„თავისუფლების ქარტია“ საქართველოს კანონით განსაზღვრული კომისიის შემადგენლობისა და საქმიანობის წესის შესახებ დებულების დამტკიცების თაობაზე

დანართი

„თავისუფლების ქარტია“ საქართველოს კანონით

განსაზღვრული კომისიის საქმიანობის წესი

მუხლი1. კომისიის მიზანი

საქართველოს სახელმწიფო უსაფრთხოების სამსახურში „თავისუფლების ქარტია“ საქართველოს კანონით განსაზღვრული კომისიის შექმნის მიზანია:

ა) ყოფილი სსრკ-ის სპეციალური სამსახურების საიდუმლო თანამშრომლების, „თავისუფლების ქარტია“ საქართველოს კანონით დადგენილი თანამდებობის პირების რეგისტრაცია, ნებაყოფლობითი აღიარებისა და რეესტრის წარმოება;

ბ) კომუნისტური ტოტალიტარული და ფაშისტური იდეოლოგიების და პროპაგანდის აკრძალვა;

გ) „თავისუფლების ქარტია“ საქართველოს კანონით განსაზღვრული სხვა მიზნების განხორციელება.

მუხლი 2. კომისიის ფუნქციები და ამოცანები

1. კომისიის წევრებს საქართველოს კანონმდებლობით დადგენილი წესით უნდა გაუფორმდეთ სახელმწიფო საიდუმლოებასთან დაშვების პირველი („განსაკუთრებული მნიშვნელობის“) ფორმა.

2. კომისია:

ა) შესაბამისი ელექტრონული ან მატერიალური ფორმების გამოყენებით აგროვებს მონაცემებს და აწარმოებს იმ პირთა რეესტრს, რომლებიც საიდუმლოდ თანამშრომლობდნენ ყოფილი სსრკ-ის სპეციალურ სამსახურებთან ან რომელთა შესახებ საქართველოს კანონმდებლობით დადგენილი წესით მიღებული მონაცემები ყოფილი სსრკ-ის სპეციალურ სამსახურებთან მათ ფარულ კავშირზე მიუთითებს;

ბ) აგროვებს ინფორმაციას ადმინისტრაციული ორგანოების მიერ კომუნისტური ტოტალიტარული ან/და ფაშისტური სიმბოლიკის, აგრეთვე სახელმწიფო ან ადგილობრივი თვითმმართველობის საკუთრებაზე გამოყენების თაობაზე, ასევე საკულტო ნაგებობების, ძეგლების, მონუმენტების, ბარელიეფების, წარწერების შესახებ, ქუჩების, მოედნების, სოფლებისა და დაბების სახელწოდებების, აგრეთვე მასობრივი თავშეყრის სხვა ადგილების თაობაზე, რომლებიც შეიცავს კომუნისტური ტოტალიტარული და ფაშისტური იდეოლოგიების და პროპაგანდის ელემენტებს თუ ამ იდეოლოგიების ლიდერთა სახელებს.

3. კომისია იღებს გადაწყვეტილებას რეესტრში იმ პირთა შესახებ მონაცემების შეტანის თაობაზე, რომლებიც საიდუმლოდ თანამშრომლობდნენ ან ფარული კავშირი ჰქონდათ ყოფილი სსრკ-ის სპეციალურ სამსახურებთან.

4. კომისია უზრუნველყოფს იმ პირთა მიერ მოწოდებული ინფორმაციის საიდუმლოებას, რომლებიც საიდუმლოდ თანამშრომლობდნენ ან ფარული კავშირი ჰქონდათ ყოფილი სსრკ-ის სპეციალურ სამსახურებთან, გარდა „თავისუფლების ქარტია“ საქართველოს კანონით დადგენილი გამონაკლისებისა.

5. კომუნისტური ტოტალიტარული და ფაშისტური იდეოლოგიების მატარებელი სიმბოლიკის, ძეგლების, ბარელიეფების, წარწერების, სახელწოდებების აღმოფხვრის მიზნით კომისია მიმართავს უფლებამოსილ პირს. კომისიის მიმართვის შემთხვევაში უფლებამოსილი პირი ვალდებულია აღმოფხვრას კომუნისტური ტოტალიტარული ან/და ფაშისტური სიმბოლიკა.

6. კომისია საჯაროდ აცხადებს მხოლოდ იმ პირთა ვინაობას და მათ შესახებ მონაცემებს, რომლებიც საიდუმლოდ თანამშრომლობდნენ ან ფარული კავშირი ჰქონდათ ყოფილი სსრკ-ის სპეციალურ სამსახურებთან, უკავიათ „თავისუფლების ქარტია“ კანონის მე-8 მუხლით განსაზღვრული თანამდებობა და ნებაყოფლობით, ამავე კანონით დადგენილ ვადაში არ განაცხადებენ უარს ამ თანამდებობაზე.

7. კომისია ამ მუხლის მე-6 პუნქტით გათვალისწინებულ გადაწყვეტილებას იღებს დახურულ სხდომაზე. ამ სხდომაზე საქართველოს ზოგადი ადმინისტრაციული კოდექსით დადგენილი წესით მოწვეული უნდა იყოს პირი, რომლის შესახებაც მიიღება გადაწყვეტილება. კომისიის გადაწყვეტილება ძალაში შედის მიღებიდან 1 თვის ვადაში. პირი, რომლის შესახებაც იქნა მიღებული ეს გადაწყვეტილება, უფლებამოსილია გაასაჩივროს იგი სასამართლოში. სასამართლოს მიერ სარჩელის წარმოებაში მიღება აჩერებს კომისიის გადაწყვეტილების მოქმედებას.

8. კომისიის სხვა ფუნქცია-მოვალეობები ასევე განისაზღვრება „თავისუფლების ქარტია“ საქართველოს კანონით.

მუხლი 3. კომისიის მუშაობის ორგანიზაციულ-სამართლებრივი საკითხები

1. კომისია იკრიბება საჭიროების შემთხვევაში.

2. კომისიას იწვევს კომისიის თავმჯდომარე ან კომისიის წევრთა 1/3. კომისიის სხდომა უფლებამოსილია, თუ მას ესწრება კომისიის წევრთა შემადგენლობის ნახევარზე მეტი. კომისიაში თითოეულ წევრს აქვს ერთი ხმის უფლება.

3. კომისიის გადაწყვეტილება მიიღება ღია კენჭისყრით, დამსწრე კომისიის წევრთა ხმების უბრალო უმრავლესობით. ხმების თანაბრად გაყოფის შემთხვევაში გადამწყვეტია კომისიის თავმჯდომარის ხმა.

4. კომისია გადაწყვეტილებას იღებს 10 სამუშაო დღის ვადაში.

5. კომისიის თავმჯდომარე უფლებამოსილია მიმართოს „თავისუფლების ქარტია“ საქართველოს კანონით განსაზღვრულ თანამდებობის პირს ან ორგანოს ამ კანონით გათვალისწინებული შესაბამისი ინფორმაციის გამოთხოვის მიზნით.

6. საჭიროების შემთხვევაში კომისია უფლებამოსილია შექმნას სამუშაო ჯგუფი (ჯგუფები).

7. კომისიის სხდომა ფორმდება ოქმით, რომელსაც ხელს აწერს სხდომის თავმჯდომარე და მდივანი.

8. კომისიის სხდომის ოქმს აფორმებს კომისიის სხდომის მდივანი.

9. კომისიის წევრს უფლება აქვს თავისი განსხვავებული აზრი დაურთოს ოქმს, რის შესახებაც ოქმში კეთდება შესაბამისი ჩანაწერი.

10. კომისიის მუშაობის გამარტივების მიზნით, სამსახურის კონტრდაზვერვის დეპარტამენტში იქმნება კომისიასთან არსებული სამდივნო, რომლის შემადგენლობას განსაზღვრავს კომისიის თავმჯდომარე.