კვების პროდუქტებისა და თამბაქოს წარმოების ლიცენზიისა და ნებართვის გაცემის შესახებ

✨ ჰკითხე AI-ს ამ კანონის შესახებ
საქართველოს კანონი ძალადაკარგული სურსათი
მიღების თარიღი
07.05.2003 ძალადაკარგული 28.12.2005
გამომცემი ორგანო
საქართველოს პარლამენტი
ნომერი
№2179
სარეგისტრაციო კოდი
240.090.000.05.001.001.252
გამოქვეყნების წყარო
matsne.gov.ge , სსმ, 14, 03/06/2003
🕸️ გრაფი — კავშირების ვიზუალიზაცია
← უკუმითითება ცვლილება → 🧬 სემანტიკური ეს აქტი
ცვლილებები (2)

შემდგომი ცვლილებები (2)

1
„კვების პროდუქტებისა და თამბაქოს წარმოების სფეროში ლიცენზიის გაცემბის შესახებ“ საქართველოს კანონის ძალადაკარგულად ცნობის თაობაზე
28.12.2005
2
„კვების პროდუქტებისა და თამბაქოს წარმოების ლიცენზიის და ნებართვის გაცემის შესახებ“ საქართველოს კანონში ცვლილებებისა და დამატების შეტანის თაობაზე
09.12.2004
03.06.2003 09.12.2004 28.12.2005

დოკუმენტის ტექსტი

საქართველოს კანონი

კვების პროდუქტებისა და თამბაქოს წარმოების ლიცენზიისა და ნებართვის გაცემის შესახებ

თავი I

ზოგადი დებულებანი

    მუხლი 1. კანონის რეგულირების სფერო

ეს კანონი აწესრიგებს საქართველოს ტერიტორიაზე კვების (მათ შორის, ბავშვთა კვების) პროდუქტების და თამბაქოს პროდუქციის წარმოების ლიცენზიისა და ნებართვის გაცემასთან დაკავშირებულ ურთიერთობებს, განსაზღვრავს ლიცენზირებადი და სანებართვო წარმოების სახეებს, ადგენს სალიცენზიო და სანებართვო პირობებს.

თავი II

ლიცენზია

    მუხლი 2. ლიცენზირებადი წარმოების სახეები

ლიცენზირებადი წარმოების სახეებია:

ა) ალკოჰოლიანი სასმელებისა და ეთილის სპირტის წარმოება;

ბ) ლუდის, უალკოჰოლო სასმელებისა და წყლის, მათ შორის მინერალური წყლის სასაქონლო პროდუქციის წარმოება;

გ) ყველა სხვა სახის კვების (მათ შორის, ბავშვთა კვების) პროდუქტებისა და თამბაქოს წარმოება.

    მუხლი 3.  ლიცენზიის გაცემის ზოგადი წესი

ლიცენზიის გაცემა წარმოებს „სამეწარმეო საქმიანობის ლიცენზიისა და ნებართვის გაცემის საფუძვლების შესახებ“ საქართველოს კანონის მესამე თავით დადგენილი მოთხოვნების შესაბამისად.

    მუხლი 4.  ლიცენზიის მოქმედების შეჩერება და განახლება, ლიცენზიის გაუქმება

ლიცენზიის მოქმედების შეჩერება და განახლება,  ლიცენზიის გაუქმება წარმოებს „სამეწარმეო საქმიანობის ლიცენზიისა და ნებართვის გაცემის საფუძვლების შესახებ“ საქართველოს კანონის მეოთხე თავის შესაბამისად.

    მუხლი 5. ლიცენზირებადი წარმოების განხორციელება

ამ კანონით გათვალისწინებულ ლიცენზირებად წარმოებას ლიცენზიის მფლობელი ახორციელებს შესაბამის საწარმოზე გაცემული ნებართვის საფუძველზე, რომლის გაცემის წესსა და პირობებს ადგენს საქართველოს კანონი „სამეწარმეო საქმიანობის ლიცენზიისა და ნებართვის გაცემის საფუძვლების შესახებ“ და ეს კანონი.

    მუხლი 6. სალიცენზიო მოწმობის ფორმა

სალიცენზიო მოწმობის ფორმა მტკიცდება სოფლის მეურნეობისა და სურსათის მინისტრის ბრძანებით.

თავი III

ნებართვა

    მუხლი 7. სანებართვო საწარმოების სახეობანი

სანებართვო  საწარმოებია:

1. ალკოჰოლიანი სასმელებისა და ეთილის სპირტის საწარმო, რომელშიც ხორციელდება:

ა) ყურძნის გადამუშავება და ღვინომასალების დამზადება;

ბ) მშრალი ღვინის დამზადება ან/და ჩამოსხმა;

გ) სუფრის ნახევრად მშრალი, ნახევრად ტკბილი და ტკბილი ღვინოების დამზადება ან/და ჩამოსხმა;

დ) ნატურალური ნახევრად მშრალი, ნახევრად ტკბილი და ტკბილი ღვინოების დამზადება ან/და ჩამოსხმა;

ე) ცქრიალა ღვინის დამზადება;

ვ) შუშხუნა ღვინის დამზადება;

ზ) შემაგრებული და არომატიზებული ღვინოების დამზადება ან/და ჩამოსხმა;

თ) ბრენდის სპირტის გამოხდა ან/და დავარგება;

ი) ბრენდის დამზადება ან/და ჩამოსხმა;

კ) ნედლი სპირტის დამზადება;

ლ) სპირტი რექტიფიკატის დამზადება;

მ) არყის დამზადება ან/და ჩამოსხმა;

ნ) ლიქიორის, ნაყენებისა და მაგარი სასმელების დამზადება ან/და ჩამოსხმა;

ო) ეთილის სპირტის გამოყენებით დაბალალკოჰოლიანი სასმელების დამზადება ან/და ჩამოსხმა;

პ) ხილკენკროვანი ღვინოების დამზადება ან/და ჩამოსხმა;

ჟ) ძმრის დამზადება ან/და ჩამოსხმა.

2. ლუდის, უალკოჰოლო სასმელებისა და წყლის საწარმო, რომელშიც მზადდება:

ა) ლუდი, უალკოჰოლო სასმელები და წყალი;

ბ) მინერალური წყლები;

გ) ბურახი;

დ) ნახშირორჟანგი გაზირებული სასმელებისათვის.

3. სხვა სახის კვების პროდუქტებისა და თამბაქოს პროდუქციის საწარმო, რომელშიც ხორციელდება:

ა) ჩაის გადამუშავება ან/და დაფასოება;

ბ) ყავის გადამუშავება ან/და დაფასოება;

გ) ფქვილისა და ბურღულეულის დამზადება ან/და დაფასოება;

დ) პურ-ფუნთუშეულისა და მაკარონის დამზადება ან/და დაფასოება;

ე) შაქრის დამზადება ან/და დაფასოება;

ვ) თაფლისა და სახამებელ-ბადაგის დამზადება ან/და დაფასოება;

ზ) შაქროვანი და ფქვილოვანი საკონდიტრო ნაწარმის დამზადება ან/და დაფასოება;

თ) ხილისა და კაკლის გადამუშავება ან/და დაფასოება;

ი) ბოსტნეულისა და სოკოს გადამუშავება ან/და დაფასოება;

კ) ხორცისა და ხორცის პროდუქტების წარმოება ან/და დაფასოება;

ლ) რძისა და რძის პროდუქტების წარმოება ან/და დაფასოება;

მ) მცენარეული ზეთების დამზადება ან/და დაფასოება;

ნ) ცხიმების დამზადება ან/და დაფასოება;

ო) თევზისა და ზღვის სხვა პროდუქტების გადამუშავება ან/და დაფასოება;

პ) საგემოვნო პროდუქტების დამზადება ან/და დაფასოება;

ჟ) საკვებდანამატების დამზადება ან/და დაფასოება;

რ) თამბაქოს გადამუშავება ან/და დაფასოება;

ს) ბავშვთა კვების პროდუქტების დამზადება ან/და დაფასოება.

    მუხლი 8. საწარმოს სანებართვო პირობები

1. ნებართვის მაძიებელი შესაბამისი ნებართვის მისაღებად ნებართვის გამცემს წარუდგენს „სამეწარმეო საქმიანობის ლიცენზიისა და ნებართვის გაცემის საფუძვლების შესახებ“ საქართველოს კანონისა და ამ კანონის მოთხოვნათა თანახმად გაცემულ ლიცენზიას.

2. „სამეწარმეო საქმიანობის ლიცენზიისა და ნებართვის გაცემის საფუძვლების შესახებ“ საქართველოს კანონის 22-ე მუხლით გათვალისწინებულ დოკუმენტაციას უნდა ერთვოდეს:

ა) ინფორმაცია საწარმოს განთავსების ადგილის შესახებ;

ბ) ინფორმაცია სალიცენზიო პროფილის სპეციალისტების კვალიფიკაციის შესახებ (მხოლოდ ტექნოლოგიურ პროცესებზე პასუხისმგებელ პირთათვის);

გ) ინფორმაცია წარმოების მატერიალურ-ტექნიკური ბაზის არსებობის შესახებ;

დ) მეწარმის მიერ დამტკიცებული და მოქმედი სტანდარტების მოთხოვნების შესაბამისად დამუშავებული ტექნოლოგიური ინსტრუქცია;

ე) ინფორმაცია პროდუქციის ხარისხის შიდასაწარმოო კონტროლის სისტემის არსებობის შესახებ (რძის გადამმუშავებელი საწარმოსათვის–მიკრობიოლოგიური ლაბორატორიის, ბოქსის, დედოების მოსამზადებელი უბნის, ქიმიკოს-ანალეტიკოსის, მიკრობიოლოგის არსებობის მითითებით);

ვ) სახელმწიფო სანიტარიული ზედამხედველობის ინსპექციის მიერ გაცემული დოკუმენტი ობიექტის სანიტარიულ-ჰიგიენური ნორმებისა და წესების მოთხოვნებთან შესაბამისობაზე.

3. ამ მუხლის მე-2 პუნქტით გათვალისწინებულ მონაცემთა ცვლილებების შემთხვევაში ნებართვის მფლობელი ვალდებულია ნებართვის გამცემს წერილობით აცნობოს ამის თაობაზე და წარუდგინოს სათანადო დოკუმენტები შესაბამისი ცვლილების განხორციელებიდან 7 სამუშაო დღის განმავლობაში.

    მუხლი 9.  ნებართვის გაცემის ზოგადი წესი

ნებართვის გაცემისას გამოიყენება “სამეწარმეო საქმიანობის ლიცენზიისა და ნებართვის გაცემის საფუძვლების შესახებ” საქართველოს კანონის 23-ე მუხლი.

    მუხლი 10.  ნებართვის მოქმედების ვადა

ნებართვის მოქმედების ვადა განისაზღვრება არანაკლებ 1 და არა უმეტეს 3 წლით.

    მუხლი 11. სანებართვო მოწმობის ფორმა

სანებართვო მოწმობის ფორმა მტკიცდება სოფლის მეურნეობისა და სურსათის მინისტრის ბრძანებით.

    მუხლი 12. სანებართვო  პირობების შემოწმების წესი

1. ნებართვის გამცემი უფლებამოსილია კომისიური წესით, ნებართვის მაძიებლის თანდასწრებით, ადგილზე შეამოწმოს სანებართვო პირობები, რის შესახებაც აფორმებს სათანადო წერილობით დასკვნას.

2. თუ ადგილზე შემოწმების შედეგად დადგინდა, რომ ფაქტობრივი მდგომარეობა არ შეესაბამება კანონით დადგენილ სანებართვო  პირობებს, ეს ნებართვის გაცემაზე უარის თქმის საფუძველია.

თავი IV

გარდამავალი და დასკვნითი დებულებანი

    მუხლი 13. ამ კანონის ამოქმედებამდე გაცემული ლიცენზიებისა და ნებართვების მოქმედების ვადა

ამ კანონის ამოქმედებიდან 6 თვის შემდეგ ამ კანონით განსაზღვრული საქმიანობა შესაბამისი ლიცენზიისა და ნებართვის გარეშე ითვლება უკანონოდ.

    მუხლი 14. კანონის ამოქმედება

ეს კანონი ამოქმედდეს „სამეწარმეო საქმიანობის ლიცენზიისა და ნებართვის გაცემის საფუძვლების შესახებ“ საქართველოს კანონის ამოქმედების დღიდან.

საქართველოს პრეზიდენტი ედუარდ შევარდნაძე

თბილისი,

2003 წლის 7 მაისი.

№2179-IIს