„ფარმაცევტულ, სამედიცინო, ხანდაზმულთა, შეზღუდული შესაძლებლობის მქონე პირთა და მზრუნველობას მოკლებულ ბავშვთა დაწესებულებებში, აგრეთვე, სასწავლო, სამეცნიერო-კვლევითი, საექსპერტო-დიაგნოსტიკური და საკონტროლო-ანალიზური (ლაბორატორიული) საქმიანობის განმახორციელებელ დაწესებულებებში ნარკოტიკული საშუალებების, ფსიქოტროპული ნივთიერებებისა და პრეკურსორების ლეგალური ბრუნვის წესების დამტკიცების შესახებ“ საქართველოს შრომის, ჯანმრთელობისა და სოციალური დაცვის მინისტრის 2003 წლის 21 ივლისის №150/ნ ბრძანებაში ცვლილების შეტანის თაობაზე

დანართი №1

ფარმაცევტული საქმიანობის საბითუმო რეალიზაციის განმახორციელებელ დაწესებულებაში ნარკოტიკული საშუალებების, ფსიქოტროპული ნივთიერებებისა და სპეციალურ კონტროლს დაქვემდებარებულ ნივთიერებებთან გათანაბრებული სამკურნალო საშუალებების შეძენის, შენახვის, აღრიცხვის, გაცემისა და რეალიზაციის წესი

1. ნარკოტიკული საშუალებების, ფსიქოტროპული ნივთიერებებისა და სპეციალურ კონტროლს დაქვემდებარებულ ნივთიერებებთან გათანაბრებული სამკურნალო საშუალებების (შემდგომ – სპეციალურ კონტროლს დაქვემდებარებული სამკურნალო საშუალებები) საბითუმო რეალიზაციის განხორციელების უფლება აქვს მხოლოდ შესაბამისი ნებართვის მქონე იმ იურიდიულ პირს, რომელიც დაფუძნებულია სახელმწიფოს ან სახელმწიფოს მიერ დაფუძნებული/სახელმწიფოს მართვაში (შემდგომში – საბითუმო რეალიზატორი) მყოფი იურიდიული პირის მიერ, საქართველოს კანონმდებლობით დადგენილი წესის საფუძველზე.

2. სპეციალურ კონტროლს დაქვემდებარებული სამკურნალო საშუალებების შეძენა, შენახვა, აღრიცხვა, გაცემასა და რეალიზაციაზე პასუხისმგებლობა ეკისრება საბითუმო რეალიზატორს.

3. იურიდიული პირები, რომლებიც კანონმდებლობით მინიჭებული უფლებამოსილების ფარგლებში უფლებამოსილი არიან, მიმართონ სპეციალურ კონტროლს დაქვემდებარებული სამკურნალო საშუალებების შესაძენად საბითუმო რეალიზატორს (შემსყიდველ(ებ)ი), ვალდებული არიან ყოველწლიურად, მომდევნო საანგარიშო წლის განმავლობაში განსახორციელებელი პერიოდული შესყიდვებისთვის შეადგინონ საჭირო ნივთიერებების ნუსხა, შესაბამისი მახასიათებლებით, განსაზღვრონ პროგნოზირებული რაოდენობები წინა წლისა და არსებული ფაქტობრივი გარემოებების ანალიზის საფუძველზე და ზემოხსენებული მონაცემები დადგენილი ფორმით წარუდგინონ საბითუმო რეალიზატორს ყოველი წლის არაუგვიანეს 31 ივლისისა.

4. საბითუმო რეალიზატორი ვალდებულია:

ა) შეიძინოს მხოლოდ საქართველოში რეგისტრირებული, სპეციალურ კონტროლს დაქვემდებარებული სამკურნალო საშუალებები, გარდა „წამლისა და ფარმაცევტული საქმიანობის შესახებ“ საქართველოს კანონით გათვალისწინებული გამონაკლისებისა;

ბ) საქართველოს ტერიტორიაზე სპეციალურ კონტროლს დაქვემდებარებული სამკურნალო საშუალებები შეიძინოს და აწარმოოს საბითუმო რეალიზაცია მხოლოდ შესაბამისი უფლების მქონე იურიდიული პირისაგან/პირებზე;

გ) ნარკოტიკული საშუალებები დანიშნულების ადგილამდე (საბითუმო რეალიზაციის ობიექტის მისამართი) გადაიტანოს მხოლოდ პოლიციის ბადრაგის თანხლებით;

დ) საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს (შემდგომ ტექსტსა და დანართებში – სამინისტრო) სახელმწიფო კონტროლს დაქვემდებარებულ საჯარო სამართლის იურიდიულ პირს – სამედიცინო და ფარმაცევტული საქმიანობის რეგულირების სააგენტოს (შემდგომ – სააგენტო) მიაწოდოს ინფორმაცია სპეციალურ კონტროლს დაქვემდებარებული სამკურნალო საშუალებების ლეგალური ბრუნვის შესახებ, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის (შემდგომ ტექსტსა და დანართებში – მინისტრი) შესაბამისი ბრძანებით დადგენილი წესით.

5. საბითუმო რეალიზატორს ეკრძალება:

ა) სპეციალურ კონტროლს დაქვემდებარებული სამკურნალო საშუალებების საცალო რეალიზაცია;

ბ) სპეციალურ კონტროლს დაქვემდებარებული სამკურნალო საშუალებების რეალიზაცია ხარისხის სერტიფიკატის გარეშე;

გ) ნარკოტიკული საშუალებების გაცემა ფარმაცევტულ საქმიანობაზე უფლებამოსილ იმ იურიდიულ პირზე, რომელსაც გაცემის მომენტისათვის არ ახლავს პოლიციის დაცვა.

6. საბითუმო რეალიზატორთან ნარკოტიკული საშუალებების აღრიცხვისა და შემოსავალ-გასავლის ყველა საბუთი ინახება 5 წლის, ხოლო ფსიქოტროპული ნივთიერებებისა და სპეციალურ კონტროლს დაქვემდებარებულ ნივთიერებებთან გათანაბრებული სამკურნალო საშუალებების – 3 წლის განმავლობაში (თუ საქართველოს კანონმდებლობა არ ითვალისწინებს დოკუმენტის უფრო ხანგრძლივი დროით შენახვას) ბრძანებით გამოყოფილ პასუხისმგებელ პირთან, რის შემდეგაც ნადგურდება შესაბამისი აქტით, რომელშიც მითითებული უნდა იყოს განადგურებული დოკუმენტაციის ჩამონათვალი, განადგურების თარიღი. აქტს ხელს უნდა აწერდნენ საბითუმო რეალიზაციის განმახორციელებელი დაწესებულების ხელმძღვანელი, საბითუმო რეალიზაციის ობიექტში სპეციალურ კონტროლს დაქვემდებარებული სამკურნალო საშუალებების შეძენა, შენახვა, აღრიცხვა, გაცემასა და რეალიზაციაზე პასუხისმგებელი პირები და პოლიციის მოწვეული წარმომადგენელი.

7. საბითუმო რეალიზაციის ობიექტში სპეციალურ კონტროლს დაქვემდებარებული სამკურნალო საშუალებები ექვემდებარება საგნობრივ-რაოდენობრივ აღრიცხვას დალუქულ, დანომრილ, ზონარგაყრილ და სააგენტოს ბეჭდით დამოწმებულ სპეციალურ ჟურნალში (დანართი №10).

8. საბითუმო რეალიზაციის ობიექტში ფსიქოტროპული ნივთიერებები და სპეციალურ კონტროლს დაქვემდებარებული ნივთიერებებთან გათანაბრებული სამკურნალო საშუალებები ინახება სპეციალურად გამოყოფილ ოთახში (ოთახებში), რომელიც აღჭურვილი უნდა იყოს რკინის კარებით და ფანჯრებზე გისოსებით. ხოლო, ნარკოტიკული საშუალებები ინახება სპეციალურად გამოყოფილ უფანჯრო ოთახში (ოთახებში). ოთახს უნდა ჰქონდეს კაპიტალური კედლები, რკინის კარები და გააჩნდეს ადგილობრივი შუქხმოვანი და პოლიციასთან დაკავშირებული სიგნალიზაცია. საბითუმო რეალიზაციის ობიექტი, სადაც ინახება ამ პუნქტით გათვალისწინებული ნივთიერებები, უზრუნველყოფილი უნდა იყოს შეიარაღებული დაცვით. იმ შემთხვევაში, თუ საბითუმო რეალიზატორი ვერ უზრუნველყოფს ამ პუნქტით გათვალისწინებული მოთხოვნების შესრულებას, ნარკოტიკული საშუალებების შენახვა და გაცემა დასაშვებია განხორციელდეს დადგენილი საცავიდან მინისტრისა და საქართველოს შინაგან საქმეთა მინისტრის ურთიერთშეთანხმების შემთხვევაში, რაზეც ფორმდება შესაბამისი დოკუმენტი. აღნიშნულ საცავში ნარკოტიკული საშუალებების მიღების, შეძენის, აღრიცხვის, გაცემისა და რეალიზაციის წესი შეესაბამება საბითუმო რეალიზაციის ობიექტიდან ნარკოტიკული საშუალებების მიღების, შეძენის, აღრიცხვის, გაცემისა და რეალიზაციის წესს.

9. სპეციალურად გამოყოფილი ოთახის და სეიფის გასაღებები ინახება სპეციალურ კონტროლს დაქვემდებარებული სამკურნალო საშუალებების შენახვა, აღრიცხვასა და გაცემაზე შესაბამისი ბრძანებით განსაზღვრულ პასუხისმგებელ პირთან (პირებთან).

10. ოთახი და სეიფი, სადაც ინახება სპეციალურ კონტროლს დაქვემდებარებული სამკურნალო საშუალებები, სამუშაო საათების დამთავრების შემდეგ იკეტება და ილუქება. ამ ოთახში შესვლის უფლება აქვთ მხოლოდ ბრძანებით განსაზღვრულ პასუხისმგებელ პირებს.

11. სპეციალურ კონტროლს დაქვემდებარებული სამკურნალო საშუალებების მიღება წარმოებს საბითუმო რეალიზატორის ხელმძღვანელის ბრძანებით გამოყოფილი მიმღები კომისიის მიერ. კომისიის შემადგენლობაში შედიან:

ა) კომისიის თავმჯდომარე (უმაღლესი ფარმაცევტული განათლებით);

ბ) კომისიის თავმჯდომარის მოადგილე (მოადგილეები);

გ) შესაბამისი განყოფილების გამგე ან მისი მოადგილე.

12. საბითუმო რეალიზატორის მიერ მიღებული ნარკოტიკული საშუალებების თითოეულ დასახელებაზე ივსება სააღრიცხვო ბარათი ან კომპიუტერული პროგრამით გათვალისწინებული აღრიცხვის ფორმა.

13. საბითუმო რეალიზაციის ობიექტიდან სპეციალურ კონტროლს დაქვემდებარებული სამკურნალო საშუალებების სუბსტანციები გაიცემა მხოლოდ დალუქულ მდგომარეობაში. ეტიკეტზე აღინიშნება სუბსტანციის დასახელება, რაოდენობა, გამცემი ბაზის დასახელება, ლაბორატორიული ანალიზის და სერიის ნომრები, ვარგისიანობის ვადა და მოწმდება ბრძანებით განსაზღვრული პასუხისმგებელი პირის ხელმოწერით.

14. საბითუმო რეალიზატორიდან სპეციალურ კონტროლს დაქვემდებარებული სამკურნალო საშუალებები გაიცემა მხოლოდ სათანადო მოთხოვნის (განაცხადის) და გატანაზე პასუხისმგებელი პირის ვინაობისა და უფლებამოსილების დამადასტურებელი დოკუმენტის საფუძველზე. მინდობილობის შემთხვევაში მისი მოქმედების ვადა არ უნდა აღემატებოდეს 6 თვეს. მინდობილ პირთან დაკავშირებით გარემოებების შეცვლის შემთხვევაში (გათავისუფლება და ა.შ.) ორგანიზაცია ვალდებულია დაუყოვნებლივ აცნობოს აღნიშნულის შესახებ საბითუმო რეალიზატორს, ამ უკანასკნელის მიერ განსაზღვრული ფორმით. აღნიშნული პუნქტის ფარგლებში სავალდებულოდ წარმოსადგენი მოთხოვნის შინაარსსა და გატანაზე უფლებამოსილი პირის შესახებ მონაცემების/ინფორმაციის სისწორეზე პასუხისმგებლობა ეკისრება შემსყიდველს.

15. სტაციონართან (სასწრაფო და გადაუდებელი სამედიცინო დახმარების სამსახურთან) ხელშეკრულებით მომუშავე საბითუმო რეალიზატორიდან სპეციალურ კონტროლს დაქვემდებარებული სამკურნალო საშუალებების გაცემა ხდება სტაციონარის (სასწრაფო და გადაუდებელი სამედიცინო დახმარების სამსახურის) მიერ გაცემული მოთხოვნისა და ამ წესის მე-14 პუნქტით გათვალისწინებული დოკუმენტაციის საფუძველზე. მოთხოვნა გამოიწერება ოთხ ეგზემპლარად წამლის დასახელების (ლათინურ ენაზე), დოზირებისა და რაოდენობის სრული მითითებით. მოთხოვნას ხელს აწერენ სტაციონარის (სასწრაფო და გადაუდებელი სამედიცინო დახმარების სამსახურის) ხელმძღვანელი, მიღებაზე - გაცემაზე პასუხისმგებელი პირ(ებ)ი. ოთხი ეგზემპლარიდან ორი რჩება საბითუმო რეალიზატორთან, ხოლო ორი ეგზემპლარი უბრუნდება სტაციონარს (სასწრაფო და გადაუდებელი სამედიცინო დახმარების სამსახურს).

16. მოთხოვნა ნარკოტიკულ საშუალებებზე, ფსიქოტროპულ ნივთიერებებზე იწერება ცალ-ცალკე. სპეციალურ კონტროლს დაქვემდებარებული სამკურნალო საშუალებები გამოიწერება სხვა სამკურნალო საშუალებებისაგან განცალკევებით, ლათინურ ენაზე, დასახელების, წამლის ფორმისა და დოზის სრული მითითებით. რაოდენობა მიეთითება როგორც რიცხობრივად, ასევე სიტყვიერად. მოთხოვნა მოწმდება იურიდიული პირის ბეჭდითა და ხელმძღვანელის ხელმოწერით.

17. სპეციალურ კონტროლს დაქვემდებარებული სამკურნალო საშუალებების გაცემის წინ ბრძანებით გამოყოფილი პასუხისმგებელი პირი ვალდებულია, მოითხოვოს შესაბამისი უფლების დამადასტურებელი დოკუმენტი (ნებართვა, ლიცენზია და სხვა), გადაამოწმოს გაცემის საფუძველი (მოთხოვნა, მინდობილობა), გასაცემი სამკურნალო საშუალების შესაბამისობა თანმხლებ დოკუმენტაციასთან, შეფუთვის, მარკირების და გაფორმების სისწორე, რის შემდეგაც ხელს აწერს/ადასტურებს საგადასახადო ანგარიშფაქტურას და სპეციალურ კონტროლს დაქვემდებარებული სამკურნალო საშუალებების გაცემის სპეციალურ ფორმას (დანართი №9).

 18. შემსყიდველი ვალდებულია პროდუქციის პერიოდული შესყიდვებისთვის, საბითუმო რეალიზატორს წარუდგინოს შესაბამისი საქმიანობის უფლების დამადასტურებელი დოკუმენტი (ნებართვა, ლიცენზია და სხვა) და საბითუმო რეალიზატორის მიერ დადგენილი სრულად შევსებული შესყიდვის (შეკვეთის) სპეციალური ფორმა. ამავდროულად, აუცილებელია, რომ განაცხადი შეიცავდეს ინფორმაციას, თუ რა პერიოდის მოხმარებაზეა გათვლილი/რა პერიოდისთვის იქნება საკმარისი შესაძენად მოთხოვნილი მედიკამენტების ოდენობა. შევსებული განაცხადი მოთხოვნილ დოკუმენტაციასთან ერთად შემსყიდველს შეუძლია წარმოადგინოს როგორც ელექტრონული ფორმით, ასევე დედნის სახით საბითუმო რეალიზაციის განმახორციელებელ დაწესებულებაში.

19. საბითუმო რეალიზაციის განმახორციელებელი ამ წესის მიხედვით წარმოდგენილ ინფორმაციაზე დაყრდნობით იწყებს შესაბამის პროცედურებს, ამუშავებს შეკვეთას და უგზავნის შემსყიდველს შესაბამის ინვოისს განაცხადში მითითებულ, შემსყიდველის ელექტრონულ მისამართზე შევსებული შესყიდვის (შეკვეთის) სპეციალური ფორმის მიღებიდან არაუგვიანეს 5 სამუშაო დღისა. შემსყიდველი შეკვეთის დადასტურებას ახდენს ინვოისის მიხედვით ანგარიშსწორების განხორციელებით, რის დასადასტურებლად უგზავნის განმახორციელებელს შესაბამის საგადახდო დავალებას ინვოისის მიღებიდან არაუგვიანეს ერთ სამუშაო დღეში. საგადახდო დავალების მიღებიდან განმახორციელებელი უზრუნველყოფს საჭირო მოქმედებებს მედიკამენტების მისაწოდებლად, მათ შორის, არეზერვებს, ამზადებს შეკვეთას მასში მითითებული მედიკამენტების შესაბამისი ოდენობებით და გადასცემს შეკვეთას შემსყიდველს საგადახდო დავალების მიღებიდან არაუგვიანეს 5 სამუშაო დღისა.

20. შემსყიდველი ვალდებულია სრულად გადაიხადოს ინვოისში მითითებული თანხა წინასწარ, მედიკამენტების მიწოდებამდე, გარდა კანონით გათვალისწინებული შემთხვევისა. საბითუმო რეალიზატორი, ინვოისით განსაზღვრული თანხის მიმწოდებლის მიერ ანაზღაურების შემდეგ მიმწოდებელს უგზავნის შეტყობინებას შეკვეთის გატანის, დროისა და ადგილის შესახებ.

21. საგამონაკლისო შემთხვევაში, შესაძლოა საბითუმო რეალიზაციის განმახორციელებელი და შემსყიდველი შეთანხმდნენ გადახდის განსხვავებულ პირობაზე, კერძოდ, საბითუმო რეალიზატორმა შემსყიდველს „პროდუქციის“ შესასყიდად შეიძლება განუსაზღვროს საკრედიტო ლიმიტი (კონსიგნაციით გადახდის უფლება), რაც სავალდებულოა უზრუნველყოფილი იყოს შესაბამისი ფინანსური გარანტიით. გარანტიის გამცემი, ისევე როგორც გარანტიის პირობები და ტექსტი წინასწარ წერილობით შეთანხმებული უნდა იყოს საბითუმო რეალიზატორთან.

22. შემსყიდველი ვალდებულია საბითუმო რეალიზატორის მიერ მიწოდებული შეკვეთის გატანის ადგილზე გამოცხადდეს მითითებულ დროს შესაბამისი სატრანსპორტო საშუალების თანხლებით.

23. შემსყიდველი ვალდებულია, ჩაიბაროს მიწოდებული პროდუქციის რაოდენობა, გადაამოწმოს ვარგისობის ვადა, მოახდინოს ვიზუალური დათვალიერება. იმ შემთხვევაში, თუ პროდუქტი შეესაბამება დოკუმენტაციაში მითითებულ პარამეტრებს ფორმდება შესაბამისი მიღება-ჩაბარების აქტი. პროდუქტის მიღების შემდგომ შემსყიდველს არ წარმოეშობა მოთხოვნა პროდუქციის ნაკლთან დაკავშირებით, გარდა იმ შემთხვევისა, როდესაც მოთხოვნა ეხება ფარულ ნივთობრივ ნაკლს, რომლის აღმოჩენაც საქონლის მიღების დროს შეუძლებელი იყო და მიღება-ჩაბარების გაფორმებიდან გასული არ არის ერთი თვე.

24. შემსყიდველისთვის პროდუქციის გადაცემის მომენტიდან პროდუქციის დაზიანების, დაკარგვისა და ნებისმიერი სხვა სახის რისკი გადადის შემსყიდველზე.

25. შემსყიდველი ვალდებულია დაიცვას პროდუქციის შენახვის, ტრანსპორტირების, გამოყენებისა და რეალიზაციისთვის წინამდებარე წესებითა და კანონმდებლობით დადგენილი ვალდებულებები.

დანართი №9

სპეცილურ კონტროლს დაქვემდებარებული

ფარმაცევტული პროდუქტის (სამკურნალო საშუალება)

გაცემის სპეციალურ ფორმა

საბითუმო რეალიზატორი:                                                    მიმღები ორგანიზაცია:

მისამართი:                                                                                 მისამართი:

მომსახურე ბანკი:                                                                      მომსახურე ბანკი:

ანგარიშის №                                                                            ანგარიშის №

ხელშეკრულება №

მედიკამენტების ხარისხის სერტიფიკატები ინახება საბითუმო რეალიზატორთან

პასუხისმგებელი ფარმაცევტი ___________________

გაამზადა _________         გასცა _________        მიიღო _________      

დანართი №10

სპეციალურ კონტროლს დაქვემდებარებული

ფარმაცევტული პროდუქტის (სამკურნალო საშუალება)

საგნობრივ-რაოდენობრივი აღრიცხვის ჟურნალის ფორმა საბითუმო რეალიზატორისთვის

ბ.ა

შენიშვნა

ბ.ა

შენიშვნა

დანართი №31

ჯანმრთელობის დაცვის სახელმწიფო პროგრამით გათვალისწინებული ნარკოტიკული საშუალებების შეძენის, შენახვის, აღრიცხვის, პაციენტებზე გაცემის წესი

1. ჯანმრთელობის დაცვის სახელმწიფო პროგრამით გათვალისწინებული ნარკოტიკული საშუალების პაციენტებზე გაცემას უზრუნველყოფს პროგრამის განმახორციელებელი – სამინისტროს სახელმწიფო კონტროლს დაქვემდებარებული სსიპ – ჯანმრთელობის ეროვნული სააგენტო (შემდგომ – პროგრამის განმახორციელებელი დაწესებულება).

2. პროგრამის განმახორციელებელი დაწესებულება უფლებამოსილია მის მიერ ადმინისტრირებადი ჯანმრთელობის დაცვის სახელმწიფო პროგრამებით განსაზღვრული ღონისძიებების უზრუნველსაყოფად, მოქმედი კანონმდებლობის შესაბამისად (მათ შორის, მესამე პირის საშუალებით), მიაწოდოს ნარკოტიკული საშუალებები შესაბამისი პროგრამის ბენეფიციარებს.

3. პროგრამის განმახორციელებელი უფლებამოსილია, ნარკოტიკული საშუალების ბენეფიციარზე გაცემა მოახდინოს პოლიციის შესაბამისი სტრუქტურული ერთეულიდან პროგრამის განმახორციელებელი დაწესებულების ხელმძღვანელის ბრძანებით დანიშნული პირის (შემდგომ – პასუხისმგებელი პირ(ებ)ი) საშუალებით.

4. პოლიციის შენობაში ნარკოტიკული საშუალებები ინახება პოლიციის უფროსის მიერ შერჩეულ ოთახში განთავსებულ სეიფში.

5. პოლიციის შენობაში ნარკოტიკული საშუალებების შესანახი ოთახის დაცვის ვალდებულება ეკისრება პოლიციის უფროსის მიერ ბრძანებით გამოყოფილ პირს.

6. სეიფში, სადაც ინახება ნარკოტიკული საშუალებები, აკრძალულია იარაღის, პოლიციის კუთვნილი დოკუმენტაციის ან სხვა საგნების შენახვა.

7. პოლიციის შენობაში განთავსებული ნარკოტიკული საშუალების მიღება, აღრიცხვა და პაციენტებზე გაცემა ხორციელდება სპეციალური რეცეპტის ბლანკის (ფორმა №1) საფუძველზე და განმახორციელებლის მიერ დადგენილი წესის შესაბამისად.

8. ნარკოტიკული საშუალებები ექვემდებარება საგნობრივ-რაოდენობრივ აღრიცხვას დანომრილ, ზონარგაყრილ და პროგრამის განმახორციელებელი დაწესებულების ხელმძღვანელის მიერ დალუქულ და ხელმოწერილ სპეციალურ ჟურნალში.

9. პროგრამის განმახორციელებელ დაწესებულებაში ნარკოტიკული საშუალებების/სამკურნალო საშუალებების სააღრიცხვო დოკუმენტაცია ინახება 5 წლის განმავლობაში, რის შემდეგაც ნადგურდება სათანადო აქტის შედგენით, რომელშიც მითითებული უნდა იყოს განადგურებული დოკუმენტაციის ჩამონათვალი, განადგურების თარიღი. აქტი ხელმოწერილი უნდა იყოს პროგრამის განმახორციელებელი დაწესებულების ოთხი თანამშრომლის მიერ, მათ შორის, ხელმძღვანელი და მის მიერ ბრძანებით განსაზღვრული პასუხისმგებელი პირი (პირები).

10. პოლიციის შენობაში განთავსებულ, სახელმწიფო პროგრამით გათვალისწინებული ნარკოტიკული საშუალებების დადგენილი წესით შეძენაზე, მიღებაზე, შენახვაზე, აღრიცხვასა და პაციენტებზე გაცემაზე პასუხისმგებლობა ეკისრება პროგრამის განმახორციელებელი დაწესებულების ხელმძღვანელს და აღნიშნულ საქმიანობაზე ბრძანებით გამოყოფილ პირს (პირებს).

11. სამუშაო დღის დამთავრების შემდეგ ფარმაცევტი კეტავს და ლუქავს სეიფს. დალუქული სეიფი დადგენილი წესით ჰბარდება პოლიციის მორიგეს, ხოლო სეიფის გასაღები და ლუქის ბეჭედი ინახება პასუხისმგებელ პირთან. სეიფის გახსნა ხდება მხოლოდ პოლიციის მორიგესთან ერთად ლუქის მთლიანობის შემოწმების შემდეგ. ლუქის დაზიანების აღმოჩენის შემთხვევაში ფარმაცევტი და პოლიციის მორიგე ვალდებული არიან აღნიშნულის შესახებ დაუყოვნებლივ აცნობონ პოლიციის უფროსს და სეიფი გახსნან მხოლოდ მისი ნებართვის შემდეგ.

12. ყოველი თვის პირველი რიცხვისათვის პასუხისმგებელი პირი ახდენს შედარებას სეიფში ფაქტობრივად არსებულ ნარკოტიკულ საშუალებათა რაოდენობასა და სპეციალურ ჟურნალში აღნიშნულ ნაშთს შორის და ადგენს შედარების უწყისს. ფაქტობრივ ნაშთსა და ჟურნალის მონაცემებში სხვაობის აღმოჩენის შემთხვევაში პასუხისმგებელი პირი ვალდებულია აღნიშნულის შესახებ დაუყოვნებლივ, წერილობით აცნობოს პოლიციის უფროსს და პროგრამის განმახორციელებელი დაწესებულების ხელმძღვანელს, ხოლო, თავის მხრივ, პროგრამის განმახორციელებელი დაწესებულება ინფორმაციას აწვდის სააგენტოს.

13. პაციენტისათვის ნარკოტიკული საშუალების პირველად დანიშვნის შესახებ ამბულატორიული დაწესებულება ვალდებულია, რეცეპტის ბლანკის მიმღები პირის მეშვეობით, დაუყოვნებლივ, წერილობით აცნობოს პროგრამის განმახორციელებელს პაციენტის გვარი, სახელი, პირადი ნომერი, ასაკი, მისამართი, ტელეფონის ნომერი, დიაგნოზი, დანიშნული ნარკოტიკული საშუალების დასახელება, სადღეღამისო დოზა, აგრეთვე, იმ პირის გვარი, სახელი, მამის სახელი, პირადობის დამადასტურებელი დოკუმენტის ან პასპორტის ნომერი, რომელიც გაიტანს კონკრეტული პაციენტისათვის საჭირო ნარკოტიკულ საშუალებას. აღნიშნული მონაცემები დასტურდება კომისიის თავმჯდომარისა და შესაბამისი ექიმის ხელმოწერებით, დაწესებულების შტამპითა და ბეჭდით. პასუხისმგებელ პირს ეკრძალება ნარკოტიკული საშუალებების გაცემა ამ წერილობითი ინფორმაციის არსებობის გარეშე. ამბულატორიული დაწესებულება ასევე ვალდებულია დაუყოვნებლივ აცნობოს პროგრამის განმახორციელებელს ნარკოტიკული საშუალების დოზის ან სახეობის შეცვლის, პაციენტის გარდაცვალების, ნარკოტიკული საშუალების გამოწერის შეწყვეტის თარიღის, პაციენტის საცხოვრებელი ადგილის შეცვლის შესახებ.

14. ნარკოტიკული საშუალების მიღებაზე უფლებამოსილების მქონი პირი (პაციენტი ან ამბულატორიული დაწესებულების მიერ წერილობით განსაზღვრული პაციენტის წარმომადგენელი) ვალდებულია წამლის მისაღებად გამოცხადდეს პირადობის დამადასტურებელი დოკუმენტით.

15. ნარკოტიკული საშუალებების მიმღების პირადობის დამადასტურებელი დოკუმენტის შემოწმების შემდეგ პასუხისმგებელი პირი რეცეპტის მეორე გვერდზე აკეთებს ჩანაწერს. კერძოდ, კეთდება ჩანაწერი ფაქტობრივად გაცემული სამკურნალო საშუალების შესახებ სავაჭრო დასახელების, დოზის, რაოდენობისა (როგორც ციფრებით, ისე სიტყვიერად) და გაცემის თარიღის მითითებით, რასაც ხელმოწერით ადასტურებს წამლის მიმღები და გამცემი.

16. პაციენტი ან მის მიერ ნდობით აღჭურვილი პირი (შემდგომ – წამლის მიმღები) ვალდებულია წამლის გამოტანისას დააბრუნოს გამოყენებული ნარკოტიკული საშუალებების ცარიელი ამპულები და წარუდგინოს ისინი ნარკოტიკული საშუალებების გამცემს წამლის ყოველი შემდეგი გაცემისას. გამოყენებული ამპულები დაბრუნების დღესვე ნადგურდება ნარკოტიკული საშუალების შენახვასა და გაცემაზე პასუხისმგებელი პირ(ებ)ის მიერ, წამლის მიმღები პირის თანდასწრებით.

17. პაციენტის გარდაცვალების ან მკურნალობის შეწყვეტის შემთხვევაში, გამოუყენებელი რეცეპტის ბლანკები ექვემდებარება რეცეპტის გამცემი ამბულატორიული დაწესებულებისათვის დაბრუნებას, რის შესახებაც ექიმი ნარკოტიკული საშუალების დანიშვნის პირველივე დღეს აფრთხილებს პაციენტს/მის ოჯახის წევრს ან შესაბამის წარმომადგენელს.

18. პაციენტი/მისი ოჯახის წევრი ან შესაბამისი წარმომადგენელი ვალდებულია ნარკოტიკული საშუალებების გაცემის დღეს, წამლის გამცემს დაუბრუნოს გაუხარჯავი ნარკოტიკული საშუალება, რაც დაბრუნების დღესვე, პაციენტი/მისი ოჯახის წევრი ან შესაბამისი წარმომადგენლის თანდასწრებით ნადგურდება პოლიციის თანამშრომლისა და პასუხისმგებელი პირის მიერ. დაბრუნებული ნარკოტიკული საშუალებები ექვემდებარება მკაცრ აღრიცხვას სპეციალურ ჟურნალში, რომელშიც აღინიშნება პაციენტის სახელი, მამის სახელი და გვარი, დაბრუნებული გამოუყენებელი ნარკოტიკული საშუალებების რაობა და რაოდენობა, დაბრუნებისა და განადგურების თარიღი, ნარკოტიკული საშუალებების ყოველი განადგურებისას ჟურნალში ხელს აწერს პოლიციის თანამშრომელი, პასუხისმგებელი პირი და წამლის მიმღები პირი.

19. დაბრუნებული და გამოუყენებელი ნარკოტიკული საშუალებების ამპულები ნადგურდება გასრესვის, ტაბლეტები – დაჩეჩქვის და დაწვის გზით. დაბრუნებული ამპულები ექვემდებარება მკაცრ აღრიცხვას სპეციალურ ჟურნალში, რომელშიც აღინიშნება პაციენტის პირადი ნომერი, სახელი და გვარი, წამლის მიმღები პირის პირადი ნომერი, სახელი და გვარი, დაბრუნებული ნარკოტიკული საშუალებების დასახელება და ამპულების რაოდენობა, დაბრუნებისა და განადგურების თარიღი. ნარკოტიკული საშუალებების გამოყენებული ამპულების ყოველი განადგურებისას ჟურნალში ხელს აწერენ ნარკოტიკული საშუალების შენახვასა და გაცემაზე პასუხისმგებელი პირ(ებ)ი და ნარკოტიკული საშუალების მიმღები პირი.

20. პასუხისმგებელი პირ(ებ)ი ვალდებულია ნარკოტიკული საშუალების მიმღებს წინასწარ დაუდგინოს წამლის მიღების დღე და საათი.

21. პროგრამის განმახორციელებელი ახდენს ტერიტორიული ამბულატორიული დაწესებულებების ინფორმირებას გასაცემი ნარკოტიკული საშუალებების დასახელების, წამლის ფორმისა და დოზის შესახებ.