“სიცოცხლის დაზღვევის სახეობების განხორციელებაზე მზღვეველის აქტივებისა და აღებულ სადაზღვევო ვალდებულებებს შორის ზღვრული თანაფარდობის წესის დამტკიცების შესახებ”

სახელმწიფო სარეგისტრაციო კოდი 290.060.000.24.016.006.782

საქართველოს დაზღვევის სახელმწიფო ზედამხედველობის სამსახურის უფროსის ბრძანება №49

2004 წლის 19 ოქტომბერი

ქ. თბილისი

სიცოცხლის დაზღვევის სახეობების განხორციელებაზე მზღვეველის აქტივებსა და აღებულ სადაზღვევო ვალდებულებებს შორის ზღვრული თანაფარდობის წესის დამტკიცების შესახებ

„დაზღვევის შესახებ” საქართველოს კანონის მე-14 მუხლის დ) ქვეპუნქტის შესრულების მიზნით, ვბრძანებ:

1. დამტკიცდეს „სიცოცხლის დაზღვევის სახეობების განხორციელებაზე მზღვეველის აქტივებსა და აღებულ სადაზღვევო ვალდებულებებს შორის ზღვრული თანაფარდობის წესი” (თან ერთვის).

2. ეს ბრძანება ამოქმედდეს გამოქვეყნებისთანავე.

ა. ცერცვაძე

სიცოცხლის დაზღვევის სახეობების განხორციელებაზე მზღვეველის აქტივებსა და აღებულ სადაზღვევო ვალდებულებებს შორის ზღვრული თანაფარდობის წესი

    მუხლი 1

„სიცოცხლის დაზღვევის სახეობების განხორციელებაზე მზღვეველის აქტივებსა და აღებულ სადაზღვევო ვალდებულებებს შორის ზღვრული თანაფარდობის წესი” შემუშავებულია „დაზღვევის შესახებ” საქართველოს კანონის მე-14 მუხლის დ) ქვეპუნქტის თანახმად და განსაზღვრავს სადაზღვევო ორგანიზაციების აქტივებსა და აღებულ სადაზღვევო ვალდებულებებს შორის ზღვრული თანაფარდობის ნორმატივის გამოთვლისა და გამოყენების წესს.

    მუხლი 2

„სიცოცხლის დაზღვევის სახეობების განხორციელებაზე მზღვეველის აქტივებსა და აღებულ სადაზღვევო ვალდებულებებს შორის თანაფარდობის წესში” გამოყენებულ ცნებებს და აღნიშვნებს აქვთ შემდეგი მნიშვნელობა:

ა) K – შესწორების კოეფიციენტი;

ბ) A – მზღვეველის აქტივების ფაქტობრივი ოდენობა;

გ) A¹– მზღვეველის აქტივების ნორმატიული ოდენობა.

    მუხლი 3

1. მზღვეველის აქტივების ნორმატიული ოდენობა გამოითვლება შემდეგნაირად:

A¹=რეზერვები X 0,05 X K სადაც,

    

K = მიმდინარე წლის შექმნილ რეზერვებს გამოკლებული გადაზღვევაზე მიმართული თანხა და შეფარდებული მიმდინარე წლის შექმნილ სიცოცხლის დაზღვევის რეზერვებთან. ამასთან, გადაზღვევაზე მიმართული სარეზერვო თანხა ლიმიტირებული იქნება 15%-მდე. შესაბამისად, K≥0,85 თუ K<0,85, ის ჩაითვლება 0,85-ის ტოლად.

2. მზღვეველის აქტივების ფაქტობრივი ოდენობა ეს არის მზღვეველის მთლიანი აქტივები გათავისუფლებული მომავალი ვალდებულებებისაგან გარდა დამფუძნებლის წინაშე ვალდებულებისა გამოკლებული არამატერიალური აქტივების სიდიდე და დებიტორული ვალდებულებები, რომელთა ვადაც გავიდა.

    მუხლი 4

1. მზღვეველი სადაზღვევო საქმიანობის განხორციელებისას აქტივების ფაქტობრივ და ნორმატიულ ოდენობას შორის უნდა აკმაყოფილებდეს შემდეგ თანაფარდობას:

A>A¹

2. მზღვეველი ვალდებულია სადაზღვევო საქმიანობის განხორციელების მთელი პერიოდის განმავლობაში აკმაყოფილებდეს ამ წესის მოთხოვნებს.

    მუხლი 5

1. მზღვეველს, რომლის აქტივებსა და აღებულ სადაზღვევო ვალდებულებებს შორის ზღვრული თანაფარდობის ნორმატივი შეუსაბამობაშია ამ წესის მოთხოვნებთან, მიეცემა მითითება არა უმეტეს 2 თვის ვადაში ამ წესით გათვალისწინებული ეკონომიკური ლიმიტის დარღვევის აღმოფხვრის თაობაზე.

2. აღნიშნული მითითების შეუსრულებლობის შემთხვევაში საქართველოს დაზღვევის ზედამხედველობის სამსახური გაატარებს კანონმდებლობით განსაზღვრულ ზომებს.