გადაწყვეტილება №26793/2/2026
📜 საკანონმდებლო ნორმები
📄 სრული ტექსტი
№26793/2/2026
17 აპრილი 2026
გ ა დ ა წ ყ ვ ე ტ ი ლ ე ბ ა
მომჩივანი: „-------“ (ს/ნ„-------“)
მოპასუხე: აუდიტის დეპარტამენტი
საქართველოს ფინანსთა სამინისტროსთან არსებულმა დავების განხილვის საბჭომ,2.04.2026 წელს განიხილა და მიიღო გადაწყვეტილება „-------“-ის 2.03.2026 წელს რეგისტრირებულ საჩივარზე (რეგისტრაციის №26793/2/2026).
დავის საგანი:
საქართველოს ფინანსთა სამინისტროსთან არსებული დავების განხილვის საბჭოს 23.05.2025 წლის №25044/2/2025 გადაწყვეტილების აღსრულების შედეგები.
გასაჩივრებული გადაწყვეტილება:
აუდიტის დეპარტამენტის 3.02.2026 წლის №053-1 საგადასახდო მოთხოვნა
დარიცხული თანხა: 324 236,23 ლარი.
მათ შორის:
გადასახადი - 235 923
დღგ - 37 419
მიწა - არასასოფლო - (-351)
საშემოსავლო გადასახადი - 196 427
ქონების გადასახადი - 2 428
ჯარიმა - 60 054
საურავი - 28 259,23
ფაქტების აღწერა/დარიცხვის საფუძვლები
აუდიტის დეპარტამენტის 27.12.2023 წლის კამერალური საგადასახადო შემოწმების აქტით შემოწმებულია 1.01.2020 წლიდან 1.08.2023 წლამდე პერიოდი. შემოწმების აქტის საფუძველზე გადასახადის გადამხდელს წარედგინა აუდიტის დეპარტამენტის 28.12.2023 წლის №053-16 საგადასახადო მოთხოვნა, რაც გასაჩივრდა შემოსავლების სამსახურში. შემოსავლების სამსახურის 15.04.2024 წლის №8694 ბრძანებით:
- საშემოსავლო გადასახადის გაანგარიშების საკითხთან დაკავშირებით, საგადასახადო ვალდებულებების დაზუსტების მიზნით, ერთ ჰექტარზე მოყვანილი ჰიბრიდული სიმინდის ოდენობის განსაზღვრის საკითხთან მიმართებით, აუდიტის დეპარტამენტს დაევალა გადასახადის გადამხდელის არგუმენტების შესაბამისად, დამატებით შეისწავლოს სადავო საკითხი, ყოველმხრივ გამოიკვლიოს და დაადგინოს საქმის ირგვლივ არსებული ფაქტობრივი გარემოებები, ასევე, სადავო საკითხის ყოველმხრივი და სრულყოფილი გამოკვლევის მიზნით კომპეტენტური ორგანოდან/ორგანოებიდან გამოითხოვოს შესაბამისი ინფორმაცია და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება). ერთობლივი შემოსავლიდან გამოსაქვით სესხის პროცენტებთან და ძირითადი საშუალებების სრულად გამოქვითვის მეთოდთან დაკავშირებით, გადასახადის გადამხდელს მიეცა წინადადება ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს სადავო საკითხთან დაკავშირებით საჩივარში მითითებული არგუმენტების დოკუმენტურად დადასტურებული მტკიცებულებები.
განსაზღვრულ ვადაში მტკიცებულებების წარდგენის შემთხვევაში, აუდიტის დეპარტამენტს დაევალა შეისწავლოს წარდგენილი მტკიცებულებები და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება);
- სასაქონლო-მატერიალური ფასეულობების ინვენტარიზაციის შედეგების ერთობლივ შემოსავალში ასახვის საკითხთან დაკავშირებით, საგადასახადო ვალდებულებების დაზუსტების მიზნით, აუდიტის დეპარტამენტს დაევალა დამატებით შეისწავლოს/ყოველმხრივ გამოიკვლიოს სადავო საკითხი და შესწავლის შედეგების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება);
- ფიზიკური პირის ქონების გადასახადის გაანგარიშების საკითხთან დაკავშირებით, აუდიტის დეპარტამენტს დაევალა მითითებული პუნქტების შესრულების შედეგების გათვალისწინებით განსაზღვროს მომჩივნის საგადასახადო წლის განმავლობაში მიღებული შემოსავლები და სათანადო საფუძვლების არსებობის შემთხვევაში, განახორციელოს შემოწმებით განსაზღვრული ქონების გადასახადის (გარდა მიწისა) კორექტირება (შემცირება);
- დღგ-ის ნაწილში ჩასათვლელი თანხის დაზუსტების მიზნით გადასახადის გადამხდელს მიეცა წინადადება ამ ბრძანების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს დღგ-ის ჩათვლის უფლების დამადასტურებელი დოკუმენტაცია/მტკიცებულებები. განსაზღვრულ ვადაში მტკიცებულებების წარდგენის შემთხვევაში, აუდიტის დეპარტამენტს დაევალა შეისწავლოს გადამხდელის მიერ წარმოდგენილი მტკიცებულებები და დღგ-ის ჩათვლის მიღებასთან დაკავშირებით კანონმდებლობით დადგენილი შეზღუდვების გათვალისწინებით, სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება);
- დანარჩენ ნაწილში საჩივარი არ დაკმაყოფილდა.
შემოსავლების სამსახურის 15.04.2024 წლის №8694 ბრძანება გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში, რომლის 25.07.2024 წლის №23050/2/2024 გადაწყვეტილებით საჩივარი არ დაკმაყოფილდა.
შემოსავლების სამსახურის 15.04.2024 წლის №8694 ბრძანების აღსრულების შედეგებზე შედგენილი აუდიტის დეპარტამენტის 24.12.2024 წლის დასკვნის მიხედვით:
- გამოთხოვილ იქნა ინფორმაცია კომპეტენტური ორგანოებიდან, კერძოდ შემოწმების მიერ მოთხოვნილ იქნა შემდეგი სახის ინფორმაცია „ლაგოდეხის მუნიციპალიტეტში ჰიბრიდული ჯიშის სიმინდის მოსავლიანობის ოდენობის (1 ჰექტარ მიწაზე მოყვანილი ტონა სიმინდი) შესახებ 2020, 2021 და 2022 წლების საანგარიშო პერიოდებში“. აღნიშნულ წერილთან დაკავშირებით მიღებული ინფორმაციით დგინდება, რომ მსგავსი ტიპის ინფორმაცია შესაბამის კომპეტენტურ ორგანოებში (ლაგოდეხის მუნიციპალიტეტის მერია/საქართველოს გარემოს დაცვისა და სოფლის მეურნეობის სამინისტროს სსდ გარემოსდაცვითი დეპარტამენტი (ააიპ სოფლის განვითარების სააგენტო)/საქართველოს სტატისტიკის ეროვნული დეპარტამენტი) არ ინახება. ასევე გადაწყვეტილების თანახმად, მითითებულ ვადაში გადასახადის გადამხდელის მიერ წარმოდგენილ იქნა ინფორმაცია მოსავლიანობასთან დაკავშირებით, რომელიც არ აღმოჩნდა საკმარისი მტკიცებულება ერთ ჰექტარზე მოყვანილი სიმინდის მოსავლიანობის კორექტირებისთვის. შედეგად შემოწმების მიერ სათანადო საფუძვლების არარსებობის გამო არ განხორციელებულა ერთ ჰექტარზე მოყვანილი სიმინდის მოსავლიანობის ოდენობის კორექტირება და აღნიშნულის საფუძველზე საგადასახადო ვალდებულებების კორექტირება. ამასთან, გადასახადის გადამხდელის მიერ, გადაწყვეტილების შესაბამისად წარდგენილ იქნა დამატებითი ხარჯების დამადასტურებელი დოკუმენტები, კერძოდ სესხის პროცენტები და საკომისიო გადასახადები, რომელიც შემოწმების მიერ გათვალისწინებულ იქნა გადასახადის გადამხდელის გამოსაქვით ხარჯებში, რის საფუძველზეც განხორციელდა საგადასახადო ვალდებულებების კორექტირება;
- გადაწყვეტილების შესაბამისად განხორციელდა საგადასახადო მონიტორინგის დეპარტამენტის მიერ ჩატარებული ინვენტარიზაციის შედეგების ყოველმხრივი შესწავლა და ინვენტარიზაციის ოქმით გამოვლენილი დანაკლისი (დღგ-ის 18%-იანი განაკვეთით დასაბეგრი პროდუქციის ნაწილში) დაექვემდებარა დღგ-ით დაბეგვრას 2023 წლის მარტის თვეში. ასევე სმფ-ების ნაშთები 2020-2022 წლებში დაექვემდებარა კორექტირებას ჩამოწერილი სმფ-ების შესაბამისად, რამაც გამოიწვია აქტით დარიცხული საშემოსავლო გადასახადის შემცირება;
- შემოსავლების სამსახურის გადაწყვეტილების თანახმად, დამატებით შესწავლილ იქნა საჩივარსა და გადაწყვტილებაში მითითებული საკითხები, თუმცა სათანადო საფუძვლების არარსებობის გამო (წლიური საშემოსავლო გადასახადით დასაბეგრი ბრუნვები არ ჩამოსცდა 100 000 ლარიან ზღვარს) ი/მ "-------"-ის (ს/ნ "-------") ყოველწლიური ქონების გადასახადში დარიცხული თანხები კორექტირებას არ დაექვემდებარა;
- შემოსავლების სამსახურის გადაწყვეტილების შესაბამისად, დაკორექტირდა დღგ-ის ჩასათვლელი თანხები (დამატებით ელექტრონული საგადასახადო ანგარიშ-ფაქტურები დაექვემდებარა ჩათვლებში გათვალისწინებას).
აუდიტის დეპარტამენტის 24.12.2024 წლის დასკვნის საფუძველზე გადასახადის გადამხდელს წარედგინა ამავე დეპარტამენტის 26.12.2024 წლის №053-10 საგადასახადო მოთხოვნა, რაც გასაჩივრდა შემოსავლების სამსახურში.
შემოსავლების სამსახურის 20.03.2025 წლის №5077 ბრძანებით საჩივარი დაკმაყოფილდა ნაწილობრივ, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.
საქართველოს ფინანსთა სამინისტროსთან არსებული დავების განხილვის საბჭოს 23.05.2025 წლის №25044/2/2025 გადაწყვეტილებით, ნაწილობრივ გაუქმდა შემოსავლების სამსახურის 20.03.2025 წლის №5077 ბრძანება, აუდიტის დეპარტამენტს დაევალა შემოსავლების სამსახურის 15.04.2024 წლის №8694 ბრძანების აღსრულების დროს დაშვებული შესაძლო უზუსტობების შესწავლა მომჩივნის მონაწილეობით და სათანადო საფუძვლების არსებობის შემთხვევაში, მომჩივნის საგადასახადო ვალდებულებების კორექტირება (შემცირება).
საბჭოს 23.05.2025 წლის №25044/2/2025 გადაწყვეტილების აღსრულების შედეგებზე შედგენილია აუდიტის დეპარტამენტის 29.01.2026 წლის დასკვნის მიხედვით, დავების განხილვის საბჭოს გადაწყვეტილების შესაბამისად გადასახადის გადამხდელის მონაწილეობით დამატებით შესწავლილი იქნა შემოსავლების სამსახურის 15.04.2024 წლის №8694 ბრძანების აღსრულების შედეგები შესაბამისი მასალებით, რომლის ანალიზის თანახმად აღსრულების შედეგებში უზუსტობა არ გამოვლინდა. შედეგად ი/მ „-------“-ზე (ს/ნ „-------“) 15.04.2024 წლის №8694 ბრძანების საფუძველზე გაანგარიშებული საგადასახდო ვალდებულებები კორექტირებას არ დაექვემდებარა.
აუდიტის დეპარტამენტის 29.01.2026 წლის დასკვნის საფუძველზე გადასახადის გადამხდელს წარედგინა ამავე დეპარტამენტის 3.02.2026 წლის №053-1 საგადასახადო მოთხოვნა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.
მომჩივნის არგუმენტაცია
საქართველოს ფინანსთა სამინისტროსთან არსებული დავების განხილვის საბჭოს გადაწყვეტილების შესაბამისად საჩივარი დაკმაყოფილდა ნაწილობრივ. კერძოდ, აუდიტის დეპარტამენტს დაევალა, შემოსავლების სამსახურის 15.04.2024 წლის №8694 ბრძანების აღსრულების დროს დაშვებული შესაძლო უზუსტობების შესწავლა მომჩივნის მონაწილეობით და სათანადო საფუძვლების არსებობის შემთხვევაში, მომჩივნის საგადასახადო ვალდებულებების კორექტირება (შემცირება).
ასაჩივრებს დანაკლისის თანხის ერთობლივ შემოსავალში ასახვის პერიოდს, ხოლო მიმდინარე გადაანგარიშებით შემოწმებულ პერიოდზე დამატებით დაერიცხა დღგ-ის თანხა, რაც დაუშვებელია და აღნიშნული შეცდომა მიმდინარე გაანგარიშებით არ გამოსწორებულა. შესაბამისად, გაურკვეველია აღნიშნულ ნაწილში დასკვნის მიხედვით, დარიცხული დღგ-ის თანხა, რომლის მიხედვითაც ხდება უკვე შემოწმებულ პერიოდზე დარიცხული გადასახადის დამძიმება, რაც დაუშვებელია.
ბათილად უნდა იქნას ცნობილი აუდიტის დეპარტამენტის 3.02.2026 წლის №053-1 საგადასახადო მოთხოვნა, 29.01.2026 წლის დასკვნა და 3.02.2026 წლის №2116 ბრძანება გადასახადების/გადასახდელების და საგადასახადო სანქციების თანხების დარიცხვის/შემცირების შესახებ.
დავების განხილვის საბჭო
მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:
საგადასახადო კოდექსის 73-ე მუხლის მე-5 ნაწილის „ა“ ქვეპუნქტის თანახმად, საგადასახადო ორგანოს უფლება აქვს, პირის საგადასახადო ვალდებულებები განსაზღვროს არაპირდაპირი მეთოდების გამოყენებით (აქტივების სიდიდის, საოპერაციო შემოსავლებისა და ხარჯების, პირის შესახებ ინფორმაციის მისი საქმიანობის სხვა საგადასახადო პერიოდთან ან სხვა ამგვარი გადასახადის გადამხდელის შესახებ მონაცემების შედარების, აგრეთვე სხვა მსგავსი ინფორმაციის ანალიზის საფუძველზე) თუ პირს არ აქვს სააღრიცხვო დოკუმენტაცია ან სააღრიცხვო დოკუმენტაციით შეუძლებელია დაბეგვრის ობიექტის დადგენა.
საგადასახადო კოდექსის მე-100 მუხლის მე-3 ნაწილის თანახმად, ერთობლივ შემოსავალს განეკუთვნება ნებისმიერი ფორმით ან/და საქმიანობით მიღებული შემოსავალი, კერძოდ:
ა) ხელფასის სახით მიღებული შემოსავლები;
ბ) ეკონომიკური საქმიანობით მიღებული შემოსავლები, რომლებიც დაკავშირებული არ არის დაქირავებით მუშაობასთან;
გ) სხვა შემოსავლები, რომლებიც დაკავშირებული არ არის დაქირავებით მუშაობასთან და ეკონომიკურ საქმიანობასთან.
საგადასახადო კოდექსის 102-ე მუხლის პირველი ნაწილის „ა“ ქვეპუნქტის თანახმად, ეკონომიკური საქმიანობით მიღებულ შემოსავლებს განეკუთვნება საქონლის/მომსახურების მიწოდებით მიღებული შემოსავლები.
საგადასახადო კოდექსის 105-ე მუხლის პირველი და მე-2 ნაწილების თანახმად:
1. ერთობლივი შემოსავლიდან გამოიქვითება ყველა ხარჯი, რომელიც დაკავშირებულია მის მიღებასთან, გარდა იმ ხარჯებისა, რომლებიც ამ კოდექსის თანახმად გამოქვითვას არ ექვემდებარება.
2. თუ ამ კოდექსით სხვა რამ არ არის გათვალისწინებული, ყველა ხარჯი დოკუმენტურად უნდა იყოს დადასტურებული.
საგადასახადო კოდექსის 159-ე მუხლის პირველი ნაწილის „ა“ ქვეპუნქტის თანახმად, დღგ-ით დასაბეგრი ოპერაციაა დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ საქონლის მიწოდება.
საგადასახადო კოდექსის 304-ე მუხლის 21 ნაწილის თანახმად, თუ გასაჩივრებული გადაწყვეტილება/საგადასახადო მოთხოვნა გამოცემულია დავის განმხილველი ორგანოს მიერ მიღებული გადაწყვეტილების შესაბამისად, დავის განმხილველი ორგანო იღებს გადაწყვეტილებას საჩივრის დაკმაყოფილებაზე უარის თქმის შესახებ. აღნიშნულ საკითხს იხილავს ის ორგანო, რომლის მიერ მიღებული გადაწყვეტილების მიხედვითაც იქნა გამოცემული გასაჩივრებული გადაწყვეტილება/საგადასახადო მოთხოვნა.
საქართველოს ფინანსთა სამინისტროსთან არსებული დავების განხილვის საბჭოს 23.05.2025 წლის №25044/2/2025 გადაწყვეტილებით, აუდიტის დეპარტამენტს დაევალა შემოსავლების სამსახურის 15.04.2024 წლის №8694 ბრძანების აღსრულების დროს დაშვებული შესაძლო უზუსტობების შესწავლა მომჩივნის მონაწილეობით და სათანადო საფუძვლების არსებობის შემთხვევაში, მომჩივნის საგადასახადო ვალდებულებების კორექტირება (შემცირება).
აუდიტის დეპარტამენტის 29.01.2026 წლის დასკვნის მიხედვით, გადასახადის გადამხდელის მონაწილეობით დამატებით შესწავლილი იქნა შემოსავლების სამსახურის 15.04.2024 წლის №8694 ბრძანების აღსრულების შედეგები შესაბამისი მასალებით, რომლის ანალიზის თანახმად აღსრულების შედეგებში უზუსტობა არ გამოვლინდა.
მომჩივანი განმარტავს, რომ ასაჩივრებს დანაკლისის თანხის ერთობლივ შემოსავალში ასახვის პერიოდს, ხოლო მიმდინარე გადაანგარიშებით შემოწმებულ პერიოდზე დამატებით დაერიცხა დღგ-ის თანხა, რაც დაუშვებელია და აღნიშნული შეცდომა მიმდინარე გაანგარიშებით არ გამოსწორებულა.
აუდიტის დეპარტამენტის 25.03.2026 წლის №„-------“ წერილით წარმოდგენილი ინფორმაციის მიხედვით, შემოსავლების სამსახურის 15.04.2024 წლის №8694 ბრძანების აღსრულების დროს შემოწმების აქტით დარიცხული თანხების გასწორების დროს მომჩივნის საგადასახადო ვალდებულებების დამძიმება არ მომხდარა და აღნიშნულ საკითხში გადასახადის გადამხდელს დარიცხული თანხები სალდირებულად დაუკორექტირდა (შეუმცირდა) 44 462 ლარით. ასევე, საბჭოს 23.05.2025 წლის №25044/2/2025 გადაწყვეტილების აღსრულების დროს, გადასახადის გადამხდელის მონაწილეობით დამატებით შესწავლილ იქნა შემოსავლების სამსახურის 15.04.2024 წლის №8694 ბრძანების აღსრულების შედეგები, რომლის ანალიზის თანახმად აღსრულების შედეგებში უზუსტობა არ გამოვლინდა და არც გადასახადის გადამხდელის მხრიდან ყოფილა დამატებითი არგუმენტები ან/და მტკიცებულებები წარმოდგენილი აღსრულების შედეგებთან დაკავშირებით.
საბჭო ყურადღებას ამახვილებს საქმის გარემოებებზე და მიიჩნევს, რომ აუდიტის დეპარტამენტის 29.01.2026 წლის დასკვნა გამოცემულია საბჭოს 23.05.2025 წლის №25044/2/2025 გადაწყვეტილების შესაბამისად და არ არსებობს სადავო აქტების გაუქმების საფუძველი.
საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:
1. საჩივარი არ დაკმაყოფილდეს;
2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.
სადავო საკითხი
მომჩივანი ასაჩივრებს დანაკლისის თანხის ერთობლივ შემოსავალში ასახვის პერიოდს, ხოლო მიმდინარე გადაანგარიშებით შემოწმებულ პერიოდზე დღგ-ის თანხის დარიცხვას.
ფაქტობრივი გარემოებები
აუდიტის დეპარტამენტის 27.12.2023 წლის კამერალური საგადასახადო შემოწმების აქტით შემოწმებულია 1.01.2020 წლიდან 1.08.2023 წლამდე პერიოდი. შემოწმების აქტის საფუძველზე გადასახადის გადამხდელს წარედგინა აუდიტის დეპარტამენტის 28.12.2023 წლის №053-16 საგადასახადო მოთხოვნა, რაც გასაჩივრდა შემოსავლების სამსახურში. შემოსავლების სამსახურის 15.04.2024 წლის №8694 ბრძანებით.
გადაწყვეტილება
საბჭო ყურადღებას ამახვილებს საქმის გარემოებებზე და მიიჩნევს, რომ აუდიტის დეპარტამენტის 29.01.2026 წლის დასკვნა გამოცემულია საბჭოს 23.05.2025 წლის №25044/2/2025 გადაწყვეტილების შესაბამისად და არ არსებობს სადავო აქტების გაუქმების საფუძველი.
დასაბუთება
საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს :
73(5),102,105,304(21).