საჯარო ინფორმაციის ელექტრონულად მოთხოვნის სტანდარტისა და საჯარო ინფორმაციის პროაქტიულად გამოქვეყნების წესის დამტკიცების შესახებ

   „საქართველოს დედაქალაქის - თბილისის შესახებ“ საქართველოს კანონის 23¹ მუხლის „ფ“ ქვეპუნქტისა და 28-ე მუხლის, საქართველოს ზოგადი ადმინისტრაციული კოდექსის 28-ე მუხლის მე-2 ნაწილისა და 37-ე მუხლის მე-4 ნაწილის, 218-ე მუხლის მე-4 ნაწილის შესაბამისად, ქ. თბილისის მთავრობა ადგენს:

ქ. თბილისის მერიის ოფიციალურ ვებგვერდზე www.Tbilisi.gov.ge გამოქვეყნდეს ქ. თბილისის მერიაში მიღებული ყველა ადმინისტრაციულ–სამართლებრივი აქტი (გადაწყვეტილება), რომელიც არ შეიცავს სახელმწიფო ან/და კომერციულ საიდუმლოებას ან სხვა პირის პერსონალურ მონაცემებს მიკუთვნებულ ინფორმაციას, ასევე ის ინფორმაცია, რომელიც არ არის გამოქვეყნებული სხვა წესით.

ქ. თბილისის მერიის ადმინისტრაციის შესაბამისი სამსახურები, ამ დადგენილების პირველი პუნქტით გათვალისწინებულ დოკუმენტებს დამუშავებული სახით, ელექტრონული კომუნიკაციის საშუალებების გამოყენებით აწვდიან ქ. თბილისის მერიის საჯარო ინფორმაციის ხელმისაწვდომობის უზრუნველყოფასა და ინფორმაციის პროაქტიულ გამოქვეყნებაზე პასუხისმგებელ პირს, რომელიც ეცნობა მათ და კანონმდებლობასთან შესაბამისობის დადგენის შემდეგ აქვეყნებს  ქ. თბილისის მერიის ოფიციალურ ვებგვერდზე www.Tbilisi.gov.ge

ქ. თბილისის მერიის სტრუქტურული ერთეულები - საქალაქო სამსახურები, ამ დადგენილების პირველი პუნქტით გათვალისწინებულ დოკუმენტებს დამუშავებული სახით, ელექტრონული კომუნიკაციის საშუალებების გამოყენებით აწვდიან ქ. თბილისის მერიის საჯარო ინფორმაციის ხელმისაწვდომობის უზრუნველყოფასა და ინფორმაციის პროაქტიულ გამოქვეყნებაზე პასუხისმგებელ პირს, რომელიც ეცნობა მათ და კანონმდებლობასთან შესაბამისობის დადგენის შემდეგ აქვეყნებს  ქ. თბილისის მერიის ოფიციალურ ვებგვერდზე www.Tbilisi.gov.ge.

ქ. თბილისის რაიონული გამგეობების სტრუქტურული ერთეულები, ამ დადგენილების პირველი პუნქტით გათვალისწინებულ დოკუმენტებს დამუშავებული სახით, ელეტრონული კომუნიკაციის საშუალებების გამოყენებით აწვდიან შესაბამისი რაიონული გამგეობის საჯარო ინფორმაციის ხელმისაწვდომობის უზრუნველყოფასა და ინფორმაციის პროაქტიულ გამოქვეყნებაზე პასუხისმგებელ პირს, რომელიც ეცნობა მათ და ამ დადგენილების პირველ პუნქტთან შესაბამისობის დადგენის შემდეგ აქვეყნებს ქ. თბილისის მერიის ოფიციალურ ვებგვერდზე www.Tbilisi.gov.ge.

საჯარო ინფორმაციის ელექტრონულად მოთხოვნა შესაძლებელია foi@tbilisi.gov.ge მისამართზე შესაბამისი მოთხოვნის გამოგზავნით.

ამ დადგენილების მე-4 პუნქტით გათვალისწინებული მოთხოვნა უნდა მომზადდეს წერილობითი ფორმით, ყველა იმ რეკვიზიტის მითითებით, რომელიც გათვალისწინებულია საქართველოს ზოგადი ადმინისტრაციული კოდექსის 78-ე მუხლით. ასეთი წესით მომზადებული განცხადებისა და მოთხოვნის ავტორის პირადობის დამადასტურებელი დოკუმენტის PDF ფორმატში სკანირებული ფაილი ან ფაილები გადმოგზავნილი უნდა იქნეს შესაბამის ელექტონული ფოსტის მისამართზე.

ამ დადგენილების მე-4 და მე-5 პუნქტის მოთხოვნების გაუთვალისწინებლობა განაცხადის განუხილველად დატოვების საფუძველია.

ქ. თბილისის მერიის მიერ დაფუძნებული საჯარო სამართლის იურიდიული პირები საჯარო ინფორმაციის ელექტრონულად მოთხოვნის სტანდარტსა და საჯარო ინფორმაციის პროაქტიულად გამოქვეყნების წესს განსაზღვრავენ მათ მიერ გამოცემული აქტებით.

 დადგენილება ძალაში შედის გამოქვეყნებისთანავე.