საქართველოს იუსტიციის მინისტრის ბრძანება №104 საქართველოს იუსტიციის სამინისტროს ემბლემის დამტკიცების შესახებ

სახელმწიფო სარეგისტრაციო კოდი 410.012.004.055

საქართველოს იუსტიციის მინისტრის

ბრძანება №104

2000 წლის 16 ივნისი

ქ. თბილისი

საქართველოს იუსტიციის სამინისტროს ემბლემის დამტკიცების შესახებ

 „საქართველოს იუსტიციის სამინისტროს დებულების დამტკიცების შესახებ” საქართველოს პრეზიდენტის 2000 წლის 13 მარტის ბრძანებულების შესაბამისად დამტკიცდეს:

1. საქართველოს იუსტიციის სამინისტროს ემბლემა თანდართული ნიმუშისა და აღწერილობის შესაბამისად.

2. ეს ბრძანება ძალაშია გამოქვეყნებისთანავე.

ჯ. ხეცურიანი

პლანშეტი

საქართველო იუსტიციის სამინისტროს ემბლემა

გამოსახულება წარმოადგენს იუსტიციის სამინისტროს ემბლემას, რომელიც მოთავსებულია ოვალში. იუსტიციის სამინისტროს ემბლემა წარმოადგენს რამდენიმე სიმბოლოს კომპოზიციურ შენაერთს, კერძოდ:

1. გამოსახულების საფუძველს წარმოადგენს გადაშლილი წიგნი. ამ შემტხვევაში იგი მიუთითებს იუსტიციის სამინისტროს ერთ-ერთ ძირითად ფუნქციაზე – კანონშემოქმედებით ფუნქციაზე.

2. გამოსახულების ცენტრში მოთავსებულია ადამიანის სიმბოლური გამოსახულება, რომელსაც ერთგვარად იფარავს (იცავს) გაშლილი წიგნის (ანუ კანონის) აფრიალებული ფურცლები. ეს მიუთითებს იუსტიციის სამინისტროს კიდევ ერთ მნიშვნელოვან ფუნქციაზე, კერძოდ, ადამიანის უფლებების დაცვაზე.

3. გადაშლილი წიგნის აფრიალებულ ფურცლებზე (ანუ კანონზე) დაყრდნობილია სასწორი – ანუ სამართლის საყოველთაოდ მიღებული სიმბოლო.

4. გამოსახულების ფერი არის ლურჯი.