სასჯელაღსრულების დეპარტამენტის დაწესებულებიდან საერთო პროფილის საავადმყოფოში, ტუბერკულოზით დაავადებულ მსჯავრდებულთა სამკურნალო დაწესებულებასა და მსჯავრდებულთა და პატიმართა სამკურნალო დაწესებულებაში დაავადებულ პატიმართა და მსჯავრდებულთა გადაყვანის შესახებ

სახელმწიფო სარეგისტრაციო კოდი 100.060.010.22.027.009.217

საქართველოს იუსტიციის მინისტრის

ბრძანება №717

2006 წლის 11 სექტემბერი

ქ. თბილისი

სასჯელაღსრულების დეპარტამენტის დაწესებულებიდან საერთო პროფილის საავადმყოფოში, ტუბერკულოზით დაავადებულ მსჯავრდებულთა სამკურნალო დაწესებულებასა და მსჯავრდებულთა და პატიმართა სამკურნალო დაწესებულებაში დაავადებულ პატიმართა და მსჯავრდებულთა გადაყვანის შესახებ

სასჯელაღსრულების დეპარტამენტის დაწესებულებიდან საერთო პროფილის საავადმყოფოში, ტუბერკულოზით დაავადებულ მსჯავრდებულთა სამკურნალო დაწესებულებასა და მსჯავრდებულთა და პატიმართა სამკურნალო დაწესებულებაში დაავადებულ პატიმართა და მსჯავრდებულთა გადაყვანის მიზნით, ამ სფეროში პატიმართა და მსჯავრდებულთა უფლებების დაცვის, აღნიშნულ საკითხთა ორგანიზაციული სრულყოფისა და კონტროლის მექანიზმების გაუმჯობესების მიზნით, ,,პატიმრობის შესახებ“ საქართველოს კანონის პირველი მუხლის 2¹პუნქტის, მე-40 მუხლისა და ნორმატიული აქტების შესახებ“ საქართველოს კანონის 50-ე მუხლის პირველი პუნქტის ,,ბ“ ქვეპუნქტის მოთხოვნათა შესაბამისად, ვბრძანებ:

1. იუსტიციის სამინისტროს სასჯელაღსრულების დეპარტამენტის დაწესებულებიდან, მსჯავრდებულთა და პატიმართა გადაუდებელი სადიაგნოსტიკო გამოკვლევებისა და მკურნალობის მიზნით, მსჯავრდებულთა და პატიმართა სამკურნალო დაწესებულებასა და ტუბერკულოზით დაავადებულ მსჯავრდებულთა სამკურნალო დაწესებულებაში გეგმური წესით გადაყვანა განხორციელდეს დაწესებულების სამედიცინო ნაწილის მთავარი (უფროსი) ექიმის პატაკის საფუძველზე დაწესებულების დირექტორის ბრძანებით.

2. მსჯავრდებულთა და პატიმართა სამკურნალო დაწესებულებიდან და ტუბერკულოზით დაავადებულ მსჯავრდებულთა სამკურნალო დაწესებულებიდან, მსჯავრდებულთა და პატიმართა გადაუდებელი სადიაგნოსტიკო გამოკვლევებისა და მკურნალობის მიზნით, საერთო პროფილის საავადმყოფოებში გეგმური წესით გადაყვანა განხორციელდეს სასჯელაღსრულების დეპარტამენტის თავმჯდომარის ბრძანებით, დაწესებულების დირექტორისა და მთავარი (უფროსი) ექიმის პატაკის საფუძველზე.

3. სასჯელაღსრულების დაწესებულების დირექტორი 24 საათის განმავლობაში მსჯავრდებულთა და პატიმართა სამკურნალოდ გაყვანის თაობაზე აცნობებს სასჯელაღსრულების დეპარტამენტის კურატორ იუსტიციის მინისტრის მოადგილეს, სასჯელაღსრულების სისტემის რეფორმის, მონიტორინგისა და სამედიცინო ზედამხედველობის დეპარტამენტსა და სასჯელაღსრულების დეპარტამენტს.

4. მწვავე დაავადების შემთხვევაში, გადაუდებელი აუცილებლობისას ავადმყოფის გადაყვანა საერთო პროფილის საავადმყოფოში ან მსჯავრდებულთა და პატიმართა სამკურნალო დაწესებულებაში მოხდეს დაუყოვნებლივ სასჯელაღსრულების დეპარტამენტის თავმჯდომარის ბრძანებით, დაწესებულების დირექტორისა და მთავარი (უფროსი) ექიმის პატაკის საფუძველზე.

5. დაავადებულ პატიმართა და მსჯავრდებულთა ბადრაგირება და დაცვა უზრუნველყოს სასჯელაღსრულების დეპარტამენტმა კანონმდებლობით დადგენილი წესით.

6. წინამდებარე ბრძანება სახელმძღვანელოდ გადაეგზავნოს სასჯელაღსრულების დეპარტამენტს, სასჯელაღსრულების დაწესებულებებს და სასჯელაღსრულების სისტემის რეფორმის, მონიტორინგისა და სამედიცინო ზედამხედველობის დეპარტამენტს.

7. კონტროლი ბრძანების შესრულებაზე დაევალოს სასჯელაღსრულების სისტემის კურატორ იუსტიციის მინისტრის მოადგილესა (გ. მიქანაძე) და სასჯელაღსრულების დეპარტამენტის თავმჯდომარეს (ბ. ახალაია).

8. ამ ბრძანების ამოქმედებისთანავე ძალადაკარგულად გამოცხადდეს საქართველოს იუსტიციის მინისტრის 2006 წლის 3 ივლისის №649 ბრძანება ,,სასჯელაღსრულების დეპარტამენტის დაწესებულებიდან საერთო პროფილის საავადმყოფოში დაავადებულ პატიმართა და მსჯავრდებულთა გადაყვანის ორგანიზაციულ ღონისძიებათა გაუმჯობესების შესახებ“ (სსმ III, 03.07.2006, №89 მუხ. 1205).

9. ეს ბრძანება ამოქმედდეს გამოქვეყნებისთანავე.

გ. ქავთარაძე