„თესლისა და სარგავი მასალის საქართველოში გავრცელების დამატებითი პირობების“ დამტკიცების შესახებ

დადგენილება ამოქმედდეს 2014 წლის პირველი მარტიდან.

1. „თესლისა და სარგავი მასალის საქართველოში გავრცელების დამატებითი პირობები“ აწესრიგებს თესლისა და სარგავი მასალის საქართველოში გავრცელებასთან დაკავშირებულ ურთიერთობებს.

2. წინამდებარე პირობებით დადგენილი მოთხოვნები არ ვრცელდება ოჯახური გამოყენებისათვის განკუთვნილი და გენეტიკურად მოდიფიცირებული თესლისა და სარგავი მასალის რეგულირებაზე. 

1. წინამდებარე პირობებში გამოყენებულ ტერმინებს აქვთ შემდეგი მნიშვნელობა:

ა) თესლი – სათესი მასალის ყველა ბოტანიკური სახე, რომელიც განკუთვნილია მცენარის გამრავლებისათვის (აღწარმოებისათვის), მათ შორის, საკუთრივ თესლი, მცენარის ნაყოფი, რთული ნაყოფის ნაწილები, თანანაყოფი და სხვა;

ბ) სარგავი მასალა – მცენარე და მათი ვეგეტაციური ორგანოები, რომლებიც განკუთვნილია მცენარის გამრავლებისათვის;

გ) თესლის კატეგორიები:

გ.ა) საბაზისო თესლი (ელიტა) – მცენარის წინასაბაზისო თესლის გამრავლებით მიღებული თესლი, რომელზედაც პასუხისმგებელია ჯიშის შემნარჩუნებელი;

გ.ბ) პირველი რეპროდუქციის თესლი – საბაზისო თესლის გამრავლებით მიღებული თესლი;

გ.გ) მეორე რეპროდუქციის თესლი – პირველი რეპროდუქციის თესლის გამრავლებით მიღებული სათესლე მასალა;

დ) თესლის და სარგავი მასალის ხარისხი – თესლის და სარგავი მასალის მაჩვენებლების ერთობლიობა, რითაც განისაზღვრება მათი დასათესად/დასარგავად გამოყენების ვარგისიანობა და დასტურდება ხარისხის სერტიფიკატით;

 ე) ხარისხის სერტიფიკატი – დოკუმენტი, რომლითაც სერტიფიკაციის ორგანო ადასტურებს თესლისა და სარგავი მასალის შესაბამისობას დადგენილ მოთხოვნებთან;

 ვ) ფიტოსანიტარიული სერტიფიკატი − დოკუმენტი, რომელიც მომზადებულია მცენარეთა დაცვის საერთაშორისო კონვენციით დამტკიცებული ფორმის შესაბამისად და ადასტურებს, რომ ტვირთი შეესაბამება იმპორტის ფიტოსანიტარიულ მოთხოვნებს.

საქართველოს ტერიტორიაზე გასავრცელებლად დაშვებას ექვემდებარება მცენარეთა ჯიშების შემდეგი თესლი და სარგავი მასალა:

ა) ადგილობრივი და უცხოური წარმოშობის მცენარეთა ჯიშების და ჰიბრიდების თესლი და სარგავი მასალა;

ბ) საქართველოს კანონმდებლობის შესაბამისად სამართლებრივად დაცული ჯიშების და ჰიბრიდების თესლი და სარგავი მასალა.

1. საქართველოს ტერიტორიაზე თესლისა და სარგავი მასალის ხარისხის შესაბამისობის შეფასებას და სერტიფიკაციას ახორციელებს საქართველოს კანონმდებლობით დადგენილი წესით აკრედიტებული სერტიფიკაციის ორგანო.

 2. საქართველო, კანონმდებლობით განსაზღვრული წესით, აღიარებს საერთაშორისო აკრედიტაციის მქონე შესაბამისობის შემფასებელი ორგანოს მიერ გაცემულ სერტიფიკატს.

1. ქვეყნის ტერიტორიაზე გასავრცელებლად დაიშვება თესლი და სარგავი მასალა. თესლი უნდა შეესაბამებოდეს საბაზისო თესლს (ელიტურ თესლს), პირველი და მეორე რეპროდუქციის თესლს, ხოლო სარგავი მასალა – პირველი ან მეორე ხარისხის მასალას, რომელსაც უნდა ახლდეს:

ა) ხარისხის სერტიფიკატი;

ბ) ფიტოსანიტარიული სერტიფიკატი.

 2. 2015 წლის პირველ აგვისტომდე, საქართველოში გასავრცელებლად დაიშვება აგრეთვე არასერტიფიცირებული თესლი და სარგავი მასალა, რომლის ეტიკეტზე ან/და თანმხლებ დოკუმენტაციაში მითითებული უნდა იქნეს ინფორმაცია - ,,არასერტიფიცირებული“.

3. ქვეყანაში თესლისა და სარგავი მასალის მწარმოებელი პირი ვალდებულია საქართველოს სოფლის მეურნეობის სამინისტროს ყოველწლიურად მიაწოდოს შემდეგი ინფორმაცია:

 ა) პირის დასახელების და იურიდიული მისამართის შესახებ;

ბ) თესლისა და სარგავი მასალის წარმოებისათვის გამოყენებული მიწის ფართობის ოდენობისა და ადგილმდებარეობის შესახებ;

გ) წარმოებული თესლისა და სარგავი მასალის ჯიშის (ჰიბრიდის) სახეობისა და კატეგორიის შესახებ.

1. პირი (მწარმოებელი/დისტრიბუტორი) ვალდებულია საქართველოში თესლისა და სარგავი მასალის რეალიზაციისას მომხმარებელს მიაწოდოს თესლისა და სარგავი მასალის შესახებ აუცილებელი და უტყუარი ინფორმაცია, კერძოდ:

 ა) პირის დასახელება და მისამართი;

 ბ) წარმოების თარიღი, შენახვის ვადა და პირობები (საჭიროების შემთხვევაში);

 გ) წონა ან/და მოცულობა;

 დ) თესლის კატეგორია.

 2. დაფასოებული თესლისა და სარგავი მასალისათვის ამ მუხლის პირველი პუნქტით განსაზღვრული მოთხოვნები დატანილი უნდა იქნეს ყოველ შეფუთულ ერთეულზე, ხოლო დაუფასოებელ თესლსა და სარგავ მასალას უნდა ახლდეს ინფორმაციის სახით.

 3. ქიმიური და ბიოლოგიური საშუალებებით დამუშავებულ თესლსა და სარგავ მასალას აგრეთვე უნდა ახლდეს ინსტრუქცია პრეპარატის დასახელებისა და მასთან მოპყრობის წესების მითითებით.

1. თესლისა და სარგავი მასალის იმპორტი ხორციელდება საქართველოს კანონმდებლობით დადგენილი წესით.

 2. სამეცნიერო-სელექციური მიზნებისა და გამოფენაზე ექსპონირებისათვის განკუთვნილი თესლი და სარგავი მასალა საქართველოში შეიძლება შემოტანილი იქნეს ხარისხის დამადასტურებელი სერტიფიკატის გარეშე.

ამ დადგენილებით გათვალისწინებული მოთხოვნების დარღვევისათვის პირს დაეკისრება პა­სუ­ხის­მგებლობა მოქმედი კანონმდებლობის შესაბამისად.