„საქართველოს განათლებისა და მეცნიერების სამინისტროს მიერ გამოსაყენებელი ადმინისტრაციული სამართალდარღვევის ოქმის ფორმის, ადმინისტრაციული სამართალდარღვევის ოქმის შევსების ინსტრუქციისა და ადმინისტრაციული სამართალდარღვევის ოქმის გამოყენების, აღრიცხვა-ანგარიშგებისა და გაცემის წესის დამტკიცების შესახებ“ საქართველოს განათლების, მეცნიერების, კულტურისა და სპორტის მინისტრის 2020 წლის 5 თებერვლის №20/ნ ბრძანებაში ცვლილების შეტანის თაობაზე

დანართი №2

ადმინისტრაციული სამართალდარღვევის ოქმის შევსების ინსტრუქცია

მუხლი 1

წინამდებარე ინსტრუქცია, საქართველოს ადმინისტრაციულ სამართალდარღვევათა კოდექსის შესაბამისად, განსაზღვრავს ბავშვთა დაცვის მიმართვიანობის (რეფერირების) პროცედურებში ჩართული სუბიექტის – საქართველოს განათლების, მეცნიერებისა და ახალგაზრდობის სამინისტროს მიერ (შემდგომ – სამინისტრო), ბავშვზე ძალადობის გამოვლენის და ბავშვზე ძალადობის შესახებ ინფორმაციის შესაბამისი სახელმწიფო ორგანოსთვის მიწოდების ვალდებულების შეუსრულებლობაზე ადმინისტრაციულ სამართალდარღვევათა ოქმის შევსების და წარდგენის წესს.

მუხლი 2

1. ადმინისტრაციული სამართალდარღვევის ოქმი ივსება საქართველოს ადმინისტრაციულ სამართალდარღვევათა კოდექსის 1726 მუხლით გათვალისწინებული სამართალდარღვევის არსებობისას.

2. გარდა ამ მუხლის მე-3 პუნქტით გათვალისწინებული შემთხვევისა, ადმინისტრაციული სამართალდარღვევის ოქმი, კონკრეტული ზოგადსაგანმანათლებლო დაწესებულების დირექტორის ბრძანებით განსაზღვრული რეფერირებაზე პასუხისმგებელი ფიზიკური პირის მიერ ბავშვზე ძალადობის შესახებ შესაბამისი სახელმწიფო ორგანოსთვის ინფორმაციის მიწოდების ვალდებულების შეუსრულებლობის შემთხვევაში, ივსება სამინისტროს ტერიტორიული ორგანოს – საგანმანათლებლო რესურსცენტრის უფროსის ბრძანებით განსაზღვრული უფლებამოსილი პირის მიერ სამართალდარღვევის შეტყობინებიდან არაუგვიანეს 5 სამუშაო დღისა.

3. ბავშვზე ძალადობის გამოვლენისა და ბავშვზე ძალადობის შესახებ ინფორმაციის შესაბამისი სახელმწიფო ორგანოსათვის მიწოდების ვალდებულების საგანმანათლებლო დაწესებულების მანდატურის მიერ შეუსრულებლობის შემთხვევაში, ადმინისტრაციულ სამართალდარღვევათა ოქმი ივსება სსიპ – საგანმანათლებლო დაწესებულების მანდატურის სამსახურის მონიტორინგის სამმართველოს უფლებამოსილი პირის მიერ სამართალდარღვევის შეტყობინებიდან არაუგვიანეს 5 სამუშაო დღისა.

4. ადმინისტრაციული სამართალდარღვევის ფაქტი მტკიცდება შემდეგი საშუალებებით: ადმინისტრაციული სამართალდარღვევის ოქმით, დამრღვევი პირის ახსნა-განმარტებით, არასრულწლოვანი დაზარალებულის, მოწმის (ასეთის არსებობის შემთხვევაში) და კანონიერი წარმომადგენლ(ებ)ის ჩვენებებით, ვიდეოფირით ან ფოტოფირით (ასეთის არსებობის შემთხვევაში) და სხვა დოკუმენტებით.

მუხლი 3

1. ადმინისტრაციული სამართალდარღვევის ოქმის ფორმა ივსება 3 (სამ) ეგზემპლარად, რომელთაგან პირველი ეგზემპლარი (დედანი) მიმართვასთან ერთად დაუყოვნებლივ იგზავნება შესაბამის სასამართლოში, მაგრამ არაუგვიანეს 7 სამუშაო დღისა, მეორე რჩება ოქმის შემვსებთან, ხოლო მესამე გადაეცემა სამართალდამრღვევს.

2. ადმინისტრაციულ სამართალდარღვევათა ოქმის შედგენიდან არაუგვიანეს 4 დღისა, საგანმანათლებლო რესურსცენტრი/სსიპ – საგანმანათლებლო დაწესებულების მანდატურის სამსახური უზრუნველყოფს სამინისტროს სკოლამდელი და ზოგადი განათლების განვითარების დეპარტამენტის ინფორმირებას. საგანმანათლებლო რესურსცენტრი/სსიპ – საგანმანათლებლო დაწესებულების მანდატურის სამსახური ასევე უზრუნველყოფს  სამინისტროს სკოლამდელი და ზოგადი განათლების განვითარების დეპარტამენტის ინფორმირებას სასამართლოს მიერ გამოტანილი დადგენილების ჩაბარებიდან 4  დღის ვადაში.

3. სამინისტროს სკოლამდელი და ზოგადი განათლების განვითარების დეპარტამენტი ამ მუხლის მე-2 პუნქტით გათვალისწინებული ინფორმაციის მიღებიდან არაუგვიანეს 6 დღისა უზრუნველყოფს სათანადო მოქმედებების განხორციელებას საქართველოს შინაგან საქმეთა სამინისტროში არსებულ ადმინისტრაციულ სამართალდარღვევათა აღრიცხვის ერთიან საინფორმაციო ბანკში სამართალდარღვევის შესახებ ინფორმაციის განთავსების მიზნით.

მუხლი 4

1. შესაბამისი გარემოებების დადასტურების შემთხვევაში, ადმინისტრაციული სამართალდარღვევის ოქმში შესატანი მონაცემები განისაზღვრება საქართველოს ადმინისტრაციულ სამართალდარღვევათა კოდექსის 240-ე მუხლის შესაბამისად.

2. ადმინისტრაციული სამართალდარღვევის ოქმში აღინიშნება მისი შედგენის თარიღი და ადგილი; შემდგენლის თანამდებობა, სახელი, მამის სახელი და გვარი; მონაცემები დამრღვევის პიროვნების შესახებ სახელი, გვარი, დაბადების თარიღი, პირადი ნომერი, საცხოვრებელი ადგილი: რეგისტრაციის მიხედვით და ფაქტობრივი მდგომარეობით; ადმინისტრაციული სამართალდარღვევის ჩადენის ადგილი, დრო და არსი; ნორმატიული აქტი, რომელიც ითვალისწინებს პასუხისმგებლობას ამ სამართალდარღვევისათვის; დაზარალებულთა და მოწმეთა სახელები, გვარები და მისამართები (ასეთის არსებობის შემთხვევაში); დამრღვევის ახსნა-განმარტება; ასევე საქმის გადასაწყვეტად საჭირო სხვა ცნობები.

3. ზოგადსაგანმანათლებლო დაწესებულების თანამშრომლის მიერ ბავშვთა დაცვის მიმართვიანობის (რეფერირების) პროცედურებით გათვალისწინებული ვალდებულებების შეუსრულებლობაზე ზედამხედველობას და შესაბამის რეაგირებას ახორციელებს შესაბამისი საგანმანათლებლო რესურსცენტრის უფროსის ბრძანებით განსაზღვრული პირი, ხოლო საგანმანათლებლო დაწესებულების მანდატურის მიერ შესაბამისი ვალდებულების შეუსრულებლობაზე ზედამხედველობას და შესაბამის რეაგირებას ახორციელებს სსიპ – საგანმანათლებლო დაწესებულების მანდატურის სამსახურის მონიტორინგის სამმართველოს უფლებამოსილი პირი. აღნიშნული პირი/პირები არის/არიან ამ მუხლის მე-2 პუნქტით განსაზღვრული ოქმის შემდგენელი სუბიექტი/სუბიექტები.

მუხლი 5

1. ადმინისტრაციული სამართალდარღვევის ოქმი ივსება ლურჯი ან შავი ბურთულიანი კალმით. ოქმში ყველა ჩანაწერი სრულდება გარკვევით. დაუშვებელია ოქმში გადახაზვა, გადაშლა, გადაფხეკა და ა.შ. ოქმის დაზიანების ან მასში არასწორი მონაცემის შეტანის შემთხვევაში ივსება ახალი ოქმი. დაზიანებული ან არასწორად შევსებული ოქმი ჩამოიწერება საქართველოს კანონმდებლობით დადგენილი წესით.

2. ოქმს ხელს აწერს მისი შემდგენი და ადმინისტრაციული სამართალდარღვევის ჩამდენი, მოწმის/დაზარალებულის არსებობის შემთხვევაში, ასევე აღნიშნული პირი. იმ შემთხვევაში, თუ სამართალდარღვევის ჩამდენი უარს იტყვის ოქმის ხელმოწერაზე, ოქმში კეთდება სათანადო ჩანაწერი.

მუხლი 6

ინსტრუქციაში ცვლილებების შეტანა ხდება საქართველოს განათლების, მეცნიერებისა და ახალგაზრდობის მინისტრის ბრძანებით.

დანართი №3

ადმინისტრაციული სამართალდარღვევის ოქმის გამოყენების, აღრიცხვა-ანგარიშგებისადა გაცემის წესი

მუხლი 1. ზოგადი დებულებები

წინამდებარე წესი არეგულირებს საქართველოს განათლების, მეცნიერებისა და ახალგაზრდობის სამინისტროს (შემდგომ – სამინისტრო) უფლებამოსილი ორგანოს მიერ საქართველოს ადმინისტრაციულ სამართალდარღვევათა კოდექსის და საქართველოს სხვა საკანონმდებლო და კანონქვემდებარე ნორმატიული აქტების შესაბამისად ადმინისტრაციული სამართალდარღვევის ოქმის (შემდგომ – სამართალდარღვევის ოქმი) დამზადების, გამოყენების, შენახვის, აღრიცხვა-ანგარიშგების და გაცემის წესს.

მუხლი 2. სამართალდარღვევის ოქმის აღრიცხვა და შენახვა

1. სამართალდარღვევის ოქმის აღრიცხვა-ანგარიშგებას აწარმოებს სამინისტროს სტრუქტურული ერთეულის – სკოლამდელი და ზოგადი განათლების განვითარების დეპარტამენტის რეგიონალური კოორდინაციის სამმართველო, სამინისტროს ტერიტორიული ორგანოები – საგანმანათლებლო რესურსცენტრები და სსიპ – საგანმანათლებლო დაწესებულების მანდატურის სამსახური.

2. სამართალდარღვევის ოქმები ინახება მათ აღრიცხვა-ანგარიშგებაზე უფლებამოსილ პირებთან.

3. ოქმების შენახვა ხორციელდება „მკაცრი აღრიცხვის ფორმების შესახებ“ საქართველოს კანონის შესაბამისად.

4. სათავსი, სადაც ინახება ოქმები, უნდა იყოს ხელშეუხებელი გარეშე პირთათვის და სათანადოდ დაცული დაზიანებისგან.

მუხლი 3. სამართალდარღვევის ოქმის დამზადება და გაცემა

1. სამართალდარღვევის ოქმის დამზადებას სამინისტრო ახორციელებს დამოუკიდებლად, „მკაცრი აღრიცხვის ფორმების შესახებ“ საქართველოს კანონის თანახმად, კანონმდებლობის შესაბამისად შერჩეულ პოლიგრაფიულ საწარმოში.

2. ოქმის ფორმების პოლიგრაფიული საწარმოდან გამოტანის უფლება აქვს სათანადოდ გაფორმებულ მინდობილობით აღჭურვილ პირს.

3. ოქმების ფორმების დამზადების ორგანიზებასა და მომარაგებას ახორციელებს სამინისტროს სახელმწიფო შესყიდვების პროცედურების განხორციელების უფლებამოსილების მქონე შესაბამისი სტრუქტურული ერთეული.

4. სამინისტრო სამართალდარღვევის ოქმს გასცემს სამინისტროს ტერიტორიულ ორგანოებზე – საგანმანათლებლო რესურსცენტრებზე და სსიპ – საგანმანათლებლო დაწესებულების მანდატურის სამსახურზე „მკაცრი აღრიცხვის ფორმების შესახებ“ საქართველოს კანონით დადგენილი წესით, მინდობილობის საფუძველზე.

მუხლი 4. სამართალდარღვევის ოქმის აღრიცხვის ჟურნალი

1. სამინისტროს მიერ სამართალდარღვევის ოქმის გაცემა, დაბრუნება და გაუქმება აღირიცხება ადმინისტრაციულ სამართალდარღვევათა ოქმების აღრიცხვის ჟურნალში (ამ წესის დანართი №1). ჟურნალს აწარმოებენ სამინისტროს სტრუქტურული ერთეულის – სკოლამდელი და ზოგადი განათლების განვითარების დეპარტამენტის რეგიონალური კოორდინაციის სამმართველო, სამინისტროს ტერიტორიული ორგანოები – საგანმანათლებლო რესურსცენტრები და სსიპ – საგანმანათლებლო დაწესებულების მანდატურის სამსახური.

2. ოქმი, მისი შედგენიდან არაუგვიანეს მომდევნო სამუშაო დღისა, რეგისტრირებული უნდა იქნეს ჟურნალში.

3. ჟურნალში ყველა ჩანაწერი კეთდება გარკვევით, ლურჯი მელნით. დაუშვებელია ჟურნალში ჩანაწერის წაშლა, ჩასწორება და მოშორება კორექტორის დახმარებით. აუცილებლობის შემთხვევაში, უზუსტო ჩანაწერი გადაიხაზება ერთი ხაზით, ისე, რომ ნათლად ჩანდეს ადრე დაწერილი ტექსტი. ახალი ჩანაწერი კეთდება ჟურნალის იმავე გრაფაში, ხოლო „შენიშვნის“ გრაფაში პასუხისმგებელი პირი აკეთებს შესაბამის ჩანაწერს.

4. იმ შემთხვევაში, თუ ერთი ჟურნალი აღმოჩნდება არასაკმარისი, იხსნება ახალი ჟურნალი, რომელიც წარმოადგენს მის გაგრძელებას.

5. დასაშვებია ჟურნალის ელექტრონულად წარმოება. ასეთ შემთხვევაში, ჟურნალის მიმართ ამ მუხლის მე-3 და მე-4 პუნქტებით გათვალისწინებული მოთხოვნები ვრცელდება მისი წერილობითი ფორმით ამობეჭდვის შემთხვევაში. ამობეჭდილი ჟურნალი დასტურდება პასუხისმგებელი პირის ხელმოწერით.

მუხლი 5. სამართალდარღვევის ოქმის ჩამოწერა

1. გამოსაყენებლად უვარგისი ოქმის ჩამოწერა ხდება:

ა) ოქმის არასწორად შევსების გამო;

ბ) ოქმის დაზიანების გამო;

გ) პოლიგრაფიული დეფექტის გამო.

2. გამოსაყენებლად უვარგისი ოქმის ჩამოწერა ხდება ჩამოწერის აქტის შედგენის შემდეგ (ამ წესის დანართი №2), რომელშიც აღინიშნება გამოსაყენებლად უვარგისი ოქმის/ოქმების ექსკლუზიური ნუმერაცია და ჩამოწერის მიზეზი.

3. გამოსაყენებლად უვარგისი ოქმის ექსკლუზიური ნუმერაცია შეიტანება აღრიცხვის ჟურნალში.

4. გამოსაყენებლად უვარგისი ოქმის უტილიზაცია ხორციელდება საქართველოს კანონმდებლობით დადგენილი წესით.

მუხლი 6. სამართალდარღვევის ოქმის შენახვაზე, აღრიცხვასა და გაცემაზე კონტროლი

1. სამართალდარღვევის ოქმის აღრიცხვაზე, შენახვასა და გაცემაზე კონტროლს ახორციელებს სამინისტრო.

2. სამინისტრო ყოველი კალენდარული წლის ბოლოს ახდენს ოქმების ინვენტარიზაციას კანონმდებლობით დადგენილი წესით.

3. საგანმანათლებლო რესურსცენტრები სამინისტროს 3 თვეში ერთხელ წარუდგენენ ანგარიშს სამართალდარღვევის ოქმის შენახვის, აღრიცხვისა და გაცემის შესახებ.

დანართი №1

ადმინისტრაციულ სამართალდარღვევათა ოქმის აღრიცხვის ჟურნალის ფორმა

|№ |გაცემის თარიღი |  |

| | |ოქმის № |

|გვარი |სახელი |თანამდებობა |ხელმოწერა |

| | | | |

| | | | |

| | | | |

| | | | |

აქტის მიხედვით წარმოდგენილი გამოსაქვეყნებლად უვარგისი ფორმების ჩამოწერას ვადასტურებ ხელმოწერით:

ფორმების გამოყენებასა და

აღრიცხვა-ანგარიშგებაზე

პასუხისმგებელი პირი –––––––––––––––––––––––––––––––––––