საჯარო სამართლის იურიდიული პირის – მირზა-ფათალი ახუნდოვის აზერბაიჯანული კულტურის მუზეუმის შექმნის შესახებ

საქართველოს პრეზიდენტის

ბრძანებულება №49

2007 წლის 18 იანვარი

ქ. თბილისი

საჯარო სამართლის იურიდიული პირის – მირზა-ფათალი ახუნდოვის აზერბაიჯანული კულტურის მუზეუმის შექმნის შესახებ

1. აზერბაიჯანული კულტურის ცენტრის სამართლებრივი სტატუსის განსაზღვრის მიზნით, „საჯარო სამართლის იურიდიული პირის შესახებ“ საქართველოს კანონის მე-5 მუხლის მე-2 პუნქტის „ბ“ ქვეპუნქტის შესაბამისად, ნარიმან ნარიმანოვისა და მამედ ყული ზადეს სახლ-მუზეუმების ექსპონატებისა და აზერბაიჯანული კულტურის ცენტრის ბაზაზე შეიქმნას საჯარო სამართლის იურიდიული პირი – მირზა-ფათალი ახუნდოვის აზერბაიჯანული კულტურის მუზეუმი (შემდეგში – მუზეუმი).

2. საქართველოს კულტურის, ძეგლთა დაცვისა და სპორტის სამინისტრომ (გ. გაბაშვილი) განახორციელოს მუზეუმის სახელმწიფო კონტროლი და უზრუნველყოს მუზეუმის დებულების დამტკიცება და წარმომადგენლობაზე უფლებამოსილი პირის დანიშვნა.

3. საქართველოს ეკონომიკური განვითარების სამინისტრომ (გ. არველაძე) უზრუნველყოს მუზეუმისათვის შესაბამისი ქონების კანონმდებლობით დადგენილი წესით გადაცემა.

4. ბრძანებულება ამოქმედდეს გამოქვეყნებისთანავე.

მ. სააკაშვილი