ლიტვის რესპუბლიკაში 1991 წლის 13 იანვრის ტრაგიკული მოვლენების მე-20 წლისთავთან დაკავშირებით

საქართველოს პარლამენტის განცხადება

ლიტვის რესპუბლიკაში 1991 წლის 13 იანვრის ტრაგიკული მოვლენების მე-20 წლისთავთან დაკავშირებით

 

ვინაიდან 1991 წლის 13 იანვარს ლიტვის რესპუბლიკაში საბჭოთა კავშირის ჯარის მიერ მშვიდობიანი მოსახლეობის წინააღმდეგ ძალის უხეშ გამოყენებას შედეგად მოჰყვა მსხვერპლი და ათასობით ადამიანის დაშავება;

ვინაიდან 1991 წლის იანვრის მოვლენები ლიტვაში მოჰყვა 1989 წლის 9 აპრილის ტრაგედიას საქართველოში;

ვინაიდან საერთაშორისო თანამეგობრობამ დაგმო საბჭოთა კავშირის მიერ ლიტვაში 1991 წლის იანვარში ძალის გამოყენება;

ვინაიდან 1991 წლის იანვრის მოვლენები კვალიფიცირებულია, როგორც ლიტვის რესპუბლიკის წინააღმდეგ მიმართული აგრესია;

ვინაიდან 1991 წლის იანვრის დანაშაულის ჩამდენები და ორგანიზატორები ჯერ კიდევ არ არიან დასჯილი;

ვინაიდან რუსეთის ფედერაცია საკუთარ თავს მიიჩნევს და საერთაშორისო თანამეგობრობის მიერ აღიარებულია საბჭოთა კავშირის სამართალმემკვიდრედ;

საქართველოს პარლამენტი:

ა) გამოხატავს სოლიდარობას ლიტველი ხალხის, განსაკუთრებით კი – 1991 წლის 13 იანვრის ტრაგედიის შედეგად დაღუპულთა და დაზარალებულთა ოჯახების, მიმართ;

ბ) მოუწოდებს საქართველოს აღმასრულებელ ხელისუფლებას, არასდროს დართოს ნება 1991 წლის იანვრის დანაშაულის ორგანიზატორებსა და ამსრულებლებს, გამოიყენონ საქართველოს ტერიტორია მართლმსაჯულებისგან თავის დასაღწევად;

გ) მოუწოდებს რუსეთის ფედერაციას, გაუწიოს ლიტვის რესპუბლიკის ხელისუფლებას აუცილებელი დახმარება 1991 წლის იანვარში ჩადენილი დანაშაულის გამოძიებისა და დამნაშავეების, მათ შორის, ორგანიზატორების, სასამართლოს წინაშე წარდგენის მიზნით;

დ) მიმართავს საერთაშორისო  თანამეგობრობას, ყველა შესაძლო საშუალებით დაარწმუნოს რუსეთის მხარე, ითანამშრომლოს გამოძიებასთან.

თბილისი,

2010 წლის 17 დეკემბერი.

№4135–რს