თვითმმართველი თემის - გარდაბნის მუნიციპალიტეტის გამგებლის 2016 წლის 28 იანვრის რიგგარეშე არჩევნებისათვის საარჩევნო სუბიექტების წარმომადგენლების წილისყრით გამოვლენის პროცედურის განსაზღვრის შესახებ

საქართველოს ორგანული კანონის „საქართველოს საარჩევნო კოდექსი“ მე-14 მუხლის პირველი პუნქტის „გ” ქვეპუნქტის, მე-3 პუნქტის, 30-ე მუხლის მე-2 და მე-3 პუნქტებისა და 77-ე მუხლის მე-5 პუნქტის საფუძველზე, საქართველოს ცენტრალური საარჩევნო კომისია ადგენს:

თვითმმართველი თემის – გარდაბნის მუნიციპალიტეტის გამგებლის 2016 წლის 28 იანვრის რიგგარეშე არჩევნებისათვის, საარჩევნო სუბიექტის წარმომადგენელთა საჩივრების რეგისტრაციის პროცესზე დაკვირვების გამოვლენის მიზნით, საქართველოს ორგანული კანონის „საქართველოს საარჩევნო კოდექსი“ 61-ე მუხლის მე-5 პუნქტით განსაზღვრული წილისყრა არ გაიმართება.

საარჩევნო ბლოკების „ქართული ოცნება“ და „ერთიანი ნაციონალური მოძრაობა“ თითო წარმომადგენელს საუბნო საარჩევნო კომისიაში ავტომატურად ენიჭებათ ამ დადგენილების პირველ მუხლში აღნიშნულ პროცედურაზე დაკვირვების უფლებამოსილება, გარდა ამ დადგენილების მე-3 მუხლით განსაზღვრული შემთხვევისა.

თუ საუბნო საარჩევნო კომისიის მდივანი, ამ დადგენილების მე-2 მუხლში აღნიშნული, საარჩევნო სუბიექტში შემავალი ერთ-ერთი პარტიიდან დანიშნული კომისიის წევრია, ასეთ შემთხვევაში საჩივრების რეგისტრაციის პროცესზე დაკვირვების უფლება არ აქვს ამ სუბიექტის მიერ დანიშნულ წარმომადგენელს.

თვითმმართველი თემის – გარდაბნის მუნიციპალიტეტის გამგებლის 2016 წლის 28 იანვრის რიგგარეშე არჩევნებისათვის, მთვლელებთან ერთად საარჩევნო სუბიექტის წარმომადგენელთა მიერ ნამდვილი ან/და ბათილი საარჩევნო ბიულეტინების დათვლის პროცესში მონაწილეობის მიზნით, საქართველოს ორგანული კანონის „საქართველოს საარჩევნო კოდექსი“ 67-ე მუხლის მე-2 პუნქტით განსაზღვრული წილისყრა არ გაიმართება.

საარჩევნო ბლოკების „ქართული ოცნება“ და „ერთიანი ნაციონალური მოძრაობა“ თითო წარმომადგენელს, ავტომატურად ენიჭებათ ამ დადგენილების მე-4  მუხლში აღნიშნულ პროცედურაზე დაკვირვების უფლებამოსილება.

ამ დადგენილების მე-4 და მე-5 მუხლებით დადგენილი წესების რეალიზების მიზნით, საქართველოს ორგანული კანონის „საქართველოს საარჩევნო კოდექსი” 67-ე მუხლის პირველი პუნქტით განსაზღვრულ მთვლელთა გამოვლენისათვის საუბნო საარჩევნო კომისიაში ჩატარებულ წილისყრაში არ მონაწილეობენ საარჩევნო ბლოკების „ქართული ოცნება” და „ერთიანი ნაციონალური მოძრაობა” მიერ დანიშნული საუბნო საარჩევნო კომისიის წევრები.

ეს დადგენილება შეიძლება გასაჩივრდეს თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ. თბილისი, დავით აღმაშენებლის ხეივანი, მე-12 კილომეტრი, №6) მისი მიღებიდან 2 კალენდარული დღის ვადაში.

ეს დადგენილება ამოქმედდეს გამოქვეყნებისთანავე.