საქართველოს ზოგადი ადმინისტრაციული კოდექსის 49-ე მუხლის მოთხოვნათა შესაბამისად, საქართველოს პრეზიდენტის ადმინისტრაციაში საჯარო ინფორმაციის გაცემის მდგომარეობის შესახებ 2016 წლის ანგარიში

საქართველოს ზოგადი ადმინისტრაციული კოდექსის 49-ე მუხლის მოთხოვნათა შესაბამისად, საქართველოს პრეზიდენტის ადმინისტრაციაში საჯარო ინფორმაციის გაცემის მდგომარეობის შესახებ 2016 წლის ანგარიში

საქართველოს პრეზიდენტის ადმინისტრაცია (შემდეგში – ადმინისტრაცია) საჯარო ინფორმაციის გაცემისას ხელმძღვანელობს საქართველოს ზოგადი ადმინისტრაციული კოდექსით, „პერსონალურ მონაცემთა დაცვის შესახებ“ საქართველოს კანონით, „სახელმწიფო საიდუმლოების შესახებ“ საქართველოს კანონით, „საჯარო ინფორმაციის ასლის გადაღების მოსაკრებლის შესახებ“ საქართველოს კანონითა და საქართველოს სხვა შესაბამისი სამართლებრივი აქტებით.

საანგარიშო პერიოდში საჯარო ინფორმაციის გაცემის მოთხოვნით ადმინისტრაციაში რეგისტრირებულია 179 წერილობითი განცხადება. აქედან, 138 მოთხოვნა დაკმაყოფილდა, 22 შემთხვევაში მოთხოვნილი ინფორმაცია არ აღმოჩნდა დაცული ადმინისტრაციაში; 6 განცხადება დაკმაყოფილდა ნაწილობრივ, რადგან მოთხოვნილი ინფორმაციის ნაწილი არ აღმოჩნდა დაცული ადმინისტრაციაში ან/და მოთხოვნის დაკმაყოფილება გამოიწვევდა სხვა ფიზიკური პირების პერსონალური ინფორმაციის გაცემას მათი თანხმობის გარეშე; 9 განცხადებაზე მიღებულ იქნა გადაწყვეტილება საჯარო ინფორმაციის გაცემის თაობაზე მოთხოვნის დაკმაყოფილებაზე უარის თქმის შესახებ საქართველოს ზოგადი ადმინისტრაციული კოდექსის, „პერსონალურ მონაცემთა დაცვის შესახებ“ და „სახელმწიფო საიდუმლოების შესახებ“ საქართველოს კანონის მოთხოვნათა გათვალისწინებით. ასეთ შემთხვევებში დაინტერესებულ პირებს მიეცათ განმარტება მიღებულ გადაწყვეტილებასთან დაკავშირებით. დღეის მდგომარეობით დამუშავების პროცესშია 4 განცხადება. საჯარო ინფორმაციაში შესწორების მოთხოვნა არ შემოსულა და, შესაბამისად, მოთხოვნის დაკმაყოფილებაზე უარის თქმის თაობაზე გადაწყვეტილება არ ყოფილა მიღებული.

საჯარო ინფორმაციის მოთხოვნის შესახებ განმცხადებლებს შორის არიან როგორც ფიზიკური, ისე იურიდიული პირები, მათ შორის, არასამთავრობო ორგანიზაციები, ასევე საჯარო დაწესებულებები. საჯარო ინფორმაციის გაცემასთან დაკავშირებით შემოსული მოთხოვნები ძირითადად შეეხებოდა საქართველოს პრეზიდენტის ბრძანებულებებსა და განკარგულებებს, ასევე საქართველოს პრეზიდენტისა და ადმინისტრაციის კომპეტენციის ფარგლებში მიღებულ სხვადასხვა გადაწყვეტილებას.

გადაწყვეტილება საჯარო ინფორმაციის გაცემაზე უარის თქმის თაობაზე ყოველ კონკრეტულ შემთხვევაში მიიღება ადმინისტრაციის ხელმძღვანელობის მიერ საქართველოს შესაბამისი კანონმდებლობის საფუძველზე, ადმინისტრაციის კომპეტენტური სტრუქტურული ერთეულების უშუალო მონაწილეობით. კანონმდებლობით დადგენილი წესით ადმინისტრაციაში განსაზღვრული არიან საჯარო ინფორმაციის ხელმისაწვდომობის უზრუნველყოფასა და ინფორმაციის პროაქტიულ გამოქვეყნებაზე პასუხისმგებელი საჯარო მოსამსახურეები, რომლებიც უზრუნველყოფენ შემოსულ კორესპონდენციაზე სათანადო რეაგირებას. ამასთან, საანგარიშო პერიოდში არ დაფიქსირებულა საჯარო ინფორმაციის გაცემაზე პასუხისმგებელი პირების მიერ კანონმდებლობით დადგენილი მოთხოვნების რაიმე ტიპის დარღვევა, რომელიც განაპირობებდა მათ მიმართ დისციპლინური პასუხისმგებლობის ზომის გამოყენებას.

საჯარო ინფორმაციის გაცემის მოთხოვნის ნაწილობრივ დაკმაყოფილების შესახებ გადაწყვეტილება გასაჩივრდა ერთ შემთხვევაში. განმცხადებლის მიერ მოთხოვნილი ინფორმაცია ადმინისტრაციის მიერ გაცემულ იქნა საქართველოს ზოგადი ადმინისტრაციული კოდექსის 44-ე მუხლის პირველი ნაწილისა და „პერსონალურ მონაცემთა დაცვის შესახებ“ საქართველოს კანონის მოთხოვნათა გათვალისწინებით. სარჩელი არის თბილისის საქალაქო სასამართლოს ადმინისტრაციულ საქმეთა კოლეგიის წარმოებაში, დღეის მდგომარეობით ადმინისტრაციას არ წარმოშობია გადაწყვეტილების გასაჩივრებასთან დაკავშირებული ხარჯების, მათ შორის, მხარის სასარგებლოდ თანხის გადახდის ვალდებულება.

საჯარო ინფორმაციის გაცემისას ადმინისტრაცია ხელმძღვანელობდა „საჯარო ინფორმაციის ასლის გადაღების მოსაკრებლის შესახებ“ საქართველოს კანონითა და „2016 წლის განმავლობაში მოსაკრებლის გადახდის გარეშე გამოსათხოვი საჯარო ინფორმაციის მინიმალური ოდენობის განსაზღვრის შესახებ“ საქართველოს პრეზიდენტის ადმინისტრაციის უფროსის 2015 წლის 31 დეკემბრის №12/31-03/1 ბრძანებით.

ადმინისტრაციაში ფუნქციონირებს დოკუმენტბრუნვის ელექტრონული სისტემა, რომელიც უზრუნველყოფს მონაცემთა ბაზების ავტომატურ რეჟიმში შექმნას. ადმინისტრაციის მიერ პერსონალური მონაცემების დამუშავება ხორციელდება „პერსონალურ მონაცემთა დაცვის შესახებ“ საქართველოს კანონის დებულებებისა და საქართველოს ზოგადი ადმინისტრაციული კოდექსის მოთხოვნების შესაბამისად.

საჯარო ინფორმაციის ხელმისაწვდომობისა და მისი პროაქტიულად გამოქვეყნების მიზნით, საქართველოს პრეზიდენტის ოფიციალურ ვებგვერდზე შექმნილია საჯარო ინფორმაციის ველი, სადაც ადმინისტრაციის საქმიანობასთან დაკავშირებული საჯარო ინფორმაცია სისტემატურად თავსდება და ახლდება.

 

 მოვალეობის შემსრულებელი                                                                            იაკობ ედილაშვილი