სს „საქართველოს განვითარების ფონდის“ წესდების დამტკიცების შესახებ

სს „საქართველოს განვითარების ფონდის“ წესდების დამტკიცების შესახებ საქართველოს მთავრობის დადგენილება №354 2023 წლის 6 სექტემბერი ქ. თბილისი სს „საქართველოს განვითარების ფონდის“ წესდების დამტკიცების შესახებ მუხლი 1🔗 „სააქციო საზოგადოების − საპარტნიორო ფონდის შესახებ“ საქართველოს კანონში ცვლილების შეტანის თაობაზე“ საქართველოს კანონის (31/05/2023 წ., №2989-XIმს-Xმპ) მე-2 მუხლის „ა“ ქვეპუნქტის შესაბამისად, დამტკიცდეს სს „საქართველოს განვითარების ფონდის“ (შემდგომში – ფონდი) თანდართული წესდება. მუხლი 2🔗 1. საქართველოს მთავრობამ 2023 წლის 10 სექტემბრამდე უზრუნველყოს კანდიდატების დანიშვნა ფონდის სამეთვალყურეო საბჭოს შემადგენლობაში. 2. კანდიდატი უნდა აკმაყოფილებდეს შემდეგ საკვალიფიკაციო მოთხოვნებს: გააჩნია უმაღლესი განათლება და მინიმუმ 5-წლიანი სამუშაო გამოცდილება მენეჯერულ პოზიციაზე ფინანსურ ან/და სამეწარმეო სექტორში, სარგებლობს მაღალი რეპუტაციით, არ არის ნასამართლეობის მქონე პირი. სამეთვალყურეო საბჭოს წევრები შესაძლებელია იყვნენ ასევე უცხო ქვეყნის მოქალაქეები. 3. სამეთვალყურეო საბჭოს ახალი წევრი მისი უფლებამოსილებების განხორციელების დაწყების მომენტიდან არ შეიძლება იმავდროულად იყოს სახელმწიფო მოსამსახურე, სახელმწიფო-პოლიტიკური თანამდებობის პირი, პოლიტიკური თანამდებობის პირი, საჯარო მოსამსახურე და ფონდის თანამშრომელი ან წარმომადგენლობაზე უფლებამოსილი პირი. საქართველოს მთავრობის მიერ დამტკიცებული სამეთვალყურეო საბჭოს ახალი შემადგენლობა უფლებამოსილების განხორციელებას უნდა შეუდგეს 2023 წლის 10 სექტემბრიდან. 4. ფონდის ვალდებულებების შესრულების უწყვეტობის უზრუნველყოფის მიზნით: ა) მოქმედი ხელშეკრულებების/გარიგების მხარეებს ეცნობოთ, რომ მათთან გაფორმებულ ხელშეკრულებებში/გარიგებაში ფონდს ავტომატურად ჩაენაცვლება სს „საქართველოს განვითარების ფონდი“ 2023 წლის 10 სექტემბრიდან; ბ) ფონდის დებიტორებსა და კრედიტორებს ეცნობოთ, რომ ფონდს ავტომატურად ჩაენაცვლება სს „საქართველოს განვითარების ფონდი“ 2023 წლის 10 სექტემბრიდან. მუხლი 3🔗 „ნორმატიული აქტების შესახებ“ საქართველოს ორგანული კანონის 25-ე მუხლის პირველი პუნქტის „ბ“ ქვეპუნქტის შესაბამისად, ძალადაკარგულად გამოცხადდეს „სს „საპარტნიორო ფონდის“ წესდების დამტკიცებისა და კაპიტალის ფორმირების შესახებ“ საქართველოს მთავრობის 2011 წლის 2 ივნისის №230 დადგენილება. მუხლი 4🔗 1. დადგენილება, გარდა პირველი მუხლისა, მე-2 მუხლის მე-3 პუნქტისა და მე-3 მუხლისა, ამოქმედდეს გამოქვეყნებისთანავე. 2. დადგენილების პირველი მუხლი, მე-2 მუხლის მე-3 პუნქტი და მე-3 მუხლი ამოქმედდეს 2023 წლის 10 სექტემბრიდან. პრემიერ-მინისტრიირაკლი ღარიბაშვილი სს „საქართველოს განვითარების ფონდის“ წესდება მუხლი 1🔗. ზოგადი დებულებები 1. სს „საქართველოს განვითარების ფონდი“ (შემდგომში – ფონდი ან საწარმო) არის „მეწარმეთა შესახებ“ საქართველოს კანონის შესაბამისად შექმნილი იურიდიული პირი. 2. საწარმოს სახელწოდება/საფირმო სახელწოდება – სს „საქართველოს განვითარების ფონდი“, ხოლო ინგლისურად − JSC „Development Fund of Georgia“ (DFG). 3. საწარმოს სამართლებრივი ფორმა – სააქციო საზოგადოება. 4. საწარმოს იურიდიული მისამართი – ვუკოლ ბერიძის ქუჩა №6, თბილისი, საქართველო. 5. ფონდის სამეურნეო წელიწადი ემთხვევა კალენდარულ წელიწადს. 6. ფონდის პასუხისმგებლობა მისი კრედიტორების წინაშე შემოიფარგლება მთელი მისი ქონებით. ფონდის აქციონერი პასუხს არ აგებს ფონდის ვალდებულებებისათვის. 7. ფონდის საქმიანობის მიზნებია: ა) კომერციულად მდგრადი პროექტების განხორციელება, მოგების მიღება და ფინანსური აქტივების ღირებულების გაზრდა; ბ) საქართველოს საინვესტიციო პოტენციალის ათვისება; გ) ადგილობრივი და პირდაპირი უცხოური ინვესტიციების მოზიდვის ხელშეწყობა სტრატეგიულ ეკონომიკურ სექტორებში საინვესტიციო პროექტების განსახორციელებლად ფულადი და არაფულადი თანამონაწილეობით; დ) ახალი პროექტების შემუშავება ან/და დაფინანსება; ე) განხორციელებულ პროექტებში არსებული, ფონდის კუთვნილი წილის/აქციების განკარგვა. 8. ფონდი მოიზიდავს სახსრებს და განკარგავს მათ. ფონდის დაფინანსების წყარო შეიძლება იყოს: ა) საერთაშორისო საფინანსო ინსტიტუტებიდან მოზიდული გრანტები; ბ) საერთაშორისო საფინანსო ინსტიტუტებიდან და სხვა სუბიექტებისგან მიღებული სესხები, რომელთა დაბრუნებაზე ფონდი თვითონ არის პასუხისმგებელი; გ) განხორციელებული ინვესტიციებიდან მიღებული შემოსავალი; დ) სახელმწიფოს მიერ ფონდისათვის გადაცემული კომპანიების ან/და უშუალოდ ფონდის მიერ დაფუძნებული კომპანიების დივიდენდები; ე) წილებისა და ფასიანი ქაღალდების გაყიდვით მიღებული შემოსავალი; ვ) ფონდის დამფუძნებლის შენატანები ფონდის კაპიტალში; ზ) საქართველოს კანონმდებლობით ნებადართული სხვა სახსრები. 9. ფონდს უფლება აქვს, პროექტების განხორციელების შედეგად მიღებული მოგება გამოიყენოს ამ წესდებით განსაზღვრული მიზნებისათვის. 10. ფონდი უფლებამოსილია განახორციელოს საქართველოს კანონმდებლობით აუკრძალავი ნებისმიერი საქმიანობა, რომელიც მოიცავს, მაგრამ არ შემოიფარგლება: ინვესტიციების მოზიდვით, პროექტების განხორციელებით და ამ მუხლის მე-7 პუნქტით განსაზღვრული მიზნების მისაღწევად განსახორციელებელი ნებისმიერი სხვა საქმიანობით. ის საქმიანობა, რომლის განხორციელებაც კანონმდებლობით შესაძლებელია მხოლოდ შესაბამისი ლიცენზიის/ნებართვის საფუძველზე, დასაშვებია მხოლოდ შესაბამისი ლიცენზიის/ნებართვის მიღების მომენტიდან. მუხლი 2🔗. აქციები და კაპიტალი 1. ფონდის როგორც განთავსებული, ისე განაღდებული (გადახდილი) კაპიტალი შეადგენს 250,000,000 (ორას ორმოცდაათი მილიონი) ლარს. ფონდის მითითებული კაპიტალი დაყოფილია 250,000,000 (ორას ორმოცდაათი მილიონი) ცალ ჩვეულებრივ აქციად. თითოეული აქციის ნომინალური ღირებულებაა 1 (ერთი) ლარი. 2. აქცია არის რეგისტრირებული, დემატერიალიზებული, სახელობითი ფასიანი ქაღალდი, რომელიც განსაზღვრავს ფონდის კაპიტალში პირის მონაწილეობას. 3. აქციონერის საკუთრების უფლება აქციაზე დასტურდება როგორც ამ წესდების მე-3 მუხლის მე-2 პუნქტით, ისე - ფონდის აქციათა რეესტრში ჩანაწერით ან ნომინალური მფლობელის ჩანაწერით. აქციონერს უნდა მიეცეს ამონაწერი საზოგადოების აქციათა რეესტრიდან ან ნომინალური მფლობელის ამონაწერი. 4. აქციების გადაცემა ხდება აქციათა რეესტრში შესაბამისი ცვლილების შეტანით, რომელიც დამოწმებული უნდა იყოს რეესტრის წარმოებისათვის უფლებამოსილი პირის მიერ. 5. ფონდს, კანონმდებლობით დადგენილი წესით, შეუძლია გამოუშვას აქციებში კონვერტირებადი სხვა ფასიანი ქაღალდები. მუხლი 3🔗. სააქციო საზოგადოების დამფუძნებელი 1. სააქციო საზოგადოების დამფუძნებელი პარტნიორი არის სახელმწიფო, წარმოდგენილი საქართველოს მთავრობის სახით. 2. პარტნიორის წილი კაპიტალში განისაზღვრა შემდეგნაირად: სახელმწიფო – 100 %. მუხლი 4🔗. ფონდის მმართველი ორგანოები ფონდის მმართველობის ორგანოებია სამეთვალყურეო საბჭო და დირექტორთა საბჭო. მუხლი 5🔗. აქციონერთა საერთო კრება 1. საქართველოს მთავრობის მიერ აქციონერთა საერთო კრების უფლებამოსილების განხორციელებისას მიღებული გადაწყვეტილება ფორმდება საქართველოს მთავრობის განკარგულების სახით. 2. ამ მუხლის პირველი პუნქტით განსაზღვრული გადაწყვეტილება მიიღება „საქართველოს მთავრობის რეგლამენტის დამტკიცების შესახებ“ საქართველოს მთავრობის 2018 წლის 14 თებერვლის №77 დადგენილების შესაბამისად. 3. საქართველოს მთავრობა აქციონერთა საერთო კრებაზე იღებს გადაწყვეტილებებს ამ წესდებით აქციონერთა საერთო კრების კომპეტენციისთვის მიკუთვნებულ შემდეგ საკითხებზე: ა) წესდებაში ცვლილების შეტანის შესახებ, წესდების ახალი რედაქციის მიღების შესახებ; ბ) „მეწარმეთა შესახებ“ საქართველოს კანონის მე-5 მუხლის მე-6 პუნქტით გათვალისწინებულ საკითხებზე; გ) ფონდის მიერ აქციათა გამოსყიდვის ნებართვის გაცემის შესახებ; დ) განთავსებული კაპიტალის ცვლილების შესახებ; ე) სამეთვალყურეო საბჭოს შემადგენლობის, მათი არჩევის, ნებისმიერ დროს ვადამდე გამოწვევის, ანაზღაურების ოდენობისა და სტრუქტურის განსაზღვრის შესახებ; ვ) ფონდის აუდიტის ანგარიშის დამტკიცებისა და აუდიტის განმახორციელებელი პირის შერჩევის შესახებ. თუ აუდიტის განმახორციელებელი პირი შერჩეულია ფონდის მიერ ტენდერის მეშვეობით, მაშინ აქციონერთა საერთო კრება უფლებამოსილია, თავისი შეხედულებისამებრ დამატებით შეარჩიოს ან არ შეარჩიოს ასეთი პირი და, შესაბამისად, საკუთარი არჩევანის მიხედვით დაამტკიცოს ორი აუდიტის ანგარიშიდან ერთ-ერთი; ზ) ფინანსური ანგარიშის დამტკიცებისა და დივიდენდის განაწილების შესახებ; თ) დირექტორთა და სამეთვალყურეო საბჭოს წევრების წინააღმდეგ მიმდინარე სასამართლო პროცესში მონაწილეობის შესახებ, მათ შორის, აღნიშნული პროცესისთვის წარმომადგენლის დანიშვნის თაობაზე; ი) ფონდის მიერ ქონების შეძენის შესახებ, სახელმწიფო შესყიდვების კანონმდებლობით დადგენილი წესით; კ) ფონდის მიერ ქონების (გარდა სახელმწიფო შესყიდვების კანონმდებლობით გათვალისწინებული ქონებისა) შეძენის შესახებ, თუ აქციონერთა საერთო კრების გადაწყვეტილებით სხვა რამ არ არის დადგენილი; ლ) ფონდის მიერ ნებისმიერი ქონების განკარგვის, გაცვლის (ერთმანეთთან დაკავშირებული გარიგებების) ან სხვაგვარად დატვირთვის შესახებ, თუ აქციონერთა საერთო კრების გადაწყვეტილებით სხვა რამ არ არის დადგენილი; მ) აქციათა რაოდენობის, ნომინალური ღირებულების, კლასებისა და მათთან დაკავშირებული უფლებების განსაზღვრის შესახებ; ნ) აქციათა ნომინალური ღირებულების ცვლილების ან დამატებითი აქციების განთავსების შესახებ; ო) წესდების მე-9 მუხლით გათვალისწინებულ პროექტებზე თანხმობის გაცემის შესახებ; პ)  აღმასრულებელი დირექტორისა და აღმასრულებელი დირექტორის მოადგილ(ეებ)ის დანიშვნის ან გათავისუფლების საკითხის შეთანხმების შესახებ; ჟ) ნებისმიერ სხვა საკითხებზე, გარდა ფონდის ყოველდღიურ საქმიანობასთან დაკავშირებული საკითხებისა.  მუხლი 6🔗. სამეთვალყურეო საბჭო 1. სამეთვალყურეო საბჭო შედგება არანაკლებ 3 (სამი) და არაუმეტეს 5 (ხუთი) წევრისგან. 2. სამეთვალყურეო საბჭოს შემადგენლობას განსაზღვრავს აქციონერთა საერთო კრება. სამეთვალყურეო საბჭოს წევრის დამოუკიდებლობის უზრუნველყოფის მიზნით, მისი უფლებამოსილებების ამოქმედების მომენტიდან ის არ შეიძლება იმავდროულად იყოს სახელმწიფო მოსამსახურე, სახელმწიფო-პოლიტიკური თანამდებობის პირი, პოლიტიკური თანამდებობის პირი, საჯარო მოსამსახურე და ფონდის თანამშრომელი ან წარმომადგენლობაზე უფლებამოსილი პირი. კანდიდატი უნდა აკმაყოფილებდეს შემდეგ საკვალიფიკაციო მოთხოვნებს: გააჩნია უმაღლესი განათლება და მინიმუმ 5-წლიანი სამუშაო გამოცდილება მენეჯერულ პოზიციაზე ფინანსურ ან/და სამეწარმეო სექტორში;  სარგებლობს მაღალი რეპუტაციით; წევრი არ არის ნასამართლეობის მქონე პირი; საბჭოს წევრები შესაძლებელია იყვნენ ასევე უცხო ქვეყნის მოქალაქეები. 3. სამეთვალყურეო საბჭოს საქმიანობას ხელმძღვანელობს თავმჯდომარე. სამეთვალყურეო საბჭოს თავმჯდომარესა და მის მოადგილეს ირჩევს ფონდის სამეთვალყურეო საბჭო სამეთვალყურეო საბჭოს წევრთაგან 3 წლის ვადით. 4. სამეთვალყურეო საბჭოს წევრი არ შეიძლება იყოს დირექტორთა საბჭოს წევრი. 5. სამეთვალყურეო საბჭოს ყოველი წევრი აირჩევა აქციონერთა საერთო კრების მიერ 3 (სამი) წლის ვადით. სამეთვალყურეო საბჭოს წევრის უფლებამოსილების ვადა მისი ამოწურვის შემდეგ ავტომატურად გრძელდება აქციონერთა საერთო კრების ჩატარებამდე და ამ კრებაზე ახალი წევრების არჩევამდე. სამეთვალყურეო საბჭოს წევრი შეიძლება ახალი ვადით აირჩეს. 6. სამეთვალყურეო საბჭოს წევრი საერთო კრების გადაწყვეტილებით შეიძლება ნებისმიერ დროს იქნეს გამოწვეული სამეთვალყურეო საბჭოს წევრობიდან. სამეთვალყურეო საბჭოს წევრის თანამდებობაზე დანიშვნის შესახებ გადაწყვეტილების მიღების შემდეგ სააქციო საზოგადოებასა და სამეთვალყურეო საბჭოს წევრს შორის იდება სასამსახურო ხელშეკრულება, რომელსაც სააქციო საზოგადოების მხრიდან ხელს აწერს საქართველოს პრემიერ-მინისტრი. სასამსახურო ხელშეკრულებაზე არ ვრცელდება შრომის სამართლის დებულებები. სამეთვალყურეო საბჭოს წევრების საქმიანობა ექვემდებარება ანაზღაურებას აქციონერთა საერთო კრების მიერ დადგენილი ოდენობითა და წესით. 7. სამეთვალყურეო საბჭო ახორციელებს დირექტორთა საბჭოს საქმიანობის კონტროლს. არ შეიძლება, დირექტორთა საბჭოს ფუნქციები გადაეცეს სამეთვალყურეო საბჭოს, გარდა კანონმდებლობით გათვალისწინებული შემთხვევებისა. 8. სამეთვალყურეო საბჭო უფლებამოსილია: ა) დირექტორთა საბჭოს მიერ წარდგენილი წინადადებებისა და რეკომენდაციების საფუძველზე, ხმათა უმრავლესობით მიიღოს გადაწყვეტილება საინვესტიციო პროექტის დაფინანსების მიმართულების, კრიტერიუმებისა და წესების შესახებ. ამასთან, დაფინანსების წესები უნდა შეთანხმდეს აქციონერთა საერთო კრებასთან; ბ) განახორციელოს დაფინანსებული პროექტის მიმდინარეობის/ შესრულების მონიტორინგი; გ) მიიღოს გადაწყვეტილება ფონდის კაპიტალში არსებული კომპანიების წილების/აქციების განკარგვის, ასევე ფონდის წილობრივი მონაწილეობით კომპანიის დაფუძნებისა და წილის შეძენის შესახებ, რომლითაც ამავდროულად განისაზღვრება დასაფუძნებელ/შეძენილ კომპანიაში ფონდის უფლებამოსილებები, პროექტში ფონდის წილობრივი მონაწილეობის ფორმა და წილის ოდენობა. სამეთვალყურეო საბჭოს აღნიშნული გადაწყვეტილებების აღსრულებას უზრუნველყოფს დირექტორთა საბჭო, ამ წესდების მე-5 მუხლის მე-3 პუნქტის „ი“ ქვეპუნქტისა და მე-9 მუხლის გათვალისწინებით; დ) მიიღოს გადაწყვეტილება დამოუკიდებელი რეგისტრატორის მიერ აქციათა რეესტრის წარმოებისა და მასთან ხელშეკრულების გაფორმების შესახებ; ე) მისცეს გენერალური სავაჭრო მინდობილობა (პროკურა) ამა თუ იმ პირს. პროკურა შეიძლება ორ ან რამდენიმე პირს ერთობლივად მიეცეს და განისაზღვროს, რომ ისინი ცალ-ცალკე ან ყველა ერთად წარმოადგენენ საწარმოს (საერთო მინდობილობა); ვ) დირექტორთა საბჭოს ნებისმიერ დროს მოსთხოვოს ფონდის საქმიანობის ანგარიში; ზ) გამოითხოვოს, განიხილოს, შეამოწმოს და შეისწავლოს ფონდის საქმიანი დოკუმენტაცია, მათ შორის, საბუღალტრო დოკუმენტაცია, ფონდის ქონებრივი ობიექტები და სალარო; ამ მოქმედებების განხორციელება დაავალოს სამეთვალყურეო საბჭოს თითოეულ წევრს ან მათ განსახორციელებლად მიიწვიოს ექსპერტები; თ) შეამოწმოს დირექტორთა საბჭოს წლიური ანგარიშები, წინადადებები მოგების განაწილების შესახებ, საქმიანობის ანგარიში და ამის თაობაზე მოახსენოს აქციონერთა საერთო კრებას; ი) წარმოადგინოს ფონდი დირექტორთა საბჭოს წევრებთან ურთიერთობაში, მათ შორის, სასამართლოში; კ) დაამტკიცოს ფონდის შესაბამისი წლის ბიუჯეტი და ფონდის მიერ განხორციელებული საქმიანობის ანგარიში; ლ) დაამტკიცოს ფონდის სტრუქტურა, საშტატო განრიგი და სტრუქტურული ქვედანაყოფების დებულებები; მ) დაამტკიცოს ფონდის სამეთვალყურეო საბჭოსა და ფონდში დასაქმებულთა ანაზღაურებისა და წახალისების სისტემა; ნ) სამეთვალყურეო საბჭოში შექმნას ამ წესდებით გაუთვალისწინებელი კომიტეტები და განსაზღვროს ამ კომიტეტების შინაგანაწესი; ო) განსაზღვროს ფონდის ქონების განკარგვის წესები აქციონერთა საერთო კრებასთან შეთანხმებით; პ) მიიღოს სხვა გადაწყვეტილებები წესდებით მის კომპეტენციას პირდაპირ მიკუთვნებულ საკითხებზე. 9. სამეთვალყურეო საბჭოს ამოცანები და კომპეტენციაა: ა) დირექტორთა საბჭოს საქმიანობის კონტროლი; ბ) ფონდის ფინანსური დოკუმენტაციის კონტროლი და შემოწმება; გ) ფონდის დირექტორთა საბჭოს თავმჯდომარისა (აღმასრულებელი დირექტორის) და აღმასრულებელი დირექტორის მოადგილ(ეებ)ის თანამდებობაზე დანიშვნა და გათავისუფლება აქციონერთა საერთო კრებასთან შეთანხმებით. 10. სამეთვალყურეო საბჭოს სხვა ამოცანები და კომპეტენცია შესაძლებელია განისაზღვროს აქციონერთა საერთო კრების მიერ. 11. სამეთვალყურეო საბჭოს გადაწყვეტილება შეიძლება მიღებულ იქნეს სხდომაზე განხილვის შემდეგ. სხდომა შესაძლებელია ჩატარდეს ფონდის ან ნებისმიერ სხვა მისამართზე, ამ წესდებით განსაზღვრული წესით, აგრეთვე ელექტრონული მოწყობილობების  მეშვეობით. 12. სამეთვალყურეო საბჭოს თავმჯდომარე, ხოლო რიგგარეშე სხდომის მოწვევისა და „მეწარმეთა შესახებ“ საქართველოს კანონის 217-ე მუხლის მე-3 პუნქტით გათვალისწინებული შემთხვევისას, ასევე აღმასრულებელი დირექტორი (შემდგომში – ინიციატორი) უფლებამოსილია, მოიწვიოს სამეთვალყურეო საბჭოს სხდომა. მოწვევა შესაძლებელია აგრეთვე ელექტრონული საშუალებების მეშვეობით განხორციელებული შეტყობინების ფორმით. შეტყობინება სამეთვალყურეო საბჭოს სხდომის მოწვევის შესახებ სამეთვალყურეო საბჭოს წევრებს ეგზავნებათ სავარაუდო დღის წესრიგთან ერთად, სხდომის მოწვევის სავარაუდო თარიღამდე 8 (რვა) კალენდარული დღით ადრე. სხდომის ჩატარების ფორმას ირჩევს ინიციატორი. სამეთვალყურეო საბჭოს წევრები არ შეიძლება, იქნენ წარმოდგენილი სხვა პირებით, მათ შორის − სხვა წევრებით. 13. სამეთვალყურეო საბჭოს სხდომა გადაწყვეტილებაუნარიანია, თუ მას ესწრება ან წარმოდგენილია საბჭოს მოქმედ წევრთა რაოდენობის ნახევარი მაინც, სადაც გადაწყვეტილება მიიღება დამსწრე წევრების უმრავლესობით, გარდა ხმების თანაბრად გაყოფის შემთხვევისა, როდესაც გადამწყვეტია საბჭოს თავმჯდომარის, ხოლო მისი არყოფნის შემთხვევაში − სხდომის თავმჯდომარის ხმა. თუ სამეთვალყურეო საბჭო არ არის გადაწყვეტილებაუნარიანი, სხდომის თავმჯდომარეს შეუძლია, არა უგვიანეს 48 (ორმოცდარვა) საათისა მოიწვიოს ახალი სხდომა, რომელიც გადაწყვეტილებაუნარიანი იქნება, თუ მას ესწრება წევრთა ნებისმიერი რაოდენობა. მუხლი 7🔗. აუდიტის კომიტეტი 1. სამეთვალყურეო საბჭოში იქმნება აუდიტის კომიტეტი, „მეწარმეთა შესახებ“ საქართველოს კანონის შესაბამისად. 2. აუდიტის კომიტეტის წევრი უნდა იყოს საწარმოს საქმიანობის სფეროში კომპეტენტური პირი, ხოლო აუდიტის კომიტეტის, სულ მცირე, 1 (ერთი) წევრი უნდა იყოს ბუღალტრული აღრიცხვის სფეროში ან/და აუდიტის სფეროში კომპეტენტური პირი. 3. აუდიტის კომიტეტის ფუნქციაა ზედამხედველობა გაუწიოს: ა) ფონდის შიდა აუდიტის სტრუქტურულ ქვედანაყოფს; ბ) ფინანსური ანგარიშგების შედგენის პროცესს; გ) ხარისხის კონტროლის, რისკების მართვისა და, საჭიროების შემთხვევაში, ფინანსური ინფორმაციის შიდა აუდიტის ეფექტიანობას; დ) ფინანსური ანგარიშგების/კონსოლიდირებული ანგარიშგების აუდიტის განხორციელებას ხარისხის კონტროლის მონიტორინგის ანგარიშში ასახული დასკვნების გათვალისწინებით; ე) აუდიტორის/აუდიტორული ფირმის მიერ „ბუღალტრული აღრიცხვის, ანგარიშგებისა და აუდიტის შესახებ“ საქართველოს კანონის მოთხოვნების (მათ შორის, დამოუკიდებლობის შესახებ ნორმების) დაცვას. 4. აუდიტის კომიტეტი სამეთვალყურეო საბჭოს აწვდის ინფორმაციას განხორციელებული აუდიტის შედეგების, ფინანსური ანგარიშგების უტყუარობაზე აუდიტის გავლენისა და ამ პროცესში აუდიტის კომიტეტის მონაწილეობის შესახებ. 5. აუდიტის კომიტეტი გამოსცემს რეკომენდაციებს ფინანსური ინფორმაციის უტყუარობის უზრუნველყოფისა და აქციონერთა საერთო კრების მიერ შესარჩევი აუდიტორის/აუდიტორული ფირმის შესახებ. 6. აუდიტის კომიტეტი სამეთვალყურეო საბჭოს რეგულარულად წარუდგენს საქმიანობის შესახებ ანგარიშს და დაუყოვნებლივ ატყობინებს თავისი ფუნქციების შესრულებისას წარმოშობილი წინააღმდეგობების შესახებ. მუხლი  8🔗. დირექტორთა საბჭო 1. დირექტორთა საბჭოს ძირითადი ფუნქციებია საინვესტიციო პროექტების შემუშავება, აქციონერთა საერთო კრებისთვის „სააქციო საზოგადოების − საქართველოს განვითარების ფონდის შესახებ“ საქართველოს კანონის მე-4 მუხლის მე-3 პუნქტით, ხოლო სამეთვალყურეო საბჭოსთვის − იმავე კანონის მე-6 მუხლის მე-4 პუნქტით განსაზღვრულ შემთხვევებში  პროექტების წარდგენა და დამტკიცებული პროექტების მართვა, აგრეთვე ამ წესდებითა და სამეთვალყურეო საბჭოს მიერ განსაზღვრული სხვა უფლებამოსილებების განხორციელება. 2. დირექტორთა საბჭო თავის სტრუქტურას, წევრთა რაოდენობასა და შემადგენლობას უთანხმებს სამეთვალყურეო საბჭოს. 3. დირექტორთა საბჭოს ძირითადი ფუნქციებია: ა) საინვესტიციო პროექტების შემუშავება და ამ მუხლის პირველი პუნქტით გათვალისწინებულ შემთხვევებში ფონდის აქციონერთა კრების ან სამეთვალყურეო საბჭოსათვის წარდგენა; ბ) პროექტების მართვა; გ) ამ წესდების მე-5 მუხლის მე-3 პუნქტის „ი“ ქვეპუნქტისა და მე-9 მუხლის გათვალისწინებით და აგრეთვე სამეთვალყურეო საბჭოს მიერ, ამ წესდების მე-6 მუხლის მე-8 პუნქტის „გ“ ქვეპუნქტის შესაბამისად, მიღებული გადაწყვეტილებისთვის/გადაწყვეტილებებისთვის ზიანის მიყენების გარეშე, ფონდის წილობრივი მონაწილეობით შექმნილი/არსებული საწარმოების პარტნიორის/აქციონერის უფლებამოსილების განხორციელება, მათ შორის, შეუზღუდავად, ასეთ ფონდის წილობრივი მონაწილეობით შექმნილ/არსებულ საწარმოებში კაპიტალშენატანებისა და კაპიტალში ცვლილებების განხორციელების, სამეთვალყურეო საბჭოს შექმნის/გაუქმების, სამეთვალყურეო საბჭოს წევრების დანიშვნის/გამოწვევის, წმინდა მოგების განაწილებისა და გამოყენების, აგრეთვე წლიური და შუალედური მოგების დივიდენდის სახით განაწილების შესახებ საკითხებზე გადაწყვეტილების მიღებაში მონაწილეობა, წესდების დამტკიცებისა და მასში ცვლილებების განხორციელების შესახებ გადაწყვეტილების მოწონება, დამტკიცებული წესდებით პარტნიორის კომპეტენციას მიკუთვნებულ სხვა საკითხებზე გადაწყვეტილების მიღება; დ)  ამ წესდებითა და სამეთვალყურეო საბჭოს მიერ განსაზღვრული სხვა უფლებამოსილებების განხორციელება. 4. დირექტორთა საბჭო გადაწყვეტილებებს იღებს შემდეგი წესით: ა) დირექტორთა საბჭო იკრიბება აღმასრულებელი დირექტორის გადაწყვეტილების საფუძველზე, საჭიროებისამებრ, მაგრამ არანაკლებ თვეში ერთხელ; ბ) დირექტორთა საბჭოს სხდომაზე თითოეულ წევრს აქვს თითო ხმა. ყოველი გადაწყვეტილება დირექტორთა საბჭოს მიერ მიიღება დამსწრე წევრთა ხმების უმრავლესობით. სხდომა უფლებამოსილია მიიღოს გადაწყვეტილება, თუ მას ესწრება საერთო შემადგენლობის ნახევარზე მეტი მაინც. განსახილველ საკითხთან დაკავშირებით ხმების თანაბრად გაყოფის შემთხვევაში აღმასრულებელი დირექტორი სარგებლობს გადამწყვეტი ხმის უფლებით; გ) დირექტორთა საბჭოს დღის წესრიგს განსაზღვრავს აღმასრულებელი დირექტორი. აღმასრულებელი დირექტორის წინასწარი გადაწყვეტილებით დირექტორთა საბჭო უფლებამოსილია მიიღოს გადაწყვეტილებები სხდომის ჩატარების გარეშე იმ შემთხვევაში, თუ ასეთი გადაწყვეტილება წერილობითი ფორმით არის მიღებული და მას ეთანხმება დირექტორთა საბჭოს წევრთა საერთო შემადგენლობის ნახევარზე მეტი. ასეთი ფორმით მიღებული გადაწყვეტილებები აისახება დირექტორთა საბჭოს გადაწყვეტილებაში; დ) დირექტორთა საბჭო უფლებამოსილია მიიღოს დამატებითი წესები და რეგულაციები დირექტორთა საბჭოს მიერ გადაწყვეტილებების მიღების პროცესთან დაკავშირებით;   ე) დირექტორთა საბჭოს სხდომის ოქმს აკეთებს სხდომის მდივანი. სხდომის ოქმს ხელს აწერენ დირექტორთა საბჭოს წევრები და სხდომის მდივანი; ვ) დირექტორთა საბჭოს მიერ სხდომაზე განხილულ საკითხთან დაკავშირებით მიღებული გადაწყვეტილება, საჭიროების შემთხვევაში, შეიძლება გაფორმდეს აღმასრულებელი დირექტორის ბრძანებით და აისახოს დირექტორთა საბჭოს სხდომის ოქმში; ზ) აღმასრულებელი დირექტორი უფლებამოსილია, მის კომპეტენციაში შემავალი ნებისმიერი საკითხი გაიტანოს დირექტორთა საბჭოს სხდომაზე განსახილველად ან შესათანხმებლად. 5. დირექტორთა საბჭო ვალდებულია, ელექტრონული პორტალის სუბიექტის ავტორიზებული მომხმარებლის გვერდზე გამოაქვეყნოს კანონმდებლობით გათვალისწინებული ინფორმაცია. 6. დირექტორთა საბჭოს საქმიანობას ხელმძღვანელობს დირექტორთა საბჭოს თავმჯდომარე, აღმასრულებელი დირექტორის სახით, რომელსაც 3 (სამი) წლის ვადით თანამდებობაზე ნიშნავს და თანამდებობიდან ათავისუფლებს სამეთვალყურეო საბჭო. იგი ხელმძღვანელობს და წარმოადგენს ფონდს, უძღვება ფონდის ყოველდღიურ საქმიანობას ამ წესდებითა და საქართველოს მოქმედი კანონმდებლობით გათვალისწინებული წესით. ფონდის წარმომადგენლობითი უფლებამოსილება ასევე ენიჭება აღმასრულებელი დირექტორის მოადგილე(ებ)ს, რომელიც თანამდებობაზე ინიშნება 3 (სამი) წლის ვადით. ფონდის აღმასრულებელი დირექტორი და აღმასრულებელი დირექტორის მოადგილე(ები) ფონდს წარმოადგენენ ცალ-ცალკე. 7. აღმასრულებელი დირექტორი იღებს გადაწყვეტილებას იმ საკითხებთან დაკავშირებით, რომლებიც ამ წესდებითა და მოქმედი კანონმდებლობით არ მიეკუთვნება სამეთვალყურეო საბჭოს ან აქციონერთა საერთო კრების უფლებამოსილებას. 8. დირექტორთა საბჭოს თავმჯდომარე უშუალოდ ხელმძღვანელობს პროექტის განხორციელებას. მუხლი 9🔗. პროექტებში მონაწილეობა 1. ფონდის მიერ პროექტის დაფინანსების პრიორიტეტული მიმართულებებია: ა) მაღალტექნოლოგიური და ეკომეგობრული წარმოება; ბ) ინოვაციური წარმოება და დამწყები საწარმოები (სტარტაპები); გ) ექსპორტზე ორიენტირებული წარმოება; დ) იმპორტის ჩანაცვლების პოტენციალის მქონე ადგილობრივი წარმოება; ე) საქართველოს კანონმდებლობით ნებადართული ეკონომიკური საქმიანობის (გარდა სათამაშო ბიზნესისა) განხორციელება, რომელშიც საქართველოს ეკონომიკას, სხვა ქვეყნის ეკონომიკასთან შედარებით, ფარდობითი უპირატესობა აქვს. 2. სამეთვალყურეო საბჭო ვალდებულია, ყოველი წლის დასაწყისში განსაზღვროს ამ მუხლის პირველ პუნქტში მითითებული პრიორიტეტული მიმართულებებისთვის განსაზღვრული სახსრების ოდენობები (საინვესტიციო გეგმა), რომლის ფარგლებში მოხდება შესაბამისი პროექტების დაფინანსება. თუ პროექტი ერთზე მეტ პრიორიტეტს ესადაგება, მაშინ მასზე გამოსაყოფი სახსრები გადანაწილდება იმ პრიორიტეტზე, რომელიც ძირითადია ამ კონკრეტული პროექტისთვის. სამეთვალყურეო საბჭო უფლებამოსილია, წლის განმავლობაში შეიტანოს ცვლილებები საინვესტიციო გეგმაში. 3. ფონდის მიერ პროექტის დაფინანსების სახელმძღვანელო პრინციპებია: ა) ამ საქმიანობის მაქსიმალური ეფექტიანობა და ფონდის მონაწილეობა მხოლოდ იმ პროექტებში, რომლებშიც სახელმწიფო არაპირდაპირ არის წარმოდგენილი ფონდის მიერ მინორიტარულ წილში, რაც მაქსიმალურად შეუწყობს ხელს სხვა ინვესტიციების მოზიდვას; ბ) საინვესტიციო ან სხვა სახის საქმიანობის სტრატეგიისა და მიზნების განსაზღვრა და მათი განხორციელება ფონდის წესდების შესაბამისად;  გ) საინვესტიციო ან სხვა სახის საქმიანობის განხორციელება გამჭვირვალე და სამართლიანი პროცედურების გამოყენებით, მიუკერძოებლად, საუკეთესო ბიზნესპრაქტიკის გათვალისწინებით. 4. ამ მუხლის პირველი − მე-3 პუნქტების გათვალისწინებით, სამეთვალყურეო საბჭო, დირექტორთა საბჭოს მიერ წარდგენილი წინადადებებისა და რეკომენდაციების საფუძველზე, ხმათა უმრავლესობით იღებს გადაწყვეტილებას საინვესტიციო პროექტის დაფინანსების მიმართულებების (საინვესტიციო გეგმა), კრიტერიუმებისა და წესების შესახებ. კრიტერიუმები შესაძლებელია ითვალისწინებდეს საკითხებს კონკრეტული პროექტის შესაბამისი მიმართულებისთვის მიკუთვნების წესებთან დაკავშირებით, ხოლო წესები გულისხმობდეს როგორც პირდაპირი მოლაპარაკების, ისე საჯარო შეთავაზების განხორციელების წესებს. ყველა შემთხვევაში საინვესტიციო გეგმა და ამ გეგმის განხორციელების მეთოდები (პირდაპირი მოლაპარაკება ან საჯარო შეთავაზება) უნდა გამოქვეყნდეს საჯაროდ ფონდის ვებგვერდზე. 5. ფონდი პროექტს განიხილავს, თუ მასში ფონდის მონაწილეობის ღირებულება ერთდროულად არის: ა) არანაკლებ 3 000 000 (სამი მილიონი) ლარისა, გარდა სამეთვალყურეო საბჭოს მიერ დადგენილი გამონაკლისი შემთხვევებისა; ბ) არაუმეტეს ამ პროექტის ღირებულების 30 პროცენტისა, გარდა სამეთვალყურეო საბჭოს მიერ დადგენილი გამონაკლისი შემთხვევებისა; გ) არაუმეტეს ამ პროექტის კაპიტალის 49 პროცენტისა.    6. პროექტის განხორციელებისას, ფონდის სამეთვალყურეო საბჭოსთან შეთანხმებით, დგინდება ფონდის ვალდებულება თავისი წილის 100 პროცენტის გასხვისების ვადებისა და პირობების განსაზღვრის შესახებ. ეს შეთანხმება შესაძლებელია, იყოს აგრეთვე ზოგადი, რომელიც გამოიყენება ნებისმიერი ან შესაბამისი ჯგუფის პროექტებთან მიმართებით. 7. პროექტი ფინანსდება კერძო სექტორის თანადაფინანსებით, მათ შორის, კაპიტალშენატანებით, სესხის, გარანტიის (თავდებობის) გაცემით ან სხვაგვარად. კერძო სექტორის თანადაფინანსება შეიძლება არ მოიცავდეს პროექტის განსახორციელებლად საჭირო მოსამზადებელი სამუშაოების ჩატარებას. პროექტი არ შეიძლება დაფინანსდეს თანადაფინანსების გარეშე. 8. პროექტში ფონდის მონაწილეობისთვის საჭიროა ფონდის სამეთვალყურეო საბჭოს ან აქციონერთა საერთო კრების გადაწყვეტილება, თუ ამ წესდების საფუძველზე მიღებული აქციონერთა საერთო კრების გადაწყვეტილებით ან/და სამეთვალყურეო საბჭოს უფლებამოსილების ნაწილში სამეთვალყურეო საბჭოს გადაწყვეტილებით სხვა რამ არ არის გათვალისწინებული. 9. 2023 წლის 10 სექტემბრამდე დამტკიცებული პროექტების მართვასთან დაკავშირებულ საკითხებზე, მათ შორის, ამ პროექტის დამტკიცებისას განსაზღვრული დაფინანსების განხორციელებისა და პროექტების ფარგლებში შექმნილი ქონების/აქტივების განკარგვის საკითხებზე გატარებული/ გასატარებელი ღონისძიებები არ ითვლება ახალი პროექტის განხორციელებად, გარდა ასეთ პროექტებზე ფონდის დაფინანსების გაზრდის შესახებ გადაწყვეტილებისა. 10. სტარტაპ საქართველოს პროექტზე, მათ შორის, მის ფარგლებში განსახორციელებელ ან/და მიმდინარე დამწყებ პროექტებზე არ ვრცელდება ამ მუხლის მოქმედება და ასეთი პროექტები დარეგულირდება „დამწყები საწარმოების (სტარტაპების) ხელშეწყობის პროგრამის დამტკიცების შესახებ“ საქართველოს მთავრობის 2016 წლის 11 მაისის №206 დადგენილების შესაბამისად. 11. აქციონერთა საერთო კრების გადაწყვეტილება საჭიროა პროექტში ფონდის მონაწილეობისთვის, თუ აქციონერთა საერთო კრების გადაწყვეტილებით სხვა რამ არ არის დადგენილი. მუხლი 10🔗. აქციონერის უფლებები და მოვალეობები 1. აქციონერის ერთადერთი მოვალეობაა, უზრუნველყოს შენატანის განხორციელება, საქართველოს მთავრობის შესაბამისი სამართლებრივი აქტ(ებ)ის თანახმად. 2. აქციონერს უფლება აქვს, მოითხოვოს სამეურნეო მოქმედებების ან მთლიანად წლიური ბალანსის სპეციალური შემოწმება. მუხლი 11🔗. ფონდის ანგარიშგება ფონდის სამეთვალყურეო საბჭოს თავმჯდომარე აქციონერთა საერთო კრებას წელიწადში ერთხელ წარუდგენს ანგარიშს ფონდის მიერ წინა წლის განმავლობაში განხორციელებული საქმიანობის შესახებ. ფონდი ვალდებულია, ყოველ წელს გამოაქვეყნოს აუდიტორის/აუდიტორული ფირმის მიერ შემოწმებული ფონდის წლიური ფინანსური ანგარიშგება. მუხლი 12🔗. ფონდის ლიკვიდაცია ფონდის ლიკვიდაცია ხორციელდება საქართველოს კანონმდებლობით დადგენილი წესით. მუხლი 13🔗. დასკვნითი დებულებები ის, რაც არ არის დარეგულირებული ამ წესდებით, რეგულირდება „მეწარმეთა შესახებ“ საქართველოს კანონის შესაბამისი ნორმებით.