კოდეინის შემცველი კომბინირებული პრეპარატების ლეგალური ბრუნვის წესების დამტკიცების შესახებ

სახელმწიფო სარეგისტრაციო კოდი 470.280.000.11.119.005.966

საქართველოს შრომის, ჯანმრთელობისა და სოციალური დაცვის მინისტრის ბრძანება №151/ნ

2003 წლის 21 ივლისი

ქ. თბილისი

კოდეინის შემცველი კომბინირებული პრეპარატების ლეგალური ბრუნვის წესების დამტკიცების შესახებ

“ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ” საქართველოს კანონის მე-4 მუხლის მე-2 და მე-3 პუნქტების შესაბამისად, ვბრძანებ:

1. დამტკიცდეს კოდეინის შემცველი კომბინირებული პრეპარატების ნუსხა (დანართი №1) და ამ პრეპარატების ლეგალური ბრუნვის წესები (დანართი №2).

2. ბრძანება ძალაში შევიდეს გამოქვეყნებიდან მე-15 დღეს.

ა. გამყრელიძე

 

დანართი №1

კოდეინის შემცველი კომბინირებული პრეპარატების ნუსხა

1. კაფეტინი

2. დჰკ-კონტინიუსი

3. ნეო-კოდიონი

4. პენტალგინი

5. სედალგინ-ნეო

6. სოლპადეინი

7. სპაზმოვერალგინ ნეო

დანართი №2

კოდეინის შემცველი კომბინირებული პრეპარატების ლეგალური ბრუნვის წესები

1. წინამდებარე წესი ვრცელდება კოდეინის შემცველ კომბინირებულ პრეპარატებზე (შემდგომში – პრეპარატები) მათი რეგისტრაციისთანავე.          

2. პრეპარატების იმპორტ-ექსპორტისა და საბითუმო რეალიზაციის უფლება აქვს მხოლოდ საამისოდ უფლებამოსილ, სპეციალურ კონტროლს დაქვემდებარებული ნივთიერებების ბრუნვის უფლების მქონე ფარმაცევტულ ბაზას.

3. პრეპარატების წარმოების და საბითუმო რეალიზაციის (მათ შორის საექსპორტო ოპერაციის განხორციელების გზით) უფლება აქვს მხოლოდ სპეციალურ კონტროლს დაქვემდებარებული ნივთიერებების ბრუნვის უფლების მქონე ფარმაცევტულ საწარმოს.

4. აფთიაქს უფლება აქვს განახორციელოს პრეპარატების საცალო და საბითუმო რეალიზაცია.

5. პრეპარატების იმპორტის (ექსპორტის) განხორციელებისას იმპორტიორი იურიდიული პირი არ საჭიროებს შრომის, ჯანმრთელობისა და სოციალური დაცვის სამინისტროს სამედიცინო დახმარების, ფარმაცევტული საქმიანობისა და ნარკოტიკების ლეგალურ ბრუნვაზე კონტროლის ინსპექციის (შემდგომში – ინსპექცია) საიმპორტო (საექსპორტო) ნებართვის მოწმობას, გარდა კანონმდებლობით გათვალისწინებული შემთხვევებისა.

6. პრეპარატების გამოწერა ხორციელდება მხოლოდ ფორმა №2 რეცეპტის ბლანკზე.

7. ფარმაცევტულ დაწესებულებაში პრეპარატები ექვემდებარებიან საგნობრივ-რაოდენობრივ აღრიცხვას.

8. ფარმაცევტული საწარმო და ბაზა ვალდებულია პრეპარატების ლეგალური ბრუნვის შესახებ ინფორმაცია მიაწოდოს ინსპექციას შრომის, ჯანმრთელობისა და სოციალური დაცვის მინისტრის შესაბამისი ბრძანებით განსაზღვრულ ვადებში.