საზღვარგარეთ საქართველოს დიპლომატიურ წარმომადგენლობებსა და საკონსულო დაწესებულებებში როტაციის წესით სამუშაოდ მივლინებულ პირთა წახალისების ოდენობების განსაზღვრის წესის დამტკიცების შესახებ

საზღვარგარეთ საქართველოს დიპლომატიურ წარმომადგენლობებსა და საკონსულო დაწესებულებებში როტაციის წესით სამუშაოდ მივლინებულ პირთა წახალისების

ოდენობების განსაზღვრის წესი

1. საზღვარგარეთ საქართველოს დიპლომატიურ წარმომადგენლობებსა და საკონსულო დაწესებულებებში (შემდგომში – წარმომადგენლობა) როტაციის წესით სამუშაოდ მივლინებულ მოსამსახურის (შემდგომში – მოსამსახურე) შეფასების შედეგების შესაბამისად, მოსამსახურის წახალისება ხორციელდება შემდეგი წესით:

ა) მადლობის გამოცხადება ან/და ფასიანი საჩუქარი, როგორც წახალისების ფორმა, შეიძლება გამოყენებულ იქნეს წარმომადგენლობის ხელმძღვანელის ან/და კურატორი მინისტრის მოადგილის წარდგინებით, შესაფასებელი პერიოდის განმავლობაში „საჯარო სამსახურის შესახებ“ საქართველოს კანონის 53-ე მუხლის მე-3 პუნქტის „ა“ და „ბ“ ქვეპუნქტებით გათვალისწინებული შეფასების შედეგების შესაბამისად;

ბ) ფულადი ჯილდო შეიძლება მიეცეს მოლოდ იმ მოსამსახურეს, რომელმაც შეფასების შედეგად მიიღო „საუკეთესო“ ან „კარგი“ შეფასება „საჯარო დაწესებულებაში შრომის ანაზღაურების შესახებ“ საქართველოს კანონით გათვალისწინებული ზღვრული ოდენობების ფარგლებში.

2. მოსამსახურის შეფასების შედეგების შესაბამისად წესდება მოსამსახურის წახალისების შემდეგი ფორმები:

ა) მადლობის გამოცხადება;

ბ) ფულადი ჯილდოს მიცემა;

გ) ფასიანი საჩუქრის მიცემა.

3. მოსამსახურეს, რომლის მიმართაც წახალისების ფორმად გამოყენებულ იქნა მადლობის გამოცხადება, გადაეცემა მადლობის სიგელი.

4. მოსამსახურის ფულადი ჯილდოს ზედა ზღვარი განისაზღვრება „საჯარო დაწესებულებაში შრომის ანაზღაურების შესახებ“ საქართველოს კანონით.

5. ფასიანი საჩუქარი გაიცემა „კორუფციის წინააღმდეგ ბრძოლის შესახებ“ საქართველოს კანონის მე-5 მუხლით გათვალისწინებული ზღვრული ოდენობების ფარგლებში.

6. ერთდროულად შეიძლება გამოყენებულ იქნეს მოსამსახურის წახალისების რამდენიმე ფორმა.

7. მოსამსახურის წახალისება ხდება წარმომადგენლობის ხელმძღვანელის ან/და კურატორი მინისტრის მოადგილის წარდგინებით.

8. წარდგინებას უნდა ერთოდეს მოსამსახურის შეფასების შედეგების შესახებ ინფორმაცია და დასაბუთება, რომლის საფუძველზეც მას შეიძლება განესაზღვროს წახალისების ერთი ან რამდენიმე ფორმა.

9. წახალისების შესახებ წარდგინება გადაეგზავნება საგარეო საქმეთა სამინისტროს ადამიანური რესურსების მართვის დეპარტამენტს (შემდგომში – დეპარტამენტი), რომელიც მასალებს ამზადებს 10 სამუშაო დღის განმავლობაში.

10. წახალისების ნებისმიერი ფორმის გამოყენება შემდგომში არ ზღუდავს დისციპლინური გადაცდომისას მოსამსახურის/წარმომადგენლობის ხელმძღვანელის პასუხისმგებლობის საკითხის განხილვას.

11. მოსამსახურის/წარმომადგენლობის ხელმძღვანელის მიმართ წახალისების ფორმების გამოყენების შესახებ ინფორმაცია უნდა აისახოს ადამიანური რესურსების მართვის ერთიან ელექტრონულ სისტემაში.

12. მოსამსახურეს მისთვის დაკისრებული ფუნქციების ზედმიწევნით და სანიმუშოდ შესრულებისათვის, ხანგრძლივი და კეთილსინდისიერი სამსახურისათვის ან/და მის მიერ განსაკუთრებული სირთულის ან მნიშვნელობის დავალების შესრულებისათვის წარმომადგენლობის ხელმძღვანელის ან/და კურატორი მინისტრის მოადგილის წარდგინების საფუძველზე, საგარეო საქმეთა მინისტრის გადაწყვეტილებით შეიძლება მიეცეს ფულადი ჯილდო ამ წესით დადგენილი ზღვრული ოდენობის ფარგლებში.

13. წარმომადგენლობის ხელმძღვანელისათვის ფულადი ჯილდოს განსაზღვრა ხორციელდება მინისტრის გადაწყვეტილებით.

14. მოსამსახურეს ზეგანაკვეთური სამუშაოს ან/და დამატებითი ფუნქციების შესრულებისათვის, მათ შორის, ღამის საათებში, დასვენების/უქმე დღეს და ჯანმრთელობისათვის რისკის შემცველ სამუშაო პირობებში საქმიანობისათვის, შეიძლება მიეცეს სახელფასო დანამატი.

15. მოსამსახურეს სახელფასო დანამატი ეძლევა წარმომადგენლობის ხელმძღვანელის ან/და კურატორი მინისტრის მოადგილის წარდგინების საფუძველზე, მინისტრის გადაწყვეტილებით, „საჯარო დაწესებულებაში შრომის ანაზღაურების შესახებ“ საქართველოს კანონით დადგენილი ზღვრული ოდენობის ფარგლებში.

16. წარმომადგენლობის ხელმძღვანელისათვის სახელფასო დანამატის განსაზღვრა ხორციელდება მინისტრის გადაწყვეტილებით.

შენიშვნა: ამ ბრძანების მიზნებისთვის, ფულადი ჯილდოსა და სახელფასო დანამატის გაცემის შემთხვევაში, გაანგარიშება ხორციელდება საზღვრის კვეთამდე დამტკიცებული თანამდებობრივი სარგოს ოდენობებიდან.