არასაპატიმრო სასჯელთა აღსრულების წესისა და პრობაციის შესახებ

✨ ჰკითხე AI-ს ამ კანონის შესახებ
საქართველოს კანონი ძალადაკარგული სისხლის სამართალი
მიღების თარიღი
19.06.2001 ძალადაკარგული 19.06.2007
გამომცემი ორგანო
საქართველოს პარლამენტი
ნომერი
№943
სარეგისტრაციო კოდი
080.040.030.05.001.000.940
გამოქვეყნების წყარო
matsne.gov.ge , სსმ, 21, 04/07/2001
🕸️ გრაფი — კავშირების ვიზუალიზაცია
← უკუმითითება ცვლილება → 🧬 სემანტიკური ეს აქტი
ცვლილებები (4)

შემდგომი ცვლილებები (4)

1
დანაშაულის პრევენციის, არასაპატიმრო სასჯელთა აღსრულების წესისა და პრობაციის შესახებ
19.06.2007
2
„არასაპატიმრო სასჯელთა აღსრულების წესისა და პრობაციის შესახებ“ საქართველოს კანონში დამატებებისა და ცვლილებების შეტანის თაობაზე
25.07.2006
3
„არასაპატიმრო სასჯელთა აღსრულების წესისა და პრობაციის შესახებ“ საქართველოს კანონში ცვლილებების შეტანის თაობაზე
20.04.2005
4
„არასაპატიმრო სასჯელთა აღსრულების წესისა და პრობაციის შესახებ“ საქართველოს კანონში ცვლილებებისა და დამატებების შეტანის თაობაზე
07.05.2003
04.07.2001 07.05.2003 20.04.2005 25.07.2006 19.06.2007

დოკუმენტის ტექსტი

საქართველოს კანონი

არასაპატიმრო სასჯელთა აღსრულების წესისა და პრობაციის შესახებ

თავი I. ზოგადი დებულებანი

    მუხლი 1. კანონის გამოყენების სფერო

ამ კანონით დადგენილი წესით აღსრულებას ექვემდებარება სასამართლოს განაჩენი, განჩინება და დადგენილება (შემდგომში – სასამართლო აქტი):

ა) სასჯელის სახით ჯარიმის დაკისრების შესახებ;

ბ) სასჯელის სახით თანამდებობის დაკავების ან საქმიანობის უფლების ჩამორთმევის შესახებ;

გ) სასჯელის სახით საზოგადოებისათვის სასარგებლო შრომის დანიშვნის შესახებ;

დ) სასჯელის სახით გამასწორებელი სამუშაოს დანიშვნის შესახებ;

ე) სასჯელის სახით პირობითი მსჯავრის დანიშვნის შესახებ;

ვ) სასჯელის მოხდისაგან პირობით ვადამდე გათავისუფლების შესახებ;

ზ) სასჯელის მოხდის გადავადების შესახებ.

    მუხლი 2. აღმასრულებელი ორგანო

ამ კანონის პირველი მუხლით განსაზღვრული სასამართლო აქტი აღსასრულებლად ეგზავნება საქართველოს იუსტიციის სამინისტროს, აფხაზეთისა და აჭარის ავტონომიური რესპუბლიკების იუსტიციის სამინისტროების ტერიტორიულ ორგანოებს – სააღსრულებო ბიუროებს (შემდგომში – სააღსრულებო ბიურო) მსჯავრდებულის საცხოვრებელი ადგილის მიხედვით.

    მუხლი 3. აღსასრულებელი სასამართლო აქტის აღრიცხვა, განაწილება და კონტროლი მის აღსრულებაზე

1. აღსასრულებელ სასამართლო აქტს სააღსრულებო ბიუროს უფროსი რეგისტრაციაში ატარებს სპეციალურ ჟურნალში, რომელშიც აღინიშნება:

ა) სასამართლო აქტის რეგისტრაციის ნომერი;

ბ) სასამართლო აქტის სააღსრულებო ბიუროში შესვლის თარიღი;

გ) სასამართლო აქტის მიმღები სასამართლოს დასახელება და აქტის ძალაში შესვლის თარიღი;

დ) სასამართლო აქტის სარეზოლუციო ნაწილის მოკლე შინაარსი;

ე) მსჯავრდებული პირის მონაცემები (სახელი, გვარი, დაბადების თარიღი და ადგილი, საცხოვრებელი ადგილი, ოჯახური მდგომარეობა, სამუშაო ადგილი ან სასწავლებელი);

ვ) სისხლის სამართლის კოდექსის მუხლი, რომლის საფუძველზედაც მიღებულ იქნა აღსასრულებელი სასამართლო აქტი;

ზ) სასამართლო აღმასრულებელი, რომელსაც აღსასრულებლად გადაეცა სასამართლო აქტი, მისი ხელმოწერა;

თ) მონაცემები წარდგინებების შესახებ;

ი) სააღსრულებო წარმოების დამთავრების თარიღი.

2. სააღსრულებო ბიუროს უფროსი სასამართლო აქტს აღსასრულებლად გადასცემს სასამართლო აღმასრულებელს მსჯავრდებულის საცხოვრებელი ადგილისა და სააღსრულებო ბიუროს სამოქმედო ტერიტორიის მიხედვით.

3. სასამართლო აქტის აღსრულებაზე კონტროლს ახორციელებს სააღსრულებო ბიუროს უფროსი.

    მუხლი 4. აღსასრულებელი სასამართლო აქტის განმარტება და აღსრულების შეტყობინება

1. თუ აღსასრულებელი სასამართლო აქტი ბუნდოვანია ან შეიცავს რაიმე უზუსტობას, სააღსრულებო ბიუროს უფროსი აქტის მისთვის გაუგებარი ან არაზუსტი ნაწილის განმარტების თხოვნით მიმართავს სასამართლოს.

2. სააღსრულებო ბიუროს უფროსი აღსასრულებელი სასამართლო აქტის აღსრულების დაწყების შესახებ წერილობით აცნობებს სასამართლოს.

3. თუ მსჯავრდებული არ ცხოვრობს სასამართლო აქტში მითითებულ მისამართზე, სააღსრულებო ბიუროს უფროსი სასამართლო აქტს დაურთავს აღნიშნული გარემოების დამადასტურებელ დოკუმენტს და მსჯავრდებულის ძებნის გამოსაცხადებლად გადაუგზავნის აქტის მიმღებ სასამართლოს.

    მუხლი 5. აღსრულების დაწყება და სააღსრულებო საქმე

1. სასამართლო აქტის წარმოებაში მიღებისას სასამართლო აღმასრულებელი იბარებს მსჯავრდებულს და აცნობს სასამართლოს მიერ მასზე დაკისრებულ მოვალეობებს (მათ შორის, მოვალეობას საცხოვრებელი ადგილის შეცვლის შესახებ სააღსრულებო ბიუროსათვის შეტყობინების თაობაზე), რის შესახებაც ადგენს ოქმს.

2. თითოეული სასამართლო აქტის სააღსრულებო წარმოებაში მიღების შემდეგ იხსნება სააღსრულებო საქმე, რომლის რიგითი ნომერი უნდა შეესაბამებოდეს რეგისტრაციის ჟურნალში გატარებული აღსასრულებელი სასამართლო აქტის რეგისტრაციის ნომერს.

3. სააღსრულებო საქმეში შეიტანება:

ა) აღსასრულებელი სასამართლო აქტი;

ბ) მსჯავრდებულის შესახებ რეგისტრაციის ჟურნალში არსებული მონაცემები და მისი ფოტოსურათი;

გ) სასამართლო აღმასრულებლის მიერ განხორციელებული ღონისძიებების ოქმები;

დ) სასამართლოში გაგზავნილი შეტყობინებების ასლები;

ე) მოხსენებითი ბარათი სააღსრულებო ბიუროს უფროსის სახელზე სასამართლოსათვის წარდგინებით მიმართვის მიზანშეწონილობის შესახებ;

ვ) სააღსრულებო ბიუროს უფროსის სასამართლოსათვის წარდგინების ასლი;

ზ) სააღსრულებო წარმოების პროცესში შედგენილი სხვა დოკუმენტები.

    მუხლი 6. ოქმი

1. სასამართლო აღმასრულებელი სააღსრულებო მოქმედებების განხორციელების პროცესში ადგენს ოქმს, რომელიც უნდა შეიცავდეს:

ა) ოქმის შედგენის ადგილსა და თარიღს;

ბ) სასამართლო აქტის დასახელებას, რომლის აღსასრულებლადაც შედგენილია ოქმი;

გ) ოქმის შემდგენელი სასამართლო აღმასრულებლის სახელსა და გვარს;

დ) ოქმის შედგენის დროს დამსწრე პირების მონაცემებს;

ე) სააღსრულებო მოქმედების შინაარსს.

2. ოქმის სისწორე დასტურდება სასამართლო აღმასრულებლის, მსჯავრდებულისა და ოქმის შედგენის დროს დამსწრე პირების ხელმოწერებითა და სასამართლო აღმასრულებლის ბეჭდით. უარი ოქმზე ხელის მოწერაზე აღინიშნება ოქმში.

    მუხლი 7. სასამართლო აღმასრულებლის მოხსენებითი ბარათი

თუ სასამართლო აღმასრულებელი მიიჩნევს, რომ არსებობს საფუძველი სასამართლოსათვის წარდგინებით მიმართვისათვის, იგი სააღსრულებო ბიუროს უფროსის სახელზე წერს მოხსენებით ბარათს, რომელშიც უნდა მიეთითოს;

ა) სააღსრულებო საქმის ნომერი;

ბ) აღსასრულებელი სასამართლო აქტი;

გ) მოკლე ცნობები სააღსრულებო მოქმედებათა შესახებ;

დ) ცნობები მსჯავრდებულის მიერ მისთვის დაკისრებული მოვალეობის შეუსრულებლობის (ასეთის არსებობის შემთხვევაში) სასამართლოსათვის შეტყობინების შესახებ;

ე) მისი პირადი მოსაზრება წარდგინების მიზანშეწონილობასთან დაკავშირებით;

ვ) სასამართლო აღმასრულებლის ხელმოწერა, ბეჭედი და მოხსენებითი ბარათის წარდგენის თარიღი.

    მუხლი 8. სააღსრულებო ბიუროს უფროსის წარდგინების სახეები

სააღსრულებო ბიუროს უფროსი კანონით გათვალისწინებულ შემთხვევებში სასამართლოში შედის ერთ-ერთი შემდეგი სახის წარდგინებით:

ა) მსჯავრდებულისათვის დაკისრებული ჯარიმის სასჯელის სხვა სახით შეცვლის შესახებ;

ბ) მსჯავრდებულისათვის დანიშნული საზოგადოებისათვის სასარგებლო შრომის სასჯელის სხვა სახით შეცვლის შესახებ;

გ) მსჯავრდებულისათვის დანიშნული გამასწორებელი სამუშაოს სასჯელის სხვა სახით შეცვლის შესახებ;

დ) სასამართლოს მიერ პირობით მსჯავრდებულისათვის დაკისრებული მოვალეობის მთლიანად ან ნაწილობრივ გაუქმების ან მისთვის ახალი მოვალეობის დაკისრების შესახებ;

ე) პირობითი მსჯავრის გაუქმების შესახებ;

ვ) პირობით მსჯავრდებულისათვის ადმინისტრაციული სახდელის დაკისრების გამო გამოსაცდელი ვადის არა უმეტეს ერთი წლით გაგრძელების შესახებ;

ზ) პირობითი მსჯავრის გაუქმებისა და განაჩენით დანიშნული სასჯელის აღსრულების შესახებ;

თ) პირობით ვადამდე გათავისუფლების გაუქმებისა და სასჯელის მოუხდელი ნაწილის აღსრულების შესახებ;

ი) სასჯელის მოხდის გადავადების გაუქმებისა და განაჩენით დანიშნულ ადგილას მსჯავრდებულის სასჯელის მოსახდელად გაგზავნის შესახებ.

    მუხლი 9. წარდგინება

1. სააღსრულებო ბიუროს უფროსის მიერ სასამართლო წარდგინებაში უნდა აღინიშნოს:

ა) სასამართლო აქტის დასახელება, რომლის აღსრულების პროცესში წარმოიშვა სასამართლოსათვის წარდგინებით მიმართვის აუცილებლობა;

ბ) მონაცემები მსჯავრდებულის შესახებ და სასამართლოს მიერ მისთვის დაკისრებული მოვალეობები;

გ) ცნობები მსჯავრდებულის ყოფაქცევის შესახებ და სასამართლოსათვის წარდგინებით მიმართვის მიზეზი;

დ) წარდგინების შინაარსი.

2. წარდგინებას ხელს აწერს და სააღსრულებო ბიუროს ბეჭდით ამოწმებს სააღსრულებო ბიუროს უფროსი.

3. წარდგინებას უნდა დაერთოს წარდგინებაში მოყვანილი ფაქტების დამადასტურებელი მტკიცებულებანი.

    მუხლი 10. სააღსრულებო საქმის წარმოების დასრულება

1. სასჯელის სახით ჯარიმის დაკისრების შემთხვევაში აღსასრულებელი სასამართლო აქტის მიმართ სააღსრულებო წარმოება მთავრდება:

ა) ჯარიმის სახით დაკისრებული თანხის მთლიანად გადახდისას;

ბ) სასამართლოს მიერ ჯარიმის სხვა სახის სასჯელით შეცვლისას.

2. თანამდებობის დაკავების ან საქმიანობის უფლების ჩამორთმევის შემთხვევაში აღსასრულებელი სასამართლო აქტის მიმართ სააღსრულებო წარმოება მთავრდება სასამართლოს მიერ დადგენილი იმ ვადის გასვლისას, რომლის განმავლობაშიც პირს აკრძალული ჰქონდა გარკვეული თანამდებობის დაკავების ან საქმიანობის უფლება;

3. საზოგადოებისათვის სასარგებლო შრომის დაკისრების შემთხვევაში აღსასრულებელი სასამართლო აქტის მიმართ სააღსრულებო წარმოება მთავრდება:

ა) სასჯელის მთლიანად მოხდისას;

ბ) საზოგადოებისათვის სასარგებლო შრომის სხვა სახის სასჯელით შეცვლისას.

4. გამასწორებელი სამუშაოს დანიშვნის შემთხვევაში აღსასრულებელი სასამართლო აქტის მიმართ სააღსრულებო წარმოება მთავრდება:

ა) სასჯელის მთლიანად მოხდისას;

ბ) გამასწორებელი სამუშაოს სხვა სახის სასჯელით შეცვლისას.

5. მსჯავრდებულისათვის პირობითი მსჯავრის დაკისრების შემთხვევაში აღსასრულებელი სასამართლო აქტის მიმართ სააღსრულებო წარმოება მთავრდება:

ა) სასამართლოს მიერ დადგენილი გამოსაცდელი ვადის გასვლისას;

ბ) სასამართლოს მიერ პირობითი მსჯავრის გაუქმებისა და მსჯავრდებულისათვის ნასამართლობის მოხსნისას;

გ) სასამართლო აქტის მიღებისას, რომლის მიხედვითაც უქმდება პირობითი მსჯავრი და უნდა აღსრულდეს განაჩენით დანიშნული სასჯელი.

6. მსჯავრდებულის პირობით ვადამდე გათავისუფლების შემთხვევაში აღსასრულებელი სასამართლო აქტის მიმართ სააღსრულებო წარმოება მთავრდება:

ა) სასჯელის მოუხდელი ნაწილის ვადის გასვლისას;

ბ) სასამართლო აქტის მიღებისას, რომლის მიხედვითაც უქმდება პირობით ვადამდე გათავისუფლება და უნდა აღსრულდეს სასჯელის მოუხდელი ნაწილი.

7. ორსული ქალისათვის ან ქალისათვის, რომელსაც ჰყავს ხუთ წლამდე ასაკის შვილი, სასჯელის მოხდის გადავადების შემთხვევაში აღსასრულებელი სასამართლო აქტის მიმართ სააღსრულებო წარმოება მთავრდება:

ა) იმ ვადის გასვლის შემდეგ, რომლის განმავლობაშიც სასამართლომ გადაავადა სასჯელის აღსრულება;

ბ) სასამართლო აქტის მიღებისას, რომლის მიხედვითაც უქმდება სასჯელის მოხდის გადავადება და მსჯავრდებული სასჯელის მოსახდელად იგზავნება განაჩენით დანიშნულ ადგილას.

8. ამ მუხლის მე-7 პუნქტის „ა“ ქვეპუნქტით გათვალისწინებულ შემთხვევაში სასამართლო აღმასრულებელი სასამართლოს ატყობინებს იმ ვადის გასვლის შესახებ, რომლის განმავლობაშიც გადავადებული იყო სასჯელის აღსრულება.

9. კანონიერ ძალაში შესული აღსასრულებელი სასამართლო აქტის გაუქმების ან მსჯავრდებულის გარდაცვალების შემთხვევაში სააღსრულებო წარმოება წყდება.

10. სააღსრულებო წარმოების დასრულების შემდეგ სააღსრულებო საქმე ინახება კანონმდებლობით დადგენილი წესით.

    მუხლი 11. სასამართლო აქტების აღსრულებაზე სამსახურებრივი ზედამხედველობა და ინფორმაცია სასამართლო აქტების აღსრულების მდგომარეობის შესახებ

1. სასამართლო აქტების აღსრულებაზე კანონით დადგენილ სამსახურებრივ ზედამხედველობას ახორციელებენ საქართველოს იუსტიციის სამინისტროს, აფხაზეთისა და აჭარის ავტონომიური რესპუბლიკების იუსტიციის სამინისტროების სააღსრულებო დეპარტამენტები.

2. სააღსრულებო ბიუროს უფროსი სააღსრულებო დეპარტამენტს პერიოდულად ან მოთხოვნისამებრ წარუდგენს სტატისტიკურ ინფორმაციასა და ანგარიშს სასამართლო აქტების აღსრულების მდგომარეობის შესახებ. სტატისტიკური ანგარიშის ფორმებს ამტკიცებს სააღსრულებო დეპარტამენტის თავმჯდომარე.

    მუხლი 12. სასამართლო აღმასრულებლის მოქმედების გასაჩივრება

მსჯავრდებულს უფლება აქვს სასამართლოში გაასაჩივროს სასამართლო აღმასრულებლის მოქმედება, რომელიც დაკავშირებულია ამ კანონით გათვალისწინებული სასამართლო აქტების აღსრულებასთან.

თავი II.

სასჯელის სახით ჯარიმის დაკისრების, თანამდებობის დაკავების ან საქმიანობის უფლების ჩამორთმევის, საზოგადოებისათვის სასარგებლო შრომისა და გამასწორებელი სამუშაოს დანიშვნის შესახებ სასამართლო აქტების აღსრულების წესი

    მუხლი 13. სასჯელის სახით ჯარიმის დაკისრების შესახებ სასამართლო აქტის აღსრულება

1. ამ კანონის მე-5 მუხლის პირველი პუნქტით გათვალისწინებული წესით სასამართლო აღმასრულებელი აფრთხილებს მსჯავრდებულს, რომ იგი ვალდებულია ნებაყოფლობით გადაიხადოს დაკისრებული ჯარიმა 30 დღის განმავლობაში.

2. დადგენილ ვადაში ჯარიმის ნებაყოფლობით გადაუხდელობის შემთხვევაში სასამართლო აღმასრულებელი ჯარიმის იძულებით გადახდევინებას ახორციელებს „სააღსრულებო წარმოებათა შესახებ“ საქართველოს კანონით დადგენილი წესით.

3. თუ ჯარიმის გადახდევინება შეუძლებელია, სააღსრულებო ბიუროს უფროსი სასამართლო აღმასრულებლის მოხსენებითი ბარათის საფუძველზე და ამ კანონით დადგენილი წესით შედის სასამართლოში წარდგინებით პირისათვის დაკისრებული სასჯელის სახის შეცვლის შესახებ.

    მუხლი 14. თანამდებობის დაკავების ან საქმიანობის უფლების ჩამორთმევა

1. თანამდებობის დაკავების ან საქმიანობის უფლების ჩამორთმევის შესახებ სასამართლო აქტის აღსრულებისას სასამართლო აღმასრულებელი მსჯავრდებულის შრომის წიგნაკში აკეთებს აღნიშვნას თანამდებობის დაკავების ან საქმიანობის უფლების ჩამორთმევის შესახებ სასამართლოს მიერ განსაზღვრული ვადის მითითებით.

2. სასამართლო აღმასრულებელი პერიოდულად აკონტროლებს მსჯავრდებულის მიერ მასზე დაკისრებული მოვალეობების შესრულებას.

3. თუ სასამართლო აღმასრულებელი დაადგენს, რომ მსჯავრდებულს დაკავებული აქვს ის თანამდებობა ან ეწევა ისეთ საქმიანობას, რომელიც აკრძალული აქვს სასამართლო აქტით, იგი სამუშაოს მიმცემ თანამდებობის პირს წინადადებით მიმართავს გაათავისუფლოს მსჯავრდებული დაკავებული თანამდებობიდან ან აუკრძალოს მას სასამართლო აქტში მითითებული საქმიანობა.

4. სასამართლო აღმასრულებლის მიერ სამუშაოს მიმცემი თანამდებობის პირისათვის გაგზავნილი წინადადება უნდა შეიცავდეს გაფრთხილებას სასამართლო აქტის შეუსრულებლობისათვის ან მისი შესრულების ხელის შეშლისათვის მოსალოდნელი სისხლისსამართლებრივი პასუხისმგებლობის შესახებ.

5. თუ სამუშაოს მიმცემი თანამდებობის პირი სასამართლო აღმასრულებლის წინადადების მიღებიდან ერთი კვირის განმავლობაში არ გაათავისუფლებს მსჯავრდებულს დაკავებული თანამდებობიდან ან არ შეუცვლის მას საქმიანობის სფეროს, სისხლის სამართლის საქმის აღძვრის საკითხის გადასაწყვეტად შესაბამისი მასალები გადაეგზავნება პროკურატურის ორგანოს.

    მუხლი 15. საზოგადოებისათვის სასარგებლო შრომის დანიშვნის შესახებ სასამართლო აქტის აღსრულება

1. საზოგადოებისათვის სასარგებლო შრომის დანიშვნის შესახებ სასამართლო აქტის აღსასრულებლად მიღებისას სასამართლო აღმასრულებელი ადგილობრივი თვითმმართველობისა და მმართველობის შესაბამის ორგანოს უგზავნის მოთხოვნას საზოგადოებისათვის სასარგებლო შრომის სახისა და მსჯავრდებულის სამუშაო ადგილის განსაზღვრის შესახებ. მოთხოვნაში მითითებული უნდა იყოს სასამართლოს მიერ განსაზღვრული საზოგადოებისათვის სასარგებლო შრომის მთლიანი ვადა და სისხლის სამართლის კოდექსით დადგენილი ასეთი სახის შრომის ყოველდღიური ხანგრძლივობა.

2. საზოგადოებისათვის სასარგებლო შრომა შეიძლება განხორციელდეს დღის ნებისმიერ მონაკვეთში, მსჯავრდებულის თავისუფალი დროის გათვალისწინებით.

3. ადგილობრივი თვითმმართველობისა და მმართველობის ორგანო ვალდებულია მოთხოვნის მიღებიდან ერთი თვის განმავლობაში წერილობით აცნობოს სასამართლო აღმასრულებელს საზოგადოებისათვის სასარგებლო სამუშაოს სახის, მისი ხანგრძლივობის და მსჯავრდებულის სამუშაო ადგილის შესახებ. ცნობაში მითითებული უნდა იყოს სამუშაოს მიმცემის დასახელება და მისამართი.

4. თუ ადგილობრივი თვითმმართველობისა და მმართველობის ორგანოს მიერ შეთავაზებული სამუშაოს ხანგრძლივობა სასამართლოს მიერ საზოგადოებისათვის სასარგებლო შრომისათვის განსაზღვრულ ვადაზე ნაკლებია, ადგილობრივი თვითმმართველობისა და მმართველობის ორგანო ვალდებულია შეთავაზებული სამუშაოს ვადის გასვლამდე განსაზღვროს და აცნობოს სასამართლო აღმასრულებელს მსჯავრდებულის ახალი სამუშაო ადგილი.

5. მსჯავრდებულს თავისი სურვილით, სათანადო პირობების არსებობის შემთხვევაში, უფლება აქვს საზოგადოებისათვის სასარგებლოდ იმუშაოს დასვენების დღეებში.

6. მსჯავრდებულის მიერ საზოგადოებისათვის სასარგებლო შრომის ხანგრძლივობის, შესრულებული სამუშაოს მოცულობის აღრიცხვას ახორციელებს და შესაბამის ჩანაწერებს აწარმოებს სამუშაოს მიმცემი. სასამართლო აღმასრულებელი, მსჯავრდებულისათვის დაკისრებული სასჯელის ამ სახის ვადის შესაბამისად, პერიოდულად აკონტროლებს სამუშაოს მიმცემის ჩანაწერების სისწორეს და მონაცემები სამუშაოს შესრულების შესახებ შეაქვს ოქმში.

7. თუ მსჯავრდებული უარს განაცხადებს საზოგადოებისათვის სასარგებლო შრომაზე ან ჯიუტად თავს არიდებს მას, სააღსრულებო ბიუროს უფროსი ამ კანონით დადგენილი წესით მიმართავს სასამართლოს წარდგინებით საზოგადოებისათვის სასარგებლო შრომის სასჯელის სხვა სახით შეცვლის შესახებ.

    მუხლი 16. გამასწორებელი სამუშაოს დანიშვნის შესახებ სასამართლო აქტის აღსრულება

1. გამასწორებელი სამუშაოს დანიშვნის შესახებ სასამართლო აქტის აღსასრულებლად მიღების შემდეგ ან მსჯავრდებულის სხვა სამუშაო ადგილზე გადასვლისას სასამართლო აღმასრულებელი მსჯავრდებულის სამუშაოს მიმცემს უგზავნის მოთხოვნას მსჯავრდებულის ხელფასიდან სასამართლოს მიერ დადგენილი პროცენტული ოდენობის შესაბამისი თანხის სახელმწიფო შემოსავალში დაქვითვის შესახებ.

2. სამუშაოს მიმცემისათვის გაგზავნილ მოთხოვნაში მითითებული უნდა იყოს სასამართლო აქტის შეუსრულებლობის ან მისი შესრულების ხელის შეშლისათვის მოსალოდნელი სისხლისსამართლებრივი პასუხისმგებლობის შესახებ.

3. სასამართლო აღმასრულებელი აკონტროლებს სამუშაოს მიმცემის მიერ სახელმწიფო შემოსავალში მსჯავრდებულის ხელფასიდან თანხების დაქვითვის სისწორეს და შესაბამისი საფუძვლის არსებობის შემთხვევაში სისხლის სამართლის საქმის აღძვრის საკითხის გადასაწყვეტად მასალებს უგზავნის პროკურატურის ორგანოს.

4. თუ მსჯავრდებული სასჯელის მოხდის პროცესში სამუშაოს მიმცემის ინიციატივით გათავისუფლდა სამუშაოდან, სასამართლო აღმასრულებელი შესაბამის დასაქმების სამსახურს მიმართავს თხოვნით მსჯავრებულის სამუშაო ადგილით უზრუნველყოფის შესახებ. არსებული სამუშაო ადგილის შეთავაზების შესახებ დაუყოვნებლივ ეცნობება მსჯავრდებულს.

5. თუ მსჯავრდებული ჯიუტად თავს არიდებს გამასწორებელ სამუშაოს, სააღსრულებო ბიუროს უფროსი ამ კანონით დადგენილი წესით სასამართლოს მიმართავს წარდგინებით გამასწორებელი სამუშაოს სასჯელის სხვა სახით შეცვლის შესახებ.

თავი III.

 მსჯავრდებულის მიმართ პრობაციის ღონისძიებების გამოყენების (პირობითი მსჯავრის დანიშვნის, სასჯელის მოხდისაგან პირობით ვადამდე გათავისუფლებისა და სასჯელის მოხდის გადავადების) შესახებ სასამართლო აქტის აღსრულების წესი

    მუხლი 17. სასამართლო აღმასრულებლისა და პენიტენციალური სისტემის სოციალური მუშაკის უფლებამოსილებანი სასამართლო აქტის აღსრულების პროცესში პრობაციის ღონისძიებების გამოყენების შესახებ

1. სასამართლო აღმასრულებელი ამ კანონის პირველი მუხლის „ე“-„ზ“ ქვეპუნქტებით გათვალისწინებული სასამართლო აქტის აღსრულების პროცესში პრობაციის ღონისძიების გამოყენების შესახებ:

ა) აკონტროლებს სასამართლოს მიერ მსჯავრდებულისათვის დაკისრებული მოვალეობების შესრულებას;

ბ) აკონტროლებს მსჯავრდებულის ყოფაქცევას და უწევს მას დახმარებას;

გ) ატარებს მსჯავრდებულთან აღმზრდელობითი ხასიათის ღონისძიებებს;

დ) შეძლებისდაგვარად ეხმარება მას შრომით მოწყობაში;

ე) ახორციელებს სხვა ღონისძიებებს, რომლებიც ხელს შეუწყობს მსჯავრდებულის რესოციალიზაციას, რისთვისაც, საჭიროების შემთხვევაში, ამყარებს საქმიან ურთიერთობებს ადგილობრივი თვითმმართველობისა და მმართველობის ორგანოებთან, სხვა სახელმწიფო და არასახელმწიფო ორგანოებთან, დაწესებულებებთან და ორგანიზაციებთან.

2. სასამართლო აღმასრულებელს სასამართლოს მიერ მსჯავრდებულისათვის დაკისრებული მოვალეობების შესრულების დროს, მისი ყოფაქცევის კონტროლის განხორციელებისას უფლება აქვს:

ა) პერიოდულად დაიბაროს მსჯავრდებული და ჩამოართვას მას ახსნა-განმარტება;

ბ) მიიღოს ინფორმაცია მსჯავრდებულის ყოფაქცევის შესახებ მისი ნათესავებისაგან, ნაცნობებისაგან, სამუშაო ადგილიდან და სასწავლო დაწესებულებიდან;

გ) გამოითხოვოს მსჯავრდებულის შესახებ არსებული ინფორმაცია სახელმწიფო და შესაბამისი სამკურნალო დაწესებულებებიდან.

3. ამ მუხლის პირველი პუნქტის „გ“-„ე“ ქვეპუნქტებით გათვალისწინებულ ღონისძიებებს ახორციელებს აგრეთვე პენიტენციალური სისტემის სოციალური სამსახურის მუშაკი, რომლის სამუშაო ადგილია სააღსრულებო ბიურო. პენიტენციალური სისტემის სოციალური სამსახურის მუშაკად, როგორც წესი, შეიძლება დაინიშნოს უმაღლესი სოციოლოგიური, ფსიქოლოგიური და პედაგოგიური, განათლების მქონე პირი.

    მუხლი 18. მსჯავდრებულის მიერ საცხოვრებელი ადგილის შეცვლა

1. თუ სასამართლო თავისი აქტით მსჯავრდებულს დააკისრებს მოვალეობას არ შეიცვალოს საცხოვრებელი ადგილი სასჯელის აღმასრულებელი ორგანოს თანხმობის გარეშე, საცხოვრებელი ადგილის შეცვლის შესახებ მსჯავრდებულის განცხადებას იხილავს და გადაწყვეტილებას იღებს სააღსრულებო ბიუროს უფროსი.

2. საცხოვრებელი ადგილის შეცვლის ნებართვის გაცემის შესახებ ბიუროს უფროსის გადაწყვეტილება მსჯავრდებულს ეცნობება წერილობით ბიუროს უფროსის მიერ განცხადების მიღებიდან არა უგვიანეს ორი კვირის ვადაში.

3. თუ სასამართლომ მსჯავრდებულს არ დააკისრა ამ მუხლის პირველი პუნქტით გათვალისწინებული მოვალეობა, იგი საცხოვრებელი ადგილის შეცვლის შესახებ ერთი თვით ადრე აცნობებს კონტროლის განმახორციელებელ ორგანოს.

4. მსჯავრდებულის მიერ საცხოვრებელი ადგილის შეცვლის შემთხვევაში სააღსრულებო საქმე გადაეგზავნება სააღსრულებო ბიუროს მსჯავრდებულის ახალი საცხოვრებელი ადგილის მიხედვით, რის შესახებაც კეთდება ჩანაწერი სარეგისტრაციო ჟურნალში.

    მუხლი 19. სასჯელის აღსრულებაგადავადებული მსჯავრდებულისათვის გაფრთხილების მიცემა

თუ მსჯავრდებული, რომელსაც სასამართლომ გადაუვადა სასჯელის მოხდა უარს აცხადებს შვილზე ან თავს არიდებს მის აღზრდას, სასამართლო აღმასრულებელი აფრთხილებს მას წერილობით ასეთი ქმედების შესაძლო შედეგების შესახებ, რაზედაც დგება შესაბამისი ოქმი.

    მუხლი 20. სასამართლო აღმასრულებლის მიერ მსჯავრდებულისათვის დაკისრებული მოვალეობის სასამართლოსათვის შეტყობინება

1. სასამართლო აღმასრულებელი სასამართლოს მიერ მსჯავრდებულისათვის დაკისრებული მოვალეობის შეუსრულებლობის ყოველ კონკრეტულ ფაქტს ატყობინებს სასამართლოს.

2. შეტყობინება უნდა შეიცავდეს:

ა) შეტყობინების გაგზავნის თარიღს;

ბ) სასამართლო აქტის დასახელებას, რომლის საფუძველზედაც მოხდა მსჯავრდებულისათვის მოვალეობის დაკისრება;

გ) მსჯავრდებულისათვის დაკისრებულ მოვალეობას;

დ) მსჯავრდებულის მიერ ჩადენილი ქმედების აღწერას, რის შედეგადაც არ შესრულდა სასამართლოს მიერ მისთვის დაკისრებული მოვალეობა და აღნიშნული ქმედების ჩადენის დამადასტურებელ ფაქტებს;

ე) სასამართლო აღმასრულებლის ხელმოწერასა და ბეჭედს.

    მუხლი 21. მსჯავრდებულის მიერ სასამართლო აქტით დაკისრებული მოვალეობის ჯიუტად ან სისტემატურად შეუსრულებლობა

1. მსჯავრდებულის მიერ სასამართლო აქტით მისთვის დაკისრებული მოვალეობის ჯიუტად შეუსრულებლობად ჩაითვლება მსჯავრდებულის აშკარა დაუმორჩილებლობა სასამართლო აღმასრულებლის კანონიერი მოთხოვნისადმი, ან უარი მისთვის დაკისრებული მოვალეობის შესრულებაზე.

2. მსჯავრდებულის მიერ სასამართლო აქტით მისთვის დაკისრებული მოვალეობების სისტემატურად შეუსრულებლობად ჩაითვლება დაკისრებული მოვალეობების არანაკლებ სამჯერ შეუსრულებლობა.

თავი IV.

გარდამავალი და დასკვნითი დებულებანი

    მუხლი 22. ამ კანონის ამოქმედებამდე მიღებული სასამართლო აქტების აღსრულება

1. ამ კანონის ამოქმედებამდე მიღებული სასამართლო აქტები აღსრულდება ამ კანონით დადგენილი წესით.

2. ამ კანონის ამოქმედებიდან ორი თვის ვადაში საქართველოს შინაგან საქმეთა და იუსტიციის სამინისტროებმა უზრუნველყონ შინაგან საქმეთა სამინისტროს ორგანოებში არსებული ამ კანონით გათვალისწინებული აღსასრულებელი სასამართლო აქტების სააღსრულებო ბიუროებისათვის აღსასრულებლად გადაცემა.

3. ამ კანონის ამოქმედებისთანავე ძალადაკარგულად ჩაითვალოს საქართველოს იუსტიციის მინისტრის 2000 წლის 24 მაისის №80 ბრძანება „პრობაციის სამსახურის ფუნქციების განხორციელებისა და „პირობითი მსჯავრის დანიშვნის, სასჯელის მოხდისაგან პირობით ვადამდე გათავისუფლების და სასჯელის მოხდის გადავადების შესახებ სასამართლო აქტების აღსრულების დროებითი წესის“ დამტკიცების შესახებ“.

    მუხლი 23. კანონის ამოქმედება

ეს კანონი ამოქმედდეს გამოქვეყნებისთანავე.

საქართველოს პრეზიდენტი    ე. შევარდნაძე

თბილისი,

2001 წლის 19 ივნისი.

№943–IIს