„ბრალდებულთა/მსჯავრდებულთა გაყვანა/გადაყვანისას ბადრაგირების წესის დამტკიცების შესახებ“ საქართველოს სასჯელაღსრულებისა და პრობაციის მინისტრის 2015 წლის 19 ოქტომბრის №149 ბრძანებაში ცვლილების შეტანის თაობაზე

საქართველოს იუსტიციის მინისტრის

2020 წლის 13 მაისი

ქ. თბილისი

„ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტისა და „პატიმრობის კოდექსში ცვლილების შეტანის შესახებ“ საქართველოს 2018 წლის 5 ივლისის №3128 კანონის მე-2 მუხლის მე-5 პუნქტის შესაბამისად, ახალი კორონავირუსის გავრცელების პრევენციის, ესკორტირების უსაფრთხოების უზრუნველყოფისა და აღკვეთის ღონისძიების/სასჯელის შეუფერხებლად აღსრულების ხელშეწყობის მიზნით, ვბრძანებ:

„მუხლი 53¹. კოვიდინფიცირებულ ბრალდებულზე/მსჯავრდებულზე სამოქალაქო სამედიცინო დაწესებულებაში მეთვალყურეობის სპეციალური წესი

1. იმ ბრალდებულის/მსჯავრდებულის მიმართ, რომელსაც დაუდასტურდა ახალი კორონავირუსი (COVID-19) და მკურნალობის მიზნით განთავსებულია სამოქალაქო სამედიცინო დაწესებულებაში, სპეციალური პენიტენციური სამსახურის გენერალური დირექტორის გადაწყვეტილებით, მეთვალყურეობა შეიძლება განხორციელდეს ელექტრონული ზედამხედველობის საშუალებით.

2. ელექტრონული ზედამხედველობის საშუალება (შემდგომ – აპარატურა) შედგება გადამცემისა და მიმღებისაგან. გადამცემს წარმოადგენს ელექტრონული სამაჯური, რომელიც სამოქალაქო სამედიცინო დაწესებულებაში მკურნალობის პერიოდში დამაგრებულია, როგორც წესი, მსჯავრდებულის ქვემოკიდურზე იმგვარად, რომ დაზიანების გარეშე შეუძლებელია მისი მოშორება. მიმღები განთავსებულია სამოქალაქო სამედიცინო დაწესებულებაში, რომელიც მუდმივად მიერთებულია დენის წყაროსთან.

3. ბრალდებულზე/მსჯავრდებულზე ელექტრონული საშუალებით ზედამხედველობას ახორციელებს სპეციალური პენიტენციური სამსახური საქართველოს იუსტიციის სამინისტროს  მმართველობის სფეროში მოქმედ საჯარო სამართლის იურიდიულ პირთან – დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულ სააგენტოსთან (შემდგომ − სააგენტო) თანამშრომლობით.

4. სამოქალაქო სამედიცინო დაწესებულების შენობის გარე პერიმეტრზე/მიმდებარე ტერიტორიაზე ეწყობა დროებითი საგუშაგო, რომელიც შედგება ესკორტირების ჯგუფის არანაკლებ 3 წევრისგან, რომლებიც უზრუნველყოფენ დაცვასა და მეთვალყურეობას.

5. აპარატურაზე ნებისმიერი ფორმით ზემოქმედება, აგრეთვე ბრალდებულის/მსჯავრდებულის მიერ მისთვის განსაზღვრული პერიმეტრის დატოვება, სააგენტოს მიერ დაუყოვნებლივ ეცნობება სპეციალური პენიტენციური სამსახურის პენიტენციური დეპარტამენტის ესკორტირებისა და სპეციალურ ღონისძიებათა მთავარ სამმართველოს.

6. აპარატურის დაზიანებამ შეიძლება გამოიწვიოს მნიშვნელოვანი მატერიალური ზიანი, რაც ექვემდებარება ბრალდებულის/მსჯავრდებულის, ხოლო არასრულწლოვანი ბრალდებულის/მსჯავრდებულის შემთხვევაში, მისი კანონიერი წარმომადგენლის მიერ სრულად ანაზღაურებას.