„საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს სახელმწიფო კონტროლს დაქვემდებარებული სსიპ − ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ მომსახურების გაწევის ვადის, სახეების, საფასურის გადახდისა და გადახდილი საფასურის დაბრუნების წესის დამტკიცების შესახებ“ საქართველოს მთავრობის 2015 წლის 14 სექტემბრის №468 დადგენილებაში ცვლილების შეტანის თაობაზე

1. პირველი მუხლის 3¹ და 3² პუნქტები ჩამოყალიბდეს შემდეგი რედაქციით:

„3¹. ამ მუხლის პირველი პუნქტის „ა“ ქვეპუნქტით დამტკიცებული №1 დანართის 135-ე, 136-ე და 137-ე პოზიციებით განსაზღვრული მომსახურების საფასური ერთჯერადად 10 პირისა და მეტის ტესტირების შემთხვევაში მცირდება 20%-ის ოდენობით.

3². ამ მუხლის პირველი პუნქტის „ა“ ქვეპუნქტით დამტკიცებული №1 დანართის 138-ე პოზიციით განსაზღვრული მომსახურების საფასური ერთჯერადად 200 და მეტი უსიმპტომო პირის ტესტირების შემთხვევაში (ოთხი ან მეტი ნიმუშის პულირების მეთოდის გამოყენებით) მცირდება 50%-ის ოდენობით.“.

2. პირველი მუხლის 3² პუნქტის შემდეგ დაემატოს შემდეგი შინაარსის 3³ და 3⁴ პუნქტები:

„3³. ამ მუხლის პირველი პუნქტის „ა“ ქვეპუნქტით დამტკიცებული №1 დანართის 135-ე, 136-ე, 137-ე, 138-ე, 139-ე, 140-ე და 141-ე პოზიციებით განსაზღვრული ტესტირება უფასოა სახელმწიფო პროგრამების ფარგლებში და საქართველოს მთავრობის მიერ განსაზღვრულ შემთხვევებში.

3⁴. ამ მუხლის პირველი პუნქტის „ა“ ქვეპუნქტით დამტკიცებული №1 დანართით განსაზღვრული მომსახურების საფასური ახალი ტექნოლოგიებისა და მეთოდოლოგიების ვალიდაციასთან ერთად შესაძლებელია, დაექვემდებაროს ცვლილებას.“.

3. დადგენილებით დამტკიცებული №1 დანართი („კვლევები“) ჩამოყალიბდეს თანდართული რედაქციით.