,,ტყით სარგებლობის ლიცენზიების გაცემის წესისა და პირობების შესახებ დებულების დამტკიცების თაობაზე“ საქართველოს მთავრობის 2005 წლის 11 აგვისტოს №132 დადგენილებით დამტკიცებულ დებულებაში ცვლილებისა და დამატების შეტანის შესახებ“

საქართველოს მთავრობის

დადგენილება №96

2008 წლის 12 აპრილი

ქ. თბილისი

,,ტყით სარგებლობის ლიცენზიების გაცემის წესისა და პირობების შესახებ დებულების დამტკიცების თაობაზე“ საქართველოს მთავრობის 2005 წლის 11 აგვისტოს №132 დადგენილებით დამტკიცებულ დებულებაში ცვლილებისა და დამატების შეტანის შესახებ

1. ,,ნორმატიული აქტების შესახებ“ საქართველოს კანონის 36-ე მუხლის საფუძველზე, ,,ტყით სარგებლობის ლიცენზიების გაცემის წესისა და პირობების შესახებ დებულების დამტკიცების თაობაზე“ საქართველოს მთავრობის 2005 წლის 11 აგვისტოს №132 დადგენილებით (სსმ III, 2005 წელი, №94, მუხლი 1066) დამტკიცებული დებულების მე-9 მუხლში შეტანილ იქნეს შემდეგი ცვლილება და დამატება:

ა) მე-14 პუნქტი ჩამოყალიბდეს ახალი რედაქციით:

,,14. ამ მუხლის მე-12 პუნქტით გათვალისწინებული პირები ვალდებული არიან მათ მიერ დამზადებული სამასალე მერქნის 25 (ოცდახუთი) პროცენტი (№1 დანართის მიხედვით) საქართველოს გარემოს დაცვისა და ბუნებრივი რესურსების სამინისტროს სახელმწიფო საქვეუწყებო დაწესებულება – სატყეო დეპარტამენტთან ერთად გადასცენ სახელმწიფო რწმუნებულების – გუბერნატორების ადმინისტრაციებს დადგენილების მე-2 დანართის შესაბამისად.“;

ბ) დაემატოს მე-15 პუნქტი:

,,15. სახელმწიფო რწმუნებულების – გუბერნატორების ადმინისტრაციებმა შესაბამისი მუნიციპალიტეტების გამგეობების მეშვეობით უზრუნველყონ სამასალე მერქნის მოსახლეობისათვის მიწოდების ორგანიზება.“.

2. დადგენილება ამოქმედდეს გამოქვეყნებისთანავე.

პრემიერ-მინისტრი ვ. გურგენიძე

 დანართი №2

სამასალე მერქნის ფონდის განაწილება სამხარეო ადმინისტრაციების მიხედვით