„საჯარო სამართლის იურიდიული პირის – განათლების აკრედიტაციის ეროვნული ცენტრის რეორგანიზაციის გზით საჯარო სამართლის იურიდიული პირის – განათლების ხარისხის განვითარების ეროვნული ცენტრის შექმნისა და მისი დებულების დამტკიცების შესახებ“ საქართველოს განათლებისა და მეცნიერების მინისტრის 2010 წლის 14 სექტემბრის №89/ნ ბრძანებაში ცვლილების შეტანის თაობაზე

1. პირველი მუხლის მე-5 პუნქტი ჩამოყალიბდეს შემდეგი რედაქციით:

„5. ცენტრს აქვს დამოუკიდებელი ბალანსი, საბანკო ან/და სახაზინო ანგარიში, ემბლემა, ბეჭედი მცირე სახელმწიფო გერბის გამოსახულებით და იურიდიული პირის სხვა რეკვიზიტები.“.

2. მე-4 მუხლის:

ა) მე-2 პუნქტი ჩამოყალიბდეს შემდეგი რედაქციით:

„2. ცენტრს ხელმძღვანელობს დირექტორი, რომელსაც საქართველოს განათლების, მეცნიერებისა და ახალგაზრდობის მინისტრის (შემდგომ − მინისტრი) წარდგინებით, 5 წლის ვადით თანამდებობაზე ნიშნავს საქართველოს პრემიერ-მინისტრი.“;

ბ) მე-2 პუნქტის შემდეგ დაემატოს 2¹-2⁴ პუნქტები შემდეგი რედაქციით:

„2¹. ცენტრის დირექტორს მინისტრის წარდგინებით თანამდებობიდან ათავისუფლებს საქართველოს პრემიერ-მინისტრი.  

2². ცენტრის დირექტორის უფლებამოსილების ვადამდე შეწყვეტის საფუძვლებია:

ა) პირადი განცხადება;

ბ) საქართველოს მოქალაქეობის დაკარგვა;

გ) მის მიმართ სასამართლოს გამამტყუნებელი განაჩენის კანონიერ ძალაში შესვლა;

დ) გარდაცვალება;

ე) სასამართლოს მიერ ისეთი გადაწყვეტილების გამოტანა, რომელიც შეუძლებელს ხდის მის მიერ უფლებამოსილების განხორციელებას;

ვ) ცენტრის დირექტორის უფლებამოსილებით განსაზღვრული ვალდებულების უხეში დარღვევა ან/და ცენტრის საქმიანობისთვის არსებითი ზიანის მიყენება.

2³. ცენტრის დირექტორი არ შეიძლება იმავდროულად იყოს დასაქმებული ან ეკავოს თანამდებობა საქართველოს აღმასრულებელ ხელისუფლებაში.

2⁴. სამინისტრო უზრუნველყოფს დირექტორის შერჩევის პროცედურების განხორციელებას, კანონმდებლობით დადგენილი წესით.“;

გ)  3¹ პუნქტი ჩამოყალიბდეს შემდეგი რედაქციით:

„3¹. დირექტორის თანამდებობიდან გათავისუფლების შემთხვევაში, დირექტორის მოვალეობის დაკისრების მიზნით, მინისტრი, საკოორდინაციო საბჭოსთან შეთანხმებით პრემიერ-მინისტრს წარუდგენს  ცენტრის  დირექტორის ერთ-ერთ მოადგილეს.“;

დ)  მე-5 პუნქტი ჩამოყალიბდეს შემდეგი რედაქციით:

„5. საკოორდინაციო საბჭო არის კოლეგიური ორგანო, რომელიც იქმნება 4 წლის ვადით,  ცენტრის მართვაში, მისი საქმიანობისა და განათლების ხარისხის უზრუნველყოფის მექანიზმების განვითარებაში დაინტერესებულ მხარეთა მონაწილეობის უზრუნველსაყოფად“.

3. 5¹ მუხლის:

ა) პირველი პუნქტი ამოღებულ იქნეს;

ბ) მე-2 პუნქტი ჩამოყალიბდეს შემდეგი რედაქციით:

„2. საკოორდინაციო საბჭოს წევრებს 4 წლის ვადით ნიშნავს მინისტრი ცენტრის დირექტორის წარდგინებით.“;

გ) მე-8 პუნქტის შემდეგ დაემატოს  8¹- 8² პუნქტები შემდეგი რედაქციით:

„8¹. საკოორდინაციო საბჭოს წევრები მონაწილეობენ ცენტრის დირექტორის კანდიდატურის შერჩევის პროცესში. დირექტორობის კანდიდატურის შესარჩევი კომისიის არანაკლებ 1/3 კომპლექტდება საკოორდინაციო საბჭოს წევრებით.

8². საკოორდინაციო საბჭოს წევრები მონაწილეობენ ცენტრის დირექტორის გათავისუფლების პროცესში. მინისტრის მიერ ცენტრის დირექტორის გათავისუფლების წარდგინება ხდება საკოორდინაციო საბჭოსთან შეთანხმებით.“.

ეს ბრძანება ამოქმედდეს გამოქვეყნებისთანავე.