,,ჩრდილოატლანტიკური ხელშეკრულების ორგანიზაციის (ნატო) კლასიფიცირებული ინ­ფორმაციის საკომუნიკაციო და საინფორმაციო საშუალებებით დაცვისათვის პასუხისმგე­ბელი ორგანოს განსაზღვრის შესახებ“

საქართველოს პრეზიდენტის

ბრძანებულება №709

2005 წლის 23 აგვისტო

ქ. თბილისი

ჩრდილოატლანტიკური ხელშეკრულების ორგანიზაციის (ნატო) კლასიფიცირებული ინფორმაციის საკომუნიკაციო და საინფორმაციო საშუალებებით დაცვისათვის პასუხისმგებელი ორგანოს განსაზღვრის შესახებ

საქართველოს ნატოსთან „ინდივიდუალური პარტნიორობის სამოქმედო გეგმით“გათვალისწინებული ვალდებულებების შესრულების, საქართველოს უსაფრთხოების სისტემის ნატოს სტანდარტებთან შესაბამისობაში მოყვანისა და ამ კუთხით ნატოს კლასიფიცირებული ინფორმაციის დაცვის ტექნიკურ და ორგანიზაციულ ღონისძიებათა უზრუნველსაყოფად:

1. საქართველოში ჩრდილოატლანტიკური ხელშეკრულების ორგანიზაციის (ნატო) კლასიფიცირებული ინფორმაციის კრიპტოგრაფიული ტექნიკური საშუალებებით დაცვისათვის, კრიპტოგრაფიული სისტემის ეფექტიან და რაციონალურ შერჩევასა და მომსახურებისათვის პასუხისმგებელ ორგანოდ განისაზღვროს საჯარო სამართლის იურიდიული პირი – „სახელისუფლებო სპეციალური კავშირებისა და ინფორმაციის სააგენტო“.

2. სსიპ „სახელისუფლებო სპეციალური კავშირებისა და ინფორმაციის სააგენტომ“(ვ. გოგოლაძე) ნატოს მოთხოვნათა გათვალისწინებით:

ა) განახორციელოს შესაბამისი სახელმწიფო სტრუქტურებისათვის ნატოს კლასიფიცირებული ინფორმაციის დაცვის ტექნიკური საშუალებების შერჩევა;

ბ) განსაზღვროს ინფორმაციის დაცვის ტექნიკური საშუალებებისა და სისტემების გამოყენების მიზანშეწონილობა;

გ) გასცეს შესაბამისი რეკომენდაციები ნატოს კლასიფიცირებული ინფორმაციის დაცვის ტექნიკურ და ორგანიზაციულ ღონისძიებათა უზრუნველსაყოფად და განახორციელოს მათი შესრულების კონტროლი.

3. სსიპ „სახელისუფლებო სპეციალური კავშირებისა და ინფორმაციის სააგენტოს“მიერ შერჩეული ტექნიკური საშუალებებით ნატოს კლასიფიცირებული ინფორმაციის დაცვის თაობაზე გადაწყვეტილებას იღებს საქართველოს პრეზიდენტის თანაშემწე ეროვნული უშიშროების საკითხებში – ეროვნული უშიშროების საბჭოს მდივანი.

4. ყველა შესაბამისი ორგანო, ორგანიზაცია და დაწესებულება, რომელიც ფლობს ან შეხება აქვს ნატოს კლასიფიცირებულ ინფორმაციასთან, ვალდებულია ინფორმაციის დაცვისათვის გამოიყენოს სსიპ „სახელისუფლებო სპეციალური კავშირებისა და ინფორმაციის სააგენტოს“მიერ შერჩეული და ატესტირებული ტექნიკური საშუალებები.

5. საქართველოს საგარეო საქმეთა სამინისტრომ (ს. ზურაბიშვილი) დადგენილი წესით უზრუნველყოს ჩრდილოატლანტიკური ხელშეკრულების ორგანიზაციის (ნატო) შესაბამისი სამსახურის ინფორმირება ამ ბრძანებულების მიღების თაობაზე.

6. ბრძანებულების შესრულების კონტროლი განახორციელოს საქართველოს ეროვნული უშიშროების საბჭოს აპარატმა  (გ. ბეჟუაშვილი).

მ. სააკაშვილი