უნდა დაევალოს აუდიტის დეპარტამენტს, გადასახადის გადამხდელის არგუმენტების გათვალისწინებით, ყოველმხრივ შეისწავლოს/გამოიკვლიოს სადავო საკითხი და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება).

 

დასაბუთება

შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 73(9); 101; 154;