„ბრალდებულთა/მსჯავრდებულთა რეესტრებისა და პირადი საქმის წარმოების წესის დამტკიცების შესახებ“ საქართველოს სასჯელაღსრულების, პრობაციისა და იურიდიული დახმარების საკითხთა მინისტრის 2011 წლის 10 მაისის №82 ბრძანებაში ცვლილების შეტანის თაობაზე

„12². საქართველოს სასჯელაღსრულებისა და პრობაციის სამინისტროს პენიტენციური დაწესებულების დირექტორი შეწყალების საკითხთა კომისიას,  მომართვის საფუძველზე, „შეწყალების წესის დამტკიცების შესახებ“ საქართველოს პრეზიდენტის 2014 წლის 27 მარტის №120 ბრძანებულებით დადგენილ ვადაში, უგზავნის მსჯავრდებულის დახასიათებას ამ წესის დანართი №18-ის შესაბამისად.

12³. ამ მუხლის 12² პუნქტით გათვალისწინებულ შემთხვევაში, შეწყალების საკითხთა კომისიისათვის ცნობის გაგზავნის შემდგომ, თუ მსჯავრდებულის მიმართ  გამოყენებულ იქნა წახალისების ზომები ან/და მას დაეკისრა დისციპლინური  პასუხისმგებლობა, აგრეთვე თუ მსჯავრდებული სასჯელის მოხდისაგან გათავისუფლდა პირობით ვადამდე, თავისუფლების აღკვეთის სახით დანიშნული სასჯელი შეეცვალა უფრო მსუბუქი სახის სასჯელით, მის მიმართ მიმდინარეობს სისხლისსამართლებრივი დევნა ან მიღებულია გამამტყუნებელი განაჩენი სხვა სისხლის სამართლის საქმეზე, დაწესებულების დირექტორი ვალდებულია ზემოაღნიშნული გარემოებების დადგომიდან არაუმეტეს 3 სამუშაო დღის ვადაში შეწყალების საკითხთა კომისიას გაუგზავნოს ამ პუნქტით გათვალისწინებული ინფორმაცია.

12⁴. დაწესებულების დირექტორი ვალდებულია ყოველი თვის ბოლოს საქართველოს სასჯელაღსრულებისა და პრობაციის მინისტრს წარუდგინოს ანგარიში, ამ მუხლის 12² და 12³ პუნქტებით გათვალისწინებულ შემთხვევაში, შეწყალების საკითხთა კომისიისათვის გაგზავნილი ცნობების და ინფორმაციის შესახებ.“.