“საქართველოს ეროვნული ბანკის პრეზიდენტის 2002 წლის 16 სექტემბრის №234 ბრძანებით დამტკიცებყლ “კომერციული ბაკების ადმინისტრატორთა შესაფერისობის კრიტერიუმების შესახებ დებულებაში” ცვლილებებისა და დამატებების შეტანის შესახებ”

სახელმწიფო სარეგისტრაციო კოდი 220.020.000.18.011.006.734

საქართველოს ეროვნული ბანკის პრეზიდენტის

ბრძანება №212

2004 წლის 30 სექტემბერი

ქ. თბილისი

საქართველოს ეროვნული ბანკის პრეზიდენტის 2002 წლის 16 სექტემბრის №234 ბრძანებით დამტკიცებულ „კომერციული ბანკების ადმინისტრატორთა შესაფერისობის კრიტერიუმების შესახებ დებულებაში” ცვლილებებისა და დამატებების შეტანის შესახებ

    მუხლი 1

„საქართველოს ეროვნული ბანკის შესახებ” საქართველოს ორგანული კანონის 59-ე და 73-ე მუხ-ლებისა და „კომერციული ბანკების საქმიანობის შესახებ” საქართველოს კანონის მე-4 და მე-15 მუხლების მოთხოვნათა შესაბამისად, საქართველოს ეროვნული ბანკის პრეზიდენტის 2002 წლის 16 სექტემბრის №234 ბრძანებით დამტკიცებულ „კომერციული ბანკების ადმინისტრატორთა შესაფერისობის კრიტერიუმების შესახებ დებულებაში” (სსმ III, 2002 წ., №96, მუხ. 833) შეტანილ იქნეს შემდეგი ცვლილებები და დამატებები:

1.  მე-3 მუხლის პირველ პუნქტს დაემატოს შემდეგი შინაარსის „დ” ქვეპუნქტი:

„დ)    ბანკის ის სტრუქტურული ერთეული (ან თანამდებობა), რომელიც პასუხისმგებელი იქნება ადმინისტრატორის თანამდებობაზე დანიშვნის პროცედურების დაცვისათვის.“.   

2.  მე-3 მუხლის მე-2 პუნქტის „ა” და „ბ” ქვეპუნქტები ჩამოყალიბდეს შემდეგი რედაქციით:

„ა) ადმინისტრატორის თანამდებობაზე დანიშვნამდე პირის შესაფერისობის კრიტერიუმებთან შესაბამისობის განსაზღვრის მიზნით იქონიოს დასანიშნი პირის შესახებ ამ დებულებით დადგენილი დოკუმენტაცია და უზრუნველყოს მასში არსებული ინფორმაციის უტყუარობისა და სიზუსტის დეტალური შემოწმება;

ბ)  ბანკის ადმინისტრატორად დანიშვნამდე განსაზღვროს აკმაყოფილებს თუ არა დასანიშნი პირი ადმინისტრატორთა შესაფერისობის კრიტერიუმებს“.

3.  მე-3 მუხლის მე-2 პუნქტის შემდეგ დაემატოს 2¹ პუნქტი და ჩამოყალიბდეს შემდეგი რედაქციით:

„2¹.    მოქმედი კანონმდებლობის შესაბამისად, ბანკის ადმინისტრატორის თანამდებობაზე დანიშვნის თარიღი არის:

ა)  სამეწარმეო რეესტრში რეგისტრაციას დაქვემდებარებული პირებისათვის – სამეწარმეო რეესტრში რეგისტრაციის თარიღი;

ბ)  სამეწარმეო რეესტრში რეგისტრაციას არდაქვემდებარებული პირებისათვის – ბანკის შესაბამისი დოკუმენტის (ოქმი, ბრძანება და სხვ.) გამოცემის თარიღი.“.

4. მე-3 მუხლის მე-3 პუნქტის „დ” ქვეპუნქტი ჩამოყალიბდეს შემდეგი რედაქციით:

„დ) ადმინისტრატორის კვალიფიკაციისა და პროფესიული გამოცდილების დამადასტურებელ ინფორმაციას (დანიშვნის თარიღისათვის განახლებული კადრების აღრიცხვის ფურცელი, ამონაწერი შრომის წიგნაკიდან და/ან წინა სამუშაო ადგილების დამადასტურებელი სხვა დოკუმენტები)“.

5. მე-3 მუხლის მე-3 პუნქტის „ვ” და „ზ” ქვეპუნქტები ჩამოყალიბდეს შემდეგი რედაქციით:

„ვ)     2 სარეკომენდაციო წერილს (გაცემულს იმ პირთა მიერ, რომლებთანაც მუშაობდა პირი);

ზ) ცნობას ნასამართლობის შესახებ რეზიდენტი პირებისათვის საქართველოს შინაგან საქმეთა სამინისტროდან, ხოლო არარეზიდენტი პირებისათვის შესაბამისი ქვეყნის სამართალდამცავი ორგანოდან, ლეგალიზებულს საქართველოს კანონმდებლობით დადგენილი წესით“.

6. მე-3 მუხლის მე-3 პუნქტს დაემატოს შემდეგი შინაარსის „თ” და „ი” ქვეპუნქტები:

„თ)    ბანკის სამეთვალყურეო ან დირექტორთა საბჭოს გადაწყვეტილებას ადმინისტრატორის დანიშვნის შესახებ;    

ი) შესაბამის სასამართლო დადგენილებას ან/და სამეწარმეო რეესტრიდან ამონაწერს სამეწარმეო რეესტრში რეგისტრაციას დაქვემდებარებული პირების შესახებ, ხოლო ბანკის შესაბამის დოკუმენტს (ოქმი, ბრძანება და სხვ.) სამეწარმეო რეესტრში რეგისტრაციას არდაქვემდებარებული პირების შესახებ.“.

7. მე-3 მუხლის მე-4 პუნქტი ჩამოყალიბდეს შემდეგი რედაქციით:

„4.     ბანკის სამეთვალყურეო ან დირექტორთა საბჭომ ეროვნულ ბანკს უნდა წარუდგინოს:

ა) ყოველწლიურად 31 იანვრამდე ინფორმაცია მოქმედი ადმინისტრატორების ვალების შესახებ 1 იანვრის მდგომარეობით;

ბ)  მოქმედი ადმინისტრატორების მიერ თანამდებობაზე დანიშვნის შემდგომ პერიოდში მიღებული განათლების დამადასტურებელი დოკუმენტის ასლი.“.

    მუხლი 2

ეს ბრძანება ამოქმედდეს გამოქვეყნებისთანავე.        

პრეზიდენტის მოვალეობის

შემსრულებელი ი. ვახტანგიშვილი