საქართველოს საგადასახადო კოდექსის 286-ე მუხლის მე-3 ნაწილის გამოყენების შესახებ ინსტრუქციის დამტკიცების თაობაზე
🕸️ გრაფი — კავშირების ვიზუალიზაცია
დოკუმენტის ტექსტი
საქართველოს ფინანსთა მინისტრის
ბრძანება №413
2011 წლი ს 27 ივლისი
ქ. თბილისი
„საქართველოს საგადასახადო კოდექსის 286-ე მუხლის მე-3 ნაწილის გამოყენების შესახებ ინსტრუქციის“ დამტკიცების თაობაზე
საქართველოს საგადასახადო კოდექსის მე-2 მუხლის მე-4 ნაწილის საფუძველზე, ვბრძანებ:
მუხლი 1. დამტკიცდეს „საქართველოს საგადასახადო კოდექსის 286-ე მუხლის მე-3 ნაწილის გამოყენების შესახებ ინსტრუქცია“.
მუხლი 2.ეს ბრძანება ამოქმედდეს გამოქვეყნებისთანავე.
დ. გვინდაძე
საქართველოს საგადასახადო კოდექსის 286-ე მუხლის მე-3 ნაწილის გამოყენების შესახებ ინსტრუქცია
საქართველოს საგადასახადო კოდექსის 286-ე მუხლის მე-3 ნაწილის მიზნებისათვის სარეალიზაციოდ/მისაწოდებლად განკუთვნილ სასაქონლო-მატერიალურ ფასეულობად (მზა პროდუქციად) ითვლება საქართველოს საგადასახადო კოდექსის მე-8 მუხლის 28-ე ნაწილით გათვალისწინებული ნებისმიერი სასაქონლო-მატერიალური ფასეულობა, რომლის რეალიზაცია შესაძლებელია განხორციელდეს დამოუკიდებლად.
მაგალითი 1
მაღაზიას, რომელიც ეწევა კომერციულ საქმიანობას (ეწევა საოჯახო ტექნიკით ვაჭრობას), საინვენტარიზაციო კომისიამ მის მფლობელობაში არსებული სასაქონლო-მატერიალური ფასეულობების ნაშთების სააღრიცხვო დოკუმენტაციაში აღრიცხულ ნაშთებთან შედარებისას გამოუვლინა 5000 ლარის აღურიცხველი მზა პროდუქცია (5 ტელევიზორი), რომელიც გამიზნული იყო სარეალიზაციოდ.
მოცემულ პირობებში:
ვინაიდან, მაღაზიას არ გააჩნდა სააღრიცხვო დოკუმენტაცია ტელევიზორებზე და გამიზნული ჰქონდა სარეალიზაციოდ, საქართველოს საგადასახადო კოდექსის 286-ე მუხლის მე-3 ნაწილის შესაბამისად იგი დაჯარიმდება გამოვლენილი აღურიცხველი მზა პროდუქციის საბაზრო ღირებულებით (5000 ლარით). ამასთან, აღურიცხველი მზა პროდუქციის ღირებულება საბაზრო ფასით ჩაეთვლება გამოვლენის საგადასახადო პერიოდის მიხედვით მიღებულ სარგებლად.
მაგალითი 2
შპს „პური“ წარმოადგენს პურის საცხობს, რომელიც რეალიზაციას უკეთებს მხოლოდ პურს. საწარმო პურის წარმოებაში იყენებს ფქვილს, მარილს, საფუარს და ღუმელს. საინვენტარიზაციო კომისიამ მის მფლობელობაში არსებული ფქვილის ნაშთების სააღრიცხვო დოკუმენტაციაში აღრიცხულ ნაშთებთან შედარებისას გამოუვლინა 1000 ლარის აღურიცხველი ფქვილი.
მოცემულ პირობებში:
მიუხედავად იმისა, რომ შპს „პური“ არ ახორციელებს პურის გარდა სხვა პროდუქციის რეალიზაციას, მისთვის აღურიცხველი ფქვილი ჩაითვლება სარეალიზაციოდ განკუთვნილ მზა პროდუქციად და, შესაბამისად, დაეკისრება სანქცია, ვინაიდან ფქვილის რეალიზაცია შესაძლებელია განხორციელდეს დამოუკიდებლად. ამასთან, აღურიცხველი ფქვილის ღირებულება საბაზრო ფასით ჩაეთვლება გამოვლენის საგადასახადო პერიოდის მიხედვით მიღებულ სარგებლად.
მაგალითი 3
შპს „სახალისო“ ახორციელებს ლიმონათის წარმოებას. წარმოებაში იგი იყენებს ბოთლებს, სითხეს და ეტიკეტებს. საინვენტარიზაციო კომისიამ მის მფლობელობაში არსებული სასაქონლო-მატერიალური ფასეულობების ნაშთების სააღრიცხვო დოკუმენტაციაში აღრიცხულ ნაშთებთან შედარებისას გამოუვლინა 2000 ლარის აღურიცხველი ეტიკეტი.
მოცემულ პირობებში:
ეტიკეტი წარმოადგენს სასაქონლო-მატერიალურ ფასეულობას, მაგრამ მისი დამოუკიდებლად რეალიზაცია შეუძლებელია, ვინაიდან მასზე გამოსახულია საწარმოს საფირმო დასახელება და შესაბამისი ლოგო. აქედან გამომდინარე, საქართველოს საგადასახადო კოდექსის 286-ე მუხლის მე-3 ნაწილის შესაბამისად, იგი არ დაჯარიმდება.
მაგალითი 4
პირობები იგივეა, რაც მე-2 მაგალითში, იმ განსხვავებით რომ საინვენტარიზაციო კომისიამ საცხობს გამოუვლინა მის მფლობელობაში არსებული ღუმელი პირველადი საგადასახადო დოკუმენტაციის და სააღრიცხვო დოკუმენტაციაში აღრიცხვის გარეშე.
მოცემულ პირობებში:
ღუმელი საცხობისთვის წარმოადგენს ძირითად საშუალებას, შესაბამისად, მისი პირველადი საგადასახადო დოკუმენტაციის და სააღრიცხვო დოკუმენტაციაში აღრიცხვის გარეშე გამოვლენა არ გამოიწვევს მის დაჯარიმებას საქართველოს საგადასახადო კოდექსის 286-ე მუხლის მე-3 ნაწილის მიხედვით.