„საქართველოში საგარეო დახმარების კოორდინაციის წესის დამტკიცების თაობაზე“ საქართველოს მთავრობის 2015 წლის 1 ივნისის №238 დადგენილებაში ცვლილების შეტანის შესახებ

მუხლი 1. ზოგადი დებულებანი

1. საქართველოში საგარეო დახმარების კოორდინაციის წესის (შემდგომში – წესი) მიზანია საზღვარგარეთის ქვეყნების უფლებამოსილი ორგანოების, სააგენტოებისა და საერთაშორისო დონორი ორგანიზაციების ძალისხმევისა და რესურსების (შემდგომში − საგარეო დახმარების) საქართველოს მთავრობის სამართლებრივი აქტებით დამტკიცებული სახელმწიფო სტრატეგიის განმსაზღვრელი დოკუმენტებით და „საგარეო დახმარების სფეროში პოლიტიკის განსაზღვრის შესახებ“ საქართველოს მთავრობის განკარგულებით  გათვალისწინებულ პრიორიტეტულ საკითხებზე ეფექტიანად მიმართვის მიზნით, უფლებამოსილ დაწესებულებათა კოორდინაციის წესებისა და მექანიზმების განსაზღვრა.

2. ეს წესი არ ვრცელდება თავდაცვისა და უსაფრთხოების სფეროებში განსახორციელებელ იმ საგარეო დახმარებაზე, რომელიც განკუთვნილია შეიარაღების, ტექნიკისა და აღჭურვილობის საქართველოსათვის გადმოცემისა და არსებულის მოდერნიზაციისათვის, საქართველოს თავდაცვის სამინისტროს თავდაცვის ძალების რეფორმირების პროცესის მხარდასაჭერად და ახალი ტექნოლოგიების დასანერგად.

მუხლი 2. ტერმინთა გამარტება

ამ წესის მიზნებისთვის:

ა) დონორი – საერთაშორისო ორგანიზაცია, საფინანსო ინსტიტუტი, უცხო ქვეყნის მთავრობა ან მისი წარმომადგენლობა, ან უცხო ქვეყნის კერძო ორგანიზაცია, რომელიც ხელშეკრულების ან წერილობითი გადაწყვეტილების საფუძველზე საქართველოს სოციალურ-ეკონომიკური განვითარებისა და სტრატეგიული რეფორმების განხორციელების ხელშეწყობის მიზნით უწევს დახმარებას საქართველოს;

ბ) საგარეო დახმარება – ფინანსური, მატერიალურ-ტექნიკური, ჰუმანიტარული და/ან ექსპერტული დახმარება;

გ) შემაჯამებელი დასკვნების დოკუმენტი – დოკუმენტი, რომელიც აჯამებს თემატური საკოორდინაციო ჯგუფის შეხვედრის მიმდინარეობისას განხილულ საკითხებს და წარმოადგენს ჩარჩოს მონაწილე მხარეებს შორის შემდგომი დიალოგისთვის;

დ) საჭიროებების მატრიცა – ინსტრუმენტი, რომლის მეშვეობითაც სამთავრობო საჭიროებების შესახებ ინფორმაცია მიეწოდება დონორებს;

ე) საპროექტო ინიციატივა – საგარეო დახმარების  მიღების შესახებ დოკუმენტის პროექტი, რომელიც დადგენილი წესით წარედგინება საქართველოს მთავრობის ადმინისტრაციას;

ვ) საბიუჯეტო ორგანიზაცია – საქართველოს ცენტრალური ხელისუფლების მიერ დაფუძნებული ან/და მის მიმართ ანგარიშვალდებული/მისი კონტროლისადმი დაქვემდებარებული ორგანიზაცია, აგრეთვე სხვა საჯარო სამართლის იურიდიული პირი/არასამეწარმეო (არაკომერციული) იურიდიული პირი (მისი არსებობის შემთხვევაში), თუ იგი არის შესაბამისი დონის ბიუჯეტით განსაზღვრული პროგრამის/ქვეპროგრამის ფარგლებში ასიგნებების განკარგვის უფლებამოსილების მქონე ორგანიზაცია.

მუხლი 3. საქართველოს მთავრობის ადმინისტრაციის საერთაშორისო ურთიერთობების დეპარტამენტის უფლებამოსილება

1. საქართველოს მთავრობის ადმინისტრაცია საგარეო დახმარების კოორდინაციას ახორციელებს საქართველოს მთავრობის ადმინისტრაციის საერთაშორისო ურთიერთობების დეპარტამენტის (შემდგომში – საერთაშორისო ურთიერთობების დეპარტამენტი) მეშვეობით.

2. დონორების მიერ ქვეყნის განვითარებაზე მიმართული პროგრამებისა და პროექტების დაფინანსების საჭიროების განსაზღვრა არის საქართველოს შესაბამისი სამინისტროებისა და სახელმწიფო მინისტრის აპარატის უფლებამოსილება, დარგობრივი პოლიტიკის შესაბამისად.

3. საერთაშორისო ურთიერთობების დეპარტამენტი ხელს უწყობს  სახელმწიფო პრიორიტეტების შესაბამისად, საგარეო დახმარების მიმდინარეობისა და შედეგიანობის გაუმჯობესებას, ისევე როგორც სტრატეგიულ საკითხებზე უწყებათაშორის  და დონორებთან ეფექტიან კომუნიკაციას. დასახული მიზნის მისაღწევად საერთაშორისო ურთიერთობების დეპარტამენტის უფლებამოსილებას განეკუთვნება:

ა) ქვეყნის მასშტაბით საგარეო დახმარების შესახებ ინფორმაციის შეგროვება და ანალიზი;

ბ) საქართველოს მთავრობის მიერ განსაზღვრულ პრიორიტეტებთან  საგარეო დახმარების თავსებადობის მიზნით, სხვადასხვა დონორ და პარტნიორ ორგანიზაციასა და დახმარების მიმღებს შორის თანამშრომლობის კოორდინაცია;

გ) საგარეო დახმარების სფეროში პოლიტიკის განმსაზღვრელი უწყებათაშორისი კომისიის სამდივნოს ფუნქციის განხორციელება; 

დ) საქართველოსთან პარტნიორობისა და თანამშრომლობის სტრატეგიის შემუშავების პროცესის ხელშეწყობა;

ე) დონორებისთვის ქვეყნის განვითარების საჭიროებების შესახებ ინფორმაციის თანმიმდევრულად მიწოდების ხელშეწყობა და ამ მიზნით უწყებათაშორისი მუშაობის კოორდინაცია;

ვ) სტრატეგიული პრიორიტეტების შესაბამისად, სახელმწიფო უწყებების ინიციატივების რეალიზების მიზნით, საგარეო დახმარების რესურსების მობილიზების ხელშეწყობა და სახელმწიფო დაწესებულებებისთვის საგარეო დახმარების შესაძლებლობების შესახებ ინფორმაციის მიწოდება.

შენიშვნა 1: ევროკავშირის დახმარების ფარგლებში არსებული შესაძლებლობების შესახებ დეტალური ინფორმაციის გავრცელება წარმოადგენს საქართველოს საგარეო საქმეთა სამინისტროს ევროკავშირის გენერალური დირექტორატის ევროკავშირის დახმარების კოორდინაციისა და სექტორული ინტეგრაციის დეპარტამენტის პრეროგატივას;

შენიშვნა 2: ფისკალურ გადაწყვეტილებები, საგარეო წყაროებიდან დაფინანსებული პროექტების თაობაზე, მიიღება კანონმდებლობით დადგენილი წესით, საქართველოს ფინანსთა სამინისტროს კოორდინირებით;

ზ) დონორთა კოორდინაციის ეფექტიანობის გაზრდის მიზნით შესაბამისი პროცედურებისა და მექანიზმების შემუშავება, გაძლიერება, მონიტორინგი და შეფასება;

თ) დონორებისთვის, საქართველოს საჯარო დაწესებულებებისთვის, სამოქალაქო და ფართო საზოგადოებისთვის საქართველოში საგარეო დახმარების შესახებ ინფორმაციის მიწოდება და კომუნიკაცია;

ი) დონორების დაფინანსებით განხორციელებული პროექტების მიმდინარეობისა და შედეგების  ძირითადი ტენდენციების ანალიზი;

კ) „ელექტრონულ მთავრობის“ პროგრამაში ამ წესის მე-6 მუხლის შესაბამისად ინიციირებულ პროექტებზე პოზიციის დაფიქსირება;

ლ) ნებისმიერი სხვა აქტივობა, რომელიც მიზნად ისახავს საგარეო დახმარების ეფექტიან კოორდინაციას.

4. საერთაშორისო ურთიერთობების დეპარტამენტი უზრუნველყოფს გამჭვირვალე კომუნიკაციას საქართველოს ყველა სამინისტროსა და სახელმწიფო მინისტრის აპარატთან, მათ შორის, საგარეო დახმარების მიღების საკითხებში ტრადიციულ პარტნიორებთან: საქართველოს ფინანსთა სამინისტროსთან, საქართველოს საგარეო საქმეთა სამინისტროსთან, საქართველოს რეგიონული განვითარებისა და ინფრასტრუქტურის სამინისტროსთან (რეგიონულ და ადგილობრივ დონეზე საგარეო დახმარების კოორდინაციის ხელშეწყობის მიზნით).

მუხლი 4. დონორების კოორდინაციის ძირითადი მექანიზმები

1. საგარეო დახმარების ეფექტიან კოორდინაციას, სახელმწიფო პრიორიტეტებთან ჰარმონიზაციისა და ურთიერთგადაფარვების თავიდან აცილების მიზნით, საქართველოს მთავრობა ახორციელებს შემდეგი მექანიზმებით:

ა) დონორების  საკოორდინაციო ფორუმი;

ბ) თემატური საკოორდინაციო ჯგუფები;

გ) სექტორული საკოორდინაციო შეხვედრები;

დ) საგარეო დახმარების ინფორმაციული მართვის სისტემა (eAIMS);

ე) საგარეო დახმარების სფეროში პოლიტიკის  განმსაზღვრელი უწყებათაშორისი კომისია.

2. დონორების კოორდინაციის მექანიზმები შეიძლება მოიცავდეს დაუგეგმავ და პროგრამულ საკოორდინაციო შეხვედრებსაც, რომლებიც განპირობებულია სხვადასხვა საჭიროებიდან გამომდინარე დონორი ორგანიზაციის ან საქართველოს რომელიმე სამთავრობო დაწესებულების მოთხოვნით. ასეთი საკოორდინაციო შეხვედრების საქართველოს მთავრობის ადმინისტრაციის მიერ ორგანიზების საჭიროების შესახებ საერთაშორისო ურთიერთობების დეპარტამენტს უნდა გაეგზავნოს შეტყობინება არანაკლებ 10 სამუშაო დღით ადრე.

3. საგარეო დახმარების მიმღები საბიუჯეტო ორგანიზაცია ყოველი კვარტლის ბოლოს საერთაშორისო ურთიერთობების დეპარტამენტს აწვდის ინფორმაციას მიმდინარე და დასრულებული პროექტების შესახებ ამ წესის დანართი 1.1-ში მოცემული კრიტერიუმების შესაბამისად, მიუხედავად ამ წესის მე-5 მუხლის პირველი პუნქტით განსაზღვრული პროექტის ბიუჯეტის ოდენობისა. იმავე ინფორმაციის წარმოდგენა ეთხოვოთ საქართველოს მუნიციპალიტეტებსაც;

შენიშვნა: მოცემული პუნქტის მიზნებისთვის, სამინისტრო/ სახელმწიფო მინისტრის აპარატი პასუხისმგებელია მის მიერ  დაფუძნებული ან/და მის მიმართ ანგარიშვალდებული/მისი კონტროლისადმი დაქვემდებარებული ორგანიზაციის პროექტებთან დაკავშირებული ინფორმაციის წარმოდგენაზე.

მუხლი 5. საქართველოს მთავრობის ადმინისტრაციის ინფორმირება საგარეო დახმარების საპროექტო ინიციატივებთან დაკავშირებით

1. თუ საბიუჯეტო ორგანიზაციის მიერ მისაღები საგარეო დახმარების თანხა ან/და ნატურალური ფორმით გადმოსაცემი ქონების ღირებულება აღემატება ასი ათას ლარს, საპროექტო ინიციატივა  მის გაფორმებამდე, წერილობით  უნდა წარედგინოს საქართველოს მთავრობის ადმინისტრაციას საგარეო დახმარების გაცემის მიზნის, მოცულობისა და სახსრების (ფულადი თუ ნატურალური ფორმით) გამოყენების კონკრეტული მიმართულების წინასწარი შეფასების მიზნით. აღნიშნული წესი არ ვრცელდება უმაღლესი საგანმანათლებლო დაწესებულების სტატუსის მქონე საჯარო სამართლის იური­დიულ პირებზე, ასევე ამ დადგენილების ამოქ­მე­დე­ბამდე გამოყოფილი იმ საგარეო დახმარების მიმართ, რომლებზეც დახმარების გამ­ცემ­სა და  მიმღებს შორის უკვე გაფორ­მე­ბულია შესაბამისი დოკუმენტი.

2. საქართველოს მთავრობის ადმინისტრაციის წინაშე საპროექტო ინიციატივის წარდგენიდან, არა უმეტეს 10 სამუშაო დღის ვადაში, საერთაშორისო ურთიერთობების დეპარტამენტი იხილავს საგარეო დახმარების გაცემის მიზნის, მოცულობისა და სახსრების (ფულადი თუ ნატურალური ფორმით) გამოყენების შესაბამისობას სახელმწიფო პრიორიტეტებთან და  თუ მიიჩნევს, რომ საპროექტო ინიციატივა არ შეესაბამება სამთავრობო პრიორიტეტებს ან ადგილი აქვს სხვა უწყების საპროექტო ინიციატივის გადაფარვას ან დუბლირებას, წერილობით აძლევს ინიციატორ უწყებას ამგვარი შეუსაბამობის, გადაფარვის ან დუბლირების დაძლევის შესახებ შესაძლო რეკომენდაციებს.

3. თუ საპროექტო ინიციატივის ავტორი დაწესებულება ეთანხმება ასეთ რეკომენდაციას, იგი საქართველოს მთავრობის ადმინისტრაციას 5 სამუშაო დღის ვადაში უგზავნის დაზუსტებულ საპროექტო წინადადებას, ხოლო თუ არ ეთანხმება, საპროექტო ინიციატივის ავტორი დაწესებულება და საქართველოს მთავრობის ადმინისტრაცია 5 სამუშაო დღის ვადაში გამართავენ ერთობლივ კონსულტაციებს სავარაუდო შეუსაბამობის, გადაფარვის ან დუბლირების დაძლევის მიზნით. თუ ასეთი კონსულტაციების შედეგად მხარეები ვერ მივლენ შეთანხმებამდე, საკითხი განხილული იქნება საქართველოს მთავრობის სხდომაზე.

4. მოცემული მუხლის მიზნებისთვის, საგარეო დახმარება არ გულისხმობს ამ წესის მე-6 მუხლით გათვალისწინებულ გრანტს, ასევე გრანტს, რომელიც თავისი იურიდიული ბუნებით წარმოადგენს საქართველოს საერთაშორისო ხელშეკრულებას და, შესაბამისად, ექვემდებარება „საქართველოს საერთაშორისო ხელშეკრულებების შესახებ“ საქართველოს კანონით დადგენილ შემათანხმებელ პროცედურებს, ასევე სახელმწიფო  სესხს, რომელთან დაკავშირებული საკითხებიც წარმოადგენს საქართველოს ფინანსთა სამინისტროს ექსკლუზიურ უფლებამოსილებას.

მუხლი 6. საბიუჯეტო ორგანიზაციის მიერ გრანტის მიღებასთან დაკავშირებით გასატარებელი ღონისძიებები

საბიუჯეტო ორგანიზაციებმა გრანტის მიღების მიზნით გაითვალისწინონ შემდეგი:

1. თუ გრანტის თანხა ან/და ნატურალური ფორმით მისაღები ქონების ღირებულება აღემატება ასი ათას ლარს, გრანტის მიღების შესახებ დოკუმენტის პროექტი მის გაფორმებამდე განსახილველად უნდა წარედგინოს საქართველოს მთავრობას გრანტის მიღების მიზნის, მოცულობისა და სახსრების (ფულადი თუ ნატურალური ფორმით) გამოყენების კონკრეტული მიმართულების წინასწარი შეფასების მიზნით.

2. ეს მუხლი არ მოქმედებს ამ დადგენილების ამოქმედებამდე გამოყოფილი იმ გრანტების მიმართ, რომლებზეც გრანტის გამცემსა და გრანტის მიმღებს შორის უკვე გაფორმებულია შესაბამისი დოკუმენტი.

3. ეს მუხლი არ მოქმედებს უმაღლესი საგანმანათლებლო დაწესებულების სტატუსის მქონე საჯარო სამართლის იურიდიულ პირებზე.

4. ამ მუხლით გათვალისწინებული გრანტის მიღების შესახებ დოკუმენტის პროექტის „ელექტრონული მთავრობის“ პროგრამაში ინიციირების შემთხევაში, სავალდებულოა საქართველოს მთავრობის 2018 წლის 14 თებერვლის №77 დადგენილებით დამტკიცებული „საქართველოს მთავრობის რეგლამენტის“ მე-12 მუხლის მე-7 პუნქტის შესაბამისად, „ელექტრონული მთავრობის“ პროგრამაში საერთაშორისო ურთიერთობების დეპარტამენტის დადებითი პოზიციის დაფიქსირება.

მუხლი 7. დონორების  საკოორდინაციო ფორუმი

1. დონორების საკოორდინაციო ფორუმი (შემდგომში − ფორუმი),  როგორც წესი, წელიწადში ერთხელ იმართება საქართველოს მთავრობის ინიციატივით და მისი უპირველესი ამოცანაა სტრატეგიული დიალოგი დონორებთან, სახელმწიფო პრიორიტეტების შესახებ ინფორმაციის წარდგენა და სამთავრობო გეგმებთან დაკავშირებით მათი მხარდაჭერის გაძლიერება.

2. ფორუმის თავმჯდომარეა საქართველოს პრემიერ-მინისტრი. ფორუმს ესწრებიან საქართველოს სამინისტროების, სახელმწიფო მინისტრის აპარატის და დონორული ორგანიზაციების წარმომადგენლები. 

3. ფორუმის ორგანიზაციულ და ანალიტიკურ უზრუნველყოფას ახორციელებს საერთაშორისო ურთიერთობების დეპარტამენტი, სხვა შესაბამის სახელმწიფო დაწესებულებებსა და დონორებთან თანამშრომლობით.

მუხლი 8. თემატური საკოორდინაციო ჯგუფები

1. თემატური საკოორდინაციო ჯგუფები საქმიანობას ახორციელებენ  საქართველოს მთავრობის ადმინისტრაციაში. ჯგუფები იკრიბებიან წელიწადში ერთხელ, წინასწარ შეთანხმებული თარიღების და დღის წესრიგის შესაბამისად, რომელსაც ამზადებს საერთაშორისო ურთიერთობების დეპარტამენტი საქართველოს სამინისტროებთან, სახელმწიფო მინისტრის აპარატსა და დონორებთან შეთანხმებით.

2. თემატური საკოორდინაციო ჯგუფების მიზანია კომუნიკაცია და სტრატეგიული დიალოგი  დონორებთან, საგარეო დახმარების სახელმწიფო პრიორიტეტებთან ჰარმონიზაციისა და ურთიერთგადაფარვების თავიდან აცილების მიზნით.

3. თემატური საკოორდინაციო ჯგუფები მოიცავს შემდეგ მიმართულებებს:

ა) საჯარო მმართველობა;

ბ) ადამიანის უფლებები და საზოგადოებრივი უსაფრთხოება;

გ) ეკონომიკური განვითარება;

დ) სოციალური პოლიტიკა და ადამიანური კაპიტალის განვითარება;

ე) ბუნებრივი რესურსების მდგრადი გამოყენება;

ვ) რეგიონული განვითარება.

4. საქართველოს მთავრობის პრიორიტეტებიდან გამომდინარე, თემატური საკოორდინაციო ჯგუფის თემა შესაძლოა შეიცვალოს პერიოდულად. გარდა ამისა, განსახილველი საკითხების ურთიერთკავშირისა და ერთგვაროვანი საჭიროებებიდან გამომდინარე, შესაძლებელია რამდენიმე ჯგუფის შეხვედრის გაერთიანება ან ქვეჯგუფების შექმნა.

5. თემატური საკოორდინაციო ჯგუფის წევრები არიან საქართველოს სამინისტროები და დონორები. საჭიროების შემთხვევაში, სახელმწიფო საქვეუწყებო დაწესებულებებისა და საჯარო სამართლის იურიდიული პირების წარმომადგენლები, რომლებიც თემატური საკოორდინაციო ჯგუფების ფარგლებში ახორციელებენ აქტივობებს.

6. თითოეულ თემატურ საკოორდინაციო ჯგუფს თანათავმჯდომარეობენ საქართველოს მთავრობისა და დონორი ორგანიზაციების წარმომადგენლები. თანათავმჯდომარეთა რაოდენობა შესაძლოა იყოს ერთი ან რამდენიმე.   

7. საქართველოს მთავრობის მხრიდან თანათავმჯდომარე შესაბამისი ჯგუფებისთვის განისაზღვრება შემდეგნაირად:

ა) საჯარო მმართველობა – საქართველოს მთავრობის ადმინისტრაციის პოლიტიკის დაგეგმვისა და სამთავრობო კოორდინაციის დეპარტამენტი;

ბ) ადამიანის უფლებები და საზოგადოებრივი უსაფრთოხება – საქართველოს მთავრობის ადმინისტრაციის ადამიანის უფლებათა დეპარტამენტი;

გ) ეკონომიკური განვითარება – საქართველოს ეკონომიკისა და მდგრადი განვითარების სამინისტრო;

დ) სოციალური პოლიტიკა და ადამიანური კაპიტალის განვითარება – საქართველოს ოკუპირებულ ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო; საქართველოს განათლების, მეცნიერებისა და ახალგაზრდობის სამინისტრო;

ე) ბუნებრივი რესურსების მდგრადი გამოყენება – საქართველოს გარემოს დაცვისა და სოფლის მეურნეობის სამინისტრო;

ვ) რეგიონული განვითარება – საქართველოს რეგიონული განვითარებისა და ინფრასტრუქტურის სამინისტრო.

8. დონორების მხრიდან შეხვედრის თანათავმჯდომარეების შესახებ ინფორმაცია არა უგვიანეს ყოველი წლის 31 იანვრისა ეცნობება  საერთაშორისო ურთიერთობების დეპარტამენტს.

მუხლი 9. თემატური საკოორდინაციო ჯგუფის შეხვედრის მოსამზადებელი ეტაპი

თემატური საკოორდინაციო ჯგუფების შეხვედრების მოსამზადებელ ეტაპზე ჩართულნი არიან საქართველოს სამინისტროების, სხვა სახელმწიფო დაწესებულებების, საერთაშორისო ურთიერთობების დეპარტამენტის და დონორული ორგანიზაციების წარმომადგენლები. აღნიშნული შეხვედრების მომზადების მიზნით:

ა) საერთაშორისო ურთიერთობების დეპარტამენტი ჯგუფების თანათავმჯდომარეებთან ათანხმებს და ყველა დაინტერესებულ მხარეს უგზავნის თემატური საკოორდინაციო ჯგუფების შეხვედრების ჩატარების კალენდარს;

ბ) თემატური საკოორდინაციო ჯგუფის შეხვედრათა მოსამზადებელ ეტაპზე, საერთაშორისო ურთიერთობების დეპარტამენტი, „საგარეო დახმარების სფეროში პოლიტიკის განსაზღვრის შესახებ“ საქართველოს მთავრობის განკარგულების  შესაბამისად, საქართველოს მთავრობის მხრიდან ჯგუფის თანათავმჯდომარესთან ათანხმებს შეხვედრაზე განსახილველი სამთავრობო პრიორიტეტების ჩამონათვალსა და შეხვედრის დღის წესრიგს, რომელიც შესაბამისი უკუკავშირისთვის ეგზავნება დონორების მხრიდან თანათავმჯდომარეს;

გ) ჯგუფის შეხვედრის მოსამზადებელი ეტაპის აუცილებელ კომპონენტს წარმოადგენს სამთავრობო საჭიროებების შეფასება. საჭიროებების შეგროვებას  ამ წესის დანართი 1.2-ში მოცემული ფორმის გამოყენებით, ახორციელებს საქართველოს მთავრობის მხრიდან თანათავმჯდომარე. აღნიშნული ფორმა საერთაშორისო ურთიერთობების დეპარტამენტს მიეწოდება შეხვედრის გამართვამდე არა უგვიანეს 10 სამუშაო დღისა, რომელიც უზრუნველყოფს საჭიროებების მატრიცის განხილვას „საგარეო დახმარების სფეროში პოლიტიკის განსაზღვრის შესახებ“ საქართველოს მთავრობის განკარგულებით განსაზღვრულ პრიორიტეტებთან შესაბამისობის დადგენისა და შესაძლო არაპრიორიტეტული ან დუბლირებული საკითხების თავიდან აცილების მიზნით. შენიშვნების არსებობის შემთხვევაში, საერთაშორისო ურთიერთობების დეპარტამენტი საქართველოს მთავრობის მხრიდან ჯგუფის თანათავმჯდომარესთან მართავს დამატებით კონსულტაციებს და დოკუმენტის საბოლოო ვერსიას უზიარებს დონორულ მხარეს;

დ) შეხვედრაზე მოსაწვევი პირების სია შეხვედრის თანათავმჯდომარეების მიერ მიეწოდება საერთაშორისო ურთიერთობების დეპარტამენტს შეხვედრის გამართვამდე არა უგვიანეს 10 სამუშაო დღისა.

მუხლი 10. თემატური საკოორდინაციო ჯგუფის მიმდინარეობა და შემაჯამებელი დასკვნები

1. თემატური საკოორდინაციო ჯგუფის შეხვედრას ხსნის და მოდერაციას უწევს საქართველოს მთავრობის ადმინისტრაციის წარმომადგენელი. შეხვედრის თანათავმჯდომარეები წარმოადგენენ თავიანთ ხედვას განსახილველ საკითხებთან დაკავშირებით.

2. შესაძლებელია შეხვედრის მიმდინარეობის აუდიო-ვიდეო ჩაწერა. შეხვედრის შემდგომ საერთაშორისო ურთიერთობების დეპარტამენტის მიერ მზადდება ოქმი და შემაჯამებელი დასკვნების დოკუმენტი, რომელიც შესაბამისი კომენტარებისთვის და ხელმოსაწერად ეგზავნება თანათავმჯდომარეებს შეხვედრის ჩატარებიდან არა უგვიანეს 10 სამუშაო დღისა. შემაჯამებელი დასკვნების დოკუმენტი შედგება ზოგადი და სპეციალური ნაწილებისგან, ასახავს შეხვედრის მიმდინარეობისას განხილულ საკითხებზე მხარეთა მოლოდინებს და  წამოადგენს შემდგომი შესაძლო ურთიერთთანამშრომლობის ჩარჩოს.

3. საკოორდინაციო ჯგუფის შეხვედრიდან არა უგვიანეს 14 სამუშაო დღისა, ჯგუფის თანათავმჯდომარეები უზრუნველყოფენ საერთაშორისო ურთიერთობების დეპარტამენტისთვის იმ პირების შესახებ ინფორმაციის მიწოდებას (საკონტაქტო პირები), რომლებიც კოორდინაციას გაუწევენ შეხვედრის შემდგომ პროცესებს. საკონტაქტო პირები დაგეგმავენ შეხვედრებს საჭიროებების მატრიცაში წარმოდგენილი ინფორმაციის განხილვისა და სამომავლო ურთიერთთანამშრომლობის გზების დასახვის მიზნით და უზრუნველყოფენ შემაჯამებელი დასკვნების დოკუმენტში მოცემული ინფორმაციის პერიოდულ მონიტორინგს.

4. თემატური საკოორდინაციო ჯგუფის შემაჯამებელი დასკვნების დოკუმენტში მოცემული საკითხების ირგვლივ არსებული პროგრესის განხილვის მიზნით,  ჯგუფის შემდგომი შეხვედრის გამართვამდე, როგორც წესი, იმავე მხარეების მონაწილეობით იმართება შუალედური შეხვედრები.

მუხლი 11. სექტორული საკოორდინაციო შეხვედრები

სექტორული საკოორდინაციო შეხვედრები იმართება საბიუჯეტო ორგანიზაციის მიერ დონორებთან,  მიმდინარე თანამშრომლობის გაღრმავებისა და ურთიერთგადაფარვების თავიდან აცილების მიზნით. დაგეგმილი შეხვედრების შესახებ  საერთაშორისო ურთიერთობების დეპარტამენტს სახელმწიფო დაწესებულებებისგან ეგზავნება წინასწარი შეტყობინება შეხვედრის გამართვამდე არა უგვიანეს 7 სამუშაო დღისა.

მუხლი 12. საგარეო დახმარების ინფორმაციული მართვის სისტემა

1. ინფორმაცია საქართველოსთვის გამოყოფილი საგარეო დახმარების შესახებ თავმოყრილია საერთაშორისო ურთიერთობების დეპარტამენტის ადმინისტრირებას დაქვემდებარებულ  მონაცემთა ბაზაში (http://eaims.ge/).

2. საგარეო დახმარების ინფორმაციული მართვის სისტემაში არსებული ინფორმაციის ანალიზის საფუძველზე, საერთაშორისო ურთიერთობების დეპარტამენტი, წელიწადში ერთხელ, ამზადებს და საჯაროდ აქვეყნებს საგარეო დახმარების შესახებ ანგარიშს.

დანართი 1.1

მონაცემთა ელექტრონულ ბაზაში (eaims.ge) მიმდინარე/დასრულებული პროექტების შესახებ წარმოსადგენი ინფორმაციის  კრიტერიუმები:

• პროექტის განმახორციელებელი დაწესებულება          

• დონორი

• პროექტის დასახელება

• პროექტის რეგისტრაციის ნომერი

• პროექტის სტატუსი

• პროექტის ბიუჯეტი

• დაფინანსების ტიპი

• ტერიტორიული დაფარვა

• პროექტის დაწყების თარიღი

• პროექტის დასრულების თარიღი

• პროექტის მოკლე აღწერა

• შესაძლო აქტივობები

დანართი 1.2

საჭიროებების მატრიცა

დანართი №2

საგარეო დახმარების სფეროში პოლიტიკის განმსაზღვრელი უწყებათაშორისი კომისიის შემადგენლობა და საქმიანობის წესი

მუხლი 1. საგარეო დახმარების სფეროში პოლიტიკის განმსაზღვრელი უწყებათაშორისი კომისია  

საგარეო დახმარების სფეროში პოლიტიკის განმსაზღვრელი უწყებათაშორისი კომისია  (შემდგომში – კომისია), საგარეო დახმარების პოლიტიკის განსაზღვრის მიზნით ასრულებს ქვეყნის შესაბამისი დაწესებულებების საქმიანობის მაკოორდინირებელ ფუნქციას.

მუხლი 2. კომისიის შემადგენლობა

კომისია შედგება შემდეგი წევრებისგან:

1. საქართველოს მთავრობის ადმინისტრაციის უფროსი –  კომისიის თავმჯდომარე.

2. საქართველოს მთავრობის ადმინისტრაციის უფროსის მოადგილე – კომისიის თავმჯდომარის მოადგილე.

3. საქართველოს ფინანსთა  მინისტრის მოადგილე − კომისიის წევრი.

4. საქართველოს საგარეო საქმეთა მინისტრის მოადგილე –  კომისიის წევრი.

5. საქართველოს ეკონომიკისა და მდგრადი განვითარების მინისტრის მოადგილე − კომისიის წევრი.

6. საქართველოს რეგიონული განვითარებისა და ინფრასტრუქტურის მინისტრის მოადგილე − კომისიის წევრი.

7. საქართველოს გარემოს დაცვისა და სოფლის მეურნეობის მინისტრის მოადგილე − კომისიის წევრი.

8. საქართველოს იუსტიციის მინისტრის მოადგილე – კომისიის წევრი.

9. საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილეები –  კომისიის წევრები.

10. საქართველოს შინაგან საქმეთა მინისტრის მოადგილე - კომისიის წევრი.

11. საქართველოს განათლების, მეცნიერებისა და ახალგაზრდობის მინისტრის მოადგილე – კომისიის წევრი.

12. შერიგებისა და სამოქალაქო თანასწორობის საკითხებში სახელმწიფო მინისტრის მოადგილე – კომისიის წევრი.

13. საქართველოს კულტურისა და სპორტის მინისტრის მოადგილე – კომისიის წევრი.

მუხლი 3. კომისიის უფლებამოსილებანი

1. კომისია უფლებამოსილია, შეიმუშაოს წინადადებები და რეკომენდაციები ქვეყნის საგარეო დახმარების სფეროში პოლიტიკის განსაზღვრის მიზნით, როგორც ქვეყნის განვითარების ეროვნული სტრატეგიისა და  მთავრობის სექტორული პოლიტიკის დოკუმენტების, ასევე ქვეყნის მიერ საერთაშორისო ხელშეკრულებით ნაკისრი, მათ შორის, ევროინტეგრაციის პროცესთან დაკავშირებული ვალდებულებების  შესაბამისად.  

2. კომისია შეიმუშავებს  და  საქართველოს მთავრობას დასამტკიცებლად წარუდგენს „საგარეო დახმარების სფეროში პოლიტიკის განსაზღვრის შესახებ“ საქართველოს მთავრობის განკარგულების პროექტს. აღნიშნული განკარგულება წარმოადგენს დონორების კოორდინაციის მექანიზმების მუშაობის პროცესში ჩარჩო დოკუმენტს.  

3. კომისიას უფლება აქვს, შესაბამისი დაწესებულებებიდან მიიღოს თავისი საქმიანობისთვის საჭირო ინფორმაცია, დოკუმენტები, ცნობები და სხვა მონაცემები, საქართველოს კანონმდებლობით დადგენილი წესით.

4. კომისია უფლებამოსილია, შექმნას  დროებითი ან მუდმივმოქმედი სამუშაო ჯგუფ(ებ)ი და მიიწვიოს დამოუკიდებელი ექსპერტები, საკუთარ კომპეტენციაში შემავალი საკითხების შესწავლისა და სათანადო რეკომენდაციების შემუშავების მიზნით. კომისიის გადაწყვეტილებით შექმნილი სამუშაო ჯგუფი ანგარიშვალდებულია კომისიის წი

მუხლი 4. კომისიის საქმიანობის მიზანი და ფუნქციები

1. კომისიის საქმიანობის მთავარი მიზანია საქართველოს საგარეო დახმარების სახელმწიფო პრიორიტეტებთან ჰარმონიზაციის, ურთიერთგადაფარვების თავიდან აცილების, ქვეყნის მიერ ნაკისრი საერთაშორისო ვალდებულებების შესრულების ხელშეწყობის, ევროკავშირთან ინტეგრაციის გზაზე აუცილებელი ღონისძიებების გატარების მიზნით საგარეო დახმარების ერთიანი პოლიტიკის ჩამოყალიბება და  წარმართვა.

2. კომისიის ძირითადი ფუნქციებია:

ა) ქვეყნის საგარეო დახმარების სფეროში პოლიტიკის პრაქტიკაში ეფექტიანი იმპლემენტაციის ხელშეწყობა;

ბ) საჭიროებისამებრ, საგარეო დახმარების სფეროში პოლიტიკის განახლება და სათანადო კოორდინაცია;

გ) ქვეყნის საგარეო დახმარების სფეროში არსებული გამოწვევების განხილვა და მათ აღმოსაფხვრელად წინადადებებისა და რეკომენდაციების მომზადება;

დ) სამუშაო ჯგუფ(ებ)ის, საქმიანობის მონიტორინგი, ასეთის შექმნის შემთხვევაში;

 ე) კომისიის მიზნებისა და ძირითადი ფუნქციების შესრულებასთან დაკავშირებული სხვა საკითხების განხილვა და მათზე წინადადებებისა და რეკომენდაციების მომზადება

მუხლი 5. კომისიის სხდომის ორგანიზება

1. სხდომის დღის წესრიგიდან გამომდინარე, კომისიის თავმჯდომარის გადაწყვეტილებით, კომპეტენციისა და საქმიანობის სფეროს მიკუთვნებულ საკითხებთან დაკავშირებით, კომისიის სხდომაზე სათათბირო ხმის უფლების გარეშე შეიძლება, მიწვეულ იქნენ სახელმწიფო საქვეუწყებო დაწესებულებების, საჯარო სამართლის იურიდიული პირებისა და დონორების წარმომადგენლები.

2. კომისიის სხდომაზე განსახილველი საკითხის ინიციირება შეუძლიათ კომისიის თავმჯდომარესა და კომისიის წევრს.

3. კომისიის სხდომები, როგორც წესი, იმართება წელიწადში ორჯერ. საჭიროების შემთხვევაში, შესაძლებელია, გაიმართოს კომისიის რიგგარეშე სხდომა, კომისიის თავმჯდომარის ან კომისიის წევრის მოთხოვნის საფუძველზე.

4. კომისიის სხდომები შეიძლება გაიმართოს, როგორც ფიზიკურად, ისე  ელექტრონულ ფორმატში.

5. კომისიის სხდომის დღის წესრიგი, დრო და ადგილი ეცნობებათ კომისიის წევრებს სხდომის გამართვამდე გონივრული ვადით ადრე.

6. კომისია უფლებამოსილია, თუ სხდომას ესწრება კომისიის წევრთა ნახევარზე მეტი, ხოლო გადაწყვეტილება მიიღება კომისიის სხდომაზე სათათბირო ხმის უფლებით დამსწრე წევრთა უმრავლესობით. ხმათა თანაბრად გაყოფის შემთხვევაში, გადამწყვეტია კომისიის თავმჯდომარის ხმა.

7. კომისიის გადაწყვეტილებები ფორმდება კომისიის სხდომის ოქმის სახით, რომელსაც ხელს აწერს კომისიის თავმჯდომარე.

8. კომისიის თავმჯდომარის არყოფნის შემთხვევაში მის ფუნქციებს ასრულებს  კომისიის თავმჯდომარის მოადგილე.

დანართი №3

საქართველოს სამინისტროებისა და სახელმწიფო მინისტრის აპარატის მიერ

გრანტის გაცემის წესი

საქართველოს სამინისტროებმა და სახელმწიფო მინისტრის აპარატმა გრანტის გაცემის შესახებ გადაწყვეტილების მიღებისას გაითვალისწინონ შემდეგი:

 1. თუ გრანტის თანხა ან/და ნატურალური ფორმით გასაცემი ქონების ღირებულება აღემატება ორმოცდაათი ათას ლარს, გრანტის გაცემის შესახებ დოკუმენტის პროექტი, მის გაფორმებამდე, საქართველოს ფინანსთა სამინისტროს დასკვნასთან ერთად, განსახილველად უნდა წარედგინოს საქართველოს მთავრობას გრანტის გაცემის მიზნის, მოცულობისა და სახსრების (ფულადი თუ ნატურალური ფორმით) გამოყენების კონკრეტული მიმართულების წინასწარი შეფასების მიზნით.

 2. თუ გრანტის თანხა ან/და ნატურალური ფორმით გასაცემი ქონების ღირებულება არ აღემატება ორმოცდაათი ათას ლარს, სამინისტრო და სახელმწიფო მინისტრის აპარატი  უფლებამოსილია, მიიღოს გრანტის გაცემის შესახებ გადაწყვეტილება საქართველოს პრემიერ-მინისტრის წინასწარი თანხმობით.

3. საქართველოს სამინისტროსა და სახელმწიფო მინისტრის აპარატის მიერ გაცემული გრანტების წლიური მოცულობა არ უნდა აღემატებოდეს მისთვის დამტკიცებული ასიგნებების 1%-ს, თუ საქართველოს მთავრობის მიერ არ იქნა მიღებული სხვა გადაწყვეტილება.