,,საქართველოს ცალკეულ ტერიტორიებზე საგანგებო მდგომარეობის მოქმედების ვადის გაგრძელების შესახებ“

საქართველოს პრეზიდენტის

ბრძანებულება №497

2008 წლის 16 ოქტომბერი

ქ. თბილისი

საქართველოს ცალკეულ ტერიტორიებზე საგანგებო მდგომარეობის მოქმედების ვადის გაგრძელების შესახებ

2008 წლის 8 სექტემბერს ევროკავშირის შუამავლობით საფრანგეთის პრეზიდენტსა და რუსეთის ფედერაციის პრეზიდენტს შორის მიღწეული შეთანხმების მე-2 პუნქტის შესაბამისად, რუსეთის ფედერაცია ვალდებული იყო 10 ოქტომბრამდე სრულად გაეყვანა აფხაზეთისა და ცხინვალის რეგიონის ადმინისტრაციული საზღვრების მიმდებარედ განლაგებული საოკუპაციო საჯარისო ნაწილები სამხედრო მოქმედებების დაწყებამდე არსებულ პოზიციებზე. მიუხედავად საერთაშორისო თანამეგობრობის აქტიური ძალისხმევისა, რუსეთის ფედერაციამ არ შეასრულა შეთანხმებით ნაკისრი ვალდებულება აღედგინა 7 აგვისტომდე არსებული მდგომარეობა და გაეთავისუფლებინა საქართველოს ტერიტორია. რუსული საოკუპაციო საჯარისო ნაწილები კვლავ იმყოფებიან საქართველოს ცალკეულ ტერიტორიებზე და საერთაშორისო სამართლის ნორმების უხეში დარღვევით აგრძელებენ თავიანთ უკანონო საქმიანობას.

საქართველოს ტერიტორიის დეოკუპაციის პროცესის შემდგომი გაგრძელებისა და სახელმწიფო სუვერენიტეტის დასაცავად საჭირო ღონისძიებების ეფექტიანად განხორციელების მიზნით, „საგანგებო მდგომარეობის შესახებ“ საქართველოს კანონის მე-3 მუხლის მე-2 პუნქტის შესაბამისად, საქართველოს პარლამენტის 2008 წლის 16 ოქტომბრის №358-IIს დადგენილების გათვალისწინებით:

1. საქართველოს პრეზიდენტის 2008 წლის 3 სექტემბრის №424, 18 სექტემბრის №452 და 2 ოქტომბრის №476 ბრძანებულებების შესაბამისად მოქმედი საგანგებო მდგომარეობის მოქმედების ვადა გაგრძელდეს 2008 წლის 31 ოქტომბრამდე საქართველოს შემდეგ ტერიტორიებზე:

ა) გაგრის რაიონი;

ბ) გუდაუთის რაიონი;

გ) ქ. სოხუმი და სოხუმის რაიონი;

დ) გულრიფშის რაიონი, მათ შორის, აჟარის თემი (აჟარა, გენწვიში, ჩხალთა);

ე) ტყვარჩელის რაიონი;

ვ) ოჩამჩირის რაიონი;

ზ) გალის რაიონი;

თ) ქ. ცხინვალი და ცხინვალის რაიონი, მათ შორის, ქურთისა და ერედვის თემები;

ი) ჯავის რაიონი;

კ) ზნაურის რაიონი;

ლ) ახალგორის რაიონი;

მ) საჩხერის რაიონის სოფელი პერევი.

2. საქართველოს საგარეო საქმეთა სამინისტრომ (ე. ტყეშელაშვილი) საქართველოს ცალკეულ ტერიტორიებზე საგანგებო მდგომარეობის მოქმედების ვადის გაგრძელების შესახებ დაუყოვნებლივ აცნობოს გაერთიანებული ერების ორგანიზაციის გენერალურ მდივანს, ევროპის საბჭოს გენერალურ მდივანს, სხვა შესაბამისი საერთაშორისო ორგანიზაციებისა და საქართველოში აკრედიტებული დიპლომატიური მისიების ხელმძღვანელებს.

3. ეს ბრძანებულება ამოქმედდეს ხელმოწერისთანავე და დაუყოვნებლივ გამოქვეყნდეს ოფიციალურ ბეჭდვით ორგანოში.

მ. სააკაშვილი